‘Yuurika Diraamay’ Daroti Geeshsha Maxaafaa Tumaa Eranaadan Maaddiis

“YUURIKA!” Ha qaalaa birshshettay “Taani demmaas!” yaagiyoogaa. Amarkkan, Kaliforniyaa giyo sohuwan, 19tta xeetu layttan worqqaa bookkiyoosaa asay zuliyo wode, issi uri worqqaa demmidi hegaadan gees. SHin, CHarles Tez Raasilinne Geeshsha Maxaafaa Tamaare gidida a laggeti hegaappe keehi alꞌꞌo gidida Geeshsha Maxaafaa tumaa demmidosona. Qassi eti hegaa asawu yootanawu wozanappe koyidosona.

Gita kataman deꞌiya miilooniyan qoodettiya asay Geeshsha Maxaafaa Tamaareti giigissido hosppun saate ekkiya “Meretaa Pooto Diraamaa” giyo pilimiyaa 1914n beꞌiis. Geeshsha Maxaafaa qofay deꞌiyo he pilimeenne an deꞌiya garamissiya silimay, loꞌꞌiya misilee, qassi ufayssiya haasayaynne muuziqay meretay merettido wodiyaappe biidi Kiristtoosa SHaꞌu Layttaa Haaruwaa wurssettaa gakkanaassi deꞌiyaabaa bessees.—Ajj. 20:4.a

He wode guutta katamatuuninne gaxariyan deꞌiyaageeti shin? Tumaa eranawu keehi koyiya ooninne siyennan attenna mala, Geeshsha Maxaafaa Tamaareti Naase 1914n “Yuurika Diraamaa” giigissidosona; hegee silimaa aggiigidi “Pooto Diraamaa” zaarettidi giigissido, issisaappe harasaa efaanawu metennaba. He wode dooridi goꞌettanawu heezzu qommoy deꞌees; ubbaykka daro qaalan giigiis: “Yuurika X” giyoogan duuqettida ubba haasayaynne muuziqay deꞌees. “Yuurika Y” giyoogan duuqettida ubba haasayaynne loꞌꞌiya silimay deꞌees. Qassi ‘Yuurika So Asaa Diraamay’ son goꞌettanawu giigido gishshawu haasayaappe doorettidaageetinne mazamureti deꞌoosona. Duuqettidabaa kaassiyoonne pilimiyaa bessiyo hirayso miishshaakka hegawu goꞌettana danddayettees.

Geeshsha Maxaafaa Tamaareti pilimiyaa bessiyo miishshaanne wogga iskkiriiniyaa goꞌettennan, ha pilimiyaa gaxariyan miishsha qanxxissennan asaa bessiyoogan, Kawotettaa mishiraachuwaa kase odettibeenna heeran yootana danddayoosona. Cenggurssa xallan giigida “Yuurika X” giyoogaa gallassikka qammikka asaa sissana danddayettees. Silimaa bessiyo “Yuurika Y” giyoogaa korinttee baynnan harabaa goꞌettidi bessana danddayettees. Pinlandde qaalan giigida Wochiyo Keelay, “Ha misileta awaaninne bessana danddayoos” yaagiis. Hegee tumukka awaaninne bessana danddayiyooba!

Akeekancha gidida Geeshsha Maxaafaa Tamaareti gita tiyaatire keettaa keraa ekkiyoogaappe, timirtte keettaa, pirdda keettaa, baabure xaabiyaanne asay deꞌiyo gita keettaa wuygiyaa mala sohuwaa miishsha qanxxennan goꞌettidosona. Daro sohuwan gootaraa miyyiyan bootta carqqiyaa kaqqidi giigissido “iskkiriiniyan” karen pilimiyaa bessidosona. Anteni Hambuki hagaadan giis: “Goshshanchati ayfiyaa miyo mittaa tokkido sohuwan uttanawu daro mittaa dooridoogaa bolli karen uttidi, asay he pilimiyaa beꞌees.” “Yuurika” bessiya asati bantta miishshaa, maayuwaa, dunkkaaniyaanne qumaa kattiyoobaa paraa gaariyan caanoosona.

“Yuurika” beꞌanawu heeraappe heeran amarida asaappe biidi xeetan qoodettiya asay shiiqees. Amarkkan 150 asay deꞌiyo kataman issi timirtte keettan 400 asay hegaa beꞌanawu shiiqiis. Hara heeran “Yuurika Diraamaa” beꞌiyo sohuwaa gakkanaashin issoti issoti 8 kilo meetiriyaa hemettidosona. Siwidine biittan, SHarlot Alberg giyo michee guutta keettan shiiqida i shooroti duuqettidaagaa siyidi ‘keehi ufayttidosona.’ Awusttiraaliyan alꞌꞌo shuchaa bookkiyo sohuwan keehi haahosan deꞌiya kataman 1,500 gidiya asay issi kutti beꞌiis. Wochiyo Keelay naaꞌꞌantto xekka timirtte keettaaninne kolloojjiyan “profeeseretinne tamaareti misiliyaa beꞌidi, qassi duuqettidabaa siyidi” ufayttidoogaa yootiis. He wode “Yuurika Diraamaa” pilime keettankka asay keehi dosees.

TUMAA ZERETTAA DICHIYOOGAA

‘Yuurika Diraamay’ Geeshsha Maxaafaa Tamaareti citan xinaatiyaa doomissanaadan haasayaa shiishshiyaageeta kiittiyo “Klas Ekisttenshin Work” giyo oosuwawu keehi maaddiis. “Yuurika Diraamaa” woqqu asay beꞌidaakko erettenna. Giigida ‘Diraamatuppe’ daruwaa asay darotoo beꞌiis. SHin, 1915n “Diraamaa” bessiya 86 citatuppe bessidoogaa ubbatoo yootidaageeti 14 xalla. Qooday kumetta gidana xayikkonne, he laytti muleera issi miilooneppe dariya asay “Diraamaa” beꞌidoogee qoncciis. Beꞌidaageetuppe 30,000 gidiya asay Geeshsha Maxaafaa qofay deꞌiyo xuufeta oychiis.

‘Yuurika Diraamay’ daro asay hassayennaba gidikkokka, Awusttiraaliyan Arjjenttiinankka, Tohossa Afirkkan British Ayli giyo haruurotunkka, Hindden Karibiyankka miilooniyan qoodettiyaageeti he dumma “Diraamaa” beꞌennan aggokkona. Etappe daroti worqqaappe keehi alꞌꞌo gidida Geeshsha Maxaafaa tumaa demmido gishshawu, “Yuurika!” gaana danddayoosona.