‘Aadhida Eratettaa’ Naagay?

Issi gallassi beꞌanawu yiidaagee naꞌaa, “Worqqaa santtimiyaa waagay biraa santtimiyaagaappe naaꞌꞌu kushe dariyoogaa erikkii?” yaagidi oychiis. Guutta naꞌay moocu giiddi, “Erays” yaagiis. Beꞌanawu yiidaagee, “Yaatin biiraa santtimiyaa aybissi ekkay? Neeni worqqaa santtimiyaa ekkiyaakko, naaꞌꞌu kushe dariya miishshay neeyyo deꞌana!” yaagiis. Naꞌay qassi, “Taani worqqaa santtimiyaa ekkikko, asay tanaara he kaassaa kaaꞌenna. Taani ay keesa biiraa santtimiyaa shiishshidaakko eray?” yaagiis. He haysiyan odettida naꞌay gasttati appe goꞌettana danddayiyo aadhida eratettaa bessiis.

Geeshsha Maxaafay, “Aadhdhida eratettaanne adussi qoppiyoogaa naaga. He wode neeni ne ogiyan hirggi bainnan hemettana; ne tohoikka xubettenna” yaagees. (Lee. 3:21, 23) Hegaa gishshawu, “aadhdhida eratettaanne” hegaa oosuwan peeshshiyo ogiyaa eriyoogee hirggennaadan oottees. Hegee nu ‘tohoy’ xubettennaadan naagiyoogan, nuuni ayyaanaaban shuggennaadan maaddees.

AADHIDA ERATETTAY AYBEE?

Aadhida eratettay eraappenne akeekaappe dummatees. Eray deꞌiyo uri tuma gididabaa dagayees. Akeeki deꞌiyo uri tuma gidida issibay haraara waani gayttiyaakko akeekana danddayees. Aadhida eratettay deꞌiyo uri eraanne akeekaa goꞌꞌiya ogiyan oosuwan peeshshana danddayees.

Leemisuwawu, issi uri Tumuppe Geeshsha Maxaafay Tamaarissiyoy Aybee? giyo maxaafaa amarida wodiyan nabbabidi akeekana danddayees. I Geeshsha Maxaafaa xannaꞌiyo wode zaariyoobay likke gidana danddayees. I shiiquwaa shiiqiyoogaa doommananne haray atto loꞌꞌo qofaa yootana danddayees. He ubbabay i ayyaanaaban dicciyoogaa bessiyaaba gidana danddayees; shin hegee i aadhida eratettaa demmiis giyoogee? Waayi gidana. I eesuwan tamaarana danddayiya ura gidana danddayees. SHin, i eraanne akeekaa goꞌettidi tumaa maara oosuwan peeshshiyo wode, aadhida erancha gidees. I loytti qoppidi kuuyidobay loꞌꞌo ayfiyaa demissikko, i aadhida eratettaa bessidoogee qoncci beettees.

Maatiyoosa 7:24-27n, Yesuusi keettaa keexxida naaꞌꞌu asatu leemisuwaa yootiis. He asatuppe issoy “wozannaama” gidiyoogaa i yootiis. Hanana danddayiyaabaa kaseti qoppidi, he bitanee ba keettaa shuchaa bolli keexxiis. I sinttappe hananabaa qoppiisinne bessiyaabaa oottiis. I shafiyaa bolli keettaa hiraysuwan woy eesuwan keexxana danddayays gi qoppibeenna. I ba oottidobay adussa wodiyawu maaddanaagaa qoppiis; hegee aadhida eratetta. Hegaa gishshawu, gotee denddido wode, a keettay aynne hanibeenna. Haꞌꞌi oychana koshshiyaabay, Nuuni he keehi koshshiya aadhida eratettaa waati demmananne naagana danddayiyoo? yaagiyaagaa.

AADHIDA ERATETTAA WAATA DEMMANA DANDDAYIYAANAA?

Koyro, Mikiyaasa 6:9y Xoossaa sunttawu yayyiyoogee aadhida eratetta gidiyoogaa yootiyoogaa akeeka. Yihoowa sunttawu yayyiyoogee a bonchiyoogaa giyoogaa. Hegee a maaraa gujjin, a sunttaa qonccissiya ubbabaa keehi bonchiyoogaa giyoogaa. Issi ura bonchanawu, neeni a qofaa erana koshshees. Yaatiyoogan an ammanettana, appe tamaarananne aagaadan kuuyada loꞌꞌo ayfiyaa demmana danddayaasa. Nuuni oottiyoobay sinttappe Yihoowaara nu dabbotaa minttanaadan qoppikkonne a maaraa kaallidi kuuyikko, aadhida eratettaa demmoos.

Naaꞌꞌanttuwan, Leemiso 18:1y, “SHaahettanau koyiya asi ba amuwaa kaallees; lo77o era ubbaakka phalqqees” yaagees. Nuuni naagettana xayikko, Yihoowappenne a asaappe duuxxana danddayoos. Nuuni shaahettenna mala, Yihoowa sunttawu yayyiyaanne a maaraa bonchiyaageetuura wodiyaa aattana koshshees. Danddayettiyaaba gidikko, gubaaꞌe shiiquwawu issi uri ubbatoo Kawotettaa Addaraashaa baana koshshees. SHiiquwan tamaariyoobay nuna goꞌꞌana mala, loytti qoppananne nu wozanan wottana koshshees.

Hegaa bolli qassi, nu wozanaabaa woosan Yihoowawu yootiyaaba gidikko, nuuni kaseegaappe aaruwan akko shiiqana. (Lee. 3:5, 6) Nuuni Geeshsha Maxaafaanne Yihoowa dirijjitee giigissido xuufiyaa nabbabidi, hegaa wozanappe oosuwan peeshshikko, nuuni oottiyoobay wodeppe kaalettanabaa akeekananne he akeekidoogaadan oottana danddayoos. Nuuni ayyaanaaban kayma ishantti zoriyo zoriyaakka siyana koshshees. (Lee. 19:20) Yaatikko, aadhida eratetta ubbaa ‘phalqqiyoogaappe,’ he keehi koshshiya eeshshay minnanaadan oottoos.

AADHIDA ERATETTAY TA SO ASAA WAATI MAADDANEE?

Aadhida eratettay so asaa naagana danddayees. Leemisuwawu, machiyaa ba azinaa loytta ‘bonchanaadan’ Geeshsha Maxaafay zorees. (Efi. 5:33) Issi azinay bonchettanawu waatana danddayii? I bana bonchanaadan wolqqanttikko, bonchettanay amarida wodiyaassa. Ooyettennaadan, hegaa mala ura machiyaa i deꞌiyo wode a amarida hanotan bonchana danddayawusu. SHin a ba azinay baynna wode a bonchanawu koyanee? Waaya koyana. I adussa wodiyawu bonchissiyaabaa qoppana koshshees. I siiqiiyoogaaninne kehiyoogan ayyaanaa ayfiyaa bessikko, a keettaayiyaa a bonchana. Azinay bonchoy bessiyoogaa gidin aggin, Kiristtaane machiyaa ba azinaa bonchana bessees.—Gal. 5:22, 23.

Geeshsha Maxaafay azinay ba machiyo siiqanaadankka yootees. (Efi. 5:28, 33) Machiyaa bana ba azinay siiqana mala, i erana koshshiyo ufayssennabaa yootennan aggiyoogee loꞌꞌo gaada qoppana danddayawusu. SHin hegee tumuppe aadhida eratettaa bessiyaabee? Guyyeppe, a yootabeennabaa i eriyo wode, aybi hananee? I o kaseegaappe loytti siiqanee? Hegee awu metiyaaba gidana danddayees. SHin, a ufayssennabaa injjetiya wodiyan woppu gaada yootikko, i azinay a tumabaa haasayiyo gishshawu o nashshana danddayees. I hegaappe simmin o kaseegaappe loytti siiqees.

Naati bantta aawatussinne aayetussi azazettana bessees; qassi naata Yihoowa ogiyan seerana bessees. (Efi. 6:1, 4) Hegaa giyoogee yelidaageeti bantta naꞌay oottana bessiyaabaanne bessennabaa xeelliyaagan daro maaraa kessana koshshees giyoogee? He maaraa woy mooriyo wode qaxxayettiyo qixaatiyaa eriyoogaa xallay gidenna. Aadhida erancha uri ba naꞌay ayssi azazettana koshshiyaakko akeekanaadan maaddees.

Leemisuwawu, issi naꞌi bana yelidaageetuppe issuwaa bolli bessennabaa haasayiis giidi qoppoos. Hanqqettidi haasayiyoogee woy yuushshi qoppennan qaxxayiyoogee naꞌay yeellatanaadan woy coꞌꞌu gaanaadan oottana danddayees. Qassi, i uluwan lancciyaa oyqqana danddayees; hegee i ba aawaakkonne ba aayeekko shiiqennaadan oottana danddayees.

Aadhida erancha aawaynne aayyiyaa bantta naata seeriyo ogiyaanne hegee sinttappe bantta naatu bolli kaalettanabaa qoppoosona. Yelidaageeti yiillotido gishshawu eesuwaara haasayana koshshenna. Merinaa deꞌuwaa demmanawu naꞌay ba aawaanne aayyiyo bonchanaadan Yihooway appe koyiyoogaa yelidaageeti geella a xallawu woppu giidi siiquwan yootana danddayoosona. Qassi naꞌay bana yelidaageeta bonchiyo wode, i Yihoowa bonchiyoogaa akeekees. (Efi. 6:2, 3) Hegaadan kehatettan haasayissiyoogee naꞌaa wozanaa denttettana danddayees. I ba aawaynne aayyiyaa bawu wozanappe qoppiyoogaa akeekeesinne eta kaseegaappe aaruwan bonchees. Guyyeppe keehi koshshiyaabay merettiyo wode naꞌay maaduwaa oychanaadan haꞌꞌi hanotay giigiis.

Issi issi aawatinne aayeti bantta naꞌaa lanccissana danddayoos giidi qoppiyo gishshawu seerokkona. SHin naꞌay gitaa gidiyo wode waananee? I Yihoowawu yayyanee, qassi Xoossay kessido maaraa kaalliyoogee eratetta gidiyoogaa akeekanee? I Yihooway tamaarissiyoobaa loytti qoppanawunne ba wozanan wottanawu koyaneeyye, woy qassi ayyaanaabaappe baqatanee?—Lee. 13:1; 29:21.

Misile medhanawu massiya uri ba medhanabaa kasetidi qoppees. I coo salkkin loꞌꞌobay merettees giidi qoppenna. Aadhida erancha aawatinne aayeti Yihoowa sunttawu yayyiyo gishshawu, i kessido maaraa daro saatiyaa bazzidi tamaaroosonanne oosuwan peeshshoosona. Eti Yihoowappenne a dirijjitiyaappe duuxxennan, aadhida eratettaa demmoosonanne bantta so asay ayyaanaaban minnanaadan hegaa goꞌettoosona.

Nuna daro layttawu nu deꞌuwan maaddana woy qohana danddayiyaabaa kuuyiyoobay galla galla merettees. Nuuni yuushshi qoppennan eesuwan kuuyiyoogaappe, takki giidi qoppiyoogee loꞌꞌo. Adussa wodiyawu gakkanabaa yuushsha qoppa. Yihoowa kaaletuwaa koya; qassi appe demmiyo aadhida eratettaa oosuwan peeshsha. Yaatikko aadhida eratettaa naagoos; hegee nuuni deꞌuwaa demmanaadan oottana.—Lee. 3:21, 22.