Nuuni Merinawu Deꞌanawu Merettida

Asay merinawu deꞌanawu koyiyoy aybissee? He koshshay nuussi deꞌanaadan Xoossay oottidoogaa Geeshsha Maxaafay nuuyyo yootees. (Eranchchaa 3:11) “Xoossai siiqo” gidiyoogaakka Geeshsha Maxaafay yootees. (1 Yohaannisa 4:8) Siiqiya Xoossay nuuni merinawu deꞌanawu amottanaadan oottidi, he amuwaa nuuni polennaadan oottees giidi qoppiyoogee bessiyaabee?

Ooninne hayqqanawu koyenna. Geeshsha Maxaafay hayqoy iita ‘morkke’ gidiyoogaa yootees. (1 Qoronttoosa 15:26) Issoti issoti yelagatettan hayqqana, harati qassi daro layttaa deꞌana, shin wurssettan ubbaykka hayqqana. Daro asay hayquwaabaa qoppiyo wode yayyees. He morkee muleera xayanee? Hegee tumuppe hananee?

NUUNI MERINAWU DEꞌANAADAN MERETTIDOOGAA BESSIYA NAQAASHAA

Asay hayqqanaadan Xoossay mule halchchibeennaagaa eriyaakko neeni garamettikkii? Geeshsha Maxaafan deꞌiya Doomettaabaa maxaafay Xoossay saꞌan asay merinawu deꞌanaadan halchchidoogaa bessiya naqaashaa yootees. Xoossaa Yihoowaya asay ufayttidi deꞌanaadan koshshiya ubbaabaa saꞌan medhdhiis. Yaatidi I koyro bitaniyaa Addaama medhdhidi Edene gannatiyan A wottiis. Hegaappe simmin, “Xoossai ba medhdhido ubbabaakka xeelliis; xeellidi daro lo77o gididoogaa be7iis.”—Doomettaabaa 1:26, 31.

Xoossay Addaama wottiyoobi baynna asa oottidi medhdhiis. (Zaarettido Wogaa 32:4) Addaame machchiyaa Hewaanakka guuggiyaaninne bollan aybinne wottiyoobi baynnaaro gidada merettaasu. Yihooway etayyo hagaadan giis: “Yelettite; corattite; ha sa7aa kumitenne haarite; abbaa moliyaa, saluwaa kafuwaanne biittaa bolli woxxi qaaxxiya, paxa de7iya mereta ubbaa haarite.”—Doomettaabaa 1:28.

Addaamenne Hewaani naati saꞌaa kumanawu wodiyaa koshshees. Xoossay koyro halchchidoogaadan, Hewaana naata yelana, qassi he naati saꞌan asi kumana gakkanaashin naata yelana. (Isiyaasa 45:18) Addaameenne Hewaana naaꞌꞌu woy heezzu yeleta xalla beꞌanawu deꞌikko, Yihooway he hidootaa etawu immiis gi qoppiyoogee bessiyaabee?

Meheenne doꞌay etassi haarettanaadan yootidobaakka qoppa. Mehiyawunne doꞌawu sunttaa sunttanaadan Addaamessi odettiis, qassi hegawu daro wodiyaa koshshees. (Doomettaabaa 2:19) SHin, mehiyaanne doꞌaa haarana giyoogee I etabaa erananne eta waati heemmanaakko akeekana giyoogaa. Hegee etassi sunttaa sunttiyoogaappe keehi daro wodiyaa koshshees.

Yaatiyo gishshawu, saꞌaa kumanaadaaninne mehiyaa doꞌaa haaranaadan Xoossay azazidoogee koyro azinaynne machchiyaa merinawu deꞌanaadan merettidoogaa bessees. Addaamee keehi daro layttaa deꞌiis.

ETI DARO LAYTTAA DEꞌIDOSONA

Beni asaa baree ha wodiyan nu bariyaappe keehi dariyoogaa Geeshsha Maxaafay yootees. Hagaadan gees: “Addaamee muleera 930 laittaa” deꞌiis. Hara usuppun asati 900 layttaappe daruwaa deꞌidoogaakka yootees! Eti Seeta, Heenoosa, Qaynaana, Yaareeda, Maatusaalanne Noha. Eti ubbay Nohe wode Bashshaa Haattaappe kase deꞌidosona;—Nohee Bashshaa Haattay yaanaappe kase 600 layttaa deꞌiis. (Doomettaabaa 5:5-27; 7:6; 9:29) Eti waanidi daro layttaa deꞌana danddayidonaa?

He asati wottiyoobi baynna Addaameenne Hewaana deꞌido wodiyaappe daro takkennan yelettidosona. Eti daro layttaa deꞌidoy hegaassa gidennan aggenna. SHin daro layttaa deꞌiyoogee wottiyoobi baynna asa gidiyoogaara waani gayttii? Qassi hayqoy waani xayanee? Zaaruwaa demmanawu, nuuni cimiyoynne hayqqiyoy aybissakko koyro erana koshshees.