Haggaaziyo Maataa Xoqqu Oottidi Xeellite
1. Alamiyan deꞌiya daroti nu haggaazuwaa aybidan xeelliyoonaa?
1 Seexaanay haariyo alamiyan deꞌiya daroti nu haggaazuwaa ‘eeyyatettadan’ xeelloosona. (1 Qor. 1:18-21) Nuuni naagettana xayikko, hegaa mala iita xeelay nuuni hidootaa qanxxanaadaaninne dochanaadan oottana danddayees. (Lee. 24:10; Isi. 5:20) Yihoowa Markka gidiyo maataa nuuni xoqqu oottidi xeelliyoy aybissee?—Isi. 43:10.
2. Haggaazoy “geeshsha” ooso geetettana danddayiyoy aybissee?
2 “Geeshsha” Oosuwaa: Kiitettida PHauloosi haggaazuwaa “geeshsha” ooso giis. (Roo. 15:15, 16) Haggaazoy “geeshsha” ooso gididoy ayba ogiyaanee? Haggaaziyoogee nuna ‘geeshsha gidida Xoossaa,’ Yihoowaara “issippe oottiya” oosanchata oottees; qassi he oosoy a sunttay geeyanaadan oottiya oosotuppe issuwaa. (1 Qor. 3:9; 1 PHe. 1:15) Yihooway nu sibikate oosuwaa ‘galataa yarshshuwaadan’ xeelliyo gishshau, haggaazoy nu goynuwan keehi koshshiyaaba.—Ibr. 13:15.
3. Mishiraachuwaa sabbakiyoogee boncho ooso gididoy aybissee?
3 Mishiraachuwaa sabbakiyoogee guutta asatuyyo imettida boncho ooso. He oosoy kiitanchatuyyo imettidaba gidiyaakko, eti ufayttidi muruta ogiyan oottana. (1 PHe. 1:12) SHin, Yihooway he gita maataa, “urqqaappe merettida miishsha” gidida, polo gidenna asaa naatuyyo immiis.—2 Qor. 4:7.
4. Nuuni haggaazuwaa xoqqu oottidi xeelliyoogaa bessana danddayiyoy ayba ogiyaanee?
4 Kaseyiyooba: Nuuni he maataa bonchiyo gishshau, nu deꞌuwan keehi ‘loꞌꞌobadan’ xeelliyoobatuppe issoy haggaazuwaa. (Pili. 1:10) Hegaa gishshau, saaminttan saaminttan haggaazanau wodiyaa keeroos. Muuziqaa miishshaa kaaꞌiyoogan keehi erettida citaara kaaꞌiya uri he maataa xoqqu oottidi xeellees; qassi he citaara asaa sinttan muuziqaa kaaꞌana haniyo paydo ubban, kasetidi loyttidi giigettees. Hegaara issi mala hanotan, nuuni “tumatettaa qaalaa suuretettan” yootanaunne ‘tamaarissiyo’ hiillaa wodiyaappe wodiyan dichanau, haggaazuwau kiyanaappe kase giigettoos.—2 Xim. 2:15; 4:2.
5. Nu haggaazuwaa nashshiyay oonee?
5 Daro asaa zaaroy loꞌꞌo gidenna gishshau, hidootaa qanxxoppite. Nu oosuwaa nashshiya daro asay nu moottan deꞌiyoogaa hassayite. Gidikkokka, nuuni nashettanau koyiyoy asaana gidenna. Nuuni xoqqu oottidi xeellana bessiyoy Yihoowa xeelaa; qassi i nuuni minnidi oottiyoobaa nashshees.—Isi. 52:7.