Bonchettida Kawuwaa Kiristtoosa Sabbite!

1, 2. Mazamure 45n odettidabaa nuuni erana koshshiyoy aybissee?

BONCHETTIDA kawoy tumatettaa gishshaunne xillotettaa gishshau piriixees; qassi ba morkketa xoonanau adaraasees. I ba morkketa muleera xooni simmidi, issi loꞌꞌiya machiyo ekkana. Kawoy yiya yeleta ubban hassayettananne sabettana. Mazamure 45 waanna qofay hegaa.

² Gidikkokka, Mazamure 45n odettidabay wurssettay loꞌꞌo gidido ufayssiya taarikeppe aaruwan maaddiyaaba. Hegan odettidabay nunakka goꞌꞌiyaaba. Hegee nuna ha wodiyaankka sinttappekka goꞌꞌiyaaba. Yaatiyo gishshau, ane ha mazamuriyaa akeekan loytti pilggoos.

“TA WOZANAI LO77O QOFAA PULTTEES”

3, 4. (a) Nuna qofissiya ‘loꞌꞌobay’ aybee, qassi hegee nu wozanaa waatidi denttettana danddayii? (b) Nuuni ‘kawuwaabaa yexxiyoy’ ayba ogiyaanee, qassi nu inxxarssay xaafiya asa biiriyaa mala gidiyoy aybiinee?

³ Mazamure 45:1 nabbaba. Mazamuraawiyaa wozanaa denttettidi loꞌꞌo qofaa ‘pulttanaadan’ oottida ‘loꞌꞌobay’ kawuwaabaa. Ha hanotay mazamuraawiyaa wozanay ufayssan poocu gaanaadaaninne a inxxarssay “lo77o xaafiya asa biiriyaa mala” gidanaadan oottiis.

⁴ Nubaashin woygana danddayettii? Mase Kawotettaabaa mishiraachoy nu wozanaa denttettiya loꞌꞌoba. Kawotettaa mishiraachoy 1914n ‘loꞌꞌoba’ woykko ufayssiyaaba gidiis. He wodeppe doommidi odettiya mishiraachoy sinttappe yaana Kawotettaabaa gidennan, haꞌꞌi saluwan haariiddi deꞌiya kawotettaabaa. Hegee “asa ubbau markka gidana mala” nuuni “sa7a ubban” sabbakiyo ‘Kawotettaa wonggeliyaa mishiraachuwaa.’ (Maa. 24:14) Kawotettaa mishiraachoy nu wozanaa denttettii? Kawotettaabaa mishiraachuwaa mishettidi sabbakiyoo? Mazamuraawiyaagaadan nuunikka nu Kawuwaa Yesuus Kiristtoosabaa ‘yexxoos.’ I Mase Kawotettan saluwan araatan uttida Kawo gidiyoogaa awaajjoos. Hegaa bollikka, deriyaa haariyaageetinne haarettiyaageeti ubbay au haarettanaadan shoobboos. (Maz. 2:1, 2, 4, 12) Nu inxxarssay “lo77o xaafiya asa biiriyaa mala” gidin, sabbakiyo wode Xoossaa Qaalaa loyttidi goꞌettoos.

KAWUWAA DOONAAPPE KEHA “HAASAYAI” KIYEES

5. (a) Yesuusi “malanchcha” gididoy ayba ogetuunee? (b) Kawuwaa doonaappe keha “haasayai” kiyidoy aybiinee, qassi nuuni a leemisuwaa waatidi kaallana danddayiyoo?

⁵ Mazamure 45:2 nabbaba. Geeshsha Maxaafay Yesuusa meraabaa yootenna. Polo asa gidiyo gishshau, i “malanchcha” gidiyoogee qoncce. Gidoppe attin, i keehippe malancha gidiyoy Yihoowayyo ammanettidaagaa giyoogaananne suure gididi deꞌiyoogaana. Hegaa bollikka, Yesuusi Kawotettaa mishiraachuwaa keha qaalan yootiis. (Luq. 4:22; Yoh. 7:46) Nuuni sabbakiyo wode a leemisuwaa kaallidi asaa wozanaa denttettiya qaalaa goꞌettanau baaxetiyoo?—Qol. 4:6.

6. Xoossay Yesuusa waatidi ‘merinau’ anjjidee?

⁶ Yesuusi wozanappe Xoossau aqido gishshau, Yihooway i saꞌan haggaaziyo wode anjjiis; qassi yarshsho gididi hayqqi simmin a woytiis. Kiitettida PHauloosi hagaadan giidi xaafiis: “[Yesuusi] bana kaushshiis; haiquwau, ubba harai atto, masqqaliyaa bolla haiquwaukka azazettiis. Hegaa gishshau, Xoossai a keehi Xoqqu xoqqu oottiis; qassi suntta ubbaappekka aadhdhiya xoqqa sunttaa ayyo immiis. Hegaa gishshau, saluwaaninne sa7an sa7aappe garssan de7iya ubbai Yesuusa sunttaa bonchchanau gulbbatana. Qassi asai ubbai Yesuus Kiristtoosa Goda yaagidi, Xoossaa Aawaa bonchchuwau markkattana.” (Pili. 2:8-11) Yihooway Yesuusau hayqqenna deꞌuwaa immidi a hayquwaappe denttiyoogan ‘merinau’ anjjiis.—Roo. 6:9.

XOOSSAY KAWUWAA A ‘LAGGETUPPE’ GITAYIIS

7. Xoossay Yesuusa a ‘laggetuppe’ gitayidi tiyidoy ayba ogetuunee?

⁷ Mazamure 45:6, 7 nabbaba. Yesuusi xillotettaa keehippe siiqiyo gishshaunne ba Aawaa Yihoowa bonchissennabaa aybanne ixxiyo gishshau, Yihooway i Mase Kawotettaa Kawo gidanaadan tiyiis. Xoossay Yesuusa a “laggetuppekka,” hegeetikka Daawita zare gidida Yihuuda kawotuppe aattidi, “ufaissaa zaitiyaa” tiyiis. Waanidi hegaadan hanidee? Koyruwan, Yesuusa tiyiday Yihoowa. Qassi, Yihooway a Kawonne Qeese Ubbatu Halaqa oottidi tiyiis. (Maz. 2:2; Ibr. 5:5, 6) Hegaa bollikka, Yihooway Yesuusa tiyidoy zaytiyaana gidennan geeshsha ayyaanaana; qassi i saꞌan uttidi gidennan saluwan uttidi haarana.

8. Yesuusa ‘kawotaa araatay Xoossaa’ gaana danddayiyoy aybiinee, qassi i xillotettan haariyoogaa nuuni ammanettana danddayiyoy aybissee?

⁸ Yihooway saluwan 1914n ba Mase Kawotettaa Kawo oottidi ba Naꞌaa sunttiis. ‘A kawotaa xamꞌꞌay suuretettaa xamꞌꞌaa’; yaatiyo gishshau, a haaroy xillotettay kumidoogaanne asa asappe shaakkennaagaa gidiyoogee qoncce. ‘A kawotaa araatay Xoossaa’ gidiyo gishshau, i haariyoogee bessiyaaba. Hegaa giyoogee kawotettaa essidaagee Yihoowa giyoogaa. Hegaa bollikka, Yesuusa “kawotaa araatai meri merinau de7ees.” Xoossay sunttido hegaa mala wolqqaama Kawuwaa kaaletuwan Yihoowayyo oottiyoogan ceeqettekketii?

KAWOY ‘BA BISUWAA GIXXIIS’

9, 10. (a) Kiristtoosi ba bisuwaa gixxidoy awudee, qassi hegaa sohuwaara waatidi goꞌettidee? (b) Yesuusi sinttappe ba bisuwaa waatidi goꞌettanee?

⁹ Mazamure 45:3 nabbaba. Yihooway Kawoy ‘ba bisuwaa ba xeessan gixxanaadan’ azaziis; yaatiyo gishshau, Yesuusi Yihoowa haaruwaa eqettiya ubbata olanaadaaninne Yihoowa pirddaa eta bolli ehanaadan au maatay imettiis. (Maz. 110:2) Kiristtoosi olan xoonettenna Kawo gidiyo gishshau, “Wolqqaama kawuwau” geetettiis. I ba bisuwaa gixxidoy 1914na; he wode Seexaanaanne daydanttata xoonidi eta duge saꞌau oliis.—Ajj. 12:7-9.

¹⁰ Hegee Kawoy xooniiddi piriixiyoogau doometta. I biron ba ‘xoonuwaa’ polana. (Ajj. 6:2) Yihoowa pirdday ha saꞌan deꞌiya Seexaanaa alamiyaa ubbaa bolli yaana bessees, qassi Seexaanaynne daydanttati qashettana bessees. Koyro, ha alamiyan deꞌiya worddo haymaanootiyaa ubbaa xaaxa waaxa oyqqida Gita Baabiloona xayana. Ha iita “shaaramuxiyo” xayssanaadan Yihooway alamiyaa haariyaageeta goꞌettana. (Ajj. 17:16, 17) Hegaappe simmin, Olancha Kawoy Seexaanaa haaruwaa xayssana. ‘Ciimma ollaa kiitanchaa’ geetettida Kiristtoosi, Seexaanaanne daydanttata cimma ollan yeggidi ba xoonuwaa polana. (Ajj. 9:1, 11; 20:1-3) Ha ufayssiya hanotay Mazamure 45n waanidi kaseti odettidaakko ane beꞌoos.

KAWOY ‘TUMATETTAA GISHSHAU’ PIRIIXEES

11. Kiristtoosi waatidi ‘tumatettaa gishshau’ piriixii?

¹¹ Mazamure 45:4 nabbaba. Olancha Kawoy olettiyoy ba haaruwaa aassanaassanne asaa haaranaassa gidenna. I xillotetta olaa olettiyoy keehi gitabaassa. I “tumatettaa, ashkketettaanne xillotettaa gishshaa” piriixees. Ubbabaa haarana bessiyay Yihoowa gidiyoogaa qonccissiya tumay exatana bessiyo waannaba. Seexaanay Yihoowa bolli makkalido wode, I haarana bessenna giidi eqettiis. He wodeppe doommidi, daydanttatinne asaa naati ha gita tumaa eqettidosona. Yihooway tiyido Kawoy, ubbabaa haariyo maatay Yihoowaagaa gidiyo tumaa merinau qonccissanau piriixiyo wodee haꞌꞌi gakkiis.

12. Kawoy ‘ashkketettaa gishshau’ piriixiyoy ayba ogiyaanee?

¹² Kawoy ‘ashkketettaa gishshaukka’ piriixees. I Xoossaassi mexi issi Naꞌaa; ashkke gidiyoogaaninne ba Aawaa maatau ammanettidi haarettiyoogan keehi loꞌꞌo leemiso gidiyaabaa oottiis. (Isi. 50:4, 5; Yoh. 5:19) Kawuwaayyo ammanettidi haarettiya ubbati a leemisuwaa kaallananne ubbaban Yihoowa maatau ashkketettan haarettana bessees. Yihooway ehanau qaalaa gelido ooratta alamiyan deꞌanaageeti hegaadan oottiyaageetu xalla.—Zak. 14:16, 17.

13. Kiristtoosi ‘xillotettaa gishshau’ waanidi piriixii?

¹³ Kiristtoosi ‘xillotettaa gishshaukka’ piriixees. Kawoy exatiyo xillotettay ‘Xoossaa xillotettaa’; hegee likke woy likke gidennabaa xeelliyaagan Yihooway kessido maaraa. (Roo. 3:21; Zaa. 32:4) Kawuwaa Yesuus Kiristtoosa xeelliyaagan Isiyaasi kasetidi, “Kawoi xillotettan kawotana” yaagiis. (Isi. 32:1) Yesuusa haaroy ‘xilloy deꞌana,’ qaalaa gelido “ooratta saluwaanne ooratta sa7aa” ehaana. (2 PHe. 3:13) He ooratta alamiyan deꞌana ubbay Yihooway kessido maaraadan deꞌana bessees.—Isi. 11:1-5.

KAWOY “MAALAALISSIYAABAA” OOTTEES

14. Yesuusa ushacha kushee waatidi “maalaalissiyaabaa” oottanee? (Ha huuphe yohuwaa doomettan deꞌiya misiliyaa xeella.)

¹⁴ Kawoy piriixiyo wode ba bisuwaa ba xeessan gixxi uttiis. (Maz. 45:3) SHin i ba bisuwaa shoddidi ushacha kushiyan oyqqiyo wodee gakkiis. Mazamuraawee kasetidi, “Ne ushachcha kushee maalaalissiyaabaa besso” yaagiis. (Maz. 45:4) Yesuus Kiristtoosi Armmageedoona olan Yihoowa pirddaa ehaanau piriixiyo wode, ba morkketu bolli “maalaalissiyaabaa” oottana. I Seexaanaa alamiyaa xayssanau ay goꞌettanaakko nuuni erokko. SHin hegee Kawuwau haarettanaadan Xoossay yootidobaa siyennan ixxida, ha saꞌan deꞌiyaageeti yashshaa kokkoranaadan oottana. (Mazamure 2:11, 12 nabbaba.) Yesuusi wurssetta wodiyaa xeelliyaagan yootido hiraagan, “Asai sa7aa bolli yaanabaa ubbaa naagiiddi, yashshan daafurana; aissi giikko, saluwan de7iya wolqqati qaaxxana” yaagiis. Gujjidikka, “Asa Na7ai, wolqqaaranne gita bonchchuwaara shaara giddoora yiishin, eti be7ana” yaagiis.—Luq. 21:26, 27.

15, 16. Olaa wode Kiristtoosa kaalliya “wotaaddarati” oonee?

¹⁵ Kawoy “wolqqaaranne gita bonchchuwaara” yaanaagaa Ajjuutaa maxaafay hagaadan giidi qonccissees: “Saloi dooyettidaagaa taani be7aas. Hegan bootta parai de7ees; he paraa toggidaagaa Ammanettiyaagaanne Tumanchchaa giidi xeegettees. Toggidaagee xillotettan pirddeesinne ba olaakka olettees. Saluwaa wotaaddarati bootta geeshsha liinuwaa giyo kiriyan dadettida maayuwaa maayidi, bootta parata toggidi, a geeduwaa kaalloosona. Asa zareta i dechchana qara bisoi a doonaappe kiyees. Birata dullan asaa i haarana. Ubbaappe Wolqqaama Xoossaa hanqquwaa eessai buulettiyoosan woine aifiyaa i gum77ana.”—Ajj. 19:11, 14, 15.

¹⁶ Olan Kiristtoosa geeduwaa kaallidi, aara issippe olettana saluwaa “wotaaddarati” oonee? Yesuusi koyro ba bisuwaa gixxidi Seexaanaanne daydanttata saluwaappe duge oliyo wode, ‘a kiitanchati’ aara issippe olettidosona. (Ajj. 12:7-9) Armmageedoona olaa wodekka Kiristtoosa wotaaddaratu giddon geeshsha kiitanchati deꞌana giidi qoppiyoogee bessiyaaba. A wotaaddaratu giddon harati deꞌanee? Yesuusi ayyaanan tiyettida ba ishatussi hagaadan giis: “Xoonidaagaayyoonne wurssettai gakkanaassi ta oosuwaa naagidaagaayyo, asa zare ubbaa haarana mala, taani ta Aawaappe ekkido maataa malaa ayyo immana; i eta birata dullan haarananne urqqa miishsha menttiyoogaadan menttana.” (Ajj. 2:26, 27) Yesuusa wotaaddaratu giddon saluwan bantta woytuwaa ekkanau deꞌiya, ayyaanan tiyettida a ishanttikka deꞌoosona. Ayyaanan tiyettida aara haariyaageeti, i kawotettata birata xamꞌꞌan heemmidi “maalaalissiyaabaa” oottiyo wode a miyyiyan eqqana.

KAWOY BA XOONUWAA POLEES

17. (a) Kiristtoosi toggido bootta paray aybau leemisoo? (b) Bisoynne wonddafee shin aybau leemisoo?

¹⁷ Mazamure 45:5 nabbaba. Kawoy bootta paraa toggiis; bootta paray he olay Yihoowa xeelan geeshshanne xillo gidiyoogau leemiso. (Ajj. 6:2; 19:11) I bisuwaa xalla gidennan wonddafiyaakka oyqqiis. Xiqisee hagaadan gees: “Taani issi bootta paraa be7aas. He paraa toggidaagee wonddafiyaa oiqqiis; qassi ayyo akiliilee imettiis. Olaa i xooniiddinne qassikka xoonanau kiyiis.” Bisoynne wonddafee Kiristtoosi ba morkketa xayssanau goꞌettiyoobau leemiso.

18. Kiristtoosa “zubbeti” waanidi “qara” gidanee?

¹⁸ Mazamuraawee Kawuwaa ‘zubbeti qara gidiyoogaa, a morkketu wozana ayfiyaa caddiyoogaanne’ asay ‘a gediyan kunddanaadan oottiyoogaa’ kasetidi yootiis. Hayqqidaageetu ahay saꞌan ubbasan deꞌana. Ermmaasa hiraagay, “GODAI woridoogeetu ahai, biittaa bollan ha gaxaappe hini gaxaa gakkanau laalettana” yaagees. (Erm. 25:33) Hegaa mala hara hiraagay hagaadan gees: “Hegaappe guyyiyan, taani issi kiitanchchai awan eqqidaagaa be7aas. He kiitanchchai saluwan xoqqidi paalliya kafo ubbatuyyo ba qaalaa xoqqu oottidi, ‘Haa yiite. Xoossaa kahuwaayyo issisaa shiiqite. Yiidi kawotu ashuwaa, shaalaqatu ashuwaanne wotaaddaratu ashuwaa miite; paratu ashuwaanne parata toggidaageetu ashuwaakka miite; qassi asa ubbaa ashuwaa ailliyaagaanne goqaagaa, xoqqaagaanne ziqqaagaa miite’ yaagiis.”—Ajj. 19:17, 18.

19. Kiristtoosi waati ‘xoonanee,’ qassi waatidi ba xoonuwaa polanee?

¹⁹ Kiristtoosi ha saꞌan deꞌiya Seexaanaa iita alamiyaa xayssi simmidi ‘ba gitatettan’ ‘xoonana.’ (Maz. 45:4) I Seexaanaanne daydanttata SHaꞌu Layttaa Haaruwaa wode ubban ciimma ollan yeggidi ba xoonuwaa polana. (Ajj. 20:2, 3) Dabloosinne a kiitanchati aybanne oottana danddayenna hanotan deꞌana; saꞌaa bollan deꞌiya asay eta qohuwaappe naxa kiyidi, xooniya bonchettida Kawuwau kumetta hanotan haarettidi deꞌana. Gidoppe attin, eti kumetta biittay wodiyaappe wodiyan gannate gidin beꞌanaappe kase, bantta Kawuwaaranne saluwan aara haariyaageetuura ufayttanaadan oottiya harabay deꞌees. He ufayssiyaabaa kaalliya huuphe yohuwan beꞌana.