Yihooway Nuna Ha Oosuwau Loohissiiddi Deꞌees
1. Yihooway asau issi oosuwaa immiyo wode, harabaa ay immii?
1 Yihooway asau issi oosuwaa immiyo wode, eti hegaa waati oottanaakko maaddiyaabaakka immees. Leemisuwau, Nohee kase ootti erenna, markkabiyaa keexxanaadan Yihooway yootido wode, i waatidi keexxanaakkokka ayyo yootiis. (Doo. 6:14-16) Ashkke gidida, dorssaa henttancha Muusee Israaꞌeela cimatukkonne Paaroonakko baanaadan kiittido wode, Yihooway a, “Taani nena haasayanau maaddana; neeni gaanabaanne taani nena tamaarissana” yaagidi minttettiis. (Kes. 4:12) Nuuni mishiraachuwaa sabbakanaadan immido oosuwaukka, Yihooway kaaletuwaa immiis. I nuna Tiꞌokiraase Haggaazo Timirtte Keettaaninne Haggaazo SHiiquwan ha oosuwau loohissiiddi deꞌees. Nuuni ha loohissuwan waani goꞌettana danddayiyoo?
2. Tiꞌokiraase Haggaazo Timirtte Keettan waanidi goꞌettana danddayiyoo?
2 Tiꞌokiraase Haggaazo Timirtte Keettaa: Ubba shiiquwan beettanaappe kase prograamiyaa maaran giigettite. Yaatidi, tamaareti bantta kifiliyaa waati shiishshiyaakko akeekiyo wode, intte hara asaa waati tamaarissanaakko eraa gujjeeta. (Lee. 27:17) Haggaazo Timirtte Keettaa maxaafay keehi goꞌꞌiyo gishshau shiiquwaa ekkidi yiite. Tamaareti kifiliyaa shiishshi simmin, timirtte keettaa bollaara xeelliyaagee appe issi issi qofaa yootiyo wode, intte goꞌettanau koyiyo qofaa malaatite; qassi ushachanne haddirssa baggaara deꞌiya sohotun masttooshaa xaafite. SHin ha timirtte keettan goꞌettiyo waanna ogee, kifileta shiishshiyoogaa. Neeni mazggabettadii? Neeyyo kifilee imettiyo wode, loytta giigetta; qassi imettiya zoriyaa oosuwan peeshsha. Haggaaziyo wode neeni tamaaridobaa goꞌetta.
3. Nuuni Haggaazo SHiiquwan goꞌettanau aybi maaddii?
3 Haggaazo SHiiquwaa: Ha shiiquwan goꞌettiyo xuufeta kasetidi nabbabiyoogaaninne qofaa immanau giigettiyoogan ha shiiquwan tamaariyoobaa loyttidi akeekana danddayoos. Nuuni qantta qofaa immiyoogee, daro asay qofaa immanaadan oottees. Ootti-besota loytti kaallite; qassi intte haggaazuwan murutanaadan oottiya qofa ubbaa goꞌettite. Inttena haggaazuwan goꞌꞌiya qofaa oyqqida Nu Kawotetta Haggaazuwaa maxeeteta goꞌettanau mata sohuwan wottite.
4. Xoossaa loohissuwan nuuni loytti goꞌettana koshshiyoy aybissee?
4 Noheyyoonne Muuseyyo imettida oosuwaadan, saꞌa ubban sabbakanaadan nuuyyo imettida oosoykka deexo ooso. (Maa. 24:14) Nuuni Gita Asttamaariyaa Yihoowan ammanettiyaabanne a loohissuwan loytti goꞌettiyaaba gidikko, hegaa muruta ogiyan oottana danddayoos.—Isi. 30:20.