Nabbabiyaageetu Oyshaa

Yesuusi hayquwaappe denddiya asay “ekkennanne gelenna” giidi Saaduqaawetussi yootiis. (Luq. 20:34-36) I yootidoy denddidi saꞌan deꞌana asaa xeelliyaagaanee?

Hegee ubba asaa, ubba qassi ba siiqo aqo laggee hayqqido uraa keehi qofissiya oysha. Hegaa mala asati ooratta alamiyan hayquwaappe denddiya bantta aqo laggiyaara zaarettidi issippe deꞌanawu amottana danddayoosona. Machiyaa hayqqido issi ishay hagaadan giis: “Taanikka ta machiyaakka shaahettana giidi qoppi erokko. Nuuni azinanne macho gididi merinawu issippe Yihoowawu goynniiddi deꞌanawu amottida. Taani hegaadan amottiyoogaa haꞌꞌikka aggabeykke.” Hayquwaappe denddiyaageeti aqo oyqqana danddayoosona giidi amottiyoogee bessiyaabee? He oyshaa zaaruwaa nuuni erokko.

Yesuusi dendduwaanne macho ekkiyoogaa xeelliyaagan yootidobay saꞌan deꞌanawu denddiyoogaanne denddiyaageeti ooratta alamiyan aqo oyqqennaagaa bessiyaaba gidennan waayi aggana giidi daro layttawu nu xuufeti yootidosona.a (Maa. 22:29, 30; Mar. 12:24, 25; Luq. 20:34-36) Nuuni issi qofan zozzu gaana xayikkonne, Yesuusi saluwan deꞌanawu denddiyoogaa xeelliyaagan he wode yootidee? Yesuusi yootidobaa ane pilggoos.

Hanotaa ane qoppa. (Luqaasa 20:27-33 nabbaba.) Hayqqida asi denddenna giya Saaduqaaweti dendduwaanne ishaa machiyo ayssiyoogaab xeelliyaagan Yesuusa paaccanawu oychidosona. Yesuusi hagaadan zaariis: “Ha wodiyaa asai machchiyo ekkees; maccaageeti azinaa geloosona. SHin haiquwaappe denddidi, sinttappe yiya wodiyan de7anau bessiya attumaasainne maccaasai ekkennanne gelenna. Aissi giikko, eti kiitanchchatu mala gidiyo gishshau, naa77anttuwaa haiqqanau danddayokkona. Qassi eti haiquwaappe denddido gishshau, Xoossaa naata.”—Luq. 20:34-36.

Yesuusi yootidoy saꞌan deꞌanawu denddiyoogaa xeelliyaagaana gidennan waayi aggana giidi nu xuufeti qonccissidoy aybissee? Hegaadan giidi qoppanaadan oottida naaꞌꞌu gaasoy deꞌees. Koyruwan, Saaduqaaweti saꞌan deꞌanawu denddiyoogaa qoppennan aggokkona, qassi Yesuusi eti qoppidoogaadan zaarennan aggenna giidi qoppida. Naaꞌꞌanttuwan, Yesuusi etawu zaariiddi wurssettan saꞌan deꞌanawu denddana ammanettida asatubaa, hegeetikka Abrahaamabaa Yisaaqabaanne Yaaqoobabaa denttiis.—Luq. 20:37, 38.

Gidoppe attin, Yesuusi qoppidoy saluwan deꞌanawu denddiyoogaa gidanakka danddayees. Nuuni hegaadan qoppanaadan oottana danddayiyaabi aybee? Ane he xiqisiyan deꞌiya naaꞌꞌu qofaa beꞌoos.

‘Hayquwaappe denddidi, deꞌanawu bessiyaageeta.’ Ayyaanan tiyettida ammanettidaageeti “Xoossaa kawotettaayyo bessiyaageeta gididi qoodettana.” (2 Tas. 1:5, 11) Yesuusa wozuwaa baggaara eti bantta deꞌuwan xillo geetettido gishshawu, nagarancha geetetti pirddettidi hayqqokkona. (Roo. 5:1, 18; 8:1) Eti “anjjettidaageetanne geeshshata,” qassi saluwan deꞌanawu hayquwaappe denddana bessiyaageeta geetettidosona. (Ajj. 20:5, 6) Hegaappe dumma ogiyan, saꞌan deꞌanawu denddiyaageetu giddon ‘worddotikka’ deꞌoosona. (Oos. 24:15) Eti hayquwaappe denddana ‘bessiyaageeta’ geetettana danddayiyoonaa?

“Eti . . . naa77anttuwaa haiqqanau danddayokkona.” Yesuusi, “Eti naaꞌꞌantto hayqqokkona” gibeenna. I, “Eti . . . naa77anttuwaa haiqqanau danddayokkona” yaagiis. Hara birshshettati he qofaa “hegaappe simmin hayqoy eta qohenna”; qassi “hegaappe simmin hayquwawu eta bolli ayba wolqqinne baawa” yaagoosona. Saꞌan ammanettidi deꞌida, ayyaanan tiyettidaageeti hayquwaappe denddidi saluwan hayqqenna deꞌuwaa, hegeekka merinawu xayenna deꞌuwaa demmana. (1 Qor. 15:53, 54) Saluwan deꞌanawu denddiyaageetu bolli hegaappe simmin hayquwawu wolqqi baawa.c

Qommoora beꞌidobaappe ay kuuyana danddayiyoo? Macho ekkiyoogaanne dendduwaa xeelliyaagan Yesuusi yootidobay saluwan deꞌanawu denddiyoogaara gayttidaba gidana danddayees. Hegaadaana gidikko, i yootidobaappe saluwan deꞌanawu denddiyaageetubaa darobaa akeekoos: Eti macho ekkokkona; eti hayqqana danddayokkona; qassi eti issi issiban saluwan deꞌiya kiitanchatu mala. SHin hegaadan kuuyiyoogee issi issi oyshaa oychanaadan oottees.

Koyruwan, Saaduqaaweti saꞌan deꞌanawu denddiyoogaa qoppennan aggokkona; yaatin Yesuusi eta oyshaa zaariyo wode saluwan deꞌanawu denddiyoogaabaa ayssi yootii? Yesuusi bana eqettiyaageetussi ubbatoo eti qoppidoogaadan zaaribeenna. Leemisuwawu, malaataa banttana bessanaadan oychida Ayhudatussi i, “Ha Beeta Maqidasiyaa qolite; taani heezzu gallassan zaarettada keexxana” yaagiis. Yesuusi eti he wode beeta maqidasiyaabaa qoppiyoogaa erennan waayi aggana; “shin i haasayiyo Beeta Maqidasee ba asatettaa.” (Yoh. 2:18-21) Dendduwaanne kiitanchati deꞌiyoogaa ammanenna iita Saaduqaawetu oyshaa zaarana koshshenna giidi Yesuusi qoppennan waayi aggana. (Lee. 23:9; Maa. 7:6; Oos. 23:8) I sinttappe saluwan deꞌanawu denddana ashkke gidida ba erissiyo ashkkarati goꞌettanaadan saluwaa dendduwaabaa tumaa qonccissanawu koyennan aggenna.

Naaꞌꞌanttuwan, Yesuusi saꞌan deꞌanawu denddana Abrahaamabaa, Yisaaqabaanne Yaaqoobabaa wurssettan yootidoy aybissee? (Maatiyoosa 22:31, 32 nabbaba.) Yesuusi he asatubaa yootiyo wode, “haiqqidaageetu dendduwaabaa gidikko” yaagidi doommidoogaa akeeka. I hegaadan doommidoogee hara qofaa yootana haniyoogaa bessiyaaba gidana danddayees. Hegaappe simmin, Saaduqaaweti ammanoos giyo Muuse xuufetun deꞌiya qofaappe, Yesuusi lacottiya buuraa matan Yihooway Muusessi yootido qaalaa goꞌettidi, asay saꞌan deꞌanawu denddiyoogee Xoossaa halcho gidiyoogaa yootiis.—Kes. 3:1-6.

Heezzanttuwan, Yesuusi dendduwaabaanne macho ekkiyoogaabaa yootidoy saluwan deꞌanawu denddiyoogaara gayttidaagaana gidikko, saꞌan deꞌanawu denddiyaageeti ekkananne gelana danddayoosona giyoogee? Xoossaa Qaalan he oyshawu qoncce zaaroy odettibeenna. Yesuusi yootidoy saluwan deꞌanawu denddiyoogaabaa gidikko, i yootido qofay ooratta alamiyan deꞌanawu denddiyaageeti ekkiyaakko ekkennaakko woy geliyaakko gelennaakko aynne qonccissenna.

SHin, aqo laggetuppe issoy hayqqiyo wode eti azinanne macho gidiyoogee attiyoogaa Xoossaa Qaalay geeshshidi yootiyoogaa eroos. Hegaa gishshawu, issi uri ba aqo laggee hayqqin hara ura ekkanawu woy gelanawu qoppikko, ba dosidoogaadan oottana danddayees. Hegee asi ba huuphen kuuyiyooba gidiyo gishshawu, issi uri aqo oyqqidi ufayttidi deꞌanawu koyikko a borana koshshenna.—Roo. 7:2, 3; 1 Qor. 7:39.

Ooratta alamiyaa deꞌuwaabaa nuuni darobaa oychana danddayiyoogee qoncce. He oyshatu zaaruwaabaa bessennabaa qoppiyoogaappe, hegaa gakkidi beꞌanawu naagana koshshees. SHin, Yihooway baassi azazettiya asay koyiyoobaanne amottiyoobaa ubbaa palahissidi immanaagaa nuuni ammanettana danddayoos.—Maz. 145:16.