Neeni “Aminꞌꞌi” Giyoogaa Yihooway Nashshees

YIHOOWAY nu goynuwaa nashshees. I ba ashkkarati haasayiyoobaa ‘ezggidi siyees;’ qassi ay keena guuttaba gidikkonne, nuuni A sabbanawu oottiyo ubbabaa I nashshees. (Mil. 3:16) Leemisuwawu, nuuni geella darotoo giyo issi qaalaa qoppa. He qaalay “aminꞌꞌi” giyoogaa. Yihooway ha qaalaakka nashshii? Ee, nashshees! Aybissakko akeekanawu, “aminꞌꞌi” giyoogee woygiyoogaakko, qassi Geeshsha Maxaafan he qaalay gelido ogiyaa ane pilggoos.

“ASAI UBBAI, ‘AMIN77I!’ YAAGO

“Aminꞌꞌi” giyoogee “hano,” woy “gido” giyoogaa. He qaalay “ammanettiyaagaa gida,” “tumanchcha gida” giya birshshettay deꞌiyo Ibraawetto qaalaappe yiis. He qaalay issi issitoo pirddaara gayttidaban geliis. Issi uri caaqqi simmidi, I giidobay tuma gidiyoogaa qonccissanawunne hegee kaalettiyoobaa ekkanawu “amin77i” yaagees. (Qoo. 5:22) I asaa sinttan “amin77i” giyo wode, gelido qaalaa naaganawu hegee awu mino gaaso gidees.—Nah. 5:13.

“Amin77i” giyo qaalaa goꞌꞌawu keehi loꞌꞌo leemisoy Zaarettido Wogaa shemppo 27n deꞌiyaagaa. Israaꞌeelati Hidootaa Biittaa geli simmidi, Higgiyaa zaarettiyo wode siyanawu Eebaala Deriyaappenne Gariizaana Deriyaappe gidduwan shiiqidosona. Eti yootiyoobaa siyana xallawu gidennan, eti Higgiyaa ekkidoogaa yootanawu yan shiiqidosona. Eti yaatidoy, azazettennan aggiyo wode gakkiyaabay nabbabettido wode “amin77i!” giyoogaana. (Zaa. 27:15-26) Daro shaꞌan qoodettiya attumaasay, maccaasaynne naati bantta qaalaa xoqqu oottidi zaariyoogaa qoppa! (Yaas. 8:30-35) Eti he gallassi haasayido qaalata mule dogibeennaagee qoncce. Qassi eti bantta qaalaa naagidosona; ayssi giikko, Geeshsha Maxaafay hagaadan gees: “Yaasu paxa de7ido wode ubbaaninneYaasuppe simmin de7idi, Xoossai Israa7eelatussi oottido ooso ubbaa erida cimatu wode ubban Israa7eelati GODAASSI goinnidosona.”—Yaas. 24:31.

Yesuusikka odettidabay tuma gidiyoogaa qonccissanawu “aminꞌꞌi” giis; shin I yaagidoy dumma ogiyaana. Yesuusi odidobaassi zaaranaassa gidennan, tumabaa yootiyoogaa erissanawu ‘aminꞌꞌi’ yaagiis (Leemisuwawu, Maatiyoosa 5:18n he qaalay Wolayttattuwan “tumaa” geetettidi birshshettiis). Issi issitoo, “aminꞌꞌi aminꞌꞌi” giyoogan he qaalaa I zaari zaaridi odiis. (Maa. 5:18; Yoh. 1:51) I yaatiyoogan, I yootiyoobay tuma gididoogaa hegaa siyiyaageeti ammananaadan oottiis. Yesuusi Xoossay qaalaa gelidobaa ubbaa polanaadan sunttettiday A gidiyo gishshawu, hegaadan ammanettidi haasayiis.—2 Qor. 1:20; Ajj. 3:14.

“ASAI UBBAI, ‘AMIN77I’ GIIDI, GODAA GALATIIS”

Israaꞌeelatikka Yihoowa sabbiyoonne woossiyo wode “aminꞌꞌi” giidosona. (Nah. 8:6; Maz. 41:13) Woosaa siyiyaageeti woosay wuriyo wode “aminꞌꞌi” giyoogan odettidabaa maayiyoogaa bessoosona. Yaatiyoogan, shiiqida ubbay issippe goynnoosona, qassi hegaadan Yihoowawu goynniyoogan ufayttidosona. Kawuwaa Daawiti Yihoowa TaabootaaYerusalaameppe ehiido wode hanidabay hegaa. Hegaappe simmin bonchchido baalan, 1 Hanidabaa Odiya 16:8-36n deꞌiya, mazamure meran giigida woosaa I wozanappe woossiis. SHiiqidaageeta he qaalay denttettin, “Asai ubbai, ‘Amin77i’ giidi, GODAA galatiis.” Ee, eti issippe Yihoowawu goynniyoogan ufayttidosona.

Koyro xeetu layttan deꞌida Kiristtaanetikka Yihoowa sabbiiddi “aminꞌꞌi” giidosona. Geeshsha Maxaafaa xaafidaageetikka bantta dabddaabbiyan he qaalaa darotoo xaafidosona. (Roo. 1:25; 16:27; 1 PHe. 4:11) Saluwan deꞌiya meretati Yihoowa bonchchanawu, “Amin77i. Xoossaa galatai gakko” giyoogaa Ajjuutaa maxaafaykka yootees. (Ajj. 19:1, 4) Beni Kiristtaaneti darotoo bantta shiiqotun woosaappe simmin “aminꞌꞌi” goosona. (1 Qor. 14:16) SHin, he qaalay aybakko eti qoppennan coo zaari zaaidi giyooba gidenna. Eti wozanappe “aminꞌꞌi” gaanawu woosaa siyananne akeekana koshshees.

NEENI “AMINꞌꞌI” GAANA KOSHSHIYOY AYBISSEE?

Yihoowa ashkkarati “aminꞌꞌi” waati giidaakko nuuni tamaari simmidi, woosaa wurssettan hegaadan giyoogee aybissi koshshiyaakko akeekana danddayoos. Nuuni nu buzo woosaa wurssettan “aminꞌꞌi” giyoogee, nu woosay wozanappe gidiyoogaa bessees. Qassi issi uri daro asaa sinttan woossiyo wode nuuni cenggurssaa sissennankka “aminꞌꞌi” giyoogee, geetettidabaa maayiyoogaa bessees. Nuuni “aminꞌꞌi” gaana koshshiyoy aybissakko hara ginata ane beꞌoos.

Nuuni minnidinne beegottidi goynnoos. Nuuni woossiyo wode nu giyoobaa xallan gidennan, nu hanotankka Yihoowawu goynnoos. Nuuni “aminꞌꞌi” giyo wode wozanappe gidanaadan koyiyo gishshawu, hegee nuuni nu qofaa naagidi loytti ezgganaadan nuna maaddees.

Hegee ayyo goynniyaageeta issuwaa oottees. Daro asaa sinttan woossiyo woosay nuuni kumetta gubaaꞌee siyiyoobaa loytti ezgganaadan maaddees. (Oos. 1:14; 12:5) Nu ishanttuuranne nu michchonttuura issippe “aminꞌꞌi” giyo wode, nuuni kaseegaappe aaruwan issuwaa gidoos. Nuuni cenggurssaa sissidi woy sissennan issippe “aminꞌꞌi” giyo wode, nuuni oychchidobaa Yihooway nuussi oottanaadan nu woosay A denttettana danddayees.

Issi michchiyaa silkkiyan shiiquwaa kaallaydda woosawu hokka bessawusu — “Aminꞌꞌi”giyoogee Yihooway sabettanaadan oottees

Nuuni Yihoowa sabboos. Yihooway nuuni awu goynnanawu oottiyo ubbabaa loytti akeekees. (Luq. 21:2, 3) I issibawu nuna denttettidabaanne nu wozanaabaa beꞌees. Nuuni shiiquwaa silkkiyan kaallana koshshiyo wodekka, “aminꞌꞌi” giyoogaa Yihooway xoqqu ootti xeelliyoogaa ammanettana danddayoos. Nuuni “aminꞌꞌi giyo wode, shiiquwan deꞌiyaageetuura issippe Yihoowa sabboos.

Nuuni “aminꞌꞌi” giyoogaa goꞌꞌay guutta milatana danddayees, shin hegee goꞌꞌennaba gidenna. Geeshsha Maxaafaa qofaa yootiya issi Insaykilopidee Xoossaa ashkkarati “ha issi qaalaa goꞌettiyoogan, ammanettiyoogaa, loytti nashshiyoogaa, qassi bantta wozanan deꞌiya hidootaabaa” yootana danddayiyoogaa qonccissees. Nuuni “aminꞌꞌi” giyo wode ubban Yihooway ufayttanaadan amottoos.—Maz. 19:14.

NEENI AWUDEKKA “AMINꞌꞌI” GAANA KOSHSHII?

“Aminꞌꞌi” giyo qaalay keehi koshshiya qaala. Gidoppe attin, woossiya uri giido issibay bala gidikko shin? Nuuni “aminꞌꞌi” geennan aggana koshshii? Koshshennan aggana danddayees. Nu ubbaa inxxarssay issi issitoo baliyoogaa Yihooway erees, qassi I hegaa qoodenna. Yaatiyo gishshawu, nuuni boriyoogaa aggidi izaawu koshshaa qoppidi, I giidobaa “aminꞌꞌi” gaanawu kuuyana danddayoos.

Hara baggaara qassi, nuuni ammanenna uri woossiyo wode, cenggurssaa sissidi gidin sissennankka gidin “aminꞌꞌi” gookko. Hegaa mala woosaa woossiyoosan nuuni deꞌikko shin? Leemisuwawu, nuuni issi sohuwan deꞌishin ammanenna uri woossanaadan oyshettana danddayees. Woy nu son deꞌiya ubba asay Yihoowa Markka waayi gidana, yaanin so asawu huuphe gidida ammanenna uri woossanawu kuuyana danddayees. Nuuni ay oottana koshshii?

Nu hegaa mala hanotan, bonchchuwan coꞌꞌu gaana danddayoos. Nuuni he wode “aminꞌꞌi” gookko; woy woosaa wode haratuura kushiyaa ohettiyoogan he woosan shaahettiyoogaa bessokko. Nuuni nu wozanan woossana danddayoos, shin harati nuuni etaara woossiyoobadan qoppenna mala cenggurssaa sissiiddi “aminꞌꞌi” gookko. Asay eqqikko, nuuni eqqanawu woy agganawu kuuyana danddayoos. Eqqiyoogee woy garbballiyaappe hokki bessiyoogee goyno gidenna. Ubba Kiristtaaneti hegaa mala hanotan ay oottanaakko kuuyana bessees; qassi hegaa mala wodetun issi uri kuuyidoban ooninne borana bessenna.

Qommoora beꞌido hanotati nuuni “aminꞌꞌi” giyoogaa Yihooway xoqqu ootti xeelliyoy aybissakko gujji qonccissoosona.