Bantta Goꞌꞌaa Aggibayida Hananabaa Yootiyaageeta Milata

BENI wode hananabaa yootiyaageetuura nena issi mala oottiyaabay deꞌii? “Geeshsha Maxaafaa Qaalatu Birshshettaa” giyo kifiliyan, 2013n giigissido Ooratta Alamiyaa Birshshettay hananabaa yootiyaagaa giya qaalaa hagaadan gees: “Xoossay ba halchuwaa asaayyo yootanawu goꞌettiyo asa. Hananabaa yootiyaageeti sinttanaabaa yootiyoogaa xalla gidennan, Yihoowa timirttiyaa, azazuwaanne pirddaa yootiyoogan a gishshaa haasayidosona.” Neeni hiraagaa yootiya ura gidana xayikkonne, Xoossaa Qaalan deꞌiyaabaa awaajjiyoogan Xoossaa gishshaa yootaasa.—Maa. 24:14.

Nu Xoossaa Yihoowabaa haratuyyo yootiyoogeenne i asaa naatuyyo halchidobaa eta tamaarissiyoogee nuuyyo keehi gita maata! Nuuni he oosuwaa ‘bolla saluwan paalliya kiitanchatuura’ issippe oottoos. (Ajj. 14:6) SHin nuuni oottanaadan immettida he gita maataa xoqqu oottidi xeellennaadan paacciyaabay merettana danddayees. He paacetuppe amaridaageeti awugeetee? Hegee daafuraa, hidootaa qanxxiyoogaa, woy issi uri aynne goꞌꞌennabadan bana xeelliyoogaa gidana danddayees. Beni wode deꞌida ammanettida hananabaa yootiyaageeti nu mala asa, shin eti hidootaa qanxxibookkona. Eti banttawu imettida oosuwaa polanaadan Yihooway maaddiis. Hegeetuppe amarida leemisota, qassi eta waati milatana danddayiyaakko ane beꞌoos.

ETI BAAXETIDOSONA

Nuuni galla galla oottiyooban issi issitoo daafurana danddayiyo gishshawu, sabbakiyo oosuwaa oottana danddayennabadan nuuyyo siyettana danddayees. Yesuusinne a erissiyo ashkkarati oottidoogaadan, nuunikka shemppana koshshiyoogee tuma. (Mar. 6:31) SHin Baabiloone biittan deꞌiya Hizqqeelabaanne Yerusalaameppe omoodettidi biida Israaꞌeelatu giddon ayyo imettida oosuwaabaa qoppa. Issi wode Hizqqeeli urqqaappe merettida xuubiyaa ekkidi Yerusalaame katamaa misiliyaa a bolli medhanaadan Xoossay ayyo yootiis. Yaatidi, he guutta katamaa dooddidabadan Hizqqeeli haddirssa miyyiyan 390 gallassaa, qassi ushacha miyyiyan 40 gallassaa zinꞌꞌana bessees. Yihooway Hizqqeelayyo, “He doodettan neeni gam77iyo gallassai wuranaashin, issi miyyiyaappe hara miyyiyau aadhdha wodhdhennaadan, taani nena wodoruwan qachchana” yaagiis. (Hiz. 4:1-8) Hegee omooduwan deꞌiya Israaꞌeelati garamettanaadan oottennan waayi aggana. Hizqqeeli issi layttaappe dariya wodiyawu hegaa mala daafurssiyaabaa aggennan zaari zaari oottana koshshees. Hananabaa yootiyaagee ayyo imettida oosuwaa waati polana danddayii?

Hizqqeeli hananabaa yootiyaagaa gididi ayssi kiitettidaakko akeekiis. Xoossay Hizqqeela kiittido wode, “[Israaꞌeelati] siyin ixxin, hananabaa yootiyaagee eta giddon de7iyoogaa eti erana” yaagidi ayyo yootiis. (Hiz. 2:5) I he aawatettay bawu aybissi imettidaakko ubbatoo qoppiis. Hegaa gishshawu, i Yerusalaame dooddidaba milatidi oottanawu eeno giis. I tumuppe hananabaa yootiyaagaa gidiyoogaa bessiis. Inne aagaadan omoodettidaageeti “Katamai kunddidoogaa” oduwaa siyidosona. Ee, Israaꞌeelati hananabaa yootiyaagee eta giddon deꞌiyoogaa eridosona.—Hiz. 33:21, 33.

Ha wodiyan, nuuni Seexaanaa alamiyaa kumettaa bolli yaana bashshaabaa haratussi yootoos. Nuna daafurssiyaabay deꞌikkokka, Xoossaa qaalaa sabbakanawu, zaarettidi oychanawunne Geeshsha Maxaafaa xannaꞌissanawu nu wolqqaa goꞌettoos. Ha alamiyaa xayuwaabaa qonccissiya hiraagati polettiyo wode, nuuni “Xoossay ba halchuwaa asaayyo yootanawu goꞌettiyo asa” gidiyo gishshawu keehi ufayttana.

HIDOOTAA QANXXANAADAN OOTTIYAABAA GENCCIDOSONA

Yihoowa ayyaanay nuna maaddiyo gishshawu genccidi oottoos; shin nuuni yootiyo mishiraachuwaa asay siyenna gishshawu issi issitoo hidootaa qanxxana danddayoos. Hananabaa yootiya Ermmaasa leemisuwaa hassayiyoogee loꞌꞌo. Xoossaa kiitaa etayyo yootido gishshawu, Israaꞌeelati a qilliiccidosonanne cayidosona. Issi wode, Ermmaasi hagaadan giis: ‘Taani GODAABAA denttada haasayikke woykko, A sunttan naaꞌꞌantto yootikke.’ Ermmaasikka nuuyyo siyettiyaagaadan siyettiyo asa. Gidikkokka, Xoossaa kiitaa aggennan yootiis. Aybissi? Hananabaa yootiyaagee gujjidi hagaadan giis: “GODAA qaalai ta meqettaa giddon qum77ettidi, eexxiya tama mala gididi, ta wozanan michchees. Taani giddon oiqqada ashshana gaada daafuraas; shin teqqanau danddayabeikke.”—Erm. 20:7-9.

Hegaadan, nuuni yootiyo mishiraachuwaa asay siyenna gishshawu nuuni hidootaa qanxxikko, he mishiraachuwaa wotti dentti qoppiyoogan hegaadan qoppiyoogaa aggana danddayoos. Hagee ‘nu meqettaa giddon qumꞌꞌettidi, eexxiya tama mala gidana’ danddayees. Geeshsha Maxaafaa galla galla nabbabiyoogaa meeze oottiyoogee nu giddon he tamay ubbatoo eexxanaadan oottana danddayees.

UFAYSSENNABAA QOPPIYOOGAA AGGIDOSONA

Issi issi Kiristtaaneti banttassi ayssi imettidaakko woy eti waati oottanaakko erenna oosoy etawu imettiyo wode unꞌꞌettana danddayoosona. Hananabaa yootiya Hooseꞌayyo hegaadan siyettennan aggenna. Yihooway Hooseꞌa, “Ba; baada shaaramuxa maccaasiyo neeyyo ekka; ekkada shaaramuxeeppe naata yela” giidi azaziis. (Hoo. 1:2) Neeni macho ekkana hanishin neeyyo bullashettiyaara shaaramuxa gidanaagaa Xoossay yootiyaakko neeyyo aybi siyettanaakko qoppa! Hooseꞌi baayyo imettida aawatettaa ekkiis. I Goomero ba macho oottidi ekkin, a attuma naꞌaa yelaasu. Guyyeppe, issi macca naꞌiyoonne hara attuma naꞌaa yelaasu. Guyyeppe yelettida he naaꞌꞌu naata a hara uraappe yelennan aggukku. Yihooway Hooseꞌayyo a machiyaa ‘ba laggettotu geeduwaa woxxanaagaa’ yootiis. A ba “laggettotu” geeduwaa biidoogaa akeeka. Qassi hegaappe guyyiyan Hooseꞌakko simmanawu malana. Neeni Hooseꞌa gidiyaakko, ne machiyo zaarettada ekkanee? Yihooway Hooseꞌi hegaadan oottanaadan yootiis! Ubba qassi hananabaa yootiyaagee o zaarettidi ekkanawu miishsha qanxxiis.—Hoo. 2:7; 3:1-5.

Hooseꞌi he immettida aawatettaa poliyoogee ay maaddaneeshsha giidi qoppennan aggenna. Gidoppe attin, Hooseꞌi ammanettidi he diraamaa ba deꞌuwan oottidoogee, Israaꞌeelati a kaddido wode Ubbaa Danddayiya Xoossawu siyettidabaa nuuni akeekanaadan maaddees. Qassi wozanay suure gidido issi issi Israaꞌeelati Xoossakko simmidosona.

Ha wodiyan, ‘shaaramuxa maccaasiyo ekkanaadan’ Xoossay ooyyoonne yootenna. SHin Hooseꞌi hegaa mala aawatettaa eeno giidi ekkidoogaappe nuuni ay tamaarana danddayiyoo? Kawotettaa mishiraachuwaa ‘yaaꞌaaninne sooppe soo’ biidi sabbakiyoogee nuuyyo deexxiyaaba gidikkokka, eeno gaana bessiyoogee nuuni tamaariyoobaappe issuwaa. (Oos. 20:21) Issi issi haggaazo qommoti neeyyo deexxana danddayoosona. Yihoowa Markkatuura Geeshsha Maxaafaa xannaꞌiya daroti Geeshsha Maxaafaa xannaꞌikkokka, mishiraachuwaa sabbakanawu eti mule sooppe soo beennaagaa yootoosona. Etappe daroti kase oottana danddayennabadan qoppidobaa guyyeppe oottiyoogaa doommidosona. Hegaappe neeni tamaariyoobay deꞌii?

Hooseꞌi baayyo immettida deexxiya aawatettaa ekkidoogaappe nuuni tamaarana danddayiyo harabaykka deꞌees. I ba macheera gayttidaagan leemiso hanotan oottido diraamaa oottennan aggana danddayiyo daro gaasoy deꞌees. Hooseꞌi he taarikiyaa xaafennaakko ayyo immettida aawatettaabaa hari ooni erana danddayii? Nuuppe attin hari erenna hanotan issi urawu Yihoowabaa yootana danddayiyo qaadaa nuunikka demmana danddayoos. Amarkkan naaꞌꞌantto xekka timirtte keettan tamaariya Ano hegaa malabay gakkiis. I asttamaariyaa tamaareti eti keehi dosiyo issi huuphe yohuwan xuufiyaa xaafanaadaaninne kifiliyan deꞌiya tamaareta ammanttanawu malanaadan yootaasu. Ana markkattanaadan baayyo merettida he hanotaa goꞌettennan aggana danddayawusu. SHin a he hanotaa Xoossay injjeyidobadan qoppaasu. Etayyo siyettiyaabaa qoppada Yihoowa woossaasu; yaatada he hanotaa loyttada goꞌettanawu koyaasu. A “Lodda Laamiyaa: Naqaashaa Akeeka” giya huuphe yohuwan xuufiyaa giigissaasu.

Ana he xuufiyaa tamaaretuyyo qonccissiyo wode, lodda laamiyan ammaniya issi naꞌiyaa Ana balaasu gaada ammanttanawu daro oyshaa oychaasu. Ana ammaniyoobay tuma gidiyoogaa ammanttaasu. I asttamaariyaa maalaalettada keehi ammanttiya xuufiyawu imettiya woytuwaa Aniyyo immaasu. Ana o oychida tamaareera he wodeppe doommada darotoo meretaabaa tobbaasu. Ha ‘oosuwawu’ hanotaa injjeyida Yihoowawu eeno giido gishshawu Ana hagaadan gaasu: “Haꞌꞌi taani mishiraachuwaa yayyennan xalan sabbakays.”

Nuuni hananabaa yootiyaageeta gidana xayikkonne, bantta goꞌꞌaa aggi bayida hananabaa yootiya Hizqqeela, Ermmaasanne Hooseꞌa milatiyoogan, ha wodiyan Yihoowa sheniyaa oottana danddayoos! So asaa goynuwaa woy buzo xinaatiyaa wode, beni wode deꞌida hananabaa yootiya haratubaa nabbaba, qassi eta waata milatana danddayiyaakko wotta dentta qoppa.