Intte Naati Giigetti Uttidonaa?
1. Tamaare naati giigetti uttana koshshidoy aybissee?
1 Timirttiyaa doommiyo ooratta layttay matattiiddi deꞌees. Intte naata kaseegaappe dumma metoynne sugettay gakkanaagee sirissenna. Hara baggaara qassi, eti ‘tumatettaayyo markkattanau’ hanotay injjetana danddayees. (Yoh. 18:37) Yaatin eti giigetti uttidonaa?
2. Giigettanau intte naati ay erana koshshii?
2 Yelettido biittaara gayttida baalatanne eeqaa goynuwaara gayttida baalata bonchiyoogee ay ay gujjiyaakko, qassi hegeeta bonchiyoogee bala gididoy aybissakko intte naati shaakkidi eriyoonaa? Xoqqa timirttiyaa kaallanaadan, mattuman banttappe dummatiya uraara laggetanaadaaninne ushshaa uyanaadan woy jallissiya xaliyaa goꞌettanaadan gakkiya sugettau intte naati giigettidonaa? Bantta ammanuwaara moggennabaa bantta haymaanootee diggiyooba giyoonaayye, eti ammaniyoobaa waati qonccissiyaakko eriyoonaa?—1 PHe. 3:15.
3. Yelidaageeti bantta So Asaa Goynuwaa omarssaa bantta naati giigettanaadan maaddanau waatidi goꞌettana danddayiyoonaa?
3 So Asaa Goynuwaa Omarssaa Goꞌettite: Layttaa giddon intte naata kaseegaappe dummatiya metoy gakkiyo wode, etaara tobbana danddayiyoogee qoncce. Timirttiyaa doommanaappe kase, intte naata timirtte keettan gakkana danddayiya metuwaa tobbanau baaxetiyoogee intte naati banttanan ammanettanaadan oottees. So Asaa goynuwaa omarssaa issuwan woy hegaappe daruwan he allaalliyaa aybissi tobbekketii? Timirttiyaa doommanaagaa qoppiyo wode naata keehippe unꞌꞌissiyaabi aybakko eta oychana danddayeeta. Naati gitatidi akeekaa gujjiyo wode, aadhida layttatun denttido allaalliyaa zaarettana danddayeeta. (Maz. 119:95) Intte asttamaaredan, timirttiyaabaa zoriya uradan woy tamaaredan hanidi oottiyoobaa, meezetiyo prograamiyan gujjana danddayeeta. Geeshsha Maxaafaappe waati zaaranaakko, qassi Akeekissiyoogaa giyaanne Yelagati Oychiyo Oyshaa giya maxaafaa waati goꞌettanaakko intte naata tamaarissite. Meezetiyo prograamiyan, issi aayyiyaa ba naati Yihoowa Markka gidiyoogaa timirttee doomettiyo wode ooratta asttamaaretuyyo yootanau giigettanaadan maaddausu.—Wochiyo Keelaa, Tisaase 15, 2010, sinttaa 3-5 (Amaarattuwaa) xeella.
4. Aadhida erancha gidida yelidaageeti ay oottiyoonaa?
4 Kiristtaane yelagatu bolli ha wurssetta gallassatun gakkiya metoy keehippe ‘waayissiyaagaa.’ (2 Xim. 3:1) Aadhida erancha gidida yelidaageeti bantta naata gakkana metuwaa kaseti qoppidi, naati he metuwaa xooni kiyanau giigettanaadan maaddoosona. (Lee. 22:3) Timirtte keettay dooyettanaappe kase, intte naati giigettidaageeta gidanaadan maaddanau intte danddayiyo ubbabaa oottite.