Xinaateti Ayyaanaaban Diccidi Xammaqettanaadan Waati Maaddana Danddayiyoo?

1-2. Xinaateti ayyaanaaban diccidi xammaqettanaadan ooni maaddana danddayii?

FIIJI giyo biittan deꞌiya Eema hagaadan gaasu: “Taani Geeshsha Maxaafaappe tamaaridobaa keehi dosaas. Hegee tuma gidiyoogaa taani eraas. SHin, taani ishanttuuranne michchonttuura wodiyaa aattiyoogaa doommidoogee issi issiban laamettada xammaqettanaadan tana maaddiis.” Hagee keehi koshshiyaabaa nuna tamaarissees, gubaaꞌiyan deꞌiya harati xinaateta maaddiyo wode, eti ayyaanaaban diccidi xammaqettana danddayoosona.

² Aassiyaageeti ubbay gubaaꞌiyaa asaa qooday gujjanaadan maaddana danddayoosona. (Efi. 4:16) Vanuwatu giyo haruuruwan deꞌiya Leelano giyo issi aqinyiyaa hagaadan gaasu: “Hagaadan giyo leemiso haasayay deꞌees: Issi naꞌi diccanaadan heeran deꞌiya asa ubbay maaddees. Erissiyo ashkkara oottiyo nu oosoykka hegaara issi mala gaada qoppays; darotoo issi uri tumaa eranaadan gubaaꞌee maaddees.” Hegaa gishshawu, issi naꞌi gastta gidanaadan yelidaageetu, hara dabbotu, so asaa laggetunne timirtte keettan tamaarissiyaageetu ubbaa maadoy koshshees. Eti naꞌaa minttettiyoogaaninne goꞌꞌiyaabaa tamaarissiyoogan maaddana danddayoosona. Hegaadankka, gubaaꞌiyaa ishanttinne michchontti xinaateti ayyaanaaban diccidi xammaqettanaadan maaddanawu eta zorana, minttettananne leemiso gidana danddayoosona.—Lee. 15:22.

3. Aana, Dorini, qassi Leelana yootidobaappe neeni ay tamaaray?

³ Xannaꞌissiya uri gubaaꞌiyan deꞌiya harati A xinaatiyaa maaddiyo wode ufayttana koshshiyoy aybissee? Moldova biittan dumma aqinye gidada haggaaziya Aana hagaadan gaasu, “Issi xinaatiyawu daroban maadoy koshshees; qassi Geeshsha Maxaafaa xannaꞌissiyaagee barkka he ubbaban maaddiyoogee metana danddayees.” Moldova biittan dumma aqinye gididi haggaaziya Dorini hagaadan giis, “Darotoo, aassiya harati xinaatiyaa wozanaa denttettiya taani mule qoppa erennabaa yootoosona.” Harati maaddiyo wode nuuni ufayttana koshshiyo hara gaasuwaa Leelana hagaadan gaasu, “Nuuni issi xinaatiyaa siiqiyoogeenne awu qoppiyoogaa bessiyoogee I Yihoowa Markkata shaakki eranaadan maaddana danddayees.”—Yoh. 13:35.

4. Nuuni ha huuphe yohuwan ay xannaꞌanee?

⁴ SHin, ‘Xinaatiyaa xannaꞌissiyay tana gidana xayikkonne, issi xinaatee ayyaanaaban diccanaadan maaddanawu ay oottana danddayiyaanaa?’ gaada qoppana danddayaasa. Issi uri issippe xannaꞌissanaadan nuna shoobbiyo wodenne Geeshsha Maxaafaa xinaatee shiiqota shiiqiyoogaa doommiyo wode nuuni ay oottana danddayiyaakko ane beꞌoos. Xinaateti ayyaanaaban diccidi xammaqettanaadan cimatikka waati maaddana danddayiyaakko beꞌana.

ISSIPPE XANNAꞌISSANAADAN ISSI URI NENA SHOOBBIYO WODE

5. Issippe xannaꞌissanaadan issi uri nena shoobbiyo wode neeni ay oottana koshshii?

⁵ Xannaꞌissiyo wode, xinaatee Xoossaa Qaalaa akeekanaadan maaddiyo gita aawatettay deꞌiyoy xannaꞌissiyaagaassa. Xannaꞌissiyaagee neeni aara xannaꞌissanaadan shoobbikko, neeni shoobettidoy A maaddanaassa. (Era. 4:9, 10) SHin, xannaꞌissiyo wode loytta maaddiyaagaa gidanawu ay oottana danddayay?

6. Neeni issi uraara Geeshsha Maxaafaa xannaꞌissiyo wode, Leemiso 20:18n deꞌiya zoriyaa waata oosuwan peeshshana danddayay?

⁶ Xannaꞌissanawu giigetta. Koyruwan, xinaatiyaabaa amaridabaa yootanaadan xannaꞌissiyaagaa oychcha. (Leemiso 20:18 nabbaba.) Hagaadan oychchana danddayaasa: “Xinaatiyaabaa neeni eriyoobay aybee? Neeni aara xannaꞌiyo huuphe yohoy aybee? Xinaatee ha xannaꞌiyoobaappe ay tamaaranaadan koyay? Xannaꞌiyo wode taani oottana woy haasayana koshshiyaabatinne koshshennabati deꞌiyoonaa? Xinaatee ayyaanaaban diccanaadan taani waata minttettana danddayiyaanaa?” Xannaꞌissiyaagee xinaatiyaabaa xuurabaa neeyyo yootennaagee qoncce; shin maaddana danddayiyaabaa yootees. Joy giyo issi misoonaawiyaa banaara xannaꞌissanawu shoobbiyoogeetuura hegaa haasayawusu. A hagaadan gaasu: “Hegaadan haasayiyoogee tanaara xannaꞌissanawu shoobettida uri xinaatiyaa maaddanawu koyanaadaaninne xannaꞌiyo wode ay haasayanaakko kuuyanaadan maaddees.”

7. Neeni issi uraara xannaꞌissanawu shoobettiyo wode giigettana koshshiyoy aybissee?

⁷ Issippe xannaꞌissanaadan issi uri nena shoobbikko, xannaꞌissiyoobaa neeni giigettiyoogee keehi loꞌꞌo. (Izi. 7:10) Dorini hagaadan giis: “Tanaara xannaꞌissiyaagee xinaatiyawu giigettidi yiyo wode taani keehi ufayttays. Yaatiyo wode I maaddiya qofaa yootana danddayees.” Hegaa bollikka, intte naaꞌꞌaykka loytti giigettidoogaa xinaatee akeekana danddayees; qassi yaatiyoogan awu loꞌꞌo leemiso gideeta. Neeni he huuphe yohuwaa loytta giigettana danddayennaba gidikkonne, waanna qofaa akeekanawu amarida wodiyaa bazzana danddayaasa.

8. Xannaꞌissiyo wode ne woossiyo woosay maaddiyaagaa gidanaadan waatana danddayay?

⁸ Xannaꞌissiyo wode keehi koshshiyaabaappe issoy woosaa gidiyo gishshawu xannaꞌissiyaagee neeni woossanaadan oychchikko, woossanaabaa qoppa. Yaatikko ne woosay keehi maaddiyaagaa gidana danddayees. (Maz. 141:2) Jaappaanen deꞌiya Anaya, O xannaꞌissiyaara shoobbin yiida michchiyaa woossido woosaa hanno gakkanawu hassayawusu. A hagaadan gaasu: “Yihoowaara A dabbotido dabbotay mino gidiyoogaa taani akeekaas; qassi I mala gidanawu koyaas. A ba woosan ta sunttaa xeesido wode, A tana siiqiyoogaakka taani akeekaas.”

9. Yaaqooba 1:19y yootiyoogaadan, xannaꞌissiyo wode loytta maaddiyaagaa gidanawu waatana danddayay?

⁹ Xannaꞌissiyo wode xannaꞌissiyaagaa maadda. Nayjeeriyan deꞌiya dumma aqinyiyaa Omamuyova hagaadan gaasu: “Xannaꞌissanawu shoobettida uri loytti ezggiyoogee maaddees. He uri loꞌꞌo qofaa yootikkonne, xannaꞌissiyoogee xannaꞌissiyaagaa aawatetta gidiyoogaa I eriyo gishshawu darobaa haasayenna.” Yaatiyo gishshawu, neeni issibaa awude haasayana koshshii, qassi waata haasayana koshshii? (Lee. 25:11) Xannaꞌissiyaageenne xinaatee haasayiyo wode loytta ezgga. (Yaaqooba 1:19 nabbaba.) Yaatada, bessiya wodiyan maaddana danddayaasa. Neeni haasayanaappe kase qoppana bessees. Leemisuwawu, neeni darobaa haasayananne xannaꞌissiyaagee issibaa qonccissiyo wode kelttiyaa gelana bessenna; qassi hara dummatiya qofaa haasayana koshshenna. SHin qantta qofaa yootiyoogan, leemisuwaa woy oyshaa goꞌettiyoogan xannaꞌiyoobay qoncce gidanaadan maaddana danddayaasa. Issi issitoo, xannaꞌiyo qofaa xeelliyaagan darobaa haasayana bessennabadan neeyyo siyettana danddayees. Gidoppe attin, xannaꞌiyaagaa neeni galatiyaabanne awu qarettiyaaba gidikko, I ayyaanaaban diccanaadan loytta maaddana.

10. Nena gakkidabaa yootiyoogee issi xinaatiyaa waati maaddana danddayii?

¹⁰ Nena gakkidabaa etawu yoota. Xinaatiyaa maaddana danddayiyaaba gidikko, neeni tumaa waata siyidaakko, paaciyaa waata xoonidaakko, woy Yihooway nena waati maaddidaakko xinaatiyawu qanttan yootana danddayaasa. (Maz. 78:4, 7) Hegee xinaatee siyana koshshiyaaba gidana danddayees. Hegee A ammanuwaa minttana woy I aggennan ayyaanaaban diccidi xammaqettanaadan minttettana danddayees. Qassi I bana gakkiiddi deꞌiya metuwaa waati xoonanaakko akeekanaadan maaddana danddayees. (1 PHe. 5:9) Brazilen haꞌꞌi aqinye gididi haggaaziya Gabreeli Geeshsha Maxaafaa kase xannaꞌiyo wode bana maaddidabaa hassayidi hagaadan giis: “Taani ishantta gakkidabaa siyido wode, nuna gakkiya metuwaa Yihooway akeekiyoogaa eraas. Qassi eti metuwaa xoonana danddayikko, taanikka xoonana danddayays.”

XINAATEE SHIIQOTA SHIIQIYOOGAA DOOMMIYO WODE

11-12. SHiiquwaa yiida xinaatiyaa nuuni ufayssan mokkana koshshiyoy aybissee?

¹¹ Issi xinaatee ayyaanaaban diccidi xammaqettanawu, gubaaꞌe shiiqota ubbatoo shiiqidi goꞌettana bessees. (Ibr. 10:24, 25) Koyro shiiquwaa shiiqanaadan xannaꞌissiyaagee A shoobbana danddayees. I shiiquwaa shiiqiyo wode, nuuni ubbay I SHiiquwaa Addaraashaa yiyoogaa aggennaadan minttettana danddayoos. Nuuni ayba ogetun hegaadan oottana danddayiyoo?

¹² Xinaatiyaa ufayssan mokka. (Roo. 15:7) Issi xinaatee shiiquwaa yiyo wode nuuni A mokki ekkikko, I aggennan SHiiquwaa Addaraashaa yaanawu koyana danddayees. Xinaatee boorasenna mala A pashkki gaada sarotanne haratuura eretissa. A haasayissa; ayssi giikko, A xannaꞌissiyaagee SHiiquwaa Addaraashaa biron waayi gakkana woy I yan oottiyoobi daana danddayees. Xinaatee yootiyoobaa loytta ezgga, qassi awu qoppiyoogaa bessa. Neeni ufayssan xinaatiyaa mokkiyoogee A waati maaddana danddayii? Amarida layttappe kase xammaqettidi haꞌꞌi gubaaꞌiyawu oottiyaagaa gididi haggaaziya Dimitira hanotaa qoppa. I koyro shiiqido shiiquwaabaa hassayidi hagaadan giis: “Taani SHiiquwaa Addaraashaa gelanawu yayyada eqqidoogaa issi ishay beꞌidi tana ekkidi geliis. Daroti yiidi tana sarotidosona. Taani keehi maalaalettaas. Taani hegaa keehi dosido gishshawu, shiiqoy galla galla deꞌanaadan koyaas. Taani hegaa malabaa harasan mule beꞌa erikke.”

13. Neeni loꞌꞌo leemiso gidiyoogee issi xinaatiyaa waati maaddana danddayii?

¹³ Loꞌꞌo leemiso gida. Neeni loꞌꞌo leemiso gidiyoogee nuuni tumu Kiristtaaneta gidiyoogaa xinaatee ammananaadan maaddana danddayees. (Maa. 5:16) Moldova biittan haꞌꞌi aqinye gididi haggaaziya Vitali hagaadan giis: “Taani gubaaꞌiyan deꞌiya haratu deꞌoy, qofaynne eeshshay ay malakko akeekaas. Hegee Yihoowa Markkatu haymaanootee tuma gidiyoogaa taani ammananaadan oottiis.”

14. Neeni loꞌꞌo leemiso gidiyoogee issi uri aggennan ayyaanaaban diccanaadan waati maaddana danddayii?

¹⁴ Xinaatee xammaqettanaappe kase tamaariyoobaa oosuwan peeshshana koshshees. Hegee issi issitoo metana danddayees. SHin Geeshsha Maxaafay yootiyo maarata oosuwan peeshshiyoogan neeni ay keena goꞌettidaakko xinaatee akeekiyo wode, I ne leemisuwaa kaallanawu koyana danddayees. (1 Qor. 11:1) Qommoora ibaa denttido Anayi hanotaa qoppa. A hagaadan gaasu: “Taani oottanawu baaxetaydda deꞌiyoobaa ishanttinne michchontti oottiiddi deꞌoosona. Taani waata eta minttettana, siiqananne atto gaana danddayiyaakko akeekaas. Eti haratubaa awudekka loꞌꞌobaa haasayoosona. Taani eta leemisuwaa kaallana koyays.”

15. Xinaatee ubbatoo shiiqota shiiqiyo wode nuuni aara laggetana koshshiyoy aybissakko akeekanaadan Leemiso 27:17y waati maaddii?

¹⁵ Xinaatiyawu lagge gida. Xinaatee shiiqota aggennan shiiqiyo wode, neeni awu qoppiyoogaa ubbatoo bessa. (Pili. 2:4) A loyttada eranawu baaxetana danddayaasa. I ayyaanaaban dicciyoogaa beꞌiyoogee nena keehi ufayssiyoogaa yootana danddayaasa. I xannaꞌiyoobaa, A soo asaabaanne oosuwaabaa oychchana danddayaasa. SHin A yeellayana danddayiyaabaa oychchennaadan naagetta. Hegaadan haasayiyoogee intte issoy issuwaara laggetanaadan maaddana danddayees. Neeni xinaatiyaara laggetikko, I ayyaanaaban diccidi xammaqettanaadan maaddana danddayaasa. (Leemiso 27:17 nabbaba.) Anaya haꞌꞌi ubba wode aqinye gidada haggaazawusu. A shiiquwaa shiiqiyoogaa koyro doommido wodiyaa hassayada hagaadan gaasu: “Taani gubaaꞌiyan deꞌiyaageetuura laggetido wode, shiiqota yeemuwan naagiyoogaanne daafurido wodekka shiiqiyoogaa doommaas. Taani ooratta laggetuura laggetidoogan ufayttaas, qassi hegee Yihoowawu goynnenna asatuura laggetiyoogaa agganaadan tana maaddiis. Taani Yihoowakko, ishanttukkonne michchonttukko shiiqanawu koyaas. Hegaa gishshawu, taani xammaqettanawu kuuyaas.”

16. Xinaatee gubaaꞌiyan ufayttanaadan maaddanawu harabaa ay oottana danddayay?

¹⁶ Xinaatee ayyaanaaban aggennan dicciyo wode, ikka gubaaꞌiyaa asa gididabadan qoppanaadan maadda. Neeni imattaa mokkiyoogan hegaadan oottana danddayaasa. (Ibr. 13:2) Moldovan deꞌiya Denisi Geeshsha Maxaafaa kase xannaꞌiyo wodiyaabaa hassayidi hagaadan giis: “Ishantti ta machchiyaanne taani etaara wodiyaa aattanaadan darotoo shoobbidosona. Eti banttana Yihooway waati maaddidaakko nuussi yootidosona. Hegee nuna minttettiis. Nuuni Yihoowawu haggaazanawu murttanaagaanne keehi ufayssiya deꞌuwaa deꞌanaagaa ammanettida.” Xinaatee aassiyaagaa gidiyo wode, nenaara haggaazanaadankka shoobbana danddayaasa. Brazilen aassiya Diyegoy hagaadan giis: “Daro ishantti banttanaara haggaazanaadan tana shoobbidosona. Hegee taani eta loytta eranaadan keehi maaddiis. Yaatiyoogan, taani darobaa tamaaraas, qassi Yihoowaaranne Yesuusaara keehi dabbotaas.”

CIMATI WAATI MAADDANA DANDDAYIYOONAA?

17. Cimati xinaateta waati maaddana danddayiyoonaa?

¹⁷ Xinaatetussi wodiyaa bazzite. Cimatoo, xinaateta intte siiqiyoogeenne etawu qoppiyoogee eti ayyaanaaban diccidi xammaqettanaadan maaddana danddayees. SHiiqotun xinaateta ubbatoo haasayissana danddayeeta. Eti shiiquwan qofaa yootiyoogaa doommiyo wode, intte eta sunttaa hassayikko etawu qoppiyoogaa eti akeekana. Aassiyaagaara issi uraa Geeshsha Maxaafaa xannaꞌissanawu wodiyaa bazzana danddayeetii? Xannaꞌiya ura intte qoppidoogaappe aaruwan maaddana danddayeeta. Nayjeeriyan deꞌiya Jaako giyo aqinyiyaa hagaadan gaasu: “Tanaara eta xannaꞌissiya ishay cima gidiyoogaa eridi daro xinaateti maalaalettidosona. Issi xinaatee hagaadan giis: ‘Ta pastteree hegaadan mule ootti erenna. I dure asaa xallaa oychchees; hegaakka eti miishshaa qanxxikko oychchees!’” He xinaatee haꞌꞌi shiiqota shiiqees.

18. Cimati 1 PHeexiroosa 5:2n deꞌiya qofaa waati oosuwan peeshshana danddayiyoonaa?

¹⁸ Xannaꞌissiyaageeta loohissitenne minttettite. Cimatoo, aassiyaageeti loytti sabbakanaadaaninne tamaarissanaadan maaddiyo gita aawatettay intteyyo deꞌees. (1 PHeexiroosa 5:2 nabbaba.) Issi uri ba xinaatiyaa inttenaara xannaꞌissanawu yayyikko, xannaꞌissanawu intte oychchana danddayeeta. Qommoora ibaa denttido Jaaka hagaadan gaasu: “Cimati ta xinaatetubaa ubbatoo tana oychchoosona. Xannaꞌissanawu taani metootiyo wode, eti maaddiya zoriyaa yootoosona.” Cimati xannaꞌissiyaageeta minttettanawu darobaa oottana danddayoosona. (1 Tas. 5:11) Jaaka gujjada hagaadan gaasu: “Cimati tana minttettiyo wodenne taani minnada oottiyoobaa eti nashshiyo wode ufayttays. Hegaa mala minttettiya qofay hombbiya gallassi irxxa haattaa uyiyoogaa mala. Eti yootiyo minttettiyaabay taani loytta xannaꞌissiyoogaa akeekanaadaaninne keehi ufayttanaadan tana maaddiis.”—Lee. 25:25.

19. Nuuni ubbay ay oottiyoogan ufayttana danddayiyoo?

¹⁹ Nuuni ha wodiyan Geeshsha Maxaafaa xannaꞌissenaba gidikkonne, issi uri ayyaanaaban diccidi xammaqettanaadan maaddana danddayoos. Xannaꞌissiyo wode darobaa haasayennan, nuuni loytti giigettido qofaa yootiyoogan xannaꞌissiyaagaa maaddana danddayoos. Xinaateti SHiiquwaa Addaraashaa yiyo wode nuuni etaara laggetananne etawu loꞌꞌo leemiso gidana danddayoos. Hegaa bollikka, cimati xinaatetussi wodiyaa bazziyoogan, qassi xannaꞌissiyaageeta loohissiyoogaaninne galatiyoogan eta minttettana danddayoosona. Nuuni issi uri Yihoowa siiqanaadaaninne awu haggaazanaadan maaddanawu, guuttaba gidikkonne issibaa oottana danddayiyo wode keehi ufayttoos!