Xoossaakko SHiiqidoogee Taayyo Loꞌꞌo Gidiis
TAWU layttay uddufuna gidiyo wode taani diccennaagee erettiis. Hegee hanidoy 34u layttappe kase taani Kot Divuwar giyo biittan deꞌiyo wode; ta geesay haꞌꞌikka 1 meetire xalla. Ta hanotay erettido wode, ta aawaynne aayyiyaa taani ta hanotaabaa qoppaydda unꞌꞌettenna mala minnada oottanaadan minttettidosona. Minttettin, muuziyaanne hegaa malabaa bayzziyoosaa nu keettaa penggen giigissada he sohuwaa geeshsha wottays. Hegee daro asay taappe shammanaadan oottiis.
Minnada oottiyoogee ubbabay laamettanaadan oottibeenna. Taani keehi qantta gidiyo gishshawu, suuqiyan bayzziyoosan deꞌiya komadinuwaa geesaa mala wayssennabaykka tana baaxeyees. Ubbabay ta geesaa keenaa taappe aduqqiya asawu giigidaba milatees. Ta hanotan keehi azzanays; shin tawu 14u laytta gidiyo wode hanotay laamettiis.
Issi gallassi, Yihoowa Markka gidida naaꞌꞌu maccaasati taani bayzziyoobaappe shammidosona; qassi hegaappe simmin, tana Geeshsha Maxaafaa xannaꞌissiyoogaa doommidosona. Ta qottaappe keehi aadhiyaabay Yihoowanne a halchuwaa eriyoogaa gidiyoogaa taani sohuwaara akeekaas. Hegee tana keehi maaddiis. Mazamure 73:28 taani keehi dosays. He xiqisiyaa doomettan, “Xoossaa matan de7iyoogee [“Xoossaakko shiiqiyoogee,” NW] taayyo lo77o” yaagees.
Qoppennan, nu soo asay Burkkina Faaso biis; hegee qassi ta deꞌuwan darobay laamettanaadan oottiis. Nuuni Kot Divuwaren deꞌiyo wode, taani bayzziyo sohuwan shooro asay tana ubbatoo beꞌiyo gishshawu meezetiis. SHin nuuni deꞌiyo ooratta heeran deꞌiya asawu taani imatta; qassi daroti ta mala asa beꞌi erokkona. Asay tana xeellidi aggenna. Hegaappe denddidaagan, issi issitoo amarida saaminttawu sooppe kiyikke. Taani Yihoowakko shiiqidoogee tawu ay keena loꞌꞌidaakko guyyeppe hassayaas. Hegaa gishshawu, Yihoowa Markkatu macara biiruwaa dabddaabbiyaa xaafaas; yaatin, Naano giyo misoonaawe michiyaa guutta motoriyaa laagga yaada tana oychaasu.
SHafee dariyo nu heera ogee ubbatoo hallixxees; qassi iray bukkiyo wode urqqatees. Naana tana xannaꞌissanawu yaydda darotoo ba guutta motoriyaappe kunddaasu; shin a mule hidootaa qanxxabeykku. Qassi a tana shiiquwaa efaanawu oychaasu. Yaatanawu sooppe kiyada asay tolidi tana xeelliyoogaa danddayana koshshiyoogaa akeekaas. Hegaa bollikka, taani motoriyan uttiyoogee laagganawu woni metiya motoriyan caanaa yaa gujjees. Gidikkokka, “Taani Ubbaa Haariya GODAA taayyo baqata attiyo soho oottaas” yaagiya, taani dosiyo xiqisiyawu naaꞌꞌantto qofaa akeekada shiiquwaa baanawu eeno gaas.
Taaninne Naana shiiquwaa biiddi issi issitoo urqqan wulloos; shin yaanikkonne shiiquwaa biyoogan keehi ufayttoos. Kawotettaa Addaraashan asay tana siiquwan mokkiyoogee harati tana tolidi xeelliyoogaappe keehi dumma! Taani uddufun aginappe simmin xammaqettaas.
Taani dosiyo xiqisiyawu heezzantto qofay, “A oosuwaa ubbaa taani yootana” yaagees. Aybippenne aaruwan tana wayssanabay haggaazuwaa gidanaagaa eraas. Sooppe soo baada koyro sabbakido gallassaa haꞌꞌikka hassayays. Qeeri naatikka gasttatikka aggennan tana xeellidosona, ta geeduwaa kaallidosona, qassi ta hemetaa qullidosona. Hegee tana keehi qohiis; shin Gannatiyaa deꞌoy taagaadan etawukka keehi koshshiyoogaa ubbatoo hassayays; yaatiyo gishshawu genccaas.
Heezzu goomay deꞌiyo, kushiyan laaggiyo bishkkiliitiyaa demmidoogee tawu hanotay injjetanaadan oottiis. Pudettaa kiyiyo wode, tanaara haggaaziya uri bishkkiliitiyaa sugees; qassi dugettaa wodhishin eesotiyo wode i bishkkiliitiyaa tanaara toggees. Haggaaziyoogee koyro heeran tana wayssikkokka, guyyeppe keehi ufayssiyaaba gidiis; hegaappe denddidaagan, 1998n kumetta wode aqinye gidaas.
Darota Geeshsha Maxaafaa xannaꞌissaas; qassi etappe oyddati xammaqettidosona. Hegaa bollikka, ta michotuppekka issinniyaa tumaa ekkaasu! Harati waanidi minnidaakko eriyoogee koshshiyo wodiyan tana darotoo minttettiis. Issi gallassi shekkeeree tana keehi sakkishin, Kot Divuwareppe issi dabddaabbee tana gakkiis. Burkkina Faason yuniversttiyan tamaariya issi naꞌaa penggen eqqosan Geeshsha Maxaafaa xinaatiyaa doomissaas; yaatada hara ishay a xannaꞌissanaadan immaas. He tamaaree guyyeppe Kot Divuware biis. He naꞌay xammaqettennan aassiyaagaa gididoogaa siyada keehi ufayttaas!
Tawu koshshiyaabaa demmanawu ay oottiyaanaa? Bollay qohettidoogeeta maaddiya issi dirijjitee maayuwaa sikkiyoogaa tana tamaarissiis. Nuna tamaarissiyaageetuppe issinna taani oottiyoobaa beꞌada, “Saamunaa waata medhanaakko nuuni nena tamaarissana bessees” yaagaasu. Eti tana hegaa tamaarissidosona. Yaatin, maayuwaa meecciyo saamunaanne so giddon goꞌettiyo saamunaa son medhays. Asay ta saamunaa dosees; qassi haratikka taappe shammanaadan yootees. Heezzu goomay deꞌiyo guutta motoriyaa toggada, saamunaa koyiya asawu ekkada bays.
Taani quunnanaadan oottida ta zokko meqettay keehi sakkiyo gishshawu, kumetta wode aqinye gidada haggaaziyoogaa 2004n aggaas. Gidikkokka, haꞌꞌikka loytta haggaazays.
Taani moocu giyoogan erettiyoogaa asay yootees. Xoossaakko shiiqidoogee taayyo loꞌꞌo gidido gishshawu, taani ufayttiyoogee bessiyaaba.—Seera Miga yootidoogaa.