Nena Ooni Eranaadan Koyay?

1. Nuuni ubbay nu meretan ay koyiyoo?

NEENI eriyoonne bonchchiyo asi ne sunttaa dogiyaakko woy ubba nena erennaba gidiyaakko neeyyo aybi siyettanee? Hegaa malabay keehi azzanttana danddayees. Aybissi? Nuuni ubbay asan erettanawu koyanaadan merettido gishshataassa. Nuuni harati nu sunttaa eriyoogaa xalla gidennan, nuuni oonakkonne ay oottidaakkokka eranaadan koyoos.—Qoo. 11:16; Iyy. 31:6.

2, 3. Nashettanawu koyiyo koshshay waanidi moorettana danddayii? (Doomettan deꞌiya misiliyaa xeella.)

² Nu meretan koyiyo hara daro koshshaadan, nashettanawu koyiyo koshshaa nu nagaray moorana danddayees. Nagaray nuuni bessenna sunttan xeesettanawu amottanaadan oottana danddayees. Tumuppe erettananne goynuwaa ekkana bessiya, saluwan deꞌiya nu Aawaa, Xoossaa Yihoowa dogissiya bonchuwaanne sabaa demmanawu amottanaadan Seexaanaa alamee denttettees.—Ajj. 4:11.

³ Yesuusi saꞌan deꞌiyo wode, haymaanootiyaa kaalettiya amarida asati erettiyoogaa xeelliyo xeelay moorettiis. Yesuusi bana kaalliyaageeta, “Higgiyaa tamaarissiyaageetuppe naagettite; eti adussa maayuwaa maayidi yuuyiyoogaanne giyaa sohuwankka asai eta bonchchidi sarotiyoogaanne dosoosona; Aihuda woosa keettan daro lo77iya oidiyaa dosoosona; asi banttana imattiyoosankka bonchcho sohuwaa dosoosona” yaagiis. Qassikka, “Eti ubbaappe aadhdhiya pirddaa ekkana” yaagiis. (Luq. 20:46, 47) SHin A immido guuttabaa harati geella xeellibeenna amꞌꞌe maccaasiyo Yesuusi galatiis. (Luq. 21:1-4) Erettiyoogaa Yesuusi xeelliyo ogee haratuugaappe keehi dumma gidiyoogee qoncce. Nuuni Xoossaa Yihooway dosiyoogaadan suure qoppanaadan ha huuphe yohoy maaddana.

AYBIPPENNE AADHDHIYA OGIYAN ERETTIYOOGAA

4. Erettana koshshiyo aybippenne aadhdhiyaabay aybee, qassi aybissi?

⁴ Yaatin, nuuni erettanawu baaxetana koshshiyo aybippenne aadhdhiyaabay aybee? Hegee asay alamiyaa timirttiyan, zalꞌꞌiyaaninne allaxxiyooban erettanawu koyiyoogaa gidenna. Hegee PHawuloosi hagaadan giidi qonccissidoogaa mala: “Ha77i Xoossaa eridi, ubbakka Xoossan erettiichchidi, laafanne qassi karettida ha ayyaanatukko waanidi simmeetii? Wodhdhi eqqidi, aille gididi, naa77anttuwaa etayyo haarettanau koyeetii?” (Gal. 4:9) Nuuni ubbabaa haariya ‘Xoossan erettiyoogee’ keehi gita maata! I nuuyyo mata dabbo gidanawu koyees. Issi eranchchay giidoogaadan, nuuni “I keha ayfiyan xeelliyoogeeta gidoos.” Yihooway ayyo dabbodan nuna eriyo wode, nu deꞌuwawu halchchettida waannabaa demmoos.—Era. 12:13, 14.

5. Nuuni waanidi Yihoowan erettiyoo?

⁵ Muusee hegaa mala anjjuwaa demmiis. Yihooway Ba ogiyaa loytti eranaadan oottana mala I woossin, Yihooway ayyo, “Taani nenan ufaittido gishshaunne nena ne sunttan eriyo gishshau, neeni tana oichchidoogaa ubbaa taani oottana” yaagiis. (Kes. 33:12-17) Yihooway nuna eriyo wode, nuunikka hegaadan gita anjjuwaa demmana danddayoos. SHin nuuni waanidi Yihoowan erettana danddayiyoo? Nuuni A siiqiyoonne nu deꞌuwan A xallawu aqiyo wode, hegaadan erettoos.—1 Qoronttoosa 8:3 nabbaba.

6, 7. Nuuni Yihoowa dabbo gidiyoogaa agganaadan oottana danddayiyaabay aybee?

⁶ SHin, nuuni saluwan deꞌiya nu Aawaara dabbotidi deꞌana koshshees. Ha alamiyan nashettiyoogaa gujjin, “laafanne qassi karettida” A qofawu aylle gidenna mala, PHawuloosi etawu xaafido Galaatiyaa Kiristtaanetudan nuunikka naagettana koshshees. (Gal. 4:9) He koyro xeetu layttaa Kiristtaaneti Xoossan erettidosona. SHin PHawuloosi he ishati pattennabawu “simmidoogaaa” yootiis. PHawuloosi etawu giidobay, “Intte hagaa keenaa yi simmidi, kase aggido pattennabawu ayssi guyye simmeetii?” giyoogaa mala.

⁷ Ha wodiyan nuunikka hegaadan hanana danddayiyoo? Ee, danddayoos. Nuuni koyro Yihoowa erido wode, Seexaanaa alamiyan hayttatiyoogaa PHawuloosaagaadan yeggi bayennan waayi aggana. (Piliphphisiyuusa 3:7, 8 nabbaba.) Geella xoqqa timirttiyaa tamaariyo woy sunttettiyo woy qassi zalꞌꞌiyan duretiyo qaadaa yeggi bayennan aggokko. Woy qassi muuziqan woy ispporttiyan erettida dure asa gidana danddayiiddi he ubbabaa aggi bayida. (Ibr. 11:24-27) Hegaadan kuuyido loꞌꞌobaa haꞌꞌi ‘nuuppe halidabadan’ xeellikko, hegee eeyyatetta! Hegaadan qoppiyoogee nuuni kase “laafanne qassi karettida” ha alamiyaabaa giidi xeellidobaa koyanaadan oottana danddayees.a

MURTTIDOOGAN YAA MINNA

8. Nuuni Yihoowan erettana mala koyanawu murttidoogan yaa minnanaadan maaddanabay aybee?

⁸ Nuuni alamiyan erettiyoogaappe, Yihoowan erettana mala koyanawu murttidoogan waanidi yaa minnana danddayiyoo? Yaatanawu, nuuni naaꞌꞌu gitabaa hassayana koshshees. Koyruwan, Yihooway baassi ammanettidi oottiyaageeta awudenne erees. (Ibraawe 6:10 nabbaba; 11:6) I ba ashkkarata ubbaa wozanappe nashshees, qassi ayyo ammanettidaageeta yeggi aggiyoogaa “worddanchcha” gidiyoobadan xeellees. Yihooway awudenne “baageeta erees.” (2 Xim. 2:19) I “xillotu ogiyaa erees”; qassi paaciyaappe eta waati ashshanaakkokka erees.—Maz. 1:6; 2 PHe. 2:9.

9. Yihooway ba asaa nashshiyoogaa waati bessidaakko qonccissiya leemisota yoota.

⁹ Issi issitoo, Yihooway ba asaa nashshiyoogaa maalaaliya ogetun bessiis. (2 Odi. 20:20, 29) Leemisuwawu, Paaroona wolqqaama olanchchati Israaꞌeelata yedettiyo wode Yihooway eta Zoꞌo Abban waati ashshidaakko qoppa. (Kes. 14:21-30; Maz. 106:9-11) Hegee keehi maalaaliyaaba gidiyo gishshawu, 40 layttay aadhdhi simminkka he heeraa biittatun asay he hanotaabaa haasayees. (Yaas. 2:9-11) Daro wodeppe kase odettida Maagooga biittaa Googi nu bolli denddanaagaa naagiiddi, Yihooway ba siiquwaanne wolqqaa bessido he hanotata nuuni hassayiyoogee keehi minttettiyaaba! (Hiz. 38:8-12) Nuuni ha alamiyan erettiyoogaappe nu Xoossan erettanawu koyidoogawu he wode Yihoowa keehi galatana.

10. Yihoowan erettiyoogaa bessiya ayba hanotata nuuni hassayana koshshii?

¹⁰ Gitaba gidida naaꞌꞌantto yohuwaakka nuuni hassayana koshshees: Yihooway nuna eriyoogaa, nuuni mule qoppibeenna ogetun bessana danddayees. Asa bessana xallawu loꞌꞌobaa oottiyaageeti Yihoowappe ayba woytonne demmennaagee odettiis. Aybissi? Eti asan sabettiyo wode bantta kumetta woytuwaa ekkidosona. (Maatiyoosa 6:1-5 nabbaba.) Gidoppe attin, eti haratussi oottido loꞌꞌobay erettibeenna asata ba Aaway ‘geeman beꞌiyoogaa’ Yesuusi yootiis. Yihooway he oosota akeekees, qassi ubbaassi bessiya woytuwaa immees. SHin I issi issitoo nuuni qoppibeenna ogetun woytees. Amarida leemisota ane beꞌoos.

BANA ZIQQI OOTTIYA YELAGA MACCAASIYAA QOPPABEENNA OGIYAN ERETTAASU

11. Yihooway yelaga maccaasiyo Mayraamo eridoogaa waati bessidee?

¹¹ Xoossaa Naꞌay asa gididi yelettiyo wodee gakkin, bana ziqqi oottiya geelaꞌiyaa Mayraama ha dumma naꞌaa aayo gidanaadan Yihooway O dooriis. Mayraama Beetaliheemeppenne A gita beeta maqidasiyaappe keehi haakkiya guutta kataman Naazireeten deꞌaasu. (Luqaasa 1:26-33 nabbaba.) Mayraama he dumma maatawu doorettidoy aybissee? Kiitanchchay Gabreeli A ‘Xoossan sabettidoogaa’ iyyo yootiis. Mayraama ayyaanaaban kayma gidiyoogee guyyeppe A ba dabbee Elssaabeexissi yootidoban qoncciis. (Luq. 1:46-55) Yihooway tumukka Mayraamo xeelliis, qassi A ammanettido gishshawu, A qoppabeenna he maataa iyyo immiis.

12, 13. Yesuusi yelettido wodenne 40 gallassappe guyyiyan beeta maqidasiyaa A efiido wode, I ayba ogiyan bessiyaagaadan erettidee?

¹² Mayraama guyyeppe Yesuusa yeliyo wode, Yihooway Yerusalaameeninne Beetaliheemen deꞌiya erettida sunttatussi woy deriyaa haariya asatussi hanidabaa erissidi eta bonchchibeenna. Kiitanchchati Beetaliheemeppe gaxan deriyan dorssaa heemmiya hiyyeesa henttanchchatussi qonccidosona. (Luq. 2:8-14) Hegaappe simmin, he henttanchchati biidi yelettida naꞌaa beꞌidosona. (Luq. 2:15-17) Yesuusi hegaadan bonchchettidoogaa beꞌidi, Mayraamanne Yooseefi ay keena ufayttidonaashsha! Yihooway oottiyoobay Dabloosaagaappe ay keena dummatiyaakko qoppa. Yesuusanne A aawaanne aayyiyo beꞌanaadan Seexaanay xoolinttiyaa qoodiyaageeta kiittido wode, Yesuusi yelettidoogaa odoy Yerusalaame asa ubbaa daganttiis. (Maa. 2:3) Yesuusi yelettidoogaa asawu hegaadan odidoogee guyyeppe aynne mooribeenna daro naati hayqqanaadan oottiis.—Maa. 2:16.

¹³ Yesuusi yelettoosappe 40 gallassa gidin, Mayraama 9 kilo meetire gidiyaagaa haakkidi Yerusalaamen deꞌiya beeta maqidasiyan yarshshana koshshees. (Luq. 2:22-24) Mayraama Yooseefaaranne Yesuusaara baydda Yesuusi sinttappe oottanabaa yarshshuwaa ekkiya qeesee dumma ogiyan erissaneeshsha gaada qoppennan waaya aggana. Yesuusi erettiis; shin Mayraama qoppido ogiyan waayi gidana. Simoona giyo, “Xoossau yayyiya xillo” bitaneenne 84-laytta amꞌꞌiyaa, hananabaa yootiya Haanna, he naꞌay yaana geetettida Masiyaa woy Kiristtoosa gidanaagaa yootanaadan Yihooway oottiis.—Luq. 2:25-38.

14. Mayraama Yihoowappe ayba anjjota demmadee?

¹⁴ Mayraama shin? Yihooway ba Naꞌawu koshshiyaabaa Mayraama ammanettada kunttidonne A dichchido gishshawu O eriyoogaa ubbatoo bessidee? Ee bessiis. Xoossay A oottidobaynne haasayidobay Geeshsha Maxaafan xaafettanaadan oottiis. Yesuusi haggaazido heezzu layttanne baggan Mayraama aara issippe yuuyana danddayabeennaba milatees. Geella A amꞌꞌe gidada Naazireeten deꞌennan aggukku. Gidoppe attin, A daro maataa demmennan attikkonne, Yesuusi hayqqiyo wode aara deꞌawusu. (Yoh. 19:26) SHin, guyyeppe geeshsha ayyaanay wodhdhido PHenxxaqosxxe gallassaa gakkanaashin, Mayraama Yesuusa kaalliya haratuura Yerusalaamen deꞌawusu. (Oos. 1:13, 14) A he sohuwan deꞌiya haratuura issippe ayyaanan tiyettennan aggukku. Yaanikko, A Yesuusaara issippe saluwan merinawu deꞌiyo maataa demmaasu giyoogaa. Hegee A ammanettada haggaazidoogawu Xoossay immido gita woyto!

YIHOOWAY BA NAꞌAA NASHSHIIS

15. Yesuusi saꞌan deꞌiyo wode, Yihooway ba Naꞌaa nashshiyoogaa waati bessidee?

¹⁵ Yesuusi ba wodiyan haymaanootiyaa woy deretettaa kaalettiyaageetun bonchchettanawu amottibeenna. SHin, Yihooway dumma dumma wodiyan heezzutoo saluwaappe haasayidoban A nashshidoogee Yesuusa ay keena minttettideeshsha. Yesuusi Yorddaanoosa SHaafan xammaqetti simmin sohuwaara, Yihooway, “Taani siiqiyo ta Na7ai, tana ufaissiyaagee hagaa” yaagiis. (Maa. 3:17) He qaalata siyida hara uri xammaqiya Yohaannisa xalla gidana. Hegaappe simmin, Yesuusi hayqqanaappe issi laytta gidiyaagaa kasetidi, I kiittidoogeetuppe heezzati Yihooway abaa, “Hagee taani siiqiyo tana ufaissiya ta Na7aa; i giyoogaa siyite” yaagishin siyidosona. (Maa. 17:5) Wurssettan, Yesuusi hayqqanaappe amarida gallassaa kasetidi, Yihooway zaarettidi saluwaappe ba Naꞌaa haasayissiis.—Yoh. 12:28.

16, 17. Qoppibeenna ogiyan Yesuusa bonchchiyoogaa Yihooway waatidi bessidee?

¹⁶ Yesuusi Xoossaa cayidobadan asay A wordduwan mootin kawuyyidi hayqqanaagaa erikkonne, ba sheniyaappe, Yihoowa shenee hananaadan woossiis. (Maa. 26:39, 42) I ba Aawaa xallaanappe attin alamiyan erettanawu koyibeenna gishshawu, ‘yeellaa kari genccidi, mittaa bolli misimaariyan xishettidi hayqqiis.’ (Ibr. 12:2) Yihooway hegawu A nashshiyoogaa waati bessidee?

¹⁷ Yesuusi saꞌan deꞌiiddi, saluwan issi wode ba Aawaa matan baayyo deꞌiya bonchchuwawu simmanawu amottiyoogaa yootiis. (Yoh. 17:5) Yesuusi hegaappe aadhdhiyaabaa demmanawu qoppidoogaa bessiyaabi baawa. I saluwan “kaseegaappe xoqqa” bonchchuwaa demmanawu qoppibeenna. SHin Yihooway waatidee? I Yesuusa hayquwaappe denttidi ‘keehi xoqqa’ sohuwaa immiyoogaaninne he wode gakkanaashin ooninne demmibeenna mule hayqqana danddayenna deꞌuwaa immiyoogan mule qoppibeenna ogiyan A bonchchiis!b (Pili. 2:9; 1 Xim. 6:16) Hegee Yesuusi ammanettidi oottidobaa Yihooway keehi nashshiyoogaa bessiyaaba!

18. Nuuni ha alamiyan nashettanawu koyennaadan maaddanabay aybee?

¹⁸ Nuuni ha alamiyan nashettanawu koyennaadan maaddanabay aybee? Yihooway baayyo ammanettida ashkkarata awudekka eriyoogaanne issi issitoo qoppibeenna ogetun eta woytiyoogaa hassaya. Nuuni qoppibeenna ayba anjjota sinttappe demmanaakko ooni erii? SHin haꞌꞌissawu ha iita alamiyaa metuwaaninne paaciyan gencciiddi, ha alameenne I nashshanawu shoobbiyo ayba nashoykka attanaagaa simi ubbatoo hassayoos. (1 Yoh. 2:17) Nu siiqo Aaway Yihooway ‘nuuni oottidobaanne A sunttaa siiqido siiquwaa doganawu worddanchcha gidenna.’ (Ibr. 6:10) Ee, I nuna nashshana; ubbakka nuuni haꞌꞌi qoppana danddayenna ogetun nashshennan aggenna!