‘Xoossaa Sunttay Geeshsha Gido’
1. Haggaazo layttaa 2012 woradaa shiiquwaa prograamiyau huuphe yohoy woygiyaagee, hegau baaso gididay aybee?
1 Nuuni Ubbaa Haariya, Yihoowa sunttan xeegettiyoogee ayba gita maatee! Nuuni ba sunttan xeegettanaadan oottidaagee Xoossaa; qassi 1931ppe doommidi, Yihoowa Markkata geetettidi dumma gidida Yihoowa sunttan erettoos. (Isi. 43:10) Xoossau mexi issi naꞌa gidida Yesuusi Xoossaa sunttaa xoqqu oottidi xeelliis; ba tamaarissido leemiso woosan koyro xekkan he sunttaabaa woossanaadan yootiis. (Maa. 6:9) Yesuusi tamaarissido he qaalati, 2012 haggaazo layttaa woradaa shiiquwaa prograamiyau huuphe yohoy baasettidoba. He huuphe yohoy, “Xoossaa Sunttay Geeshsha Gido” yaagiyaagaa.
2. SHiiquwan ay tamaaranau yeemotti naagiyoo?
2 Nuuni Tamaaranabaa: “Kumetta Wodiyau Haggaaziyaageeta Gidiyoogaadan Xoossaa Sunttaa Erissite” giya Qeeraa gallassi shiiqiya haasayay kumetta wodiyaa haggaazoy ufayssiya deꞌo oge gididoy aybissakko qonccissees. Oyddu wolqqaama piretuppe haakkanaadan nuna maaddiya, “Yihoowa Sunttaa Borissennaadan Naagettite” giya simppoozemiyan shiiqiya haasayaakka siyana. “Xoossaa Sunttay Geeshsha Gidana Koshshiyo Gaasuwaa” giya haasayan, asay koshshay baynnaagaa gidiyo wode mishettidi sabbakanaadan nuna aybi maaddanee?, qassi nu haggaazuwan muruta gidanaadan aybi maaddii? giya oyshatuyyo zaaruwaa demmana. Xoossaa sunttaa nu qofan, haasayan, kuuyiyoobaaninne eeshshan geeshsha oottana danddayiyoy ayba ogiyaanakko, Woggaa Gallassi shiiqiya, oyddu haasayay deꞌiyo simppoozemiyan siyana. “Yihooway Armmageedoonan Ba Gita Sunttaa Geeshshana” yaagiya dere haasayan oorattati goꞌettana.
3. Nuuyyo ayba gita maatay deꞌii, ha shiiqoy nuna ayba ogiyan maaddanee?
3 Matan Yihooway ba sunttaa geeshshana. (Hiz. 36:23) Hegee gakkanaashin, Yihoowa geeshsha sunttaara gayttida ubbabaa nuussi danddayettida keena ubban oottiyo gita maatay deꞌees. Xoossaa sunttan xeegettanaadan imettida gita aawatettaa kiyanaadan ha woradaa shiiquwaa prograamee nuna ubbaa maaddanaagaa ammanettoos.