‘Seeraa Siya; Siyada Aadhdhida Eranchcha Gida’

1. Nuuni aadhdhida eratettaa waati demmiyoo, qassi hegee nuna waati maaddanee?

YIHOOWAY aadhdhida eratettawu Pultto, qassi I ba aadhdhida eratettaa haratussi kehatettan immees. Yaaqooba 1:5y hagaadan gees: “Intteppe ooninne baayyo aadhdhida eratettai xayikko, borennan ubbau kehatettan immiya Xoossaa woosso.” Nuuni Xoossaa seeraa ekkiyoogee A aadhdhida eratettaa demmiyo issi oge. Qassi he aadhdhida eratettay kandduwaaninne ayyaanaaban nuna qohiyaabaappe naagana danddayees. (Lee. 2:10-12) Hegaa gishshawu, nuuni “merinaa de7uwaa naagiiddi, [nu] huuphiyaa Xoossaa siiquwan” wottoos.—Yih. 21.

2. Nuuni Xoossaa seeraa siiqiyoogaa waati tamaarana danddayiyoo?

² SHin, nu nagaraappe, nu diccido hanotaappenne hara gaasuwaappe denddidaagan nuuni seeraa ekkanawu woy bessiyaagaadan xeellanawu metootana danddayoos. SHin nuuni Xoossaa seeray goꞌꞌiyoogaa nu deꞌuwan beꞌiyo wode, I nuna ay keena siiqiyaakko akeekoos. Leemiso 3:11, 12y, “Ta na7au, GODAA seeraa karoppa; . . . GODAI ba ufaittiyo uraa seerees” yaagees. Yihooway nuussi keehi loꞌꞌobaa amottiyoogaa ammanettana danddayoos. (Ibraawe 12:5-11 nabbaba.) Xoossay nuna loytti eriyo gishshawu, A seeray nuuyyo ubbatoo bessiyaabanne koshshiyaaba. Seeraa xeelliyaagan oyddu ginata ane pilggoos: (1) nu huuphiyaa naagiyoogaa, (2) aawaanne aayee seeraa, (3) gubaaꞌiyan imettiya seeraa, qassi (4) seeran azzaniyoogaappe aaruwan iita gididabaa.

NU HUUPHIYAA NAAGIYOOGEE AADHDHIDA ERATETTAA BESSIYAABA

3. Issi naꞌi ba huuphiyaa naagiyoogaa waati tamaarii? Leemisuwan qonccissa.

³ Nu huuphiyaa naagiyoogee nu eeshshaanne nu qofaa loyttanawu nuna seeriyoogaakka bessiyaaba. Nuuni nu huuphiyaa naagiyaageeta gididi yelettibookko. Nuuni hegaa tamaarana koshshees. Leemisuwawu, guutta naꞌay bishkkiliitiyaa laaggiyoogaa biron tamaariyo wode, aaway woy aayyiyaa I kunddennaadan bishkkiliitiyaa oyqqoosona. Naꞌay laaggiyoogaa danddayiyo wode, aaway woy aayyiyaa guutta wodiyawu A issi issitoo yeddoosona. Naꞌay laaggiyoogaa loytti danddayiyo wode, aaway woy aayyiyaa A muleera yeddi aggoosona. Hegaadan, yelidaageeti danddayidi ubbatoo bantta guutta naata “Godaa seeraaninne zoriyan” loohissiyo wode, naati bantta huuphiyaa naaganaadaaninne aadhdhida eranchcha gidanaadankka eti maaddoosona.—Efi. 6:4.

4, 5. (a) Nu huuphiyaa naagiyoogee ‘ooratta asatettawu’ keehi koshshiyoy aybissee? (b) Nuuni balabaa oottikkokka, hidootaa qanxxana bessennay aybissee?

⁴ Gitaa gididi Yihoowa eridaageetussikka he maaray hanees. Eti amarida hanotan bantta huuphiyaa naagidoogee qoncce. SHin, mati erissiyo ashkkara gididaageeti ayyaanaaban kayma gidibookkona. Gidoppe attin, eti Kiristtoosa milatidi “ooratta asatettaa” maayiyoogaa tamaariyo wode, loddan loddan kayma gidana danddayoosona. (Efi. 4:23, 24) Hegaadan diccanawu ba huuphiyaa naagiyoogee keehi koshshiyaaba. Hegee “nagara oosuwaanne ha sa7aa amuwaa nuuni agganaadaaninne nu huuphiyaa naagidi, ha sa7an Xoossaa milatidi, xillotettan” deꞌiyoogaa nuuni tamaarana mala maaddees.—Tii. 2:12.

⁵ SHin, nuuni ubbay nagaranchcha. (Era. 7:20) Nuuni balabaa oottikko, hegee nuuni nu huuphiyaa bessiyaagaadan naagokko, woy mule naagana danddayokko giyoogee? Ubbatoo hegaadaana gidenna. Leemiso 24:16y, “Xillo asi laapputoo kunddikkokka denddees” yaagees. Nuuni ‘denddanaadan’ aybi maaddanee? Maaddiyay Xoossaa ayyaanaappe attin, nu wolqqaa gidenna. (Isiyaasa 12:2 nabbaba.) Nu huuphiyaa naagiyoogee he ayyaanaa ayfe.

6. Nuuni Xoossaa Qaalaa loytti xannaꞌiyaageeta waani gidana danddayiyoo? (Doomettan deꞌiya misiliyaa xeella.)

⁶ Qassi nu huuphiyaa naaganawu wozanappe woossiyoogaa, Geeshsha Maxaafaa xannaꞌiyoogaanne wotti dentti qoppiyoogaa koshshees. Xoossaa Qaalaa xannaꞌiyoogee nena metikko shin? Neeni xannaꞌiyoogaa dosikke gaana danddayaasa. SHin, neeni eeno giikko Yihooway nena maaddanaagaa hassaya. A Qaalaa neeni ‘laamotanaadan’ I nena maaddana danddayees. (1 PHe. 2:3) Koyruwan, ne huuphiyaa naagada A Qaalaa xannaꞌanawu Yihoowa woossa. Yaatada, ne woosaara maayiyaabaa ootta, guutta wodiyawu gidikkonne, ubbatoo xannaꞌana danddayaasa. Guyyeppe, xannaꞌiyoogee metennabanne ufayssiyaaba gidana! Neeni Yihoowabaa woppu giida sohuwan wotta dentta qoppiyo wode ufayttana.—1 Xim. 4:15.

7. Nuuni nu huuphiyaa naagiyoogee ayyaanaabaa hoolliyaa gakkanaadan nuna waati maaddana danddayii?

⁷ Nu huuphiyaa naagiyoogee nuuni ayyaanaaban hoolliyaa kessidi hegawu gakkanaadan nuna maaddees. Kaseegaadan mishettennabadan qoppiya issi aawaa hanotaa qoppa. Hanotay A qofissin, I kumetta wode aqinye gidanawu halchchiis; qassi nu xuufetun hegaara gayttidaagan kiyiya huuphe yohota nabbabiis. Yaatiyoogee I Yihoowaara dabbotaa minttanaadaaninne aqinye gidanawu keehi koyanaadan oottiis. Qassi I danddayiyo wode kaafiya aqinye gidanawu hanotaa giigissiis. Yaatidi ay demmidee? Xube gidiyaabay deꞌishinkka, I kumetta wodiyaa aqinye gidanawu kessido hoolliyan xeelaa wottiis; qassi wurssettan he hoolliyaa gakkiis.

NAATA YIHOOWA SEERAN DICHCHITE

8-10. Yelidaageeti bantta naati Yihoowawu haggaazanaadan oottidi dichchana mala aybi maaddana danddayii? Leemisuwaa yoota.

⁸ Bantta naata “Godaa seeraaninne zoriyan” dichchiya Kiristtaane aawaayyoonne aayeeyyo gita aawatettay deꞌees. (Efi. 6:4) Hegee ha wodiyan keehi deexxiyaaba. (2 Xim. 3:1-5) Naati yelettiyo wode iitaa kehaa shaakki erokkona; qassi eta kahay loohibeenna. Hegaa gishshawu, kahaa loohissanawu etassi seeray koshshees. (Roo. 2:14, 15) Issi Geeshsha Maxaafaa eranchchay “seeraa” geetettidi birshshettida Giriiketto qaalay “naatu dichchaa” woy aawatettaa ekkiyaageeta oottidi naata dichchiyoogaakka geetettana danddayiyoogaa qonccissiis.

⁹ Siiquwan seeriyo naati darotoo woppu goosona. Laꞌatettawu zaway deꞌiyoogaa, qassi eti kuuyiyoobaynne eta duussay loꞌꞌobaa woy iitabaa kaalettiyoogaa tamaaroosona. Qassi Kiristtaane aawatinne aayoti Yihoowa kaaletuwaa koyiyoogee keehi koshshiyaaba. Naata dichchiyoogaara gayttida qofaynne hiillay wogaappe wogan, qassi yeletaappe yeletan dummatiyoogaa dogoppite. Xoossay yootiyoobaa siyiya aawaynne aayyiyaa bantta naata waati dichchanaakko malan qoppana woy qassi ha alamiyaa aadhdhida eratettan ammanettana koshshenna.

¹⁰ Nuuni Nohe hanotaappe tamaarana danddayoos. I markkabiyaa keexxanaadan Yihooway ayyo yootido wode, Nohee ba eran ammanettibeenna. I kase markkabiyaa mule keexxi erenna. Hegaa gishshawu, I Yihooway ‘azazidoogaadan’ oottiyoogan an ammanettiis. (Doo. 6:22) Hegee ay demissidee? Noheenne A soo asay markkabiyan gelidi attidosona! Aawa gididi oottiyooban Nohessi ushachchiis. Ayssi giikko, I Xoossaa aadhdhida eratettan ammanettiis. Hegaa gishshawu, I ba naata loytti tamaarissiisinne etawu loꞌꞌo leemiso gidiyaabaa oottiis; hegee Bashshaa Haattay yaanaappe kase deꞌiya iita wodiyan keehi metiyaaba.—Doo. 6:5.

11. Naata loohissanawu yelidaageeti leemiso gidiyoogee ay keena koshshiyaabee?

¹¹ Neeni aawa woy aayo gidikko, Xoossay “azazidoogaadan” waata oottana danddayay? Yihooway yootiyoobaa siyiyoogaana. Naata dichchiyoogan I nena maaddanaadan eeno ga. A Qaalaynne A dirijjitee yootiyo zoriyaa goꞌetta. Guyyeppe, neeni hegaadan oottido gishshawu ne naati nena galatana danddayoosona! Issi ishay hagaadan giis: “Ta aawaynne ta aayyiyaa tana loytti dichchido gishshawu keehi galatays. Eti ta wozanaa denttettanawu banttawu danddayettida ubbabaa oottidosona. Taani ayyaanaaban diccido gishshawu etawu galatay bessees.” SHin, aawaynne aayyiyaa maaddanawu keehi baaxetiyaaba gidikkokka, issi issi naati Yihoowa aggoosona. Giddoppe attin, bantta naatu kahay loꞌꞌo gidanaadan eta wozanan tumaa wottanawu yelidaageeti banttawu danddayettiya ubbabaa oottanawu baaxetoosona. Qassi iita naꞌay issi galla Yihoowakko simmanaagaa eti hidootan naagana danddayoosona.

12, 13. (a) Issi naꞌi bohettikko, Kiristtaane aawatinne aayeti Xoossawu azazettiyoogaa waati bessiyoonaa? (b) Yelidaageeti Yihoowawu azazettiyoogan issi keettaa asay waani goꞌettidee?

¹² Issi naꞌi bohettiyo wode azazettiyoogee yelida amaridaageeta keehi metana danddayees. Bohettida naꞌiyaa sooppe kiyada biido issi aayee hanotaa qoppa. He aayyiyaa hagaadan gaasu: “Taani ta naꞌeeranne ta naꞌee naꞌeera wodiyaa attanawu qoppada nu xuufetun kiyida qofaappe hegawu maaddiyaabaa demmanawu purddiyaa koyays.” SHin, I azinay bantta naꞌiyaa haꞌꞌi Yihoowa kushiyan deꞌiyoogaa A akeekanaadan kehatettan O maaddiis. Hegaa gishshawu, Xoossay eta naꞌiyo seeriyoogan eti kelttiyaa gelana koshshennaagaa akeekana bessees.

¹³ Amarida layttappe guyyiyan, naꞌiyaa gubaaꞌiyaa simmaasu. Aayyiyaa hagaadan gaasu: “A haꞌꞌi taayyo galla galla dawalawusu woy silkkiyan kiitaa xaafawusu! A nuuni Xoossawu azazettidoogaa eriyo gishshawu ba aawaanne tana keehippe bonchchawusu. Nu dabbotay keehi mino.” Neeyyo bohettida naꞌi deꞌikko, “ne polo wozanan GODAA ammanetta; ne akeekan zemppoppa.” (Lee  3:5, 6) Yelidaageetoo, Yihoowa seeray zaway baynna A aadhdhida eratettaanne A siiquwaa qonccissiyoogaa hassayite. Intte naꞌaa gujjin, asa ubbaa gishshawu I ba Naꞌaa immidoogaa mule dogoppite. Xoossay ooninne xayanaadan koyenna. (2 PHeexiroosa 3:9 nabbaba.) Hegaa gishshawu, Yihoowa seeraaninne kaaletuwan ammanettite. Yihooway yootiyoobaa oottiyoogee metiyaaba gidikkokka, oottite. Yihoowa seeraara maayiyaabaa oottiteppe attin, dummatiyaabaa oottoppite.

GUBAAꞌIYAN

14. Yihooway ‘ammanettiya ashkkaraa’ baggaara tamaarissiyoobaappe nuuni waani goꞌettiyoo?

¹⁴ Yihooway Kiristtaane gubaaꞌiyaa koshshiyaaban maaddanawu, naaganawunne tamaarissanawu qaalaa geliis. I daro ogetun hegaa oottiis. Leemisuwawu, gubaaꞌiyawu koshshiyaabaa kunttanawu I ba Naꞌaa sunttiis; qassi nuuni ammanettidi deꞌanaadan maaddiya ayyaanaabaa qumaa immanaadan Yesuusi ‘ammanettiya ashkkaraa’ sunttiis. (Luq. 12:42) ‘Ashkkaray’ maaddiya kaaletuwaanne seeraa nuuyyo immees. Nena hagaadan oychcha, ‘Haasayay woy nu maxeetetuppe issuwan kiyida huuphe yohoy taani ta qofaanne ta eeshshaa giigissanaadan ay keena denttettidee?’ Neeni giigissiyaaba gidikko, ufayttaasa! Yihooway nena giigissanaadan woy seeranaadan neeni eeno giikko, hegee nena goꞌꞌees.—Lee. 2:1-5.

15, 16. (a) Cimatu oosoy nuna waati goꞌꞌana danddayii? (b) Cimati bantta oosuwan ufayttanaadan nuuni waatana danddayiyoo?

¹⁵ Xoossaa dorssaa wudiyaa heemmanaadan “imota” gidida cimatakka gubaaꞌiyawu Kiristtoosi immiis. (Efi. 4:8, 11-13) Ha alꞌꞌo imotatun nuuni waani goꞌettana danddayiyoo? Issi ogee ammanuwan cimata milatiyoogaanne eta loꞌꞌo leemisuwaa kaalliyoogaa. Hara ogee qassi eti Geeshsha Maxaafaappe yootiyo zoriyaa siyiyoogaa. (Ibraawe 13:7, 17 nabbaba.) Cimati nuna siiqiyoogaanne nuuni ayyaanaaban diccanaadan koyiyoogaa hassaya. Leemisuwawu, nuuni gubaaꞌe shiiquwaa attiyoogaa woy kaseegaadan mishettennaagaa eti akeekikko, nuna sohuwaara maaddanaagee qoncce. Eti nuuni yootiyoobaa siyidi, nuna siiquwan minttettoosonanne Geeshsha Maxaafaappe bessiya zoriyaa nuuyyo immoosona. Eti maaddiyoogaa Yihooway nena siiqiyoogaa bessiyaabadan xeellay?

¹⁶ Nuuyyo koshshiya zoriyaa immanawu cimata metana danddayiyoogaa hassaya. Leemisuwawu, Kawuwaa Daawiti ba gita nagaraa genttanawu mali simmin, hananabaa yootiya Naataani A haasayissanawu keehi metootana danddayiyoogaa qoppa! (2 Sam. 12:1-14) Hegaadan, kiitettida 12tuppe issuwaa gidida PHeexiroosi, Ayhuda gidida ba ishantta haratuppe xoqqu oottidi xeellido wode, A zoranawu kiitettida PHawuloosassi xalatettaa koshshidoogee qoncce. (Gal. 2:11-14) Yaatiyo gishshawu, neeni ne gubaaꞌiyan deꞌiya cimatussi oosoy darenna mala waatana danddayay? Ne huuphiyaa kawushshiyaagaa, pashkki giyaagaanne galatiyaagaa gida. Eti maaddiyoogaa Xoossay nena siiqiyoogaa bessiyaabadan xeella. Yaatiyoogan, neeni ufayttana; qassi cimatikka bantta oosuwaa oottiyoogan ufayttana.

17. Gubaaꞌiyan deꞌiya cimati siiquwan maaddiyoogan issi michchiyaa waata goꞌettadee?

¹⁷ Issi michchiyaa ba kase oottidobaa gaasuwan, Yihoowa siiqanawu metootaasu. A hagaadan gaasu: “Taani kase oottidobaynne harabay taani daafuranaadan oottees. Cimatuyyo taani odana bessiyoogaa erays. Eti tana boribookkona woy baceessibookkona; shin tana eti minttettidosona. Ubbatoo gubaaꞌe shiiquwaappe simmin, etayyo oosoy dariyaaba gidikkonne, etappe issoy ta hanotaa oychchees. Ta kase oottidobaa gaasuwan, Xoossay tana siiqana danddayenna gaada qoppays. SHin, Yihooway tana siiqiyoogaa qonccissanawu gubaaꞌiyaanne cimata darotoo goꞌettiis. Taani A mule aggennaadan woossaas.”

SEERAN AZZANIYOOGAAPPE AADHDHIYA IITABAY AYBEE?

18, 19. Seeran azzaniyoogaappe aadhdhiya iitabay aybee? Leemisuwaa yoota.

¹⁸ Seeray azzanttiyaaba gidana danddayikkonne, hegaappe aaruwan azzanttiyaabay deꞌees; hegee seeraa ekkennan ixxin gakkiya qohuwaa. (Ibr. 12:11) Qaayeelinne Kawuwaa Sedeqiyaasi oottido iitabaappe nuuni tamaarana danddayoos. Qaayeeli Aabeela ixxiyoogaanne woranawu koyiyoogaa Xoossay beꞌidi, Qaayeela hagaadan giis: “Aissi yiillotai? Ne som77oikka aissi xumidee? Neeni lo77obaa oottiyaabaa gidiyaakko, ne som77oi pashkkennee? SHin neeni lo77obaa oottana xayikko, nagarai do7adan ne penggen zuggees; i nena haarana koyees; shin neeni a xoonana bessees.” (Doo. 4:6, 7) Qaayeeli Yihoowa seeraa siyennan ixxidi, ba ishaa woriis; qassi hegaa gaasuwan ba deꞌo laytta ubban waayettidi deꞌiis. (Doo. 4:11, 12) Xoossay yootidobaa Qaayeeli siyidabaa gidiyaakko, A keehi daro waayee gakkenna shin.

¹⁹ Iita kawuwaa Sedeqiyaasi haaridoy Yerusalaame katamay iita hanotan deꞌiyo wodiyaana. Hananabaa yootiya Ermmaasi Sedeqiyaasi ba iita oosuwaa agganaadan zaari zaaridi zorikkonne, kawoy seeraa siyibeenna. Gakkidabay azzanttiyaaba. (Erm. 52:8-11) Yihooway nuuni hegaadan bessennaban waayettanaadan koyenna!—Isiyaasa 48:17, 18 nabbaba.

20. Xoossaa seeraa ekkiyaageetanne ekkennaageeta aybi gakkanee?

²⁰ Ha alamiyan daroti Xoossaa seeraa qilliiccoosonanne xaasayidi xeelloosona. SHin, Xoossaa seeraa ixxiya oonanne mata wode waayee gakkana. (Lee. 1:24-31) Yaatiyo gishshawu, nuuni ‘seeraa siyidi, aadhdhida eranchcha gidoos.’ Leemiso 4:13y hagaadan gees: “Tamaaridoogaa hassaya; timirttee neeyyo de7o gidido gishshau, loitta naaga; yeddoppa.”