Xinaateti Dichchaa Bessidi Xammaqettanaadan Waata Maaddana Danddayay?—SHaaho Naaꞌꞌaa

1. Erissiyo ashkkara oottiyo oosoy shemppo ashshiya ooso gidiyoogaa waati eriyoo?

ERISSIYO ASHKKARA oottiyo oosoy shemppo ashshiya ooso! Nuuni hegaa waati eriyoo? Maatiyoosa 28:19, 20n deꞌiya azazuwaa Yesuusi yootido wode: “Biidi, . . . tana kaalliyaageeta oottite;  . .  eta xammaqite” yaagiis. Xammaqettiyoogee ay keena koshshiyaabee? Nuuni merinawu deꞌana koyikko, xammaqettana bessees. Xammaqettanawu koyiya ooninne I merinaa deꞌuwaa demmana danddayiyoy Yesuusi nu gishshawu hayqqidoogaanne denddidoogaa ammanana koshshees. Kiitettida PHeexiroosi ba mala Kiristtaanetussi yootidoy hegaassa: ‘Xinqqatee inttena haꞌꞌi ashshees. Hegee Yesuus Kiristtoosi hayquwaappe denddidoogaana.’ (1 PHe. 3:21) Hegaa gishshawu, mati erissiyo ashkkara gidida uri xammaqettiyo wode, merinawu deꞌanawu hidootana danddayees.

2. Naaꞌꞌantto Ximootiyoosa 4:1, 2y nuuni ay mala asttamaare gidana koshshiyoogaa yootii?

² Erissiyo ashkkara oottanawu nuuni gooba asttamaare gidana koshshees. (2 Ximootiyoosa 4:1, 2 nabbaba.) Aybissi? Yesuusi nuna, “Biidi, . . . tana kaalliyaageeta oottite; . . .  eta tamaarissite” giidi azazido gishshataassa. Kiitettida PHawuloosi, “Neeni hegaa oottikko nenanne neeni giyoogaa siyiyaageeta ashshiyo gishshau” he oosuwaa “aggennan ootta” yaagiis. Yaatidi I, “Ne timirttiyaa naaga” giidoogee bessiyaaba. (1 Xim. 4:16) Erissiyo ashkkara oottiyo oosoy tamaarissiyoogaara gayttida ooso gidiyo gishshawu, nuuni tamaarissiyoogan gooba gidanawu koyoos.

3. Ha huuphe yohuwan, xannaꞌissiyoogaa xeelliyaagan ay beꞌanee?

³ Nuuni kumetta alamiyan miilooniyan qoodettiya xinaateta xannaꞌissoos. Hagaappe kasetiya huuphe yohuwan beꞌidoogaadan, he xinaatetuppe daroti xammaqettidi Yesuus Kiristtoosi erissiyo ashkkara gidanaadan waati maaddana danddayiyaakko nuuni eranawu koyoos. Ha huuphe yohuwan, xinaateti diccidi xammaqettanaadan maaddanawu xannaꞌissiya ubbay oottana koshshiya hara ichchashubata beꞌana.

TAMAARISSIYO WODE GEESHSHA MAXAAFAA GOꞌETTA

4. Geeshsha Maxaafaa xannaꞌissiyo wode, xannaꞌissiyaagee darobaa haasayana koshshennay aybissee? (Tohossa qofaakka xeella.)

⁴ Nuuni Xoossaa Qaalaappe tamaarissiyoobaa dosoos. Hegaa gishshawu, hegaappe darobaa haasayanawu koyana danddayoos. SHin, Wochiyo Keelaa Xinaatiyaa, Gubaaꞌiyaa Geeshsha Maxaafaa Xinaatiyaa, woy issi xinaatiyaa kaalettiyo wodekka gidin kaalettiyaagee darobaa haasayana koshshenna. Xannaꞌissiya ubbay xannaꞌissiyo wode, Geeshsha Maxaafaa loytti goꞌettanawu koyiyo gishshawu, darobaa haasayennaadan naagettana koshshees; qassi issi xiqisiyaa woy huuphe yohuwaa xeelliyaagan eriyo ubbabaa qonccissanawu malana koshshenna.b (Yoh. 16:12) Neeni xammaqettiyo wode neeyyo deꞌiya Geeshsha Maxaafaa eraa haꞌꞌi ne eriyoogaara geeddarssa. Xammaqettiyo wode, Geeshsha Maxaafay tamaarissiyo koyro timirtte xalla erennan aggakka. (Ibr. 6:1, 2) Haꞌꞌi neeni eriyoobaa tamaaranawu daro layttaa ekkiis; yaatiyo gishshawu mati xannaꞌiyoogaa doommida urawu ubbabaa issi kutti yootanawu maloppa.

5. (a) Koyro Tasalonqqe 2:13y yootiyoogaadan, nu xannaꞌissiyo uri ay akeekanaadan koyiyoo? (b) Xinaatee tamaariyoobaa xeelliyaagan yootanaadan waati minttettana danddayiyoo?

⁵ Nu xinaatee tamaariyoobay Geeshsha Maxaafaappe gidiyoogaa I akeekanaadan koyoos. (1 Tasalonqqe 2:13 nabbaba) Hegaadan waati oottana danddayiyoo? I tamaariyoobaa yootanaadan minttetta. Geeshsha Maxaafaa xiqiseta ubbatoo neeni awu qonccissiyoogaappe amaridaageeta I neeyyo qonccissanaadan oychcha. Xoossaa Qaalaa ba deꞌuwan waati oosuwan peeshshanaakko xinaatee akeekanaadan maadda. I nabbabido xiqiseta xeelliyaagan I qoppiyoonne awu siyettiyaabaa yootanaadan maaddanawu oyshata oychcha. (Luq. 10:25-28) Leemisuwawu, hagaadan oychcha: “Yihoowa eeshshatuppe issuwaa akeekanaadan ha xiqisee nena waati maaddidee?” “Ha Geeshsha Maxaafaa tumaappe neeni waana goꞌettana danddayay?” “Neeni tamaaridobaa xeelliyaagan neeyyo aybi siyettii?” (Lee. 20:5) Waannabay, I ay keena eridee giyoogaa gidennan, he eridobaa ay keena siiqiinne oosuwan peeshshii giyoogaa.

6. Xannaꞌissiyoogan kayma gididaageeta shoobbiyoogee loꞌꞌo gidana danddayiyoy aybissee?

⁶ Neeni xannaꞌissiyo wode, tamaarissiyoogan kayma gidida aassiyaageeta shoobba eray? Yaatikko, neeni xannaꞌissiyo hanotaa xeelliyaagaanne Geeshsha Maxaafaa loytti goꞌettiyaakkonne eti akeekidobaa yootanaadan oychchana danddayaasa. Tamaarissiyoogan neeni kaseppe qara gidanawu ne huuphiyaa ziqqi oottana koshshees. (Oosuwaa 18:24-26⁠ra gatta xeella.) Tamaarissiyoogan kayma gidida aassiyaagee xinaatee tamaariyoobaa akeekidabadan qoppiyaakkonne oychcha. Issi woy hegaappe daro saaminttawu neeni deꞌenna wode, he aassiyaagee ne gishshaa xannaꞌissanaadan oychchana danddayaasa. Hegee I ubbatoo xannaꞌiyoogee keehi koshshiyoogaa akeekissana. Hagee “ta” xinaatiyaa A hara ooninne xannaꞌissana danddayenna gaada mule qoppoppa. Neeni aybippenne aaruwan ne xinaatiyawu loꞌꞌobaa koyiyo gishshawu, A tumaa ubbatoo loytta tamaarissana.

TAMAARISSIYOOBAA SIIQIYOOGAANNE AMMANIYOOGAA BESSA

7. Xinaatee I tamaariyoobaa siiqanaadan maaddiyaabay aybee?

⁷ Geeshsha Maxaafay tamaarissiyoobaa neeni siiqiyoogaanne ammaniyoogaa ne xinaatee akeekana koshshees. (1 Tas. 1:5) Yaatiyo wode I tamaariyoobaa siiqana danddayees. Ne deꞌuwan Geeshsha Maxaafay nena waati maaddidaakko yootana danddayaasa. He wode Geeshsha Maxaafay akka maaddana danddayiyoogaa I akeekana.

8. Ne xinaatiyaa maaddanawu harabaa ay oottana danddayay, qassi neeni hegaadan oottiyoy aybissee?

⁸ Neeni xannaꞌissiyo wode, aagaa mala metoy gakkin xoonida hara ishanttubaanne michchonttubaa awu yoota. Xannaꞌissiyo wode A leemisoy xinaatiyaa goꞌꞌana danddayiya issi ura gubaaꞌiyaappe shoobbana danddayaasa. Woy “Geeshsha Maxaafay Asay Laamettanaadan Oottees” giya huuphe yohuwan kase kaalli kaalli kiyida Wochiyo Keelan, qassi hegaa mala jw.org saytiyan deꞌiya deꞌuwan hanidabaa demmana danddayaasa. He xuufetinne biidoti Geeshsha Maxaafay A deꞌoy giiga gidanaadan oottana danddayiyoogaa xinaatee akeekanaadan maaddana.

9. Ne xinaatee tamaariyoobaa ba so asassinne ba dabbotussi yootanaadan waata minttettana danddayay?

⁹ Xinaatee aqo oyqqidaba gidikko, aqo laggee xannaꞌii? Xannaꞌennaba gidikko, he aqo laggee xannaꞌanaadan shoobba. Ne xinaatee tamaariyoobaa ba so asassinne ba dabbotussi yootanaadan minttetta. (Yoh. 1:40-45) Waatada? Hagaadan oychchana danddayaasa: “Ne so asawu ha tumaa waata qonccissana danddayay?” woy “Hagee tuma gidiyoogaa ne dabbuwawu yootanawu awugaa xiqisiyaa goꞌettuutee?” Neeni yaatiyoogan, xinaatee asttamaare gidanaadan loohissaasa. Yaatiyoogan, I baappe koyettiyaabaa oottiyo wode gubaaꞌiyaara sabbakiyoogaa doommana danddayees. Geeshsha Maxaafaa xannaꞌanawu koyiya I eriyo hara uri deꞌikko, xinaatiyaa oychchana danddayaasa. I eriyo uri deꞌikko, sohuwaara he uraara gayttada xannaꞌanaadan shoobba. Yaatada, Geeshsha Maxaafaa Waati Xannaꞌiyoo?c giya biiduwaa A bessa.

XINAATEE GUBAAꞌIYAAPPE LAGGETA DEMMANAADAN MINTTETTA

10. Koyro Tasalonqqe 2:7, 8y yootiyoogaadan, issi asttamaaree PHawuloosa leemisuwaa waati kaallana danddayii?

¹⁰ Asttamaareti bantta tamaaretussi qoppana koshshees. Eti mata wode gubaaꞌiyaa ishantta woy michchontta gidana danddayoosona. (1 Tasalonqqe 2:7, 8 nabbaba.) Alamiyan deꞌiya laggeta aggidi Yihoowawu haggaazanawu koshshiya ubbaban laamettiyoogee eta metana danddayees. Gubaaꞌiyaappe loꞌꞌo laggeta koyiyoogan nuuni eta maaddana koshshees. Geeshsha Maxaafa xannaꞌissiyo wode xalla gidennan, hara wodetunkka aara wodiyaa aattiyoogan ne xinaatiyawu lagge gida. Xannaꞌiyo gallassan gidennan, hara gallassan ne awu silkkiyaa dawaliyoogee, kiitaa yeddiyoogee woy baada oychchiyoogee xinaatiyawu neeni qoppiyoogaa bessees.

11. Nu xinaateti gubaaꞌiyaappe ay demmanaadan nuuni koyiyoo, qassi aybissi?

¹¹ Hagaadan giyo leemiso haasayay deꞌees: “Issi naꞌi diccanawu issi heeran deꞌiya asa ubbaa maadoy koshshees.” Nuuni: “Erissiyo ashkkara oottanawu gubaaꞌiyaa maadoy koshshees” gaana danddayoos. Hegaa gishshawu, gooba asttamaareti tamaareti gubaaꞌiyan deꞌiya haratuura laggetanaadan maaddoosona; he laggeti xinaateti kaseegaappe aaruwan Yihoowakko shiiqanaadan maaddana danddayoosona. Xinaateti Xoossaa asaara dabbota minttiyo wode, ayyaanaabaaninne koshshiya haraban maaduwaa etappe demmana danddayoosona. Xinaateti ubbay eti gubaaꞌiyaa yame gididabadan, qassi ayyaanaaban nu so asaa gididabadan etawu siyettanaadan nuuni koyoos. Ishanttinne michchontti bessiyo siiqoy xinaateta ubbaa denttettanaadan koyoos. Hegee Yihoowaara dabbotanawu maaddenna asatuura deꞌiya laggetetta agganawu metootennaadan oottana. (Lee. 13:20) Kase laggeti A ixxiyo wode, Yihoowa dirijjitiyaappe loꞌꞌo laggeta I demmana danddayiyoogaa erana.—Mar. 10:29, 30; 1 PHe. 4:4.

BANA SHEEDHDHIDI XAMMAQETTIYOOGAABAA UBBATOO HAASAYA

12. Bana Yihoowawu sheedhdhidi xammaqettiyoogaabaa nu xannaꞌissiyo uraara haasayana koshshiyoy aybissee?

¹² Issi uri bana Yihoowawu sheedhdhidi xammaqettiyoogee ay keena koshshiyaabaakko neeni darotoo haasayana koshshees. Ubbaappe aaruwan, nuuni Geeshsha Maxaafaa xannaꞌissiyo halchchoy issi uri xammaqettidi erissiyo ashkkara gidanaadan maaddanaassa. Amarida aginawu aggennan Geeshsha Maxaafaa xannaꞌidoogee, ubba qassi shiiqota doommidoogee, xinaatee Geeshsha Maxaafaa I xannaꞌiyoogaa halchchoy Yihoowa Markka gididi haggaaziyoogaa doommanaadan maaddiyoogaa akeekana.

13. Issi xinaatee xammaqettanawu ay oottana koshshii?

¹³ Xammaqettanawu koyiya issi xinaatee oottana koshshiyo issi issibati deꞌoosona. Koyroogee, xinaatee Yihoowa erananne siiqana qassi A ammanana koshshees. (Yoh. 3:16; 17:3) Yaatidi, I Yihoowaaranne gubaaꞌiyan deꞌiya ishanttuuranne michchonttuura dabbotana bessees. (Ibr. 10:24, 25; Yaaq. 4:8) Qassi, xinaatee iita meezeta aggananne ba nagaraappe simmana koshshees. (Oos. 3:19, 20) Kallidi, I tamaaridobaa haratussi yootana bessees. (2 Qor. 4:13) Wurssettan, bana Yihoowawu sheedhdhana, qassi hegaa bessanawu xammaqettana koshshees. (1 PHe. 3:21; 4:2) Hegee ubba asaa keehi ufayssiya gallassa! Xinaatee ba halchchuwaa polanawu hegeeta oottiyo wode, wozanappe galata, qassi hegeeta ubbatoo oottanaadan aggennan minttetta.

XINAATEE DICCIIDDI DEꞌIYAAKKONNE ISSI ISSITOO NENA OYCHCHA

14. Issi asttamaaree xinaatee dicciiddi deꞌiyoogaa waati erana danddayii?

¹⁴ Issi xinaatee bana sheedhdhidi xammaqettanaadan maaddanawu nuuni danddayanchcha gidana koshshees. SHin I Xoossaa Yihoowawu oottanawu koyiyaakkonne nuuni akeekana koshshees. Xinaatee Yesuusa azazuwaa azazettanawu baaxetiyoogaa bessii? Woy Geeshsha Maxaafaa eraa demmanawu xalla koyii?

15. Xinaatee xammaqettanawu giigidoogaa asttamaaree waati eranee?

¹⁵ Xinaatee dicciiddi deꞌiyaakkonne loytta akeeka. Leemisuwawu, I bawu siyettiyaabaa Yihoowawu yootii? I Yihoowakko woossii? (Maz. 116:1, 2) I Geeshsha Maxaafaa nabbabiyoogan ufayttii? (Maz. 119:97) I ubbatoo shiiqota shiiqii? (Maz. 22:22) I ba deꞌuwan laamettana koshshiyaaban laamettidee? (Maz. 119:112) I tamaariyoobaa ba so asassinne ba dabbotussi yootiyoogaa doommidee? (Maz. 9:1) Ubbappe aaruwan, I Yihoowa Markka gidanawu koyii? (Maz. 40:8) Xinaatee ha ginatun dichchaa bessennaba gidikko, aybissakko hiillan eranawu mala, qassi qoncciyan shin kehatettan hegaabaa aara haasaya.d

16. Issi ura xannaꞌissiyoogaa aggana koshshiyoy awudee?

¹⁶ Issi uraara ubbatoo xannaꞌana koshshiyaakkonne issi issitoo nena hagaadan oychcha: ‘Xannaꞌiyaagee xinaatiyawu giigettennee? SHiiqota shiiqanawu koyennee? Iita meezeta aggibeennee? Worddo haymaanootiyaappe kiyibeennee?’ Ha oyshatu zaaroy ee giyaagaa gidikko, A ubbatoo xannaꞌissiyoogee haattaa waraa eranawu koyenna ura erissanawu baaxetiyoogaa mala! Xinaatee tamaariyoobaa siiqennabanne laamettanawu koyennaba gidikko, ubbatoo xannaꞌissiyoogee bessiyaabee?

17. Koyro Ximootiyoosa 4:16y yootiyoogaadan, Geeshsha Maxaafaa tamaarissiya ubbay ay oottana koshshii?

¹⁷ Erissiyo ashkkara oottiyo aawatettaa nuuni poliyoogee keehi koshshiyaaba; qassi nu xinaateti diccidi xammaqettanaadan maaddanawu koyoos. Nuuni tamaarissiyo wode Geeshsha Maxaafaa goꞌettiyoynne tamaarissiyoobaa siiqiyoogaanne ammaniyoogaa bessiyoy hegaassa. Nu xinaatee gubaaꞌiyaappe laggeta demmanaadan minttettoos. Qassi bana sheedhdhidi xammaqettiyoogaabaa ubbatoo haasayoos; xinaatee dicciiddi deꞌiyaakkonne issi issitoo nuna oychchoos. (Sinttaa 13n “Xinaateti Dichchaa Bessidi Xammaqettanaadan Asttamaaree Oottana Koshshiyaabata” giya saaxiniyaa xeella.) SHemppo ashshiya ha oosuwaa oottiyoogan keehi ufayttoos! Nu xinaateti dichchaa bessidi xammaqettanaadan maaddanawu nuussi danddayettida ubbabaa oottanawu murttidaageeta gidoos.