Haggaaziyo Wode Akeekancha Gida
1. Nuuni haggaaziyo wode akeekancha gidana koshshiyoy aybissee?
1 Xoossaa ashkkarati ‘wanggireello giddon deꞌiya dorssaa’ mala; qassi “geellanne nagaranchcha asaa giddon” sabbakoosona. (Maa. 10:16; Pili. 2:14) Deree deriyaa bolli denddiyoogeenne asaa wuuqqiyoogee ubbasan deꞌiyaabanne hirggissiyaaba; hegee iita asati “kaseegaappe iiti iiti” biyoogaa bessees. (2 Xim. 3:13) Geeshsha Maxaafay yootiyoobaa oosuwan peeshshiyoogee nuuni haggaaziyo wode akeekancha woy “cincca” gidanaadan maaddii?—Maa. 10:16.
2. Haggaazo moottaappe aggi kiyidi harasan sabbakanaadan oottiya hanotati ayba gidana danddayiyoonaa?
2 Cincca Gida: Leemiso 22:3y metuwaappe ‘qosetti attiyoogee’ eratetta gidiyoogaa yootees. Akeekancha gida. Woppu giidi deꞌiya shooro asaa hanotay qoppennan laamettana danddayees. Poliseti woy cora asay ogiyan issisan shiiqiyoogaa beꞌana danddayaasa. Issi issitoo loꞌꞌo gidida keettaaway neeni naagettanaadan yootana danddayees. Hanotaa eranau koyada yan takkiyoogaappe, sohuwaara aggada harasaa biyoogee cinccatetta.—Lee. 17:14; Yoh. 8:59; 1 Tas. 4:11.
3. Eranchchaa 4:9n deꞌiya qofaa haggaaziyo wode waati oosuwan peeshshana danddayiyoo?
3 Issippe Ootta: Eranchchaa 4:9y, “Issuwaa gidiyoogaappe naa77a gidiyoogee lo77o” yaagees. Neeni qohiyaabi baynnan nerkka haggaaziyoogaa meezetidaba gidikko, haꞌꞌi hegaadan oottiyoogee loꞌꞌo? Issi issi heeran loꞌꞌo. SHin hara heeran issi michiyaa woy issi yelagay barkka sooppe soo haggaaziyoogee, ubba qassi omarssan hegaadan oottiyoogee, loꞌꞌo gidenna. Akeekancha laggiyaara issippe oottiyoogee keehippe goꞌꞌiyoogee erettiis. (Era. 4:10, 12) Citan haggaaziyo wode issoy issuwaa qohuwaappe naagite. Haggaazo moottaappe biyo wode haratuyyo yoota.
4. Gubaaꞌiyan deꞌiya ubbaa qohuwaappe teqqana danddayiyoy ayba ogiyaanee?
4 Gubaaꞌiyaa cimati ‘nu shemppuwaa mintti naagiyo’ gishshau, heeraa hanotaadan goꞌꞌiya kaaletuwaa immoosona. (Ibr. 13:17) Nuuni nu huuphiyaa kawushshiyo wodenne cimatuura loytti hashetiyo wode, Yihooway anjjees. (Mik. 6:8; 1 Qor. 10:12) Xoossaa ashkkarati ubbay, ubbatoo akeekancha gidiyoogan, nu haggaazo moottan loytti markkattiyaageeta gidoos.