Zerettay Diccanaadan Haattaa Ushshana Bessees
1. Diccana mala haattaa ushshana bessiyaabi aybee?
1 Gaden zerido zerettay diccana mala haattaa ushshana bessees. Nu moottan deꞌiya asaa wozanan zerido tumaa zerettaa xeelliyaagankka hanotay hegaa mala. (1 Qor. 3:6) Nuuni zerettan leemisettida he tumay xaphuwaa yeddanaadan, diccanaadaaninne ayfanaadan koyikko, zaarettidi oychana, qassi he zeridobaa Geeshsha Maxaafaa goꞌettidi haattaa ushshana bessees.
2. Zaarettidi oychanau simmidi yaanaadan keettaawaa koshshaa waatidi denttettana danddayiyoo?
2 Oyshaa Dentta: Asaa haasayissiyoogaa doommiyo ogiyaa giigettiyo wode, zaarettada oychiyo wode zaaranau, koshshaa denttettiya issi oyshaakka ayssi giigissikkii? Koyro haasayissiyo gallassi wurssettan he oyshaa dentta; qassi zaareto oyshau wodiyaa keera. Daroti Geeshsha Maxaafaa waatidi xannaꞌissiyaakko bessanau Geeshsha Maxaafay Tamaarissiyoy giya maxaafaappe issi qofaa dooriyoogee maaddiyoogaa akeekidosona.
3. Koyro gallassi haasayissidobaa xaafiyo wode ay ay xaafana danddayettii?
3 Xaafa Oyqqa: Koyro gallassi haasayissiyoogaa wurssosaara, haasayidobaa ubbaa xaafa. Izaawu sunttaanne qatuwaa xaafa. A haasayissido gallassaanne saatiyaa, intte haasayidobaanne xuufe immidaba gidikko, immido xuufiyaa xaafiyoogeekka loꞌꞌoba. I ay haymaanoote kaalliyaakko yootidee? Ayyo so asi deꞌii? Bana ufayssiyaabaanne qofissiyaabaa yootidee? Hegaa malabay sinttappe haasayissanabaa giigettanau maaddees. Awude zaarettada oychanau maayidaakkonne ay oysha zaaranaakkokka xaafa.
4. Koshshay deꞌiyo ura zaarettidi oychiyoogaa xeelliyaagan nuuni minni oottana koshshiyoy aybissee?
4 Minna Ootta: Issi ura wozanan zerido ‘qaalaa efirgganau’ Seexaanay shemppoy baynnan baaxetees. (Mar. 4:14, 15) Yaatiyo gishshau, koshshay deꞌiyo ura zaarettada a son demmanau metootikko, hidootaa qanxxoppa. Dabddaabbiyaa kiittanau woy masttooshaa xaafada a penggen wottanau danddayay? Issi aqinyiyaa, issi maccaasiyo i penggen xannaꞌissiyoogaa doommaasu; shin zaarettada o son demmana danddayabeenna gishshau, dabddaabbiyaa kiittaasu. Michiyaa wurssettan o i son demmido wode, baayyo qoppiyoogaa bessido gishshau he maccaasiyaa keehippe ufayttidoogaa yootaasu. Nuuni tumaa zerettaa haattaa ushshiyo wode, hegee caariyoogaa, dicciyoogaanne ‘hasttamaa, usuppun tammaanne xeetaa’ ayfiyoogaa beꞌidi ufayttana.—Mar. 4:20.