Keettaaway Akeekanaadan Maaddite
1. Haggaazuwan demmiyo asaa maaddanau ubbappe loꞌꞌo ogee awugee?
1 Haggaazuwan loꞌꞌo ayfiyaa demmanaadan maaddiyay, issi uraa zozzu giida ogiyan haasayissiyoogeeyye, he keettaaway akeekanaadaaninne loꞌꞌo kuushshaa kuuyanaadan maaddiyoogee? PHauloosi Tasalonqqen deꞌiya Ayhudata haasayissido wode, “etappe issooti issooti yohoi tuma gididoogaa” akeekanaadan maaddiis. (Oos. 17:2-4) Harati akeekanaadan maaddiyoogee ay gujjii?
2. Kawotettaa mishiraachchuwaa yootiyo wode, nuuni PHauloosa leemisuwaa kaallana danddayiyoy ayba ogiyaanee?
2 Keettaawaa Qofaanne I Diccido Hanotaa Akeekite: Intte haggaazo moottan deꞌiya asata maaddanau eta qofaa erana bessees. Kiitettida PHauloosi, ammanenna Giriiketuura Ariyosppaagoosan haasayido wode, geella eti erana danddayiyoobaanne ammanidi ekkidobata yootiyoogan doommiis. (Oos. 17:22-31) Hegaa gishshau, inttekka asaa woygidi haasayissanaakko giigettiyo wode, intte moottan deꞌiya asatuppe daroti ammaniyoobaanne ixxiyoobaa akeekite. (1 Qor. 9:19-22) Keettaaway phalqqettiya qofaa woy oyshaa denttiyo wode, i maayiyo qofaa denttanau malite; qassi he qofaa tobbite.
3. Oyshaa hiillan goꞌettiyoogee, nuuni haraatuura tobbiyo wode loꞌꞌo ayfiyaa demmanaadan maaddana danddayiyoy ayba ogiyaanne?
3 Oyshata Hiillan Goꞌettite: Manddara biya uri haꞌꞌi deꞌiyoosaa erana xayikko, i biidi gakkanasaa yootidi maaddana danddayokko. Hegaadankka, keettaawaa qofaa erana xayikko, i bessiya kuushsha kuuyanaadan maaddana danddayokko. Yesuusi i yootiyoobaa ezggiya uraara issibaa tobbanaappe kase, he yohuwaa xeelliyaagan au aybi siyettiyaakko eranau darotoo oychees. Leemisuwau, issi bitanee Yesuusa, “Tamaarissiyaagoo, taani merinaa de7uwaa laattanau ai oottoo?” yaagidi oychido wode, hegaa zaaranaappe kase a qofaa eranau koyiis. (Luq. 10:25-28) Hara wode qassi PHeexiroosi bala zaaruwaa zaarido wode, Yesuusi a qofaa suurissanau oyshaa hiillan goꞌettiis. (Maa. 17:24-26) Hegaa gishshau, keettaaway oyshaa oychiyo wodenne bala qofaa denttiyo wode, nuunikka i he yohuwaa akeekanaadan maaddanau oyshaa goꞌettana danddayoos.
4. Nuuni keettaaway issi yohuwaa loytti akeekanaadan maaddana koshshiyoy aybissee?
4 Keettaaway issi yohuwaa loytti akeekanaadan maaddiyo wode, Gita Asttamaare gidida Yesuusanne koyro xeetu layttan wonggeliyaa yootida mino asatu leemisuwaa kaalloos. Hegaadan oottiyoogan keettaawaa bonchoos. (1 PHe. 3:15) Hegee qassi, nuuni zaaretti oychanaadan i koyana mala denttettana danddayees.