Deꞌuwan Hanidabaa
Kawotettawu Haggaazaydda Tanni Beꞌido Gitabaa
El Salvadore biittan Senta Ana giyo kataman 1947n Kaatoolike qeeseti Yihoowa Markkatu bollan metuwaa gattanawu malidosona. Ishantti Wochiyo Keelaa xannaꞌishin, dooya deꞌiya misoonaawetu keettaa penggiyaara attuma naati gita shuchaa olidosona. Hegaappe simmin qeeseti kaalettido cora asay yiis. He asaappe issoti issoti xoomppiyaa oyqqidosona; harati qassi misiliyaa oyqqidosona. Eti naaꞌꞌu saatiyawu, keettaa bolli shuchaa oliiddi, “Geelaꞌiyaa merinawu deꞌu!” “Yihooway hayqqo!” yaagidosona. Eti misoonaaweti yayyidi katamaappe kiyanaadan hegaa oottidosona. Taani hegeetuppe issinno gidiyo gishshawunne 67 layttappe kase he shiiquwaa shiiqido gishshawu, hegaa dogikke.a
QOMMOORA beꞌidobay hananaappe naaꞌꞌu layttaa kasetidi, misoonaawe gidada tanaara haggaaziya Evlin Trabertanne taani he wode Niwu Yorken Itaka matan deꞌiya Giiliyaade Geeshsha Maxaafaa Timirtte Keettan oyddantta kayan tamaaridi anjjettida. Nuuni Senta Ana giyo kataman haggaazanaadan maddaabettida. SHin taani 29 gidiya layttawu misoonaawe gidada oottidobaappe amaridabaa odanaappe kase, taani misoonaawe gididoy aybissakko ane yootays.
AYYAANAABAN TAANI LAATTIDOBAA
Taani 1923n yelettiyo wode, ta aaway Joon Olseninne ta aayiyaa Eva Olsena Amarkkan, Washingtenen, Ispoken giyo kataman deꞌoosona. Eti Luterane haymaanootiyaa kaallikkonne, Xoossay siiqo gidiyoogaa ammaniyoogaara maayettennan ixxido gishshawu, woosa keettay tamaarissiyo siꞌooliyaa tamaa timirttiyaa ammanokkona. (1 Yoh. 4:8) Ta aaway daabbuwaanne harabaa uukkiyoosan oottees; aara issippe oottiyaagee issi galla qammi Geeshsha Maxaafay siꞌoolee asay barchetiyoosa giidi tamaarissennaagaa ayyo yootiis. Sohuwaara ta aawaynne ta aayyiyaa Yihoowa Markkatuura xannaꞌiyoogaa doommidi, hayqqida asay sinttappe waananaakko Geeshsha Maxaafay yootiyoobaa tumaa eridosona.
He wode tawu layttay uddufuna; shin ta aawaynne ta aayyiyaa Geeshsha Maxaafaappe tamaarido oorattabaa mishettidi yootishin taani siyidoogaa hassayays. Eti tumu Xoossaa sunttay Yihoowa gidiyoogaa tamaaridi, kirqqi giida Sillaasiyaa Timirttiyaappe naxa kiyido wode, kaseegaappe aaruwan mishettidosona. Taani ‘aylletettaappe kessiya tumatettaa’ tamaariyoogan, he ufayssiya Geeshsha Maxaafaa timirtteta ispponjjiyaadan xunxxiyoogaa doommaas. (Yoh. 8:32) Hegaa gishshawu, Geeshsha Maxaafaa xannaꞌiyoogee tana mule saletti erenna; qassi Xoossaa Qaalaa pilggiyoogan ubbatoo ufayttays. Taani dungguuxa gidikkonne, ta aawaaranne ta aayeera issippe sabbakays. Eti 1934n xammaqettidosona. Taassi layttay 16 gidin, 1939n taanikka etadan xammaqettada Yihoowawu haggaaziyaaro gidaas.
Mizurin Sent, Luwis kataman, 1941n gita shiiquwan ta aawaaranne ta aayeera
Ta aawaynne ta aayyiyaa Isiine 1940n bantta keettaa bayzzin, nuuni heezzaykka Aydaho giyoosan Kur delen giyo kataman kumetta wodiyaa aqinye gididi haggaaziyoogaa doommida. Garssa baggan garaazhee deꞌiyo pooqiyan keettaa keraa ekkidi deꞌida. SHiiquwaakka nu son shiiqoos. He wode Kawotettaa Addaraashay deꞌiyo gubaaꞌeti guutta gidiyo gishshawu, ishantti asa son woy keraa ekkido keettan shiiqoosona.
Ta aaway, ta aayyiyaanne taani 1941n Mizuri giyoosan Sent Luwis kataman gita shiiquwaa shiiqida. Woggaa gallassay “Naatu Gallassa” gidiyo gishshawu, layttay 5ppenne 18ppe gidduwan deꞌiyo naati madirakiyawu sintta baazzan uttidosona. Ishaa Razerfordi ba haasayaa wurssettan nuussi naatussi, “Xoossawunne i sunttido Kawuwawu azazettanawu koyiya naati . . . ubbay . . . hayyanintta denddi eqqite!” yaagiis. Nuuni ubbay denddi eqqida. Yaatin, Ishaa Razerfordi, “Kawotettaabaa markkattiya 15,000ppe dariya oorattata beꞌite!” yaagiis. Ta deꞌo layttan aqinye gidanawu kaseegaappe aaruwan murttanaadan hegee tana maaddiis.
NU SOO ASAWU IMETTIDA OOSUWAA
Sent Luwis kataman gita shiiquwaa shiiqoosappe amarida aginay aadhi simmin, nu soo asay tohossa Kaliforniyan deꞌanawu biis. Yan Okisnard giyo kataman gubaaꞌiyaa essanaadan nuussi oosoy imettiis. Nuuni kaamee goochana danddayiyo, issi algga xallay deꞌiyo keettan deꞌida. Qumaa miyo xarapheezaa bolli taani qammi qammi hiixxada aqays; taassi kase aqiyo kifile deꞌees; shin hagee hegaappe keehi dummatiyaaba!
Nuuni Kaliforniyaa gakkanaappe guuttaa kasetidi, Haway giyo haruuruwan deꞌiya Perl Harber giyoosaa Tisaase 7, 1941n Jaappaane biittay oliis. Kaalliya gallassi Amarkkay Naaꞌꞌantto Alamiyaa Olaa olettiyoogaa doommiis. Sunttati xomppee toꞌanaadan azazido gishshawu, qammi qammi ubba xomppiyaa toyssoos. Haattaappe garssaara biya Jaappaane biittaa markkabeti Kaliforniyaa biittan ano abbaa xanxxaa xomoosiyo gishshawu, xomppee toꞌin ubbasay xumidoogee Jaappaaneti Kaliforniyaa biittaa shocennaadan maaddiis.
Amarida aginaappe guyyiyan, Masqqala 1942n, Ohayo giyoosan Kili(e)vland giyo kataman, Niwu World Tiꞌokiratik Assemblii giyo gita shiiquwaa shiiqida. Yan Ishaa Noori “Sarotettay Ubba Wode Deꞌanee?” giya haasayaa shiishshishin siyida. I Ajjuutaa shemppo 17 qonccissiis; he ajjuutay ‘kase deꞌiyaaba gidikkonne haꞌꞌi baynna, qassi sinttappe ciimma ollaappe kiyana doꞌaabaa’ yootees. (Ajj. 17:8, 11) He ‘doꞌay’ 1939n ba oottiyo oosuwaa aggida Kawotettatu Waattaa Maabaraa gidiyoogaa Ishaa Noori qonccissiis. Geeshsha Maxaafay he Waatta Maabaraa sohuwan haray eqqin, guutta wodiyawu sarotettay deꞌanaagaa kasetidi yootiis. Qassi 1945n hegaadan hanin, Naaꞌꞌantto Alamiyaa Olay eqqiis. Hegaappe simmin, ‘doꞌay’ Kawotettatu Issippetettaa gididi zaarettidi denddiis. He wode, Yihoowa Markkati kumetta saꞌan sabbakiyoogaa yaa gujjin, he wodeppe doommidi keehi dicciis!
Ta Giiliyaade diploomaa
He hiraagay sinttappe hananabaa taani eranaadan maaddiis. Giiliyaade Timirtte Keettay kaalliya layttan doommanaagee odettido wode, misoonaawe gidanawu taani kaseegaappe keehi koyaas. Taani 1943n, Oregan giyoosan Portlande kataman aqinye gidada maddabettaas. He wode asaa penggen Geeshsha Maxaafaa timirttiyaa fonograafiyan sissidi, Xoossaa Kawotettaabaa yootiya xuufiyaa etawu immoos. Taani he laytti ubbatoo misoonaawe haggaazuwaabaa qoppaas.
Taani siiqiyo laggee Evlin Trabertiira 1944n Giliyaaden tamaaranawu shoobettido gishshawu keehi ufayttaas. Nu asttamaareti nuuni Geeshsha Maxaafaa xannaꞌiyoogan waani ufayttanaakko ichashu aginawu bessidosona. Eti bantta huuphiyaa kawushshiyoogee nuna keehi garamissiis. Nuuni qumaa miyo wode, he ishantti issi issitoo qumaa aattoosona. Nuuni Ichashe 22, 1945n anjjettida.
TAANI MISOONAAWE GIDADA OOTTIDOBAA
Evlina, taani, Liꞌo Mahaninne a machiyaa Estera nuuni maddabettido El Salvadore biitti Tamme 1946n biida. Nuuni yan ‘kattay cahaa bessidoogaa’ akeekida. (Yoh. 4:35) Doomettan denttidobay haymaanootiyaa kaalettiyaageeti hanqquwaa suullidoogaa bessees. Hegaappe kasetiya saaminttan, nuuni Senta Ana kataman koyro worada shiiquwaa shiiqida. Dere haasayawu daro asaa shoobbida; qassi 500 gidiya asay shiiquwaa yiido gishshawu keehi ufayttida. Nuuni yayyidi katamaappe kiyiyoogaappe, yan uttidi wozanaa suure asata maaddanawu kaseegaappe aaruwan murttida. Haymaanootiyaa kaalettiyaageeti asay Geeshsha Maxaafaa nabbabennaadan yootidosona; qassi Geeshsha Maxaafaa shammana danddayiyaageeti guutta; gidoppe attin, daroti tumaa eranawu keehi koyoosona. Nuuni tumu Xoossaa Yihoowabaanne i saꞌaa Gannate oottanawu qaalaa gelido ufayssiyaabaa eta tamaarissanawu Isppeene qaalaa eranawu baaxetiyoogaa eti nashshidosona.
Giiliyaaden issippe tamaarida ichashati El Salvadore biida. Haddirssa baggan doommidi ushacha baggi: Evlin Trabert, Mili Brasher, Ester Mahan, tananne Liꞌo Mahan
Rosa Asensiyo giyo maccaasiyaa taani xannaꞌissido koyroogeetuppe issinno. A Geeshsha Maxaafaa xannaꞌiyoogaa doomma simmada, banaara deꞌiya bitaniyaappe shaahettaasu. Hegaappe simmin, i Geeshsha Maxaafaa xannaꞌiyoogaa doommiis. I o ekkiis; guyyeppe eti xammaqettidi, mishettidi haggaaziya Yihoowa Markka gididosona. Senta Anappe koyro aqinye gididay Roso.b
Rosiyyo issi guutta suuqee deꞌees. A baassi koshshiyaabaa Yihooway kunttanaagaa ammanettiyo gishshawu, haggaazanawu kiyiyo wode ba suuqiyaa gorddawusu. A guutta saatiyaappe guyyiyan zaarettada ba suuqiyaa dooyiyo wode, asay shammanawu zulees. A Maatiyoosa 6:33y ba deꞌuwan polettishin beꞌaasu; qassi hayqqana gakkanaashin ammanettada deꞌaasu.
Issi wode, heeran deꞌiya qeesee nuussi usuppun misoonaawetussi keettaa keraa immida bitaniyaakko biidi, nuna sooppe kessana xayikko, anne a machiyo bohanaagaa yootiis. Keettaa keraa immida erettida zalꞌꞌanchay haymaanootiyaa kaalettiyaageetu eeshshaa kasekka ixxiyo gishshawu, qeesee yootidobaa siyibeenna. Woosa keettappe yedettikkonne assi aybinne siyettennaagaa i qeesiyawu yootiis. I nuuni nu koyido keenaa yan deꞌana danddayiyoogaa nuussi yootiis.
BONCHETTIDA BITANEE YIHOOWA MARKKA GIDIIS
1955n keexettida macara biiruwaa
San Salvador giyo waanna kataman issi misoonaawiyaa Baltazer Perla giyo manddiisiyaa machiyo Geeshsha Maxaafaa xannaꞌissawusu. Haymaanootiyaa kaalettiyaageeti oottiyo iitabaa beꞌi simmidi, he wozanaa suure bitanee Xoossaa ammaniyoogaa aggiis. Macara biiruwaa keexxiyo wodee gakkin, Baltazeri he wode tumaa ekkibeennaba gidikkonne, miishsha qanxxissennan he keettaa pilaaniyaa kessanawunne keexxanawu koyiis.
Baltazeri Yihoowa asaara keettaa keexxi simmidi, tumu haymaanootiyaa demmidoogaa ammaniis. I Isiine 22, 1955n xammaqettiis; qassi a maccaasiyaa Pawulina hegaappe simmin sohuwaara xammaqettaasu. Eta naati naaꞌꞌaykka Yihoowawu ammanettidi haggaazoosona. Baltazer Juniyer giyo a naꞌay kumetta saꞌan ubbatoo aakkiiddi deꞌiya sabbakiyo oosuwaa maaddiyoosan Birukiliine Beeteelen 49 layttaa haggaaziis; haꞌꞌi qassi Amarkkaa Macara Konttiyaa yara gididi oottees.c
Nuuni San Salvador giyo kataman gita shiiquwaa shiiqiyoogaa doommiyo wode, Ishaa Perli nuuni gita addaraashaa demmanaadan maaddiis. Koyro nuuni amarida oydiyaa goꞌettoos; shin Yihooway anjjin layttan layttan nu qooday gujji gujjidi bin he addaraashaa kumida, ubba kumidikka palahida! He keehi ufayssiya shiiquwan, taani Geeshsha Maxaafaa xannaꞌissidoogeetuura gayttaas. Taani kase xannaꞌissidoogeeti he shiiquwan xammaqettida, eti xannaꞌissidoogeetuura eretissiyo wode taassi aybi siyettidaakko qoppa!
Ishaa Franzi issi gita shiiquwan misoonaawetussi haasayaa shiishshishin
Issi gita shiiquwan, issi ishay taakko yiidi i paaxana koyiyoobi deꞌiyoogaa yootiis. Taani i oonakko erabeykke; qassi i yootiyoobaa eranawu koyaas. I, “Taani Senta Anan intte bolli shuchaa olida attuma naatuppe issuwaa” yaagiis. I haꞌꞌi tanaara Yihoowawu haggaazees! Ta wozanay ufayssan kumiis. Kumetta wodiyaa haggaazoy issi uri dooriyo ooso ubbaappe aaruwan ufayssiyaaba gidiyoogaa taani mintta ammananaadan he haasayay maaddiis.
Nuuni El Salvadoren koyro shiiqido worada shiiquwaa
DOORIDO UFAYSSIYAABAA
Taani El Salvadoren 29 layttawu misoonaawe gidada haggaazaas; koyro Senta Anan, hegaappe simmin Sonsoneten, guyyeppe Senta Teklan, qassi wurssettan San Salvadoren haggaazaas. Taani daro woossadanne qoppada, misoonaawe gidada oottiyoogaa 1975n aggada Ispokene guyye simmanawu qofaa qachaas. Yihoowawu ammanettida ta aawaynne ta aayyiyaa cimidaageeta taani maaddana koshshees.
Ta aaway 1979n hayqqi simmin, loddan loddan wolqqay hiti hitidi biyo ta aayyiyo xeellaas. A hegaappe simmin hosppun laytta deꞌada hayqqiyo wode, iyyo layttay 94. He metiya wodiyan, taani keehi daafuraas. Unꞌꞌettidoogee ta bollay burzzuzzanaadan oottiis; hegee qassi tana keehi sakkiis. SHin, woosaynne Yihooway ba siiquwan tana kaafidoogee, he metuwan taani genccanaadan maaddiis. Yihooway, “Intte puulummana gakkanaashinkka, . . . taani inttena denttana; taani inttena tookkananne ashshana” yaagidoogaadan tana maaddiis.—Isi. 46:4.
Taani 1990n Washingten giyoosan Omek giyo kataman deꞌanawu baas. Yan Isppeene qaalan haggaaziyoogan maaddiyaabaa oottiyoogaa zaarettadakka akeekaas; qassi taani Geeshsha Maxaafaa xannaꞌissidoogeetuppe amaridaageeti xammaqettidosona. Omeken deꞌiya ta keettaa loytta oyqqanaagee tana metido gishshawu, Hidaare 2007n, taani deꞌiyoosaa matan Washingten giyoosan CHelan giyo kataman pooqiyan deꞌanawu baas. Isppeene qaalaa gubaaꞌee he wodeppe doommidi tana loytti xeellido gishshawu, keehippe galatays. Yan deꞌiya cima Yihoowa Markkiyaa ta xalaala gidiyo gishshawu, ishanttinne michontti tana bantta aayee aayeedan xeelloosona.
Taani ‘xubbiyaabi’ baynnan loytta haggaazana mala, azina gelanawunne naata yelanawu koyabeennaba gidikkokka, ayyaanaaban tawu daro naati deꞌoosona. (1 Qor. 7:34, 35) Ha wodiyan tawu ubbabay deꞌana danddayennaagaa qoppaas. Hegaa qoppada, taani kumetta wozanaappe Yihoowawu oottanawu geppidoogee kaseyana koshshiyaaba gidiyo gishshawu, hegaa kaseyaas. Hara loꞌꞌobaa ubbaa oottana danddayiyo daro wodee ooratta alamiyan deꞌana. Taani dosiyo xiqisee Yihooway “paxa de7iyaageeta ubbaa amuwaa” alanaagaa yootiya, Mazamure 145:16.
Aqinyetettay taani yelaga gididabadan qoppanaadan maaddees
Haꞌꞌi tawu layttay 91 gidikkokka, taani payya gidiyo gishshawu, aqinye gidada haggaazays. Aqinyetettay taani yelaga gididabadan qoppanaadaaninne ufayssiya deꞌo deꞌanaadan maaddees. Taani El Salvadore koyro biido wode, sabbakiyoogaa yan biron doommoos. Seexaanay caddi oyqqidi yedetaa gattikkokka, he biittan deꞌiya aassiyaageetu qooday haꞌꞌi 39,000ppe daro. Hegee ta ammanoy keehi minnanaadan oottiis. Yihoowa asay oottiyoobaa a geeshsha ayyaanay maaddiyoogee erettidaagaa!
a Yihoowa Markkatu Laytta Maxaafaa 1981, sinttaa 45-46n xeella.
b 1981 Laytta Maxaafaa, sinttaa 41-42.
c 1981 Laytta Maxaafaa, sinttaa 66-67, 74-75.