Sabbakanaadan Oottiya Tammanne Naaꞌꞌu Gaasota

Nuuni mishiraachuwaa sabbakiyoynne asaa tamaarissiyoy aybissee? Nuuni hegaadan oottiyo waanna gaasoy ashkke asay deꞌuwau efiya ogiyan baana mala maaddanaassee? (Maa. 7:14) Kaallidi deꞌiyaagaadan hegee koyro gaaso gidikkokka, nuuni sabbakanaadan oottiya waannabay hegaa gidenna. Kaallidi deꞌiya 12 gaasotuppe nuuni sabbakanaadan oottiya waanna gaaso gaada neeni qoppiyoogee awugee?

1. Sabbakiyoogee asay bashshaappe attanaadan maaddees.—Yoh. 17:3.

2. Nagaranchati bantta ogiyaappe simmanaadan maaddees.—Hiz. 3:18, 19.

3. Geeshsha Maxaafaa hiraagay polettanaadan oottees.—Maa. 24:14.

4. Xoossaa xillotettaa qonccissiyaaba. Xoossay nagaranchata xayssiyo wode, ooninne i eti bantta nagaraappe simmanaadan yootennan xayssiis gaana danddayenna.—Oos. 17:30, 31; 1 Xim. 2:3, 4.

5. Yesuusa suuttan wozettida asaa ayyaanaaban maaddiyoogan Xoossaa azazuwaa polana mala maaddees.—Roo. 1:14, 15.

6. Nuuni suuttaa acuwan oyshettennaadan oottees.—Oos. 20:26, 27.

7. Nuuni atotettaa demmanau koshshiyaabaappe issuwaa.—Hiz. 3:19; Roo. 10:9, 10.

8. Nuuni nu shooruwaa siiqiyoogaa bessiyaaba.—Maa. 22:39.

9. Yihoowayyoonne a Naꞌaayyo azazettiyoogaa bessiyaaba.—Maa. 28:19, 20.

10. Nuuni goynniyo ogiyaappe issuwaa.—Ibr. 13:15.

11. Nuuni Xoossaa siiqiyoogaa bessiyo oge.—1 Yoh. 5:3.

12. Yihoowa sunttay bonchettanaadan oottees.—Isi. 43:10-12; Maa. 6:9.

Nuuni haggaazanaadan oottiya gaasoti hageetu xalla gidokkona. Leemisuwau, sabbakiyoogee nu ammanuwaa minttees, qassi Xoossaara oottiyo maatay nuussi deꞌanaadan oottees. (1 Qor. 3:9) Gidikkokka, sabbakanaadan oottiya waanna gaasoy 12tta payduwan deꞌiyaagaa. Asay nuuni yootiyoobaa siyin siyana xayin, sabbakiyoogee Xoossaa sunttay bonchettanaadan oottees, qassi Yihooway bana boriyaagau zaaranau immana mala maaddees. (Lee. 27:11) Nuuni ‘tamaarissiyoogaanne mishiraachuwaa yootiyoogaa yaa gujjanaadan’ oottiya loꞌꞌo gaasoy deꞌees.—Oos. 5:42.