Yelagatoo, Ufayssiya Deꞌo Deꞌana Danddayeeta

1, 2. Deꞌuwan laamettana danddayiyoogaa Tona hanotay waati bessii?

TONA giyo issi tamaaree naaꞌꞌantto xekka timirttiyaa agganawu qoppiis. Ayyo aawi baawa, I timirttiyaa darin dosenna, qassi Qeeraanne Woggaa pilmiyaa beꞌiiddi woy ba laggetuura issippe wodiyaa aattees. I makkalibeenna; qassi jallissiyaabay awu amale gidibeenna. I deꞌuwawu halchchidobi baawa. Qassi I Xoossay deꞌiyoogaa sirees. He wode, Yihoowa Markka gidida issi azinaaranne machcheera gayttidi I siriyoobaanne oychchiyoobaa etawu yootiis. Deꞌon Deꞌiyaabay Merettidee? giyoonne Deꞌuwaa Doomettaa—Oychana Koshshiyo Ichashu Oyshata giyo naaꞌꞌu brooshureta eti ayyo immidosona.

² Azinaynne machchiyaa zaarettidi biyo wode, Toni ba qofaa laammiis. I brooshureta keehi nabbabido gishshawu eti dakkotidosonanne kulꞌꞌidosona. I, “Xoossay deꞌana koshshees” yaagiis. I Geeshsha Maxaafaa xannaꞌanawu eeno giis; qassi deꞌuwaa xeelliyaagan loddan loddan A qofay laamettiis. I kase gooba tamaare gidenna, shin simmidi ba timirtte keettan keehi gooba tamaaretuppe issuwaa gidiis. Qassi Tona ooratta ammanuwaabaa erida A dilekteree garamettiis. I hagaadan giis: “Ne xeelaynne ne markkee keehi loꞌꞌiis. Hegee neeni Yihoowa Markkatuura gayttido gishshataassee?” Toni ee gi zaaridi loytti markkattiis. I naaꞌꞌantto xekka timirttiyaa wurssiis; qassi ha wodiyan ubba wode aqinyenne gubaaꞌiyawu oottiyaagaa gididi haggaazees. I siiqiya Aawaa, Yihoowa eridoogan haꞌꞌi ufayttees.—Maz. 68:5.

YIHOOWAYYO AZAZETTITE; INTTE DEꞌOY INJJETANA

3. Yelagata Yihooway zoriyoobay aybee?

³ Nu giddon deꞌiya yelagatoo, Yihooway inttessi wozanappe qoppiyoogaa Tona gakkidabay nuna hassayissees. I intte tumuppe injjenne ufayssiya deꞌo deꞌanaadan koyees. Hegaa gishshawu, I inttena, ‘Intte yelagatettaa layttan inttena Medhdhidaagaa qoppite’ yaagidi zorees. (Era. 12:1) Ha alamiyan, hegee issi issitoo metana danddayees. SHin, hegee danddayettennaba gidenna. Xoossay maaddin, intte intte yelagatettaa laytta xallan gidennan, deꞌo laytta ubban injjetidoogeeta gidana danddayeeta. Leemisuwawu, Israaꞌeelati Hidootaa Biittaa xoonidoogaappenne Daawiti Gooliyaadaara olettidoogaappe nuuni tamaarana danddayiyoobaa qoppite.

4, 5. Israaꞌeelati Kanaane xoonidoogaappenne Daawiti Gooliyaadaara olettidoogaappe nuuni maaddiyaabaa ay tamaarana danddayiyoo? (Doomettan deꞌiya misileta xeella.)

⁴ Israaꞌeelati Hidootaa Biittaa matido wode, Xoossay eti qara olanchcha gidanaadan woy olawu loohanaadan azazibeenna. (Zaa. 28:1, 2) I eti ba azazuwaa azazettananne banan ammanettana koshshiyoogaa yootiis. (Yaas. 1:7-9) Asa xeelan, he zoree loꞌꞌo milatenna! SHin, ba asay Kanaaneta darotoo xoonanaadan Yihooway oottido gishshawu, hegee aybippenne aadhdhiya zore. (Yaas. 24:11-13) Ee, Xoossawu azazettanawu ammanoy koshshees; qassi ammanoy izaawussi muletoo injjetanaadan oottees. Hegee beni wodekka ha wodiyankka tuma.

⁵ Geesay heezzu meetire heera gidiyo Gooliyaada giyo wolqqaama olanchchay olaa miishshaa loytti gixxi uttiis. (1 Sam. 17:4-7) SHin Daawitawu naaꞌꞌubay deꞌees; hegeekka, yambbarshshaanne Xoossaa Yihoowa I ammaniyo ammanuwaa. Ammanoy shuggidoogeetussi, Daawiti eeyya milatidoogee qoncce. Gidoppe attin, eti keehi balidosona! Eeyyay Gooliyaada.—1 Sam. 17:48-51.

6. Nuuni ha huuphe yohuwan ay xannaꞌanee?

⁶ Nuuni ufayttanaadaaninne nu deꞌuwan nuuyyo injjetanaadan maaddiya oyddubata hagaappe kasetiya huuphe yohuwan xannaꞌida. Hegeeti ayyaanaaban nuussi koshshiyaabaa kunttiyoogaa, Xoossay immido laggeta nashshiyoogaa, maaddiya halchchuwaa halchchiyoogaanne Xoossaa asa gidiyoogan nuuni demmido laꞌatettaa xoqqu oottidi xeelliyoogaa. Ane haꞌꞌi ha yohota gujjidi beꞌoos; yaatiyo wode Mazamure 16n deꞌiya amarida maarata pilggana.

AYYAANAABAN INTTESSI KOSHSHIYAABAA KUNTTITE

7. (a) Ayyaanaabaa qoppiya ura waata qonccissuutee? (b) Daawita “saamai” aybee, qassi hegee A waati maaddidee?

⁷ Ayyaanaabaa qoppiya uri Xoossan ammaneesinne issibaa Xoossaagaadan xeellanawu malees. I kaaletuwaa demmanawu Xoossaakko xeelleesinne awu azazettanawu murttees. (1 Qor. 2:12, 13) Daawiti hegawu loꞌꞌo leemiso. I, “Ta GODAU, ta de7uwaa saamai nena; tana koshshiya ubbaa neeni taassi immaasa” yaagidi yexxiis. (Maz. 16:5) He “saamai” Daawiti baqati attiyo soho oottido Xoossaara dabbotido dabbotaa. (Maz. 16:1) Hegaappe denddidaagan, I, ‘Ta shemppoy ufayttees’ yaagiis. Ee, Xoossawu mata dabbo gidiyoogaappe aaruwan Daawita ufayssiyaabi baawa.—Mazamure 16:9, 11 nabbaba.

8. Deꞌuwan tumuppe ufayttanawu maaddiya amaridabati aybee?

⁸ Bantta deꞌuwan ufayssaanne duretettaa koyiyaageeti Daawitaagaadan ufayttokkona. (1 Xim. 6:9, 10) Kanaada biittan deꞌiya issi ishay, “Nuuni deꞌuwan demmana danddayiyoobaappe gidennan, loꞌꞌo imota ubbaa Immiya Xoossaa Yihoowawu immiyoobaappe tumu ufayssay beettees” yaagiis. (Yaaq. 1:17) Ee, intte Yihoowan ammaniyoogeenne awu haggaaziyoogee ufayssaanne woppaa demissana. Ammanuwan intte kaseegaappe aaruwan waani minnana danddayeetii? Intte Yihoowa Qaalaa nabbabana, I medhdhido loꞌꞌiyaabata loytti xeellananne I inttena siiqiyoogaa gujjin, A eeshshatubaa qoppana bessees; hegee intte aara wodiyaa aattiyoogaa mala.—Roo. 1:20; 5:8.

9. Xoossaa Qaalay Daawitaagaadan inttena laammana mala waani eeno gaana danddayeetii?

⁹ Xoossay nuna siiqiyoogee I Aawadan seeriyoogan issi issitoo qonccees. Daawiti hegaa mala keha zoriyaa ekkiis. I, “Tana zoriya GODAA galatais; bilahekka ta wozanai tana seerees” yaagiis. (Maz. 16:7) Daawiti Xoossaa qofaa wotti dentti qoppiis; I hegaa ba qofa oottiis. I Xoossaa qofay bana laammanaadan oottiis, hegaa giyoogee he qofay I loꞌꞌo asa gidanaadan oottiis giyoogaa. Intte ammanuwan hegaadan oottikko, inttekka kaseegaappe aaruwan Xoossaa siiqananne ayyo azazettanawu koyana. Intte ayyaanaabankka kayma gidana. Kirstino giyo michchiyaa hagaadan gaasu: “Taani pilggiyo wodenne nabbabidobaa wotta dentta qoppiyo wode, hegaa Yihooway taassi xaafissidobadan tawu siyettees!”

10. Isiyaasa 26:3y yootiyoogaadan, ayyaanaabaa qoppiyoogee inttena waati maaddanee?

¹⁰ Intte ayyaanaabaa qoppikko, ha alamiyaanne sinttappe A gakkanabaa Xoossaagaadan xeellana. Yihooway inttessi ha maalaalissiya eraanne akeekaa immees. Aybissi? Deꞌuwan keehi koshshiyaabay aybakko intte eranaadan, loꞌꞌobaa kuuyanaadaaninne aynne yayyennan sinttanaa wodiyaa hidootan naaganaadan I koyees! (Isiyaasa 26:3 nabbaba.) Amarkkan deꞌiya Jashuwaa giyo ishay hagaadan giis: “Yihoowaara mata dabbo gididi deꞌiyoogee ubbabaa muletoo maara qoppanaadan oottees.” Hegee daro ufayssaa demissiyoogee qoncce!

TUMU LAGGETA DOORITE

11. Tumu laggeta dooranawu maaddiyaabaa Daawiti waati qonccissidee?

¹¹ Mazamure 16:3 nabbaba. Daawiti loꞌꞌo laggeta waati demmanaakko erees. I Yihoowa siiqiyaageetuura laggetiyoogan keehi ‘ufayttiis.’ ‘Geeshshata’ geetettidaageeti kandduwan geeshshanne suure asata. Hara mazamuraaweekka dooriyo laggeta xeelliyaagan ayyo hegaadan siyettiis. I, “Taani neeyyo yayyiyaageetu ubbaayyoonne ne wogaa naagiyaageetuyyo [lagge]” yaagiis. (Maz. 119:63) Nuuni hagaappe kasetiya huuphe yohuwan beꞌidoogaadan, Yihoowayyo yayyiyaageetunne ayyo azazettiyaageetu giddoppe inttekka loꞌꞌo laggeta darota demmana danddayeeta. Intte laggeti layttan inttenaara lagge gidana koshshenna.

12. Daawitinne Yonaataani loꞌꞌo lagge gididoy aybissee?

¹² Mazamuraawee Daawiti layttan banaara lagge gididaageetu xallaara laggetibeenna. Daawita mata laggetuppe issuwaa yootana danddayay? Neeni Yonaataana qoppana danddayaasa. Daawitanne Yonaataana laggetettay Geeshsha Maxaafan xaafettida keehi ufayssiya laggetettaappe issuwaa. SHin Yonaataani Daawitappe 30 laytta gidiyaagaa bayratiyoogaa neeni eray? Yaanin, eti lagge gidanaadan oottidabay aybee? Xoossan ammaniyoogaa, issoy issuwaa bonchchiyoogaanne eti Xoossaa morkketuura olettiyo wode issoy issuwaa xalatettaa beꞌidoogaa.—1 Sam. 13:3; 14:13; 17:48-50; 18:1.

13. Neeni waatada laggeta gujjana danddayay? Leemisuwaa yoota.

¹³ Daawitaagaadaaninne Yonaataanaagaadan, Yihoowa siiqiyaageetanne an ammaniyoogaa bessiyaageeta siiqiyoogan nuunikka keehi ‘ufayttoos.’ Xoossawu daro layttaa haggaazida Kiira hagaadan gaasu: “Dumma dumma wogan diccida, kumetta saꞌan deꞌiya daro asaara taani laggetaas.” Intte hegaadan oottiyo wode, Xoossaa Qaalaynne ayyaanay asay issippetettan deꞌanaadan oottiyoogaa akeekana.

LOꞌꞌO HALCHCHO HALCHCHITE

14. (a) Loꞌꞌo halchchuwaa intte halchchanaadan aybi maaddana danddayii? (b) Ayyaanaabaa halchchiyoogaa xeelliyaagan issi issi yelagati woygiyoonaa?

¹⁴ Mazamure 16:8 nabbaba. Xoossawu haggaaziyoogee Daawiti aybippenne aattidi xeelliyooba. Intte halchchiyo wode Daawita leemisuwaa kaallana koyikko, qassi Yihooway inttessi koyiyoobaa ubbatoo qoppikko, intte intte deꞌuwan ufayttana. Istiven giyo ishay, “Taani halchchidobawu maaddiyaabaa oottiyoogee, hegaa poliyoogee, yaatada qassi taani giigissidobaa hassayiyoogee tana ufayssees” yaagiis. Haꞌꞌi hara biittan haggaaziya issi Jarmane biitta yelaga ishay, “Taani cimiyo wode, ta kase deꞌuwaa qoppada taani oottido ubbabay tabaa xalla gidin beꞌanawu koyikke” yaagiis. Inttessikka hegaadan siyettees giidi hidootoos. Yaanikko, intte imotata Xoossaa bonchchissanawunne haratussi oottanawu goꞌettite. (Gal. 6:10) Inttessi ayyaanaabaa halchchite; qassi intte hegaa polanaadan maaddana mala Yihoowa woossite. I hegaa mala woosaa zaariyoogan ufayttees.—1 Yoh. 3:22; 5:14, 15.

15. Intte inttessi ayba halchchota halchchana danddayeetii? (“Maaddiya Amarida Halchchota” giya saaxiniyaa xeella.)

¹⁵ Intte ayyaanaaban ayba halchchota halchchana danddayeetii? Gubaaꞌe shiiqotun xuufiyaappe nabbabennan zaaranawu, aqinye gidanawu, Beeteele gelanawu halchchana danddayeeta. Hara biittaa qaalaa goꞌettiya gubaaꞌiyan haggaazanawu hara qaalaa tamaarana danddayeeta. Baaraka giyo ubba wode haggaaziya issi yelagay, “Ubba galla ta wolqqa ubban Yihoowassi oottiyoogaa eriyoogaadan siyettanaadan oottiya ayba oosoynne baawa” yaagiis.

XOOSSAY INTTESSI IMMIDO LAꞌATETTAA NASHSHITE

16. Yihoowa higgetanne maarata xeelliyaagan Daawitawu aybi siyettidee, qassi aybissi?

¹⁶ Mazamure 16:2, 4 nabbaba. Nuuni hagaappe kasetiya huuphe yohuwan beꞌidoogaadan, Xoossay xillotettawu kessido higgetinne maarati nuuni loꞌꞌobaa dosanaadaaninne iitabaa ixxanaadan maaddiyoogan nuna laꞌa kessoosona. (Amo. 5:15) Mazamuraawee Daawiti Yihooway baayyo loꞌꞌotettaa Pultto gidiyoogaa yootiis. Loꞌꞌotettay kandduwan suure gidiyoogaa. Daawiti Xoossaa leemisuwaa kaallanawunne Yihooway siiqiyoobaa siiqanawu baaxetiis. Daawiti Xoossaa xeelan iita gididaba ixxiyoogaakka meezetiis. Hegeetuppe issoy asaa kawushshiyaanne Yihoowayyo bessiya bonchchuwaa immennaadan diggiya eeqaa goynuwaa.—Isi. 2:8, 9; Ajj. 4:11.

17, 18. (a) Worddo goynoy kaalettiyo iitabaa xeelliyaagan Daawiti woygidee? (b) Ha wodiyan asay ‘ba bolli metuwaa darissanaadan’ oottiyaabay aybee?

¹⁷ Beni wode, worddo goynoy shaaramuxiyoogaara gayttidaba. (Hoo. 4:13, 14) Daro asay shaaramuxiyoogan ufayttiyo gishshawu, worddo goynuwaa dosees, shin he goynoy eti ufayttanaadan oottidee? Mulekka oottibeenna! Daawiti, ‘worddo xoossata kaalliyaageeti bantta bolla metuwaa darissiyoogaa’ yootiis. Eti zawi baynna naati daroppe waayettanaadankka oottidosona. (Isi. 57:5) Meqettaa iita gidiyoogaa bessiya hegaa mala hanotaa Yihooway ixxees! (Erm. 7:31) Intte he wodiyan deꞌidaba gidiyaakko, inttena yelidaageeti Yihoowan ammanettidoogaaninne ayyo azazettidoogan intte eta keehi galatanaagee qoncce.

¹⁸ Ha wodiyankka, shaaramuxiyoogaa, haray atto mattuman issi mala gididaageeti mattumaa gayttiyoogaakka worddo goynoy darotoo xaasayidi xeellees. SHin kandduwaa laꞌatetta giyooban ufayttiyoogee kaalettiyoobay beniisappe doommidi laamettibeenna. (1 Qor. 6:18, 19) Asay ‘ba bolli metuwaa darissiyoogaa’ intte beꞌennan aggekketa. Hegaa gishshawu, yelagatoo, saluwan deꞌiya intte Aaway yootiyoobaa siyite. Ayyo azazettiyoogee inttena goꞌꞌiyoogaa loytti ammanite. Iitabaa oottidi guutta wodiyawu ufayttiyoogaappe he iitabaa gaasuwan gakkiya qohoy wolqqaama gidiyoogaa akeekite. (Gal. 6:8) Qommoora abaa denttido, Jashuwaa giyo ishay, “Nu laꞌatettaa nu koyiyo ayba ogiyankka goꞌettana danddayoos, shin A bessenna ogiyan goꞌettiyoogee ufayssaa demissenna” yaagiis.

19, 20. Yihoowan ammaniyaanne ayyo azazettiya yelagata ayba anjjoy naagii?

¹⁹ Yesuusi ba erissiyo ashkkaratussi hagaadan giis: “Intte taani tamaarissiyoogau azazettikko, tumu tana kaalliyaageeta. Intte tumatettaakka erana; qassi tumatettai inttena ailletettaappe kessana.” (Yoh. 8:31, 32) He laꞌatettay worddo haymaanootiyaappe, era xayiyoogaappenne mala ammanuwaappe laꞌa kiyiyoogaara gayttidaba. Qassi I hegaa xallakka gidenna. Nuuni sinttappe “Xoossaa naati ailletettaappe kiyido bonchcho kessaa” yeemuwan naagoos. (Roo. 8:21) ‘Kiristtoosi tamaarissiyoobawu azazettiyoogan’ ha wodiyankka he laꞌatettaa demmana danddayeeta. Yaatiyoogan, intte tumatettaabaa tamaariyoogaa xalla gidennan, an deꞌiyoogan ‘tumatettaa erana.’

²⁰ Yelagatoo, Xoossay inttessi immido laꞌatettaa nashshite. He laꞌatettaa akeekan goꞌettite; yaatiyoogan inttessi wodeppe aybippenne aadhdhiya loꞌꞌobaa demissana danddayiyaabaa intte haꞌꞌi kuuyana. Issi yelaga ishay hagaadan giis: “Yelagatettan laꞌatettaa akeekan goꞌettiyoogee haniya ooso demmiyoogaa woy ekkanawu woykko ekkennan guutta wodiyawu deꞌanawu dooriyoogaa mala gitabaa wodeppe kuuyiyo wode maaddees.”

21. “Tumu de7uwaa” ogiyan intte waani deꞌana danddayeetii?

²¹ Ha ceega alamiyan asi loꞌꞌo deꞌo giyoobaykka ammanttenna, qassi guutta wodiyaassa. Wontto hananabaa nuuni erokko. (Yaaq. 4:13, 14) Yaatiyo gishshawu, akeekanchcha gidiyoogaa bessiyaabaa oottidi “tumu de7uwaa,” hegeekka merinaa deꞌuwaa demissiya ogiyan deꞌiyoogee aybippenne loꞌꞌo. (1 Xim. 6:19) Nuuni he ogiyan baanaadan Xoossay giddennaagee qoncce. Nuuni doorana danddayoos. Yihooway inttessi ‘saama’ gidanaadan oottite. I inttessi immido daro ‘loꞌꞌobaa’ nashshite. (Maz. 103:5) I inttessi daro ‘ufayssaa’ merinawu immana danddayiyoogaa ammanettite.—Maz. 16:11.