Dendduwaa​—Hayqqida Asaa Hidootaa

Hayqqida asay denddanaagaa Geeshsha Maxaafay yootiyoobaa ammanay? Hayqqida nu siiqotuura zaarettidi gayttanau hidootiyoogee keehi ufayssiyaaba. SHin he hidootay ammanana danddayiyoobee? He oyshaa zaaruwaa eranau nuuni Yesuus Kiristtoosi kiittidoogeetu oottidobaa qoppana koshshees.

Yesuusi kiittidoogeeti hayqqida asay denddanaagaa mintti ammanidosona. Aybissi? Hegau guuxxiis giishin naaꞌꞌu gaasoy deꞌees. Koyruwan, Yesuusi bari huuphe hayquwaappe denddidoogaa eti geeshshidi ammanidosona. Yesuusi kiittidoogeetinne “ichchashu xeetaappe dariya” ishati i hayquwaappe denddidoogaa beꞌidosona. (1 Qoronttoosa 15:6) Qassi Wonggeliyaa yootiya oyddu maxaafatunkka a dendduwaabay qonccido gishshau, hegee ooninne siriyooba gidenna.—Maatiyoosa 27:62–28:20; Marqqoosa 16:1-8; Luqaasa 24:1-53; Yohaannisa 20:1–21:25.

Naaꞌꞌanttuwan, Yesuusi guuxxiis giishin heezzu asata—koyro Naynen, kaallidi Qifirinaahooman, wurssettan Biitaaniyan—hayquwaappe denttishin kiitettidaageeti beꞌidosona. (Luqaasa 7:11-17; 8:49-56; Yohaannisa 11:1-44) Qommon qonccida dendduwaappe wurssettaagee, Yesuusi keehi siiqiyo so asaara gayttidaba. Ane hanettidabaa beꞌoos.

‘TAANI DENDDO’

“Ne ishai haiquwaappe denddana.” Yesuusi hegaa yootidoy, Marttissa; i ishay Alꞌꞌaazari hayqqoosappe he wode oyddu gallassay aadhiis. Martta koyro Yesuusi woygana koyidaakko akeekabeykku. “[I] haiquwaappe denddanaagaa taani erais” yaagaasu; shin hegee sinttappe gidana gaada qoppaasu. Yesuusi, “Taani denddonne de7o” yaagidoogaa Martta siya simmada, Yesuusi i ishaa hayquwaappe denttiyoogaa beꞌaasu; a he wode ay keena ufayttidaakko qoppa!—Yohaannisa 11:23-25.

Alꞌꞌaazari hayqqidi oyddu gallassaa awan takkidee? Alꞌꞌaazari he oyddu gallassatun harasaa biidi yan deꞌidoogaa yootibeenna. Alꞌꞌaazarappe kiyidi saluwaa biida shemppoy baawa. Yesuusi Alꞌꞌaazara denttido wode, saluwan Xoossaa matan ufayttiyoosaappe i duge saꞌaa wodhanaadan oottibeenna. Yaatin, Alꞌꞌaazari he oyddu gallassaa awan takkidee? I duufo giddon leemiso hanotan xiskkidi takkiis.—Eranchchaa 9:5, 10.

Yesuusi hayquwaa xiskkuwaara geeddarssidoogaa hassaya. “‘Nu dabboi Al77aazari xiskkiis; shin xiskkuwaappe a denttanau taani bais’ yaagiis. Erissiyo ashkkarati zaaridi, ‘Godau, i xiskkidabaa gidikko, denddana’ yaagidosona. Al77aazari haiqqidoogaa Yesuusi odiis; shin Al77aazari xiskkidi zin77idoogaa odiis giidi, eti qoppidosona. Hegaa gishshau, Yesuusi geeshshidi eta, ‘Al77aazari haiqqiis’ . . . yaagiis.” (Yohaannisa 11:11-14) Yesuusi Alꞌꞌaazara hayquwaappe denttidi, paxa deꞌanaadaaninne ba soo asaara zaarettidi gayttanaadan oottiis. Yesuusi he soo asaa keehi ufayssiyaabaa oottiis!

Yesuusi saꞌan deꞌiyo wode asaa hayquwaappe denttiyoogan, i Xoossaa Kawotettaa Kawo gidiyo gishshau, sinttappe ay oottanaakko xeeraa bessiis.a Saluwan deꞌiya Yesuusi, saꞌaa haariyo wode, duufuwan deꞌiya xiskkida asaa naata denttana. I, ‘Taani denddo’ yaagidoy hegaassa. Neeni siiqiyo hayqqida asati denddiyo wode ay keena ufayttanaakko qoppa! Hayquwaappe denddiya asatikka ay keena ufayttanaakko qoppa!—Luqaasa 8:56.

MERINAA DEꞌUWAA DEMMANAU AMMANIYOOGAA

Yesuusi Marttiyyo, “Tana ammaniya urai harai atto, haiqqikkokka paxa de7ana. Qassi paxa de7iya urainne tana ammaniya urai ubbai mulekka haiqqenna” yaagiis. (Yohaannisa 11:25, 26) Yesuusi ba shaꞌu layttaa haaruwaa wode hayquwaappe denttiyo asati, wozanappe a ammaniyaaba gidikko, merinau deꞌana danddayoosona.

Yesuusi dendduwaa xeelliyaagan hegaadan maalaalissiyaabaa yooti simmidi, Martta loytta qoppanaadan oottiya oyshaa oychiis: “‘Hegaa neeni ammanai?’ yaagiis. Martta zaarada, ‘Godau, ee taani ammanais; neeni Xoossaa Na7aa’ . . . yaagaasu.” (Yohaannisa 11:26, 27) Neeni shin, asay hayquwaappe denddanaagaa Marttiigaadan ammanana koyay? Xoossay asaa naatuyyo halchidobaa koyro erana koshshees. (Yohaannisa 17:3; 1 Ximootiyoosa 2:4) He eray ammananaadan oottees. Hegaa xeelliyaagan Geeshsha Maxaafay yootiyoobaa nena bessana mala Yihoowa Markkata ayssi oychikkii? Maalaalissiya dendduwaa hidootaabaa eti neeyyo ufayssan yootana.