Godaa Kahuwaa Bonchiyoogaa Erissiyo Zamachay Laappune 17n Doommees
1. Laappune 17n aybaa zamachay doommii?
1 Godaa Kahuwaa bonchiyoogee layttan layttan Yesuusa hayquwaa yootanau maaddees. (1 Qor. 11:26) Hegaa gishshau, nuuni harati nunaara bonchanaadaaninne Yihooway siiquwan immido wozuwaabaa siyanaadan koyoos. (Yoh. 3:16) Godaa Kahuwaa bonchanau asay yaanaadan nuuni shoobbiyo zamachay ha laytti Qeeraa, Laappune 17n doommees. He zamachan neeyyo danddayettida keenaa oottanau yeemuwan naagay?
2. SHoobe woraqataa immiyo wode woygana danddayiyoo?
2 Woygana Danddayiyoo? Haasayaa qanttiyoogee keehi loꞌꞌo. Hagaadan gaana danddayaasa: “Saro, ay malee? Alame yuushuwan layttan layttan bonchettiya keehi dumma gidida baalaa Hosppune 5n intte soo asay nunaara bonchanaadan ha shoobiyaa woraqataa immanau koyeettees. Yesuusi hayqqidoogan polettidabay aybakko, qassi i haꞌꞌi ay oottiiddi deꞌiyaakko Geeshsha Maxaafaappe shiiqiya haasayaa miishsha qanxxennan ezggana danddayeeta. Nu heeran he shiiquwaa awan, qassi aappun saatiyan shiiqanaakko ha shoobiyaa woraqatay qonccissees.” Qeeraanne Woggaa gallassi shoobe woraqataa immiyo wode, hanotay injjetikko maxeetetakka issippe immana koshshees.
3. Nuuni danddayettida keenan daro asaa waatidi shoobbana danddayiyoo?
3 Daro Asaa SHoobba: Nuuni danddayettida keenan daro asaa shoobbanau koyoos. Yaatiyo gishshau, Geeshsha Maxaafaa xannaꞌissiyoogeeta, zaarettada oychiyoogeeta, dabbota, issippe oottiyaageeta, issippe tamaariyaageeta, shoorotanne neeni eriyo hara asata shoobba. Haggaazo moottaa waatidi gattanaakko gubaaꞌiyaa cimati kaaletuwaa immoosona. Godaa Kahuwaa bonchanaadan layttan layttan asaa shoobbiyo zamachay loꞌꞌo ayfiyaa ayfees. Zillaytti shiiquwaa yiida issi maccaasiyo, imattaa mokkiya ishay shoobbida uraara a gayttanaadan yootiis. SHin, he maccaasiyaa he galla maallado issi uri sooppe soo biidi shoobiyaa woraqataa immishin ekkido gishshau, shiiquwan deꞌiya asaappe issuwaanne erennaagaa yootaasu.
4. Zamachan minnidi oottanau denttettiya gaasoy aybee?
4 Godaa Kahuwaa bonchanau shiiqidaageetuppe issoy neeni shoobiyaa woraqataa immido ura gidana danddayees. Neeni shoobbido uri yin aggin, neeni minnada oottiyoobay markkattanau maaddees. Neeni gishiyo shoobiyaa woraqatay Yesuusi ha wodiyan wolqqaama Kawo gidiyoogaa yootees. Neeni asaa shoobbanau minnada oottiyoobay ubbau, giishin moottan deꞌiya asau, aassiya haratuyyo, ubbaappe aaruwan wozuwaa immido gishshau neeni wozanappe galatiyo Yihoowassikka qoncce gididaba.—Qol. 3:15.