2. Nuuni Tuggatanaadan Oottiyay Nunee?

Hegaa Erana Koshshiyo Gaasuwaa

Zaaroy ee giyaagaa gidikko, tuggay darennaadan nuuni oottana danddayoos.

Tuggatanaadan oottiya kaallidi deꞌiyaabatun asay ay keena oyshettii?

Qohuwaa.

Alamiyaa Payyatettaa Dirijjitee yootiyoogaadan issi wode naatettan 4⁠ppe 1 kushe gidiya gasttati asatettan qohettidosona; qassi 3⁠ppe 1 kushe gidiya macca asay issi wode bantta deꞌuwan asatettan woy mattuman qohettidosona.
Kayyuwaa.

Alamiyaa Payyatettaa Dirijjitee 2018n attamissido issi xuufee yootiyoogaadan, “Kumetta alamiyan 2016n, 477,000 gidiya asaa asay woriis.” Hegaa bollikka he layttan 180,000 asay olaaninne ooshshaa gaasuwan hayqqidoogee odettiis.
Sahuwaa.

Naashinal Jograafik giyo maxeetiyan, Firan Simiz geetettiya xaafiya hagaadan gaasu: “Issi biilooniyaappe dariya asay hayqqanaadan oottiya ichchashu waanna gaasoy sijaaraa cuwayiyoogaanne tambbuwaa sarbbiyoogaa: wozanaa harggiyaa, suuttay bollan meqqiyoogaa, shemppiyoogaara gayttida sahuwaa, wolqqaama suuttaa xaphuwaa harggiyaanne goofiniyaa harggiyaa.”
Asay Ubbaa Asaa Issi Ayfiyan Xeellennaagaa.

Jay Watis giyo issi eranchchiyaa hagaadan gaasu: “Hiyyeesatettay, asay ubbaa asaa issi ayfiyan xeellennaagee, zariyan shaakkiyoogee, mattuman shaakkiyoogee, betiyoogeenne issi wogaa haraagaappe xoqqu oottidi xeelliyoogee gujji gujji biidoogee asay unꞌꞌetanaadan oottennan aggenna.”

GUJJADA ERA

Xoossay Saꞌaa Medhdhidoy Aybissee? giyo biiduwaa jw.org/wal saytiyaappe beꞌa.

Ha wodiyan alamiyan tuggatanaadan oottiyaabaappe dariya baggawu gaasoy asa.

Huqqunnidi haariyaageeti asay banttawu oottanaadan yootiyoogan deꞌoy asaa metanaadan oottiyo gishshawu tuggaappe dariya baggawu gaasoy eta.

“Issi asi bau de7iya haariyo maataa hara asa qohanau [goꞌettees.]”—ERANCHCHAA 8:9.

Tuggay darennaadan oottana danddayoos.

Geeshsha Maxaafay yootiyo maaray payya gidanaadaaninne haratuura sarotettan deꞌanaadan oottees.

“Woppu giida wozanai bollaa payya wottees; shin qanaatee bollau ajaajje harggiyaa mala.”—LEEMISO 14:30.

“Ixo hanotettaa, yiilluwaa, hanqquwaa, waasuwaanne cashshaa ubbaa iitatetta ubbaara intteppe xaissite.”—EFISOONA 4:31.