‘Intte Pooꞌoy Pooꞌo’
1. Nuussi waatiyo aawatettay deꞌii?
1 Away mokkidi wullana gakkanaassi, pooꞌoy Xoossaa Yihooway sabettanaadan oottees. SHin Yesuusi bana kaalliyaageeti ekkanaadan shoobbidoy hara pooꞌo; hegeekka “de7o poo7uwaa.” (Yoh. 8:12) Ayyaanaaban he akeekaa demmiyoogee gita aawatettaa gujjiya dumma imota. Yesuusi, “Intte poo7oi asa sinttan poo7o” yaagidi azaziis; hegee harata maaddiyaaba. (Maa. 5:16) Ayyaanaaban xumay sikkido ha wodiyan, he pooꞌuwaa pooꞌissana bessees; qassi hegee ha wodiyaagaadan keehi koshshi erenna! Nuuni pooꞌuwaa pooꞌissiyoogan Kiristtoosa leemisuwaa waatidi kaallana danddayiyoo?
2. Ayyaanaabaa pooꞌuwaa pooꞌissiyoogee keehi koshshiyoogaa Yesuusi waatidi bessidee?
2 Sabbakiyoogan: Yesuusi ba wodiyaa, ba wolqqaanne baayyo deꞌiyaabaa goꞌettidi asaayyo son, gutaran, deriyaa bollan, giishin asay deꞌiyo ubbasan tumaa pooꞌuwaa pooꞌissiis. Ayyaanaabaa tumuppe akeekanaadan maaddiyoogee demissiyo goꞌꞌaa i akeekiis. (Yoh. 12:46) Yesuusi, daro asau yootana mala bana kaalliyaageeti ‘saꞌau pooꞌo’ gidanaadan oottiis. (Maa. 5:14) Eti bantta shoorotuyyo loꞌꞌobaa oottiyoogaaninne ayyaanaabaa tumaa yootiyoogan bantta pooꞌuwaa pooꞌissoosona.
3. Nuuni tumaa pooꞌuwaa wozanappe nashshiyoogaa bessana danddayiyoy ayba ogiyaanee?
3 Xoossaa asay “poo7uwan de7iya asaadan poo7uwan” hemettiyo maataa xoqqu oottidi xeelloosona; qassi asay deꞌiyoosan ubban sabbakoosona. (Efi. 5:8) Ooso keettan woy timirtte keettan shemppiyo wode, hara asay beꞌana danddayiyoosan Geeshsha Maxaafaa woy an baasettida xuufeta nabbabiyoogee, Geeshsha Maxaafaa tobbanau hanotay injjetanaadan oottees. Hagaadan oottiyoogan, issi yelaga michiyaa banaara tamaariyaageetuppe issinno xinaatiyaa doomissaasu; qassi 12 maxaafaa etayyo immaasu.
4. ‘Nu pooꞌuwaa pooꞌissiyoogee’ loꞌꞌo eeshshaa gujjiyaaba gididoy aybissee?
4 Loꞌꞌo Oosuwaa Oottiyoogan: Nu pooꞌoy pooꞌanaadan oottiyoogee nu galla galla deꞌuwaakka gujjees. (Efi. 5:9) Oottiyoosan, timirtte keettaaninne asaara gayttiyo harasan, nu loꞌꞌo eeshshay qonccidi beettees; qassi hegee Geeshsha Maxaafaa tumaa asau yootanau hanotay injjetanaadan oottees. (1 PHe. 2:12) Leemisuwau, ichashu laytta naꞌaa loꞌꞌo eeshshay a tamaarissiyaara a yelidaageeta xeeganaadan oottiis. A, “Loꞌꞌuwaa iitaa loyttidi shaakkidi eriya hagaa mala naꞌaa taani mule beꞌa erikke!” yaagaasu. Ee, nu haggaazoynne nu loꞌꞌo eeshshay asay “de7o poo7uwaa” ekkanaadaaninne nu Xoossay sabettanaadan oottees.