Geeshsha Maxaafaa Intte Xannaꞌissiyoogeeti Xammaqettanaadan Maaddite

1. Yesuusi erissiyo ashkkarati keehi cora asay waatanaadan odidonaa?

KEEHI cora attumaageetinne maccaageeti Yerusalaame biidosona. Eti dumma dumma gidida daro biittaa asanne dumma dumma daro doonaa haasayoosona. He gallassi maalaalissiyaabay haniis. Amarida Ayhudati qoppennan hara biittaappe yiidaageetu doonaa haasayidosona! Hegee shiiqida cora asay maalaalettanaadan oottikkonne, Ayhudatinne kiitettida PHeexiroosi asa ubbawu yootidobay hegaappe aaruwan maalaaliyaaba. He cora asay Yesuus Kiristtoosan ammaniyoogaa bessikko eti attana danddayiyoogaa tamaaridosona. Siyidobay eta wozanaa keehi denttettiis. Hegaa gishshawu asay hagaadan oychchiis: “Yaanin nuuni ai oottanee?” PHeexiroosi hagaadan giidi zaariis: “Intte huuphiyan huuphiyan . . . xammaqettite.”—Oos. 2:37, 38.

2. Ha huuphe yohuwan ay xannaꞌanee? (Koyro sinttan deꞌiya misiliyaa xeella.)

² Kaallidi hanidabay keehi maalaalissiyaaba. He galla 3,000 gidiya asay xammaqettidi Kiristtoosi erissiyo ashkkara gidiis. Hegee Yesuusi bana kaalliyaageeti oottanaadan azazido erissiyo ashkkara oottiyo gita oosuwawu doometta. A kaalliyaageeti ha wodiyankka he oosuwaa oottoosona. Ha wodiyan, nuuni issi ura amarida saatiyawu haasayissidi I xammaqettanaadan maaddana danddayokko. Issi xinaatee xammaqettanaadan oottiyoogee aginata woy qassi laytta woy hegaappe daro wodiyaa ekkana danddayees. Neeni issi uraa Geeshsha Maxaafaa xannaꞌissaydda deꞌiyaaba gidikko, issi uri Kiristtoosi erissiyo ashkkara gidanaadan maaddanawu oottiyo oosoy minnidi oottiyoobaa gidiyoogaa neeni loytta eraasa. Nuuni Geeshsha Maxaafaa xannaꞌissiyo uri xammaqettanaadan maaddanawu nu waatana danddayiyaakko ha huuphe yohuwan xannaꞌana.

GEESHSHA MAXAAFAA INTTE XANNAꞌISSIYOOGEETI TAMAARIYOOBAA OOSUWAN PEESHSHANAADAN MAADDITE

3. Maatiyoosa 28:19, 20n odettidaagaadan, xinaateti xammaqettanawu waatana bessii?

³ Geeshsha Maxaafaa xinaatee xammaqettanaappe kase, Geeshsha Maxaafay tamaarissiyoobaa oosuwan peeshshana koshshees. (Maatiyoosa 28:19, 20 nabbaba.) Xinaateti tamaariyoobaa oosuwan peeshshiyo wode, Yesuusi leemisuwan yootido, ba keettaa shuchchaa bolli keexxanawu loytti bookkida “wozannaama asa” mala gidoosona. (Maa. 7:24, 25; Luq. 6:47, 48) Xinaateti tamaariyoobaa oosuwan peeshshanaadan waati maaddana danddayiyoo? Nuuni oottana danddayiyo heezzubaa ane beꞌoos.

4. Xinaateti xammaqettanawu minni oottana mala nuuni waati maaddana danddayiyoo? (“Ne Xinaatee Halchchanaadaaninne Hegaa Polanaadan Maadda” giya saaxiniyaakka xeella.)

⁴ Ne xinaatee halchchuwaa kessanaadan maadda. Neeni hegaadan oottana koshshiyoy aybissee? Ha leemisuwaa qoppa: Neeni haaho sohuwaa gediyan manddaraydda deꞌiyaaba gidikko, shaafati woy dereti deꞌiyo keehi loꞌꞌiyaasan takki gaanawu kuuyana danddayaasa. He wode, ogee ay keena haahokko akeekakka. Hegaadan, ne xinaatee mata wode gakkana danddayiyo halchchota halchchiyo wode, I xammaqettanawu halchchidoogaa polana danddayiyaakkonne akeekana. Ne xinaatee halchchanaadan maaddanawu Merinawu Ufayttada Deꞌa! giya maxaafan “Halchchanabaa” giya saaxiniyaa goꞌetta. Halchchiyoogee ne xinaatee tamaariyoobaa oosuwan peeshshanaadan waati maaddiyaakko issi issi timirttiyaa wurssiyo wode tobbite. Ne xinaatee halchchanaadan neeni koyiyo hara halchchoy deꞌikko, “Harabaa” giya sohuwan xaafana danddayaasa. Ne xinaatiyaara I mata wode gakkana danddayiyoonne hegaappe takkidi gakkana danddayiyo halchchota tobbiyo wode he saaxiniyaa ubbatoo goꞌetta.

5. Marqqoosa 10:17-22y yootiyoogaadan, issi dure bitanee ay oottanaadan Yesuusi odidee, qassi aybissi?

⁵ Ne xinaatee ba deꞌuwan gitabaa laammanaadan maadda. (Marqqoosa 10:17-22 nabbaba.) Issi dure bitanee ba aqo ubbaa bayzziyoogee ayyo deexxiyaaba gidiyoogaa Yesuusi erees. (Mar. 10:23) SHin, Yesuusi he bitanee ba deꞌuwan gitabaa laammanaadan yootiis. Aybissi? Yesuusi A siiqido gishshaassa. Xinaatee koshshiyaaban laamettana danddayenna giidi nuuni qoppiyo gishshawu, tamaariyoobaa I oosuwan peeshshanaadan issi issitoo A minttettennan aggana danddayoos. Asay ceega asatettaa laammiyoogeenne ooratta asatettaa maayiyoogee wode ekkiyaaba gidana danddayees. (Qol. 3:9, 10) SHin xinaatee laammana koshshiyaabaa neeni sohuwaara aara haasayikko, I laammiyoogaa sohuwaara doommana danddayees. Hegaadan haasayiyoogee neeni awu qoppiyoogaa bessees.—Maz. 141:5; Lee. 27:17.

6. Nu xinaatee ba qofaa yootanaadan nuuni oychchana koshshiyoy aybissee?

⁶ Issibaa xeelliyaagan nu xinaatee ba qofaa yootanaadan nuuni A oychchiyoogee keehi koshshiyaaba. Yaatiyoogee ne xinaatiyawu siyettiyaabaanne I ammaniyoobaa eranaadan maaddees. Neeni hegaadan ubbatoo oottiyoogee, ammananawu awu deexxana danddayiyaabaa metootennan tobbanaadan maaddees. Merinawu Ufayttada Deꞌa! giya maxaafan xinaatee ba qofaa qonccissanaadan maaddiya daro oyshati deꞌoosona. Leemisuwawu, timirtte 04n hagaadan gees: “Neeni Yihoowa sunttaa xeesiyo wode awu aybi siyettees gaada qoppay?” Timirtte 09n hagaadan gees: “Neeni woossanawu koyiyo amaridabati aybee?” Ha oyshata zaariyoogee ne xinaatiyaa koyro heeran metana danddayees. Maxaafan deꞌiya xiqisetubaanne misiletubaa I yuushshi qoppanaadan loohissiyoogan A maaddana danddayaasa.

7. Nuuni haratu deꞌuwan hanida tumubaa waati loytti goꞌettana danddayiyoo?

⁷ Ne xinaatee waatana koshshiyaakko akeekiyo wode, I hegaa oottanaadan A minttettanawu deꞌuwan hanida tumubaa yoota. Leemisuwawu, ne xinaatee shiiqota shiiqanawu metootikko, timirtte 14n “Pilgga” giya shaahuwan Yihooway Tana Maaddiis giya biiduwaa A bessana danddayaasa. Merinawu Ufayttada Deꞌa! giya maxaafan daro timirttetun, “Loytta Akeeka” woy “Pilgga” giya shaahuwan deꞌuwan hanida hegaa malabay deꞌees.b “I hegaa oottana danddayikko neenikka oottana danddayaasa” giyoogan ne xinaatiyaa hara uraara geeddarissenna mala naagetta. Xinaatee hegaa bawu kuuyana koshshees. Geeshsha Maxaafay tamaarissiyoobaa oosuwan peeshshanaadan biiduwan beꞌido ura maaddidabaa yoota. Geella neeni keehi koshshiya xiqisiyaa qonccissana woy A maaddidabaa yootana danddayaasa. Yihooway A waati maaddidaakko danddayettida ubban qonccissa.

8. Nu xinaatee Yihoowa siiqanaadan waati maaddana danddayiyoo?

⁸ Ne xinaatee Yihoowa siiqanaadan maadda. Waatada? Yihoowa eeshshatubaa ne xinaatee loytti eranaadan maaddana danddayiyo ogiyaa koya. Yihooway bana siiqiyaageeta maaddiya ufayttiya Xoossaa gidiyoogaa ne xinaatee akeekanaadan maadda. (1 Xim. 1:11; Ibr. 11:6) Xinaatee Yihoowa azazota azazettiyoogee A goꞌꞌanaagaa yoota, qassi hegee Yihooway A siiqiyoogaa bessiyaaba gidiyoogaa awu qonccissa. (Isi. 48:17, 18) Ne xinaatee Yihoowa kaseegaappe aaruwan siiqiyo wode, koshshiyaaban laamettanawu I keehi koyana.—1 Yoh. 5:3.

HARA YIHOOWA MARKKATUURA NE XINAATIYAA ERETISSA

9. Marqqoosa 10:29, 30 maaran, issi uri xammaqettidi erissiyo ashkkara gidanawu issi issibaa aggibayanaadan aybi maaddana danddayii?

⁹ Nuuni Geeshsha Maxaafaa xannaꞌissiyo uri xammaqettanawu ba goꞌꞌaa aggibayana koshshees. Qommoora abaa denttido dure bitaniyaagaadan, amarida xinaateti bantta aquwaa aggibayiyoogee koshshana danddayees. Eti oottiyo oosoy Geeshsha Maxaafay yootiyo maaratuura maayettennaba gidikko, eti oosuwaa laammiyoogee koshshana danddayees. Yihoowa siiqennaageetuura laggetiyoogaa aggiyoogee darotussi koshshana danddayees. Harati qassi Yihoowa Markkata ixxiya eta soo asay aggibayidoogeeta gidana danddayoosona. Hegaadan aggibayiyoogee issi issi asawu deexxana danddayiyoogaa Yesuusi yootiis. SHin I bana kaalliyaageeti azzanana koshshennaagaa yootiis. Yihooway ayyaanaaban so asaa gidida siiqiyaageeta immiyoogan eta woytana. (Marqqoosa 10:29, 30 nabbaba.) He loꞌꞌo imotan ne xinaatee goꞌettanaadan waata maaddana danddayay?

10. Manweli yootidobaappe neeni ay tamaaray?

¹⁰ Ne xinaatiyawu mata lagge gida. Neeni ne xinaatiyawu qoppiyoogaa bessiyoogee keehi koshshiyaaba. Aybissi? Mekisiiko biittan deꞌiya Manweli giidobaa akeeka. Geeshsha Maxaafaa I xannaꞌiyo wode, A xannaꞌissiyaagee waati maaddidaakko yootiis. I hagaadan giis: “Nuuni xinaatiyaa doommanaappe kase, ubba galla I ta hanotaabaa tana oychchees. Taani yayyennan aybanne aara haasayanaadan I maaddiis. I tawu wozanappe qoppiyoogaa akeekaas.”

11. Nu xinaateti nunaara wodiyaa aattiyoogan waati goꞌettana danddayiyoonaa?

¹¹ Yesuusi bana kaalliyaageetuura wodiyaa aattidoogaadan, ne xinaatetuura wodiyaa aatta. (Yoh. 3:22) Ne xinaatee ba deꞌuwan issi issiban laamettiyoogaa doommikko, ne son tukkiyaa uyanaadan woy qumaa maanaadan woy aginan aginan kiyiya brodkasttingiyaappe issuwaa beꞌanaadan shoobbana danddayaasa. Ne xinaatiyaa laggetinne eta soo asay worddo haymaanootiyaara gayttida baalata bonchchiyo wode, I boorasana danddayiyo gishshawu neeni he galla A shoobbiyaakko keehi ufayttana danddayees. Uugandda biittan deꞌiya Kazibewi hagaadan giis: “Taani xannaꞌiyo wode Yihoowabaa eridoogaappe aaruwan tana xannaꞌissiyaagaara wodiyaa aattiyoogan loyttada eraas gaada qoppays. Yihooway ba asawu keehi qoppiyoogaanne eti keehi ufayttiyoogaa taani akeekaas. Taanikka ta deꞌuwan hegaadan ufayttanawu koyays.”

12. Xannaꞌissiyo wode dumma dumma aassiyaageeta efaana koshshiyoy aybissee?

¹² Xannaꞌissiyo wode dumma dumma aassiyaageeta shoobba. Xannaꞌissanawu biyo wode nuuni nurkka biyoogee woy ubbatoo issi ura xallaa efiyoogee metennaba giidi issi issitoo qoppana danddayoos. Yaatiyoogee metennaba gidikkonne, dumma dumma aassiyaageeta nunaara issi issitoo efiyoogee nu xinaatiyaa keehi maaddana. Moldova biittan deꞌiya Dimitri hagaadan giis: “Ta xannaꞌiyo wode tana xannaꞌissanawu yiida aassiyaageeti ubbay issibaa keehi dumma dumma ogiyan qonccissoosona. Hegee taani tamaariyoobaa oosuwan peeshshana danddayiyo hara ogeta akeekanaadan maaddiis. Taani daro ishanttuuranne michchonttuura gayttido gishshawu, shiiquwaa koyro biido wode daro yayyabeykke.”

13. Nu xinaatee shiiqota shiiqanaadan nuuni maaddana bessiyoy aybissee?

¹³ Ne xinaatee shiiqota shiiqanaadan maadda. Aybissi? Yihooway baassi goynniyaageeti issippe shiiqanaadan azazido gishshataassa; qassi hegee nu goynuwaa shaaho. (Ibr. 10:24, 25) Hegaa bollikka, gubaaꞌiyan deꞌiya nu ishanttinne michchontti nuuyyo so asa mala. Nuuni etaara shiiqiyoogee keehi malꞌꞌiya qumaa issippe miyoogaa mala. Neeni ne xinaatee shiiqota shiiqanaadan maaddikko, xammaqettanaadan maaddana danddayiya keehi koshshiyaabaa I oottanaadan maaddaasa. SHin I shiiqota shiiqiyoogaa doommanawu metootana danddayees. Ne xinaatee shiiqota shiiqennaadan diggiya ay metonne xoonanaadan Merinawu Ufayttada Deꞌa! giya maxaafay A waati maaddana danddayii?

14. Nu xinaatee shiiqota shiiqanaadan waati denttettana danddayiyoo?

¹⁴ Ne xinaatiyaa maaddanawu Merinawu Ufayttada Deꞌa! giya maxaafan timirtte 10 goꞌetta. He maxaafay kiyanaappe kase, amarida aassiyaageeti ha timirttiyaa bantta xinaatetuura tobbanaadan oychchida. Eti bantta xinaateti shiiqota shiiqanaadan keehi maaddiya loꞌꞌo maxaafa gidiyoogaa yootidosona. Ne xinaatiyaa shiiqota shoobbanawu timirtte 10 gakkanaashin naagana koshshennaagee qoncce. I sohuwaara shiiqota shiiqanaadan shoobba, qassi ubbatoo aggennan shiiqanaadan minttetta. Ubba xinaatetu metoy issi mala gidenna. Yaatiyo gishshawu, ne xinaatiyawu koshshiyaabaa akeeka, yaatada neeni A maaddana danddayiyoobi deꞌiyaakkonne qoppa. I shiiqiyoogaa doommanaashin guuttaa takkikko hidootaa qanxxoppa. Danddayanchcha gidada A ubbatoo shoobba.

NE XINAATEE YAYYENNAADAN MAADDA

15. Nu xinaatiyaa aybi yashshana danddayii?

¹⁵ Yihoowa Markka gidiyoogee nena guuttaa yashshidoogaa hassayay? Neeni sooppe soo baada sabbakanawu mule danddayennabadan qoppennan waayi aggana. Woy qassi ne soo asay woy laggeti nena eqettana gaada ne yayyennan waayi aggana. Yaatikko, neeni Geeshsha Maxaafaa xannaꞌissiyo urawu siyettiyaabaa akeekana danddayaasa. Yesuusi amarida asay hegaadan yayyana danddayiyoogaa yootiis. SHin, I bana kaalliyaageeti yayyiyoogaa gaasuwan Yihoowawu haggaaziyoogaa aggennaadan minttettiis. (Maa. 10:16, 17, 27, 28) Yesuusi bana kaalliyaageeti yayyiyoogaa agganaadan waati maaddidee? Qassi neeni hegaadan waata oottana danddayay?

16. Nu xinaatee tamaariyoobaa haratussi yootanaadan waati loohissana danddayiyoo?

¹⁶ Ne xinaatee ba ammaniyoobaa haratussi yootanaadan loddan loddan loohissa. Bana kaalliyaageeti sabbakanaadan Yesuusi kiittido wode eti yayyennan waayi aggana. SHin Yesuusi eti sabbakiyo sohuwaanne sabbakanabaa etassi yootiyoogan eta maaddiis. (Maa. 10:5-7) Neeni Yesuusa leemisuwaa waata kaallana danddayay? Ne xinaatee awude sabbakana danddayiyaakko eranaadan maadda. Leemisuwawu, Geeshsha Maxaafaa tumaa tamaariyoogan goꞌettana danddayiya ura I eriyaakkonne oychcha. Yaatada I he tumaa haratuyyo waatidi yootana danddayiyaakko bessiyoogan giigettanaadan maadda. Koshshikko, Merinawu Ufayttada Deꞌa! giya maxaafan “Issi Issi Asay Hagaadan Gees” giyaagaaninne “Issi Uri Hagaadan Oychchana Danddayees” giyaagan odettida qofaa tobbana danddayeeta. Neeni yaatiyo wode, ne xinaatee Geeshsha Maxaafaa goꞌettidi akeekanawu metenna ogiyaaninne hiillan zaaranaadan loohissa.

17. Nu xinaatee Yihoowan ammanettanaadan nuuni maaddiyo wode Maatiyoosa 10:19, 20, 29-31 waati goꞌettana danddayiyoo?

¹⁷ Ne xinaatee Yihoowan ammanettanaadan maadda. Yesuusi bana kaalliyaageeta Yihooway siiqiyo gishshawu, eta maaddanaagaa yootiis. (Maatiyoosa 10:19, 20, 29-31 nabbaba.) Yihooway ne xinaatiyaakka maaddanaagaa hassayissa. Neeni I kessido halchchuwaabaa aara woossiyoogan Yihoowan I ammanettanaadan maaddana danddayaasa. Poolandde biittan deꞌiya Fransisekoy hagaadan giis: “Tana xannaꞌissiyaagee woossiyo wode ubbatoo ta halchchuwaabaa woossees. Tana xannaꞌissiyaagaa woosaa Yihooway zaaridoogaa akeekido wode, taanikka woossiyoogaa sohuwaara doommaas. Taani gubaaꞌe shiiqotanne gita shiiqota shiiqanawu piqaadiyaa immanaadan ta ooratta ooso keettaa ta oychchiyo wode Yihooway tana maaddana gaada qoppaas.”

18. Kiristtaaneti tamaarissiyo oosuwaa xeelliyaagan Yihoowawu aybi siyettii?

¹⁸ Nuuni Geeshsha Maxaafaa xannaꞌissiyoogeetussi Yihooway wozanappe qoppees. Asay A dabbo gidanaadan maaddanawu Kiristtaaneti ay keena minnidi tamaarissiyaakko I erees, qassi eti hegaadan oottiyo gishshawu I eta siiqees. (Isi. 52:7) Haꞌꞌi neeni Geeshsha Maxaafaa xannaꞌissiyo uri baynnaba gidikkokka, hara aassiyaageetuura eta xinaateta issippe xannaꞌissiyoogan Geeshsha Maxaafaa xannaꞌiyaageeti xammaqettanaadan maaddana danddayaasa.