“Xoossaa Ufaissiis”

HEENOOKI daro wodiyaa deꞌiis. I 365 gidiya layttaa deꞌiis; hegee ha wodiyan deꞌiya asaa keehi adussa bariyaappe oyddu kushe dariyo gishshawu garamettana danddayoos. SHin a layttay he wode deꞌida asaagaara gatti xeelliyo wode daro gidenna. He wode, 5,000 layttappe kase, asay ha wodiyan deꞌiya asaagaappe keehi daro wodiyaa deꞌees. Koyro asa gidida Addaamee Heenooki yelettiyo wode usuppun xeetaappe dariya layttaa deꞌiis; hegaappe simmidikka heezzu xeeta gidiya layttaa deꞌiis! Addaame zaretuppe issoti issoti hegaappekka dariya wodiyaa deꞌidosona. Yaatiyo gishshawu, Heenooki awu layttay 365 gidiyo wode, biron daro layttaa deꞌana mino asa milatana danddayees. SHin, i hegaappe simmidi daro deꞌibeenna.

Heenooka gakkidabay i ba shemppuwawu hirgganaadan oottiyaaba gidennan aggenna. Xoossaappe yiida kiitaa i mata wode yootido asati a bolli yiillotidi hanidobaa qoppidi i baqatiyoogaa qoppa. Eti hanqquwaa suullidi, bantta somꞌꞌuwaa tukkidosona. He asati a keehi ixxidosona. Eti i yootiyo kiitaanne a kiittida Xoossaa karidosona. Eti Heenooka Xoossaa Yihoowa aynne oottana danddayokkona; shin Heenooka qohana danddayoosona! I ba soo asaara zaarettidi gayttana danddayiyaakkonne qoppennan aggenna. I ba macheebaanne ba macca naatubaa woy ba naꞌaa Maatusaalabaanne ba naꞌaa naꞌaa Laameekabaa qoppideeshsha? (Doomettaabaa 5:​21-23, 25) Hegee awu wurssetteeshsha?

Geeshsha Maxaafan Heenooka xeelliyaagan darobay odettibeenna. Geeshsha Maxaafay abaa heezzussa xallan guuttabaa yootees. (Doomettaabaa 5:​21-24; Ibraawe 11:5; Yihudaa 14, 15) SHin he xiqiseti mino ammanoy deꞌiyo ha bitaniyaabaa loytti akeekanawu maaddoosona. So asawu koshshiyaabaa kunttiyay nenee? Issibay likke gidiyoogaa erada hegawu exatanawu metoota eray? Hegaadan gidikko, Heenooka ammanuwaappe darobaa tamaarana danddayaasa.

‘HEENOOKI XOOSSAARA HEMETTII⁠S’

Heenooka wode deꞌiya asay keehi iita. Heenooki Addaameppe doommin laappuntta yeleta. He wode asay Addaameenne Hewaana nagaraa oottanaappe kase deꞌidoogaappe darin dummatenna hanotan asatettan mino gididi deꞌees. Eti adussa wodiyaa deꞌidoy hegaassa. SHin kandduwaabaaninne ayyaanaaban eta hanotay keehi moorettidaagaa. He wode makkalay dariis. He hanotay naaꞌꞌantto yeletan, Qaayeeli ba ishaa Aabeela worido wode doommiis. Qaayeela zaretuppe issoy appekka iitidi makkalancha gidiyoogaaninne haluwaa kiyiyoogan banan ceeqettiya asa gidiis! Heezzantta yeletan hara iitabay haniis. Asay Yihoowa sunttaa goynuwawu gidennan, hadan xeegiyoogaa doommiis. Eti Xoossaa geeshsha sunttaa xeegiyoy kawushshiyoonne boriyo hanotan gidennan aggenna.​—⁠Doomettaabaa 4:​8, 23-26.

Hegaa mala iita haymaanootee oottiyoobay Heenooka wode aakkidaba milatees. Heenooki dicciyo wode, doorana koshshiyaabay deꞌees. I he wode deꞌiya asaa mala gidaneeyye saluwaanne saꞌaa medhida tumu Xoossaa Yihoowa koyanee? Yihoowa ufayssiya ogiyan goynnido gishshawu asi worido Aabeelabaa eranawu Heenooki wozanappe koyennan aggenna. Heenooki Aabeelaagaadan oottanawu qofaa qachiis. Doomettaabaa 5:22y, “Heenooki . . . Xoossaara hemettiiddi de7iis” yaagees. Ha qofay Xoossaappe haakkida alamiyan Xoossaa ufayssiya ogiyan deꞌiday Heenooka xallaa gidiyoogaa bessees. Geeshsha Maxaafay hegaadan yootiyo asatuppe koyroy a.

He xiqisee i Maatusaala yeli simmidikka Yihoowaara ubbatoo hemettidoogaa yootees. Heenooki naꞌa yelidoy awu layttay 65 gidiina. I ba macheeppe “attuma naatanne macca naata” yeliis; a machee sunttaynne eta naatu qooday Geeshsha Maxaafan odettibeenna. Issi aaway naata dichiiddinne so asawu koshshiyaabaa kunttiiddi Xoossaara hemettanawu, ba soo asaa Xoossaa ufayssiya ogiyan ayssana bessees. Heenooki ba macheeyyo ammanettanaadan Yihooway koyiyoogaa akeekiis. (Doomettaabaa 2:24) I ba naata Xoossaa Yihoowabaa tamaarissanawu baaxetidoogee erettidaagaa. Yaatiyoogan demmidobay aybee?

Geeshsha Maxaafay hegaabaa darobaa yootenna. Heenooka naꞌay Maatusaali Geeshsha Maxaafan odettida asatu ubbaappe daro layttaa deꞌiis; i Bashshaa Haattay yiyo wode gakkanawu takkiis; shin a ammanuwaabay aybinne odettibeenna. Maatusaali Laameeka yeliis. Issi xeetaappe dariya layttaa Laameeki ba aawaa aawaa Heenookaara issi wodiyan deꞌiis. Laameeki diccidi mino ammanoy deꞌiyoogaa gidiis. Laameeki ba naꞌaa Nohebaa hananabaa yootanaadan Yihooway denttettin i yootidobay Bashshaa Haattaappe simmin polettiis. Nohee ba mayzza aawaa Heenookadan ba wodiyan deꞌida asatu giddon Xoossaara hemettida asa geetettiis. Nohee yelettiyo wode Heenooki hayqqiichiis. SHin Heenooki awu leemiso gidiis. Nohee abaa ba aawaa Laameekappe woy ba aawaa aawaa Maatusaalappe woy Heenooka aawaa Yaareedappe siyennan aggenna; Yaareedi Noheyyo layttay 366 gidin hayqqiis.​—⁠Doomettaabaa 5:​25-29; 6:9; 9:⁠1.

Heenooka hanotaanne Addaame hanotaa ane geeddarssa. Addaamee wottiyoobi baynna asa gidikkokka, Yihoowa bolli makkalidi ba zerettay a leemisuwaa kaallidi nagaraa oottanaadaaninne hegaa gaasuwan metootanaadan oottiis. SHin Heenooki nagarancha gidikkokka, Xoossaara hemettidi ba zerettawu ammanuwan leemiso gidiis. Addaamee Heenookawu layttay 308 gidiyo wode hayqqiis. Ba xallaa siiqiya mayzza aaway Addaame hayqqin a zerettay kayyottidee? Hegaabaa erokko. Hanotay ayba gidikkokka, Heenooki ‘Xoossaara hemettiis⁠.’​—⁠Doomettaabaa 5:⁠24.

Ne soo asawu koshshiyaabaa kunttiyay nena gidikko, Heenooka ammanuwaappe tamaarana danddayiyoobaa qoppa. So asawu asatettan koshshiyaabaa kunttiyoogee bessiyaaba gidikkokka, ayyaanaaban koshshiyaabaa kunttiyoogaappe aadhiyaabi baawa. (1 Ximootiyoosa 5:⁠8) Hegee haasayiyooba xallan gidennan oottiyooban qoncciyaaba. Geeshsha ayyaanay denttettin xaafettida, Xoossay kessido maaraa kaallada Heenookadan Xoossaara hemettanawu doorikko, neenikka ne soo asay kaallana bessiyo loꞌꞌo leemiso gidaasa.

HEENOOKI ‘ETABAA HANANABAA YOOTII⁠S’

He wode adan ammaniya uri baynna gishshawu Heenooki boorasennan aggenna. A Xoossay Yihooway abaa akeekidee? Ee, akeekiis. Issi gallassi, Yihooway ammanettida ba ashkkaraa haasayissiis. Heenooki he wode deꞌiya asawu yootanabaa Xoossay awu oodiis. I Heenooki hananabaa yootanaadan oottiis; hananabaa yootin i yootidobay Geeshsha Maxaafan xaafettido koyro asi a. Hegaa waati eriyoo? Keehi daro layttay aadhi simmin, Yesuusa aayee naꞌa gidida Yihuday ayyaanay kaalettin Heenooki yootido hiraagaa xaafiis.a

Heenooki yootido hiraagay aybee? I haagaadan giis: “Akeekite, Xoossaa erenna nagaranchcha asati oottido iita ooso ubbaunne qassi Xoossaa erenna he iita asati Xoossaa bolli haasayido iita haasaya ubbau, Godai eta ubbaa bolli pirddanau, ba daro sha7u geeshshatuura issippe yaana.” (Yihudaa 14, 15) Heenooki ba yootidobay polettanaagaa keehippe ammanettiis. I Xoossay he hiraagaa polidobadan qoppiis. Heenooki sinttappe polettanabaa polettiichidabadan yootidoy, he hiraagay polettiyoogee attennaagaa ammanettido gishshataassa!​—⁠Isiyaasa 46:⁠10.

Heenooki he pirddaa kiitaa, geella ubba asawu yootiyo wode awu aybi siyettideeshsha? I yootido pirddaa kiitay ay keena wolqqaamakko akeeka; eti ‘Xoossaa erenna nagarancha asata, iitabaa oottiyaageeta, iita asatanne iitabaa haasayiyaageet⁠a’ gidiyoogaa yootiis. Hegaa gishshawu, Heenooki he hiraagan koyro asati Edene Gannatiyaappe yedetettoosappe simmin asaa hanotay muleera moorettidoogaa ubba asawu mintti yootiis. Yihooway ba “daro sha7u geeshshatuura” yiyo wode he alamee muleera xa­yana. Heenooki Xoossaappe yiida he pirddaa kiitaa yayyennan barkka yootiis! Yelaga gidida Laameeki xala gidida ba aawaa aawaa hanotaa beꞌidi garamettennan aggenna. Tumukka Heenooki xala asa.

Heenooka ammanoy nuuni, ‘Ha alamiyaa Xoossay xeelliyoogaadan xeelliyaanaa⁠?’ giidi qoppanaadan denttettees. Heenooki xalatettan yootido pirddaa kiitay he wodiyan deꞌiya alamiyawu hanidoogaadan, ha alamiyawukka hanees. Heenooki yootido pirddaa kiitaara maayiya ogiyan, Yihooway he iita alamiyaa xayssanawu Nohe wode Bashshaa Haattaa yeddiis. He bashshay matan yaana wolqqaama bashshawu leemiso. (Maatiyoosa 24:​38, 39; 2 PHeexiroosa 2:​4-6) He wodeegaadan, ha wodiyankka Xoossay iita alamiyaa bolli xillo pirddaa pirddanawu ba daro shaꞌu geeshshatuura giigetti uttiis. Nuuni ubbay Heenooki yootido pirddaa kiitaa nu wozanan wottananne haratussikka yootana koshshees. Hegaara gayttidaagan nu soo asaanne nu laggetu dooroy nuugaappe dummatana danddayees. Issi issitoo nuunikka Heenookaagaadan boorasana danddayoos. SHin Yihooway Heenooka mule yeggibeenna; i ha wodiyan baassi ammanettidi oottiyaageetakka yeggenna!

HAYQUWAA BEꞌENNA MALA EKETTIIS

Heenooki wurssettan waanidee? A deꞌuwaappekka aaruwan a hayqoy maalaalees. Doomettaabaa maxaafay, “[Heenooki] Xoossaara hemettiiddi xayi bayiis; aissi giikko, Xoossai a ekki efiis” yaagees. (Doomettaabaa 5:24) Xoossay Heenooka waati efiidee? Issi issi Geeshsha Maxaafaa birshshettati Ibraawe 11:5n Xoossay Heenooka saluwaa efiidobadan qonccissoosona. SHin hegee hanennaba. Hayquwaappe denddidi saluwaa biida koyro asi Yesuus Kiristtoosa gidiyoogaa Geeshsha Maxaafay yootees.​—⁠Yohaannisa 3:​13.

Hara Geeshsha Maxaafati Ibraawe 11:5n, Heenooki hayquwaa beꞌennaadan ekettidoogaa yootoosona. Hegee woygiyoogee? Morkketi Heenooka barcheyidi worenna mala, Yihooway i waayettennan hayqqanaadan oottennan aggenna. Heenooki ekettanaappe kase, ‘Xoossay an ufayttidooga⁠a’ bessiyaabaa beꞌiis. Waatidi? Heenooki hayqqana haniiddi Xoossay ajjuutan bessin, gannate gidida saꞌaa beꞌennan aggenna. Heenooki Yihoowan nashettiyoogaa bessiya he malaataa beꞌi simmidi hayqqiis. Kiitettida PHawuloosi Heenookanne ammanettida hara asata xeelliyaagan, “He asati ubbati ammanuwan haiqqidosona” yaagidi xaafiis. (Ibraawe 11:13) Hegaappe simmin, morkketi a anhaa koyennan aggokkona; shin “ooninne a be7anau danddayibeenna.”; hegee geella he asati a anhaa tunissennaadan woy worddo haymaanootiyawu goꞌettennaadan Yihooway genttido gishshataassa gidana.b

Geeshsha Maxaafay yootiyo ha qofaa nu wozanan wottidi, Heenooki waani hayqqidaakko ane qoppoos. Ane kaallidi deꞌiyaagaadan haniis giidi qoppoos; shin hanidabay hegaappe dumma gidana danddayees. Heenooki baqatanawu woxxido gishshawu daafuriis. A morkketi i yootido pirddaa kiitaa gishshawu keehi yiillotidi a yedettoosona. Heenooki guutta wodiyawu qosettiyoosaa demmiis; shin i eta kushiyaappe attana danddayennaagaa eriis. I takkennan barchettidi hayqqana giidi qoppiis. I he sohuwan shemppiiddi ba Xoossaa woossiis. Yaatidi, i woppu giis. I ufayssiya issi ajjuutaa beꞌiis; ubba i he sohuwan deꞌiyaabadan qoppiis.

I he ajjuutan kase eriyoogaappe keehi dummatiya sohuwaa beꞌidabadan qoppa. Hegee awu Edene gannatedan loꞌꞌiya soho milatiis; shin asay yaa gelennaadan naagiya kiruubeti deꞌokkona. Yan minonne payya gidida yelaga attumaasaynne maccaasay daroy deꞌees. Eti sarotettan deꞌoosona. Heenooki kase eriyo ixoynne haymaanootiyaa gaasuwan gakkiya yedetay yan mule baawa. Heenooki qassi Yihooway a maaddiyoogaa, siiqiyoogaanne nashshiyoogaa akeekiis. I yan deꞌanaagaa eriis. I kaseegaappe keehi woppu giidaashin wolqqaama xiskkoy a efi aggiis.

I hanno gakkanawu xiskkiiddi deꞌees, hayqqiis; shin ubbabaa hassayiya Xoossaa Yihooway akka hassayees! Yesuusi yootidoogaadan, duufuwan deꞌiya, Yihooway hassayiyo ubbati Kiristtoosa cenggurssaa siyidi sarotettay kumido, keehi loꞌꞌiya ooratta alamiyan deꞌanawu xiskkuwaappe denddana.​—⁠Yohaannisa 5:​28, 29.

Neeni yan deꞌanawu koyay? Heenookaara gayttanaagee ay keena ufayssanaakko qoppa. Nuuni appe siyana keehi maalaalissiyaabaa qoppa! I wurssettan waanidaakko nu qoppiyoobay tumakkonne appe siyana. SHin nuuni haꞌꞌi appe tamaarana koshshiyaabay deꞌees. PHawuloosi Heenookabaa yooti simmidi, “Ammanoi bainnan ooninne Xoossaa ufaissanau danddayenna” yaagiis. (Ibraawe 11:⁠6) Nuuni ubbay Heenookaagaadan xalananne ammanana koshshiyoogaa hegaappe akeekoos!