Nuuni Kaseyiyoobaa

1. Yesuusi haggaazoy keehippe koshshiyaaba gidiyoogaa bessidoy ayba ogiyaanee?

¹ Yesuusi kaseyidobay haggaazuwaa. I bau danddayettida keenan daro asau sabbakanau Palesttina biittaa kumettan daro xeetu kilo meetiriyaa hemettidi minni oottiis. I haggaazuwau daro wodiyaa immanaunne ba qofaa an wottanau sima deꞌuwaa deꞌiis. (Maa. 8:20) Sahettida asaa pattanau i takkanaadan oottanau daro asay malido wode, i: “Taani hara kataman de7⁠iya asaukka Xoossaa kawotettaa wonggeliyaa mishiraachchuwaa yootanau bessees. Aissi giikko, Xoossai tana kiittidoogee hegaassa” yaagiis.—Luq. 4:43.

2. Haggaazoy Yesuusau keehippe koshshiyaaba gididoy aybissee?

² Haggaazoy Yesuusau keehippe koshshiyaaba gididoy aybissee? A keehippe qofissiyay Yihoowa sunttay geeyiyoogaa gidido gishshataassa. (Maa. 6:9) I saluwan deꞌiya ba Aawaa siiqiyo gishshau a sheniyaa polanaunne a azazuwaa ubbaa naaganau keehippe koyiis. (Yoh. 14:31) Hegaa bollikka i asau wozanappe qoppees; qassi eta maaddanau koyiis.—Maa. 9:36, 37.

3. Nuuni haggaazuwan xeelaa wottiyoogaa waatidi bessana danddayiyoo?

³ Yesuusa Leemisuwaa Kaallite: Alamee nu wodiyaa keehippe xayssiyo gishshaunne qofay wora simmanaadan oottiya darobaa giigissiyo gishshau, Yesuusaagaa mala xeelaa oyqqidi deꞌiyoogee metana danddayees. (Maa. 24:37-39; Luq. 21:34) Hegaa gishshau, sabbakiyo oosuwaa ubbatoo oottanau prograamiyaa kessiyoogaaninne giigettiyoogan, keehippe koshshiyaabaa nuuni shaakki erana koshshees. (Pili. 1:10) Nuuni sima deꞌuwaa deꞌanaunne alamiyaa kumetta hanotan goꞌettennaadan naagettanau baaxetoos.—1 Qor. 7:31.

4. Ha wodiyan kaseyana bessiyaabaa ubbatoo kaseyiyoogee keehippe koshshiyoy aybissee?

⁴ Aadhida erancha asi daro wodee baynnaba gidikko, kaseyiyoobaa doorees. Leemisuwau, wolqqaama gotee matidoogaa i erikko, ba soo asau issi issibaa giigissanaunne ba shoorota akeekissanau ba wodiyaanne wolqqaa goꞌettees. Keehippe koshshennabata hegaappe simmidi oottees. Armmageedoona gotee denddanau attida wodee wuri wuri bees. (Sof. 1:14-16; 1 Qor. 7:29) Nunanne nuuni yootiyoobaa siyiyaageeta ashshanau, gubaaꞌiyan gidin gubaaꞌiyaappe kareera gidin, nu huuphiyaanne nu timirttiyaa naagana koshshees. (1 Xim. 4:16) Ee, nuuni attanaagee nu haggaazuwaa ubbatoo kaseyiyoogaara gayttidaba!