2015 Tiꞌokiraase Haggaazo Timirtte Keettay Nuna Qara Asttamaare Oottees
1 Mazamuraawiyaa Daawiti, “Abeet GODAU, ta wogga zaallau, tana wozidaagoo, ta doonaappe kiyiya qaalainne ta wozanaa qofai nena ufaissiyaabaa gido” yaagidi xaafiis. (Maz. 19:14) Nuunikka gubaaꞌiyaaninne haggaazuwan tumaa yootiyo maataa xoqqu oottidi xeelliyo gishshawu, nuuni haasayiyoobay Yihoowa ufayssiyaagaa gidanaadan koyoos. Tiꞌokiraase Haggaazo Timirtte Keettay Yihooway nuna haggaazuwawu loohissiyo ogetuppe issuwaa. Kumetta saꞌan 111,000ppe dariya gubaaꞌetun deꞌiyaageeti ha timirtte keettan loohoosona. Ha loohissoy kumetta saꞌan deꞌiya dumma dumma hanotan diccida ishatinne michoti mishiraachuwaa hiillan, asay ammananaadan oottiya ogiyaaninne xalan yootiyaageeta gidanaadan maaddiis.—Oos. 19:8; Qol. 4:6.
2 Ha timirtte keettan 2015n tamaaranaban Xoossaa Qaalaa Gidduwaa Erissuwaa, qassi Geeshsha Maxaafaappe Tobbiyo Huuphe Yohota giyo bukleetetun deꞌiya qofaappe ekettidabay deꞌees. Hegaa bollikka, Geeshsha Maxaafaa nibaabiyaa ayfe qofaanne Kifile Paydo 1 shiishshiyo wodee kaseegaappe guuxxiis. He laamettidabaanne timirtte keettan deꞌiya kifileta waati shiishshanaakko yootiya qofaa hagaappe kaallidi deꞌiya menttotun beꞌana.
3 Geeshsha Maxaafaa Ayfe Qofaa: Ha kifiliyaa shiishshiya ishay he saaminttan nabbabido Geeshsha Maxaafaa shemppotuppe demmido, maaddiyaanne ufayssiya issi qofaa naaꞌꞌu daqiiqan yootees. Imettida wodiyaa aattennan maaddiya qofaa shiishshanawu, loytti giigettana koshshees. Hegaappe simmin 30 sokonddiyan woy hegaappe guuxxiya wodiyan, gubaaꞌiyan deꞌiyaageeti he saaminttaa Geeshsha Maxaafaa nibaabiyaappe demmido minttettiya qofaa kaseegaadan usuppun daqiiqan yootoosona. Nu qofaa 30 sokonddiyan qonccissanawu loytti giigettananne nuna seerana bessees; shin hegaadan oottiyoogee nuuni loohiyo issi oge. Qassi yaatiyoogee harati bantta buzo xinaatiyan demmido qofaa yootanawu wode demmanaadan maaddees.
4 Kifile Paydo 1: He kifilee heezzu daqiiqan woy hegaappe guuxxiya wodiyan shiiqees; qassi nabbabiyoobay kaseegaadan darenna. He kifiliyaa nabbabi shiishshiya ishati, harati qofaa akeekanaadan maaddiya ogiyan shiishshanawu, qaalata suure xeegiyoogaa bantta qaalaa xoqqu oottidi zaaretti zaarettidi meezetana koshshees. Nabbabiyoogee goynuwaara gayttidaagan nuna keehi maaddiyaaba gidiyo gishshawu, Yihoowa asay ubbay loytti nabbabanawu baaxetana bessees. Nu naatuppe daroti geeshshi nabbabiyaageeta gidiyoogee keehi ufayssiyaaba! Bantta naati hegaadan loytti nabbabanaadan tamaarissiya yelidaageeta galatiyoogee bessiyaaba.
5 Kifile Paydo 2: Ichashu daqiiqan shiishshiyo ha kifilee issi micheessi imettees. A bawu imettida huuphe yohuwaa goꞌettana koshshees. Huuphe yohoy ekettidoy Xoossaa Qaalaa Gidduwaa Erissuwaa giyo bukleetiyaappe gidikko, haggaazo moottan hegaa waatidi oosuwan peeshshanaakko bessawusu. Qassi i kifilee Geeshsha Maxaafaappe Tobbiyo Huuphe Yohota giyo bukleetiyaappe ekettidaba gidikko, hegan deꞌiya xiqiseta goꞌettada loytta qonccissana bessees. He huuphe yohuwaa loytti qonccissiya hara xiqisetakka goꞌettana danddayettees. Timirtte keettaa xomoosiya ishay o maaddiya issi michiyo maddabees.
6 Kifile Paydo 3: Ichashu daqiiqan shiishshiyo ha kifilee issi ishawu woy issi micheeyyo imettana danddayees. Ha kifilee issi micheeyyo imettiyo wode, Kifile Paydo 2 shiishshiyoogaadan shiishshawusu. Issi ishawu imettiyo wode, a kifilee Geeshsha Maxaafaappe Tobbiyo Huuphe Yohota giyo bukleetiyaappe ekettidaagaa gidikko, hegaappe amarida xiqiseta goꞌettidi he shiiquwan deꞌiyaageeta qoppidi haasayan shiishshana koshshees.
7 Kifile Paydo 3 Ishantti SHiishshiyo Ooratta Ogiyaa: He kifilee Xoossaa Qaalaa Gidduwaa Erissuwaa giyo bukleetiyaappe ekettidaagaa gidikko, ishay ba soo asaara goynniyoogaa woy haggaazuwawu giigettiyoogaa bessiya ogiyan ootti-besuwan shiishshana koshshees. Timirtte keettaa xomoosiya ishay darotoo kifilee imettido ishaa maaddiya uraanne eti ayba ogiyan ootti-bessana koshshiyaakko yootees. A maaddiya uri a soo asa woy gubaaꞌiyan deꞌiya issi isha gidana koshshees. Ha huuphe yohuwaa loytti qonccissiya hara xiqisetakka goꞌettana danddayettees. Issi issitoo ha kifiliyaa gubaaꞌe cimay shiishshana danddayees. Cimati banttana maaddiya uraanne ootti-bessiyo ogiyaa bantta huuphe doorana danddayoosona. Gubaaꞌe cimati bantta soo asaara woy gubaaꞌiyan deꞌiya hara ishaara he kifiliyaa loyttidi shiishshiyo wode, hegee gubaaꞌiyan deꞌiya ubbaa minttettiyaaba.
8 Zoriyaa: Kifile Paydo 1y, Paydo 2ynne Paydo 3y wuri simmin, timirtte keettaa xomoosiya ishay Tiꞌokiraase Haggaazo Timirtte Keettan Goꞌetta giyo maxaafaappe issi issibaa yootidi naaꞌꞌu daqiiqan eta galateesinne zorees. Timirtte keettaa xomoosiya ishay tamaaree shiishshiyo huuphe yohuwaa yootiyo wode, a zoriyo ginaa yootenna. SHin tamaaree ba kifiliyaa shiishshi simmin, asttamaaree wozanappe galati simmidi a zoriyo ginaa yootana koshshees; qassi tamaaree ba kifiliyaa loytti qonccissanaadan maaddiday aybakko woykko ayba ogiyan loytti qonccissana danddayiiddi aggidaakko kehatettan yootees.
9 Tamaareta ayba ginan zoranaakko qonccissiya qofay tamaariyawu deꞌiya Haggaazo Timirtte Keettaa maxaafan sinttaa 79ppe 81n deꞌees. Tamaaree ba kifiliyaa shiishshi simmin, timirtte keettaa xomoosiya ishay he tamaariyaa maxaafan malaatees, qassi tamaare meezetanaadan odettidabaa meezetidaakkonne oychees. Gubaaꞌe shiiquwaappe simmin woy hara wode galatananne maaddiya issi issi qofaa yootana danddayettees. Issi issi tamaariyawu huuphiyan huuphiyan immiyo zoree tamaaree ayyaanaaban diccanaadan maaddiya ogedan xeellana bessiyooba.—1 Xim. 4:15.
10 Kifile Paydo 1, Paydo 2nne Paydo 3 ekkidaageeti imettida wodiyan wurssana xayikko, xomoosiya ishay woy a maaddiya ishay hiillan etawu erissana danddayees. Tamaaree doommido qofaa qashuwaa wurssosaara madirakiyaappe wodhiyoogan azazettiyoogaa bessana danddayees.—Haggaazo Timirtte Keettaa maxaafaa sinttaa 282, mentto 4 xeella.
11 Ha timirtte keettan mazggabettana danddayiya ubbay Haggaazo Timirtte Keettan mazggabettanaadan minttettoos. (Haggaazo Timirtte Keettaa maxaafaa sinttaa 282, mentto 6 xeella.) Ha timirttee keettan tamaariyoobay Yihoowa ashkkarati Kawotettaa mishiraachuwaa asaa ammanttiya ogiyan, bonchuwaaninne siiquwan sabbakanaadaaninne tamaarissanaadan maaddees. Yihooway tiꞌokiraase timirtte keettaappe goꞌettiya ubbay a bonchiyo gishshawu keehi ufayttiyoogee erettidaagaa!—Maz. 148:12, 13; Isi. 50:4.
[Sinttaa 5n deꞌiya misiliyaa qonccissuwaa]
Zoriyaa siyada oosuwan peeshshiyoogan ayyaanaaban dicca