Aqo Laggee Haraa Siiqiyo Wode

“Ta azinay yelaga maccaasiyo dosidi tana aggidi biyoogaa yootido wode, hayqqiyaakko ixxabeykke. Ta A gishshawu gaada aggabayidobaa hassayiyo wode, hegee tawu bessennaba.”—Maariyo, Isppeene.

“Ta keettaayiyaa qoppennan deꞌishin tana aggada biido wode, ta wozanay maashi aggiis. Nu amoti, nu hidootatinne nu halchchoti ubbay hada kiyidosona. Unꞌꞌettiyaaba ubbaappe laꞌa kiyidabadan taayyo siyettido gallassati deꞌiyaaba gidikkonne, wodhdha eqqada keehi unꞌꞌettays.”—Biila, Isppeene.

AQO DEꞌUWAN ammanettennaagee keehi qohiyaaba. Issi issi aqo laggeti maarotaa oychidi simmiya bantta aqo laggeta atto giidi issippe deꞌiyoogeenne bantta dabbotaa ooraxissiyoogee tuma.a Gidikkokka, aqo laggeti shaahettin woy issippe deꞌinkka, bantta aqo laggee kaddidoogaa eridaageeti kayyottiyoogee attennaba. Hegeeti bantta meqqida wozanaa waati koolanee?

MAADDANA DANDDAYIYA GEESHSHA MAXAAFAA XIQISETA

Qohoy gakkido daro aqo laggeti keehi mishettikkokka, Geeshsha Maxaafaappe minttettuwaa demmidosona. Xoossay eta afuttaa beꞌiyoogaanne etawu qarettiyoogaa eridosona.—Milkkiyaasa 2:13-16.

“Tana hirggai woriyo wode, neeni tana woppu oottada ufaissaasa.”—Mazamure 94:19.

Biili hagaadan giis: “He xiqisiyaa nabbabiyo wode, issi qarettiya aaway ba naꞌaassi oottiyoogaadan Yihooway ta sahuwaa qaretan irxxissiyaabadan taayyo siyettees.”

“Ammanettiyaageetuyyo neeni ammanettiyaagaa.”—Mazamure 18:25.

I azinay daro aginawu ammanettennaagaa gididi takkido Karmeena hagaadan gaasu: “Ta azinay ammanettiya asa gidibeenna. SHin Yihoowan ammanttays. I tana awudenne aggiigenna.”

“Xoossaa intte woossiyo woosa ubban . . . inttena koshshiyaabaa ubbau woossiteppe attin, issibaukka hirggoppite. Qassi asa eratettaa ubbaappe aadhdhiya Xoossaa sarotettai intte wozanaanne intte qofaa nagana.”—Piliphphisiyuusa 4:6, 7.

Saasha, “Ha xiqisiyaa zaara zaarada nabbabays” yaagaasu. Gujjadakka, “Taani zaara zaara woossin Xoossay taayyo saruwaa immiis” gaasu.

Qommoora etabay odettido ubbawu issi issitoo hidootay xayiis. SHin eti Xoossaa Yihoowan ammanettidosonanne A Qaalaappe wolqqaa demmidosona. Biili hagaadan giis: “Hara ubbabay xayidaba milatido wode, ta ammanoy ta deꞌoy ufayssiyaagaa gidanaadan oottiis. Guutta wodiyawu ‘taani haiquwaa milatiya xumaa giddoora biikkokka,’ Xoossay tanaara deꞌees.”—Mazamure 23:4.

a Atto gaanaa woy agganaakko qofaa demmanawu, “Aqo Laggee Ammanettennaagaa Gidiyo Wode” giya Masqqala 8, 1999, Beegottite! (Amaarattuwaa) maxeetiyan kiyida qofaa xeella.

Genccanawu Nena Aybi Maaddanee?

Minttettiya xiqiseta wotta dentta qoppa.

Biili hagaadan giis: “Ta hanotaara maayiya qofa ubban malaataydda, koyro Iyyooba maxaafaa, hegaappe simmin Mazamure maxaafaa nabbabaas. Ha maxaafata xaafidaageeti taagaadan azzanidoogaanne unꞌꞌettidoogaa taani akeekaas.”

Mazamuriyaa ezggiyoogan minetta.

Karmeena, “Qammi xiskkoy ixxiyo wode, mazamuriyaa ezggays. Hegee tana keehi minttettiis” yaagaasu. Daaneeli, “Gitaariyaa kaaꞌiyoogaa tamaaraas, qassi muuziqay sarotettaa demmanaadan tana maaddiis” yaagiis.

Neeyyo siyettiyaabaa haratussi yoota.

Daaneeli hagaadan giis: “Tawu siyettiyaabaa haratussi yootikke. SHin taayyo loꞌꞌo laggeti deꞌiyo gishshawu etaara ubbatoo haasayays. Taayyo siyettiya toohuwaa etaara haasayiyoogaaninne etayyo xaafiyoogan eta toossays. Hegee tumuppe maaddiis.” Saasha qassi hagaadan gaasu: “Nu so asaa maaddidoogee tawu keehi koshshidaba. Ta aayyiyaa ubbatoo ta miyyiyan deꞌawusu. Ta iyyo haasayana koyiyo wode ubban ezggawusu. Ta aawaykka taani hirggenaadaaninne woppu gaanaadan, qassi loddan minettanaadan tana maaddiis.”

Qanxxennan woossa.

Karmeena, “Ubbatoo woossays. Xoossay ta yootiyoobaa siyiyoogaaninne tana maaddiyoogan tana aggibeennabadan tawu siyettiis. Wayssiya wodiyaa ubban Xoossaakko shiiqaas” yaagaasu.