Ne Dosan Oottiyoobay Yihoowa Galatissiyaabaa Gido!

1, 2. (a) Nuuni Xoossawu oottiyoobaa goꞌꞌaa xeelliyaagan Elifaazinne Bilddaadi woygidonaa? (b) Yihooway bawu siyettiyaabaa waatidi qonccissidee?

“ASI Xoossaa go77anau danddayii? Harai atto aadhdhida eranchcha gidiyaakkokka, i bana go77anaappe attin, Xoossaa go77enna. Neeni xillo gidikko, hegee Ubbaa Danddayiya Xoossaa ufaissii? Ne ogee boree bainnaagaa gidikko, hegan i aiba wore demmii?” (Iyy. 22:1-3) Hageetu mala oyshatu zaaroy aybeeshsha gaada qoppa eray? Temaana giyo biittaappe yiida Elifaazi he oyshata koyro Iyyooba oychiyo wode, i chii giidi zaarana gi qoppidoogee qoncce. SHuuhappe yiida a laggee Bilddaadi, haray atto Xoossaa sinttan suure gididi beettanakka danddayettenna giis.—Iyyooba 25:4 nabbaba.

² Worddo minttetto minttettiya ha asati nuuni Yihoowayyo ammanettidi oottanawu baaxetiyoogee a aynne maaddennaagaa, nuuni Xoossawu goꞌꞌiyoobay bilꞌꞌaagaappe, uuꞌiyaagaappe woy guxuniyaagaappe aadhennaagaa yootidosona. (Iyy. 4:19; 25:6) Nuuni yuushshi qoppana xayikko, Elifaazinne Bilddaadi banttana kawushshiyaageeta giidi qoppennan aggokko. (Iyy. 22:29) Xoqqa deriyaa liiphiyaappe woy horophilliyaa maskkootiyaara xeelliyo wode, asa oosoy keehi laafaba milatana danddayees. SHin Yihooway ba deꞌiyo xoqqasaappe saꞌaa xeelliyo wode, nuuni a Kawotettawu oottiyoobaa hegaadan xeellii? Elifaazi, Bilddaadinne Xoofaari wordduwaa yootido gishshawu Yihooway eta seeridi, Iyyooba “ta ashkkaraa” yaagidi an ufayttido wode, ba qofaa qonccissiis. (Iyy. 42:7, 8) Yaatiyo gishshawu, issi uri ‘Xoossawu goꞌꞌana’ danddayees.

“AYYO NEENI AI IMMUUTEE?”

3. Eelihu nuuni Yihoowawu oottanawu daafuriyoobaa xeelliyaagan woygidee, qassi i giidobay woygiyoogee?

³ Eelihu, “Xillo gidikko, ayyo [Xoossaayyo] neeni ai immuutee? Woikko ne kushiyaappe i ai ekkanee?” yaagidi oychin Yihooway a seeribeenna. (Iyy. 35:7) Eelihu Xoossaa oosuwan nuuni daafuriyoobawu waagi baawa giidee? Akkay, gibeenna. I nuuni Yihoowayyo oottiyoobay ayyo zemppo gidenna yaagiis. Yihooway kumetta. I kaseegaappe duretanaadan woy minnanaadan nuuni aynne oottana danddayokko. Gidikkokka, nuussi deꞌiya loꞌꞌobay, eray woy wolqqay aybikka Xoossay immidobaa; qassi hegaa nuuni waati goꞌettiyaakko i akeekees.

4. Nuuni haratussi kehatettan immiyoogaa Yihooway aybidan xeellii?

⁴ Nuuni aggenna siiquwaa bessiyaabaa a ashkkaratussi oottiyoogaa Yihooway baayyo oottiyoobadan xeellees. Leemiso 19:17y, “Hiyyeesaassi kehiya asi GODAASSI tal77ees; GODAI he lo77o oosuwaa acuwaa qanxxees” yaagees. Hiyyeesatussi nuuni kehiyo ubbabaa Yihooway xeelliyoogaa ha xiqisee yootii? Ubbabaa Medhidaagee asay kehatettaa bessiyaabaa oottiyo wode i etawu acotiyaabadan xeellidinne hegaa mala oosuwaa ayyo talꞌꞌidobadan qoodidi, eta nashshiyoogaaninne anjjiyoogan acuwaa qanxxees gaana danddayiyoo? Ee danddayoos, qassi Xoossaa Naꞌay hegee tuma gidiyoogaa qonccissiis.—Luqaasa 14:13, 14 nabbaba.

5. Nuuni xannaꞌana oyshati awugeetee?

⁵ Yihooway ba gishshaa haasayanaadan hananabaa yootiya Isiyaasa shoobbiis; yaatiyoogan, ba halchoy polettiyoogaara gayttidabaa ammanettida asati oottiyoogee bana ufayssiyoogaa qonccissiis. (Isi. 6:8-10) Isiyaasi he shoobiyaa eeno giidi ekkiis. Ha wodiyan shaꞌan qoodettiyaageeti Yihoowa oosuwan deexxiya aawatettaa ekkiyoogan hegaadan, “Hekko, tana kiitta” giyoogaa bessoosona. Gidoppe attin, issi uri hagaadan qoppana danddayees: ‘Taani oottiyoobay tumu goꞌꞌiyaabee? Taani dosada oottanaadan Yihooway ba kehatettan eeno giikkonne, taani ay keena oottikkonne, i ba Qaalaa polanawu koshshiya ubbabaa immennee?’ Deboorinne Baaraaqa wode hanidabay he oyshatussi waanidi zaaro gidiyaakko akeeka.

YASHSHAN WOLQQA XAYIKKONNE, GUYYEPPE XOOSSAN MINETTIDOSONA

6. Israaꞌeela biittaa asay Yaabina wotaaddaratuppe aybin dummatii?

⁶ Kanaane biittaa Kawoy Yaabini Israaꞌeelata 20 layttawu qareti baynnan huqqunnidi haariis. Gaxariyaa asay oge woy dabaaba kiyanawukka yayyees. Olanchatubaa xeelliyo wode, olanawukka eqettanawukka maaddiya miishshi etawu baynna gishshawu eti olawu loytti gixxibookkona; shin eta morkketussi birataappe oosettida 900 para gaareti deꞌoosona.—Daan. 4:1-3, 13; 5:6-8.a

7, 8. (a) Yihooway Baaraaqa koyro woygidi azazidee? (b) Israaꞌeelati Yaabina olanchata waatidi xoonidonaa? (Doomettan deꞌiya misiliyaa xeella.)

⁷ SHin Yihooway hananabaa yootiya Deboori baggaara Baaraaqa hagaadan giidi azaziis: “Nifttaaleema zariyaappenne Zaabiloona zariyaappe tammu sha7u asaa ekkada, Taaboora Deriyaa ba. Taani Yaabina olanchchatu gadaawai Sisaari paraa gaaretanne olanchchata ekkidi, Qiishoona SHaafan nenaara olaa gaittanau yaanaadan oottana; yin taani neeyyo a aattada immana.”—Daan. 4:4-7.

⁸ Kiitay ubbasaa gakkiis. Bantta dosan yiidaageeti Taaboora Deriyan shiiqidosona. Baaraaqi sohuwaara Yihooway azazidoogaadan oottiis. (Daannata 4:14-16 nabbaba.) Taaꞌinaakan waanna olaa olettido wode, qoppennan shaaraappe iray soosidi heeraa silimoyiis. Baaraaqi Sisaara olanchata yedettiiddi Harosheeta gakkanaashin 24 kilo meetiriyaa biis. Sisaari kase yashshiyaaba gidikkonne he wode pattennaba gidida ba paraa gaariyan biiddi issisan yeggi bayidi, woxxiiddi Daꞌinaaniima biis; he sohoy Qaadeesa heeran deꞌennan aggenna. I qosettanawu Qeenaa Hebeera machee Yaaꞌeelikko bin, Yaaꞌeela a mokka ekkaasu. I olan daafuridi xiskki bayiis. He wode Sisaari xalada a woranawu qofaa qachida Yaaꞌeeli piriyan geliis. (Daan. 4:17-21) Israaꞌeelatu morkketi xoonettidosona!b

DOSIDI OOTTIYOOGAWU ASAA XEELAY DUMMA DUMMA

9. Daannata 5:20, 21 Sisaaraara olettido olaabaa ay qonccissii?

⁹ Daannata shemppo 4⁠ynne 5⁠y issoy haran baynnabaa yootiyo gishshawu, eta naaꞌꞌaa issippe xannaꞌꞌana koshshees. Leemisuwawu Daannata 5:20, 21n, “Saluwan de7iya xolinttetikka olettidosona. Bantta yuuyiyo yuushshan eti Sisaaraara olettidosona. . . . Qiishoona SHaafai kixxidi, he kawota shokkidi efiis” yaagees. He qofay kiitanchatu maaduwaabaa yootiiyye, saluwaappe xoolintte milatiyaabay wodhidee? Taarikee qonccissidi yootenna. SHin 900 ola gaareta torqquwan naaqqida, bessiya sohuwaaninne wodiyan soosida iray Xoossay oottidoba gaanaappe attin, haraba ay gaana danddayettii? Daannata 4:14, 15n, xoonoy Yihoowappe gidiyoogee heezzutoo odettiis. Dosidi olawu kiyida 10,000 Israaꞌeelatuppe ooninne taani ashshaas giidi ceeqettana danddayenna.

10, 11. “Meroozi” aybee, qassi aybissi qanggetidee?

¹⁰ SHin, eti Yihooway maalaaliyaabaa oottidi ashshido gishshawu a sabbiyo Deboorinne Baaraaqa xoonuwaa yettan hagaadan giidosona: “GODAA kiitanchchai, ‘Merooza qanggite! Yan de7iya asaa iissidi qanggite! Aissi giikko, eti GODAA maaddanau yibookkona. A wolqqaama morkketuura olettanau kiyibookkona’ yaagiis.”—Daan. 5:23.

¹¹ Meroozi aybakko haꞌꞌi erettenna gishshawu, he qanggettay a gakkidoogee qoncce. Hegee bantta dosan olettiyaageeta shiishshanawu koyro kiitay biido wode siyennan ixxida asay deꞌiyo katamee? Woy qassi Sisaari baqatidi biyo ogiyan deꞌiyaaba gidikko, yan deꞌiya asati a oyqqana danddayiiddi oyqqennan ixxidonaa? Bantta dosan olettanaageeta Yihooway xeesiyo wode eti waanidi siyennan aggana danddayiyoonaa? He olawu eta heerappe tammu shaꞌu asay shiiqiis. He iita olanchay Sisaari hidootaa qanxxidi eta katamaa ogiyaara barkka woxxiiddi biyaagaa Merooza asay beꞌiis gaada qoppa. Hegee Yihoowa halchuwaara maayiyaabaa oottananne a anjjuwaa demmana danddayiyo loꞌꞌo wode. SHin, he injje wodiyan oottiyoobaappenne oottennan aggiyoobaappe issuwaa doorana danddayiiddi eti sheneho giidonaa? Kaallidi deꞌiya xiqisee Yaaꞌeela hegaappe dummabaa oottidoogaa yootees!—Daan. 5:24-27.

12. Daannata 5:9, 10y issoy issuwaa phalqqiya ayba qofaa yootii, qassi ha wodiyan hegee nuna waatidi maaddana koshshii?

¹² Daannata 5:9, 10y Baaraaqaara issippe salppidi olawu biidaageetu qofay beennan aggida asatuugaappe dummatiyo hanotaa yootees. Debooranne Baaraaqi ‘asaa giddon dosidi banttana aattidi immida Israaꞌeela ola gadaawata’ galatidosona. Eeno giidi biida asati otorettidi olawu kiyennan ixxida, ‘bootta hareta toggiyaageetuppenne’ ishalo deꞌuwaa dosiya, ‘gilaasiyan’ uttiyaageetuppe keehi dumma! Baaraaqaara biidaageeti meto beꞌanawu koyenna, wogga ‘ogiyaara hemettiyaageetuppe’ dumma hanotan keratiya Taaboora deriyaaninne caretiya Qiishoona wombban olettanawu eeno giidosona! Bantta ufayssawu bichaariya ubbati ‘siyanaadan’ woy qoppanaadan zoree imettiis. Ee, eti Yihoowa shene gididaban maaddana danddayishin banttappe halidabaa wotti denttidi qoppana bessees. Ha wodiyan kumetta wozanaappe Yihoowawu oottenna oonikka yaatana koshshees.

13. Roobeela, Daananne Aseera zaretu qofay Zaabiloonanne Nifttaaleema zaretuugaappe waani dummatii?

¹³ Dosidi olawu kiyidaageeti Yihooway ba haaruwaa xoqqu oottishin bantta ayfiyaa biraanan beꞌidosona. ‘Eti Yihooway xoonidoogaa yexxiyo’ wode, yootana danddayiyo loꞌꞌobaa eroosona. (Daan. 5:11) SHin Daannata 5:15-17y Roobeela, Daananne Aseera zareta dummayidi, Yihooway ootissiyo oosuwaappe aaruwan dorssan, markkabiyaaninne deꞌiyoosan leemisettida eta aqoy eta daro qofissidoogaa yootees. SHin Zaabiloonanne Nifttaaleema zareti Debooronne Baaraaqa maaddanawu “bantta shemppuwaa haiquwau aattidi [immidosona].” (Daan. 5:18) Dosidi oottiyo oosuwaa asay xeelliyo ha dumma dumma xeelaappe nuuni loꞌꞌobaa tamaaroos.

‘YIHOOWA GALATITE!’

14. Nuuni ha wodiyan Yihoowa haaruwawu exatiyoogaa waatidi bessiyoo?

¹⁴ Ha wodiyan nuuni asatettaa olaa olettanaadan xeesettana xayikkonne, mishettidi sabbakiyo oosuwan xala gidiyoogaa bessiyo maataa demmida. Yihoowa dirijjitiyan bantta dosan oottiyaageeti awudeegaappenne aaruwan koshshoosona. Miilooniyan qoodettiya ishantti, michonttinne yelagati aqinye gidiyoogan, Beeteelen oottiyoogan, Kawotettaa Addaraashaa bantta dosan keexxiyoogaaninne, gita shiiqotun bantta dosan oottiyoogan banttana aattidi immidosona. Qassi Hosppitaaliyaara Gattiya Konttiyaaninne killiliyaa shiiquwaara gayttidabaa giigissiyoogan gita oosuwaa oottiya cimata qoppa. Yihooway neeni dosada oottiyoobaa wozanappe nashshiyoogaanne hegaa dogennaagaa ammanetta.—Ibr. 6:10.

15. Nuuni Yihoowa oosuwaa sheneho geennaagaa waatidi erana danddayiyoo?

¹⁵ Nuuni ubbay nuna hagaadan oychana koshshees: ‘Ayyaanaabaa oosuwaappe dariya baggaa harati oottanaadan agga bayiyaanaa? Taani aquwaabaa bessiyaagaappe aaruwan koyiyoogee dosada oottennaadan diggii? Baaraaqadan, Debooridan, Yaaꞌeelidaaninne bantta dosan banttana aatti immida 10,000 asatudan, Yihooway yootiyo qoncce azazuwaa polanawu tawu deꞌiya aybanne goꞌettanawu ammanoynne xalatettay tawu deꞌii? Taani aquwaaban goꞌettanawu hara biitti woy hara katamaa baanawu qoppaydda deꞌikko, hegee ta so asaanne gubaaꞌiyaa waatanaakko qoppada woossiyaanaa?’c

16. Yihoowayyo baynnabaa nuuni ayyo immana danddayiyoobay aybee?

¹⁶ A haaruwawu exatiyo maataa nuussi immiyoogan Yihooway nuna bonchiis. Dabloosi ba haaruwawu exatanaadan asaa koyro cimmido gishshawu, neeni Yihoowa haaruwawu exatiyoogee Seexaanawu exatanawu mule koyennaagaa bessees. Neeni dosada oottanaadan denttettida ammanoynne suuretettay Yihoowa ufayssees. (Lee. 23:15, 16) Neeni ayyo exatada oottiyooban Yihooway bana boriya Seexaanay yeellatanaadan oottana. (Lee. 27:11) Yaatiyo gishshawu, neeni ammanettada azazettiyoogan, Yihooway alꞌꞌobadan xeelliyoobaa ayyo immaasa giyoogaa mala; qassi i hegan keehi ufayttees.

17. Daannata 5:31 sinttappe aybi hananaagaa yootii?

¹⁷ Mata wode Yihoowa haaruwaa aybippenne aattidi xeelliyaageeti saꞌan kumana. He gallassaa keehi yeemottidi naagoos! Nuuni Debooridaaninne Baaraaqadan, “Abeet GODAU, ne morkketi ubbai hegaadan haiqqona! SHin ne siiqoti maallado mokkiya awaadan phoolona” yaagidi yexxoos. (Daan. 5:31) Yihooway Seexaanaa iita alamiyaa xayssiyoogan he woosaa zaarana! Armmageedoona olay doommiyo wode, morkkiyaa xoonanawu dosidi banttana aatti immiya asati koshshokkona. He wodee nuuni nu ‘sohuwaa sohuwaa oyqqi eqqidi, Yihooway nuna ashshiyoogaa beꞌiyo’ wode. (2 Odi. 20:17) SHin he wode gakkanaassi nuuni Yihoowa halchuwaara maayettiyaabaa oottana danddayiyo darobay deꞌees.

18. Neeni dosada oottiyoogee hegan goꞌettiyaageeti waananaadan oottii?

¹⁸ ‘Asay dosidi, ba huuphiyaa aattidi immido gishshawu Yihoowa galatite!’ Baaraaqinne Deboora asa sabbiiddi gidennan, Ubbaappe Xoqqa Xoossaa sabbiiddi hegaadan giidi bantta xoonuwaa yettaa yexxiyoogaa doommidosona. (Daan. 5:1, 2) Ha wodiyankka hegaadan, neeni dosada oottiyoogee hegan goꞌettiya ubbay ‘Yihoowa galatanaadan’ denttettana mala amottoos.