Bantta Dosan Eeno Giidosona​—⁠Raashiyan

RAASHIYAA biittan deꞌiya Yihoowa Markkatu oosoy oosettennaadan daro layttawu diggidoogee attin 1991n higgiyan erettido wode, eti keehi ufayttidosona. Yan deꞌiya Yihoowa Markkatu qooday tammu kushe daridi haꞌꞌi 170,000 heera gidanaagaa he wode daroti waayi qoppana! Kawotettaabaa minnidi sabbakiya hegeetu giddon ayyaanaabaa cahaa oosuwan maaddanawu hara biittappe Raashiyaa biida Yihoowa Markkati deꞌoosona. (Maa. 9:37, 38) Hegeetuppe amaridaageetubaa ane beꞌoos.

BANTTA DOSAN OOTTIYA ISHANTTI GUBAAꞌETI MINNANAADAN MAADDOOSONA

Raashiyaa biittan nu oosoy digettiyoogee attido laytti, Inggilize biittan deꞌiya Maatiwuyyo layttay 28. He laytti shiiqido gita shiiquwan, Awurooppan arshsho baggan deꞌiya gubaaꞌetussi maadoy koshshiyoogee issi haasayan qoncciis. Leemisuwawu, Raashiyan Seynt Piterssiberg kataman deꞌiya issi gubaaꞌiyan gubaaꞌiyawu oottiyay issi ura xalla gidiyoogaanne gubaaꞌe cimi mule baynnaagaa haasayaa haasayiyaagee qonccissiis. Gidikkokka, aassiyaageeti xeetan qoodettiya asaa Geeshsha Maxaafaa xannaꞌissoosona! Maatiwu, “He haasayaappe simmin, taani ubbatoo Raashiyaa biittaabaa qoppaas; yaatiyo gishshawu, taani yaa baanawu koyiyoogaa Yihoowayyo yootaas” yaagiis. I amarida miishshaa dagayiis, darobaa bayzziis, qassi 1992n Raashiyaa biis. Yaatin i waanidee?

Maatiwu, “Metidabaappe issoy he biittaa qaalaa. Taani ayyaanaabaa loytta haasayana danddayabeykke” yaagiis. Metida harabay deꞌiyo keettaa demmiyoogaa. “Sohuwaara kiyanaadan yootin taani issi keettaappe kiyada hara keettaa gelido wodee qoodin wurenna.” Koyro hegaadan metootikkokka, Maatiwu, “Taani Raashiyaa biittaa biidoogaa mala loꞌꞌobaa kuuya erikke” yaagiis. I, “Hagan haggaaziyoogan taani Yihoowan kaseegaappe aaruwan ammanettiyoogaa tamaaraas; qassi i tana kaalettiyoogaa daro ogiyan beꞌaas” yaagidi hegaa qonccissiis. Maatiwu guyyeppe gubaaꞌe cimanne dumma aqinye gidiis; qassi haꞌꞌi Seynt Piterssiberg katamaa matan deꞌiya macara biiruwan haggaazees.

Hiroy 1999n Jaappaane biittan Gubaaꞌiyan Oottiyaageeti Loohiyo Timirtte Keettaappe anjjettiyo wode ayyo layttay 25; qassi a asttamaaretuppe issoy i kare biitti biidi haggaazanaadan minttettiis. Hiroy Raashiyaa biittan aassiyaageeti keehi koshshiyoogaa siyidi, he biittaa qaalaa tamaariyoogaa doommiis. I maaddiya harabaakka oottiis. I, “Taani usuppun aginawu Raashiyaa biitti baas. Balggoy yan caljjo gidiyo gishshawu, taani meeguwaa danddayanaakkonne beꞌanawu Hidaariyan yaa baas” yaagiis. He balggoy aadhi simmin, miishshaa dagayidi guyye Raashiyaa biitti simmidi yan deꞌanawu Jaappaane biidi darobaa haarennan deꞌiis.

Hiroy Raashiyan deꞌiyoogaa doommoosappe haꞌꞌi 12 laytta gidiis; qassi daro gubaaꞌiyan haggaaziis. Issi issitoo 100ppe dariya aassiyaageeti deꞌiyo gubaaꞌiyan gubaaꞌe cimay a xalla. Issi gubaaꞌiyan i saaminttan saaminttan, Haggaazo SHiiquwaappe dariya baggaa, Tiꞌokiraase Haggaazo Timirtte Keettaa, Wochiyo Keelaa Xinaatiyaanne Gubaaꞌe Maxaafaa Xinaatiyaa ichashaa kaalettees. Qassi minttettanawu darota biidi oychees. Hiroy he wodebaa hassayidi, “Ishanttinne michontti ayyaanaaban minnanaadan maaddiyoogee keehi ufayssiyaaba” yaagiis. Aassiyaageeti keehi koshshiyo sohuwaa biidi haggaaziyoogee a waati maaddidee? I, “Taani Raashiyaa yaanaappe kase, cimanne aqinye gidada haggaazaas; shin haa ya simmada Yihoowaara dumma dabbotaa medhidabadan tawu siyettees. Ta deꞌuwan ubbaban kaseegaappe aaruwan Yihoowan ammanettiyoogaa tamaaraas” yaagiis. Hiroy 2005n Svetlano ekki simminkka eti naaꞌꞌay aqinye gididi haggaazoosona.

Kanaada biittan deꞌiya Maatiwu layttay 34; qassi a ishaa Maykilawu layttay 28. Naaꞌꞌaykka Raashiyaa biitti beꞌanawu biidi, tumaa eranawu koyiya daroti shiiquwaa uttiyaaba gidikkokka, kaalettiya ishantti keehi guutta gidiyoogaa beꞌidi garamettidosona. Maatiwu, “Taani beꞌanawu biido gubaaꞌiyan 200 asay shiiqees; shin layttaa keehi sugida issi gubaaꞌe cimaynne gubaaꞌiyawu oottiya issi yelagay shiiqo ubbaa kaalettoosona. Taani hegaa beꞌidoogee he ishantta maaddanawu yaa baanawu koyanaadan oottiis” yaagiis. I, 2002n Raashiyaa biis.

Oyddu layttappe guyyiyan, Maykili Raashiyaa biidi haꞌꞌikka ishantti keehi koshshiyoogaa sohuwaara akeekiis. I gubaaꞌiyawu oottiyaagaa gidiyo gishshawu, hisaabiyaara, xuufiyaaranne haggaazo moottaara gayttidaagan gubaaꞌiyan oottanaadan maddabettiis. I gubaaꞌe xaafee oottiyoobaa oottanaadan, dere haasayaa haasayanaadan, qassi gita shiiquwawu issi issibaa giigissiyoogaaninne Kawotettaa Addaraashaa keexxiyoogan maaddanaadankka shoobettiis. Haꞌꞌikka maaddana koshshiyo darobay gubaaꞌiyan deꞌees. Darobaa oottiyoogee deexxiyaaba gidikkokka, haꞌꞌi gubaaꞌe cima gididi haggaaziya Maykili, “Ishantta maaddiyoogee tana keehi ufayssees. Hegee taani deꞌana danddayiyo aybippenne loꞌꞌo oge!” yaagiis.

Guyyeppe, Maatiwu Marino ekkiis; qassi Maykili Olgo ekkiis. Eti oyddaynne bantta dosan oottiya hara daroti dicci dicci biya gubaaꞌeta ubbatoo maaddoosona.

MISHETTIDI OOTTIYA MICHOTI CAHAA OOSUWAN MAADDOOSONA

Tatiyaniyyo 1994n layttay 16; he wode CHeek Ripublikeppe, Poolanddeppenne Slovaakiyaappe biida usuppun dumma aqinyeti Yukreenen i gubaaꞌiyan haggaaziyoogaa doommidosona. A, “Eti mishettidi haggaaziya, keha, Geeshsha Maxaafaa loytti eriyaanne pashkka aqinye” yaagada etabaa hassayawusu. Eti bantta goꞌꞌaa aggido gishshawu Yihooway eta waati anjjidaakko akeekada, ‘Taani eta mala gidanawu koyays’ gaada qoppaasu.

Tatiyano aqinyetu hanotay minttettin, a timirtte keettay gorddettin shemppiyo wodiyan Yukreeneeninne Belaarusen kase Yihoowa Markki bi erenna gaxariyaa baada haratuura sabbakaasu. A hegan keehi ufayttido gishshawu, Raashiyan uttada loytta haggaazanawu halchaasu. A koyro, kare biittaappe baada yan deꞌiya michiyo oychanawunne aqinye gidada haggaazaydda oottiyo oosuwaa koyanawu guutta wodiyawu yaa baasu. Guyyeppe, a Raashiyan deꞌanawu 2000n baasu. A metootadee?

Tatiyana hagaadan gaasu: “Taani gita keettaa keraa ekkanawu danddayenna gishshawu, haratu son issi kifiliyaa keraa ekkaas. Hegaadan deꞌiyoogee wayssiyaaba. Taani ta biitti simmanawu qoppido wodee deꞌees. SHin taani genccada haggaazikko goꞌettanaagaa akeekanaadan Yihooway ubba wode tana maaddiis.” Tatiyana haꞌꞌi Raashiyan missoonaawe gidada haggaazawusu. A wurssettan, “Taani ta biittaappe kiyada deꞌido laytta ubban daro loꞌꞌobaa tamaaraasinne daro laggeta demmaas. Ubbaappe aaruwan, he layttay ta ammanoy minnanaadan maaddiis” yaagaasu.

Jaappaane biittan deꞌiya Masakiyyo haꞌꞌi layttay 52 heera; a misoonaawe gidada haggaazanawu ba deꞌo layttan koyikkonne, sahoy a hegaa oottana danddayikke gaada qoppanaadan oottiis. SHin sahoy guuttaa decin, a cahaa oosuwan maaddanawu Raashiyaa baanawu qofaa qachaasu. Giiga keettaanne ubbatoo oottiyo oosuwaa demmanawu metootikkonne, a Jaappaane qaalaa tamaarissiyoogaaninne keettaa geeshshiyoogan aqinyetetta oosuwawu maaddiya miishshaa demmawusu. A aggennan haggaazanaadan maaddidabay aybee?

Raashiyan haggaazido 14ppe dariya layttaabaa qoppada Masaka, “Haggaazuwan taani demmiyo ufayssay tana gakkiya ayba metuwaakka doganaadan oottees. Kawotettaabaa aassiyaageeti keehi koshshiyoosan sabbakiyoogee oorattabay darido keehi ufayssiya deꞌuwaa deꞌanaadan oottees” yaagaasu. A gujjada, “Yihooway taayyo miyoobaa, maayiyoobaanne deꞌiyoosaa he layttatun waati giigissidaakko beꞌiyoogee tana maalaalissiyaaba” yaagaasu. Masaka Raashiyan aassiyaageeti keehi koshshiyoosan haggaazidoogaadan, Kirggistaanenkka cahaa oosuwaa oottaasu. Qassi, Inggilize qaalaa, CHayna qaalaanne Wigoor qaalaa goꞌettiya citata maaddaasu. Haꞌꞌi a Seynt Piterssibergen aqinye gidada haggaazawusu.

SO ASAY ISSIPPE MAADDIDI ANJJETTIIS

Miishshay metiyo gishshawu, so asay darotoo injje deꞌuwaa deꞌanawu hara biitti bees. SHin beni wode deꞌida Abrahaameegaadaaninne Saarigaadan issoti issoti ayyaanaabawu hara biitti boosona. (Doo. 12:1-9) Bantta biittaa Yukreeneppe 2003n Raashiyaa biida Mikaꞌilabaanne a machee Ingibaa qoppa. Geeshsha Maxaafaa xannaꞌanawu koyiya asaa eti sohuwaara demmidosona.

Mikaꞌili hagaadan giis: “Nuuni issi wode, Yihoowa Markkati kase sabbaki erenna heeran sabbakida. Issi cimay kariyaa dooyidi, ‘Intte sabaakee?’ yaagidi oychiis. Nuuni ee gin i, ‘Intte issi gallassi ta soo yaanaagaa taani erays. Yesuusi yootidobay polettennan attana danddayenna’ yaagiis. Bitanee yaagidi, Maatiyoosa 24:14n deꞌiya qofaa yootiis.” Mikaꞌili gujjidi hagaadan giis: “Qassi, tumaa eranawu keehi koyiya, Baptistte haymaanootiyaa kaalliya tammaa gidiya ashkke maccaasata hegaa heeran demmida. Eti banttawu deꞌiya Merinawu Deꞌa giya maxaafaa goꞌettidi saaminttan saaminttan Geeshsha Maxaafaa xannaꞌoosona. Eta oyshaa zaariiddi daro saatiyaa gamꞌꞌida, etaara Kawotettaa mazamuriyaa yexxida, qassi kahuwaa etaara issippe miida. Taani hassayiyo keehi ufayssiyaabaappe issoy he wodiyaa.” Mikaꞌilinne Inga Kawotettaabaa aassiyaageeti keehi koshshiyoosan haggaazidoogee eti Yihoowakko keehi shiiqanaadan, asaa keehi siiqanaadaaninne daro ufayssiya deꞌo deꞌanaadan maaddidoogaa maayoosona. Haꞌꞌi eti woradaa xomoosoosona.

Yukreene biittaa asa gidida, haꞌꞌi etawu layttay 35 heera gidido Yurinne a machiyaa Oksana, haꞌꞌi layttay 13 gidido bantta naꞌaa Aliyksiyera 2007n Raashiyan deꞌiya macara biiruwaa beꞌanawu biidosona. Ay gubaaꞌessinne maddabettibeenna keehi aaho moottaa Raashiyaa biittaa karttan yan beꞌidosona. Oksana, “He karttaa beꞌi simmidi, sabbakiyaageeti keehi koshshiyoogaa awudeegaappenne aaruwan akeekida. Hegee nuuni Raashiyaa baanawu qofaa qachanaadan maaddiis” yaagaasu. Eta maaddida harabay aybee? Yuri, “Nu xuufiyan kiyida ‘Kare Biittan Haggaazana Danddayay?’ giyaagaa mala qofaa nabbabidoogee maaddiis.a Macara biiroy nuuni baanaadan yootido sohuwan keettaanne oosuwaa koyanawu biida” yaagiis. Eti 2008n Raashiyaa biidosona.

Koyro, oosuwaa demmanawu metootidosona; qassi deꞌiyo keettaa darotoo sohuwaara sohuwaara laammidosona. Yuri hagaadan giis: “Hidootaa qanxxennaadan darotoo woossida; woossidi Yihooway maaddiyoogaa ammanettidi aggennan sabbakida. Nuuni a Kawotettaabaa kaseyiyo wode Yihooway nuna waatidi maaddidaakko beꞌida. He haggaazoy nu so asay minnanaadan oottiis.” (Maa. 6:22, 33) Aassiyaageeti keehi koshshiyo sohuwan haggaazidoogee Aliyksiya waatidi maaddidee? Oksana hagaadan gaasu: “Hegee a keehi maaddiis. I layttay bawu uddufuna gidin, bana Yihoowawu geppidi xammaqettiis. Aassiyaageeti keehi koshshiyoogaa beꞌiyoogee i timirtte keettay gorddettin shemppiyo wode ubban kaafiya aqinye gididi haggaazanaadan denttettiis. I haggaazuwawu mishettiyoogaanne haggaaziyoogaa dosiyoogaa beꞌiyoogee nuna keehi ufayssees.” Yurinne Oksana haꞌꞌi dumma aqinye gididi haggaazoosona.

“TANA ISSIBAA XALLAY ZILꞌꞌEES”

Harasaa biidi kaseegaappe loytti haggaazanawu Yihoowan kumetta wozanaappe ammanettana koshshiyoogaa cahaa oosuwaa oottiyaageeti yootidobay qonccissees. Aassiyaageeti keehi koshshiyoosaa biidi haggaaziyaageeta eti biido heeran metiyaabay gakkiyoogee qoncce; shin Kawotettaabaa siyiyaageetussi mishiraachuwaa yootiyoogan eti keehi ufayttoosona. Kawotettaabaa aassiyaageeti haꞌꞌikka keehi koshshiyo biitti baada cahaa oosuwaa oottiyoogan maaddana danddayay? Neeni yaatanawu qofaa qachikko, aassiyaageeti keehi koshshiyoosaa biidi haggaazanawu kuuyidoogaa xeelliyaagan, “Tana issibaa xallay zilꞌꞌees; hegeekka kasetada hegaa oottabeennaagaa” yaagida Yuraagaadan neeyyo siyettana danddayees.