SINTTA HUUPHE YOHUWAA: Tuggay Keehi Daridoy Aybissee? I Xayanay Awudee?
Suure Gidida Daro Asay Hayqqiis!
Noꞌelo giyo issi guutta naꞌiyaa asa dosiyaanne keehi siiqiya naꞌa. Issi galla omarssi emeren kaaꞌaydda so asay haattaa wadhiyo sohuwan kunddaasu. Iyyo oyddu laytta kumanau naaꞌꞌu saamintta xallay attiishin haattan muukettada hayqqaasu.
SHarlet, Daaniyel, Oliviya, Jozefin . . . Hageeti, Tisaase 14, 2012n, Amarkkan Konektikat giyoosan deꞌiya issi timirtte keettan tokkosidi worido 26 asatu giddon, layttay usuppuna woy laappuna gidido 20 naatuppe amaridaageeta. Baliyan, Amarkkaa Pirezddanttee Obaami he naatu sunttaa ubbaa xeesidi, azzaniya asau hagaadan giis: “Hagaa mala iitabay attana bessees.”
Layttay 18 gidido Baana, 1996n bantta soo asaara Iraqeppe Norwey baasu. I laggeti o San Reys [awaa xalqqee] gi xeegoosona. SHin otoruwan, “Taani hegaappe daro asaa worabeenna gishshau, . . . mooraas” yaagida issi bitanee, Isiine 22, 2011n worido 77 asatuppe issinniyaa Baano gidiyoogee azzanttiyaaba.
Keehi daganttiya hegaa malabay alame yuushuwan polettiyoogee darotoo odettees. Qoppennan gakkiyaabaa, danobaa, olaa, shabbirssaa, meretay gattiyo daafabaanne harabaa gaasuwan asay azzaniyoogaanne seelettiyoogaa qoppa. Suure gidida daro asay darotoo gaasoy baynnan hayqqees woy tuggatees!
Issi issi asay Medhidaagee asau qoppenna gi qoppidi, Xoossaa moorancha gees. Harati Xoossay nu tuggaa beꞌiyaaba gidikkokka, i kelttiyaa gelanau koyenna goosona. Harati qassi hegaa mala metoy he aawu qaada goosona. Hegaa xeelliyaagan asay darobaa gees. Nuuni ammanttiyaanne aliya zaaruwaa auppe demmana danddayiyoo? Tuggau gaasoy aybakko, qassi tuggay waani xayanaakko, zaaruwaa Xoossaa Qaalaa, Geeshsha Maxaafaappe kaalliya huuphe yohotun beꞌana.