Haggaazuwaa Xeelliyaagan Ubbatoo Loꞌꞌobaa Qoppa

1. Yesuusi ba erissiyo ashkkaratussi aybin leemiso gididee, qassi eti waatidonaa? (Koyro sinttan deꞌiya misiliyaa xeella.)

YESUUSI saꞌan deꞌiyo wode, I ubbatoo asawu sabbakiisinne asay I yootiyoobaa siyana giidi hidootan naagiis; qassi I erissiyo ashkkaratikka hegaadan oottanaadan koyiis. (Yoh. 4:35, 36) Yesuusi ba erissiyo ashkkaratuura deꞌiyo wode, eti minnidi sabbakidosona. (Luq. 10:1, 5-11, 17) SHin, asay Yesuusa qachchidi worido wode, erissiyo ashkkarati sabbakiyoogaa guutta wodiyawu koyibookkona. (Yoh. 16:32) Yesuusi hayquwaappe denddi simmidi, minnidi sabbakanaadan eta minttettiis. Qassi I saluwaa bi simmin, eti keehi minnidi sabbakido gishshawu eta morkketi amassalidi hagaadan giidosona: “Be7ite; intte timirttiyaa Yerusalaame katamaa muleera gattideta.”—Oos. 5:28.

2. Sabbakiyoogan nuuni muruta gidanaadan Yihooway waati maaddidee?

² Koyro xeetu layttan deꞌida Kiristtaaneti Yesuusi kaalettin sabbakidosona; qassi Yihooway eta maaddiis. Yaatiyo gishshawu, daro asay eti yootiyoobaa siyiis. Leemisuwawu, PHenxxaqosxxe gallassi 33 M.Ln, 3,000 gidiya asay xammaqettiis. (Oos. 2:41) Qassi erissiyo ashkkaratu qooday keehi gujji gujji biis. (Oos. 6:7) Gidikkonne, wurssetta gallassatun keehi daro asay mishiraachchuwaa siyanaagaa Yesuusi kasetidi yootiis.— Yoh. 14:12; Oos. 1:8.

3-4. Issi issi biittatun sabbakiyoogee metana danddayiyoy aybissee, qassi ha huuphe yohuwan nuuni ay beꞌanee?

³ Nuuni ubbaykka haggaazuwaa xeelliyaagan ubbatoo loꞌꞌobaa qoppanawu baaxetana koshshees. Gidikkokka, yaatiyoogee issi issi biittatun metennaba. Aybissi? Geeshsha Maxaafaa xannaꞌanawu koyiya keehi darotuppe amaridaageeti Yihoowa Markka demmana gakkanaashin naagana koshshiyo gishshataassa. SHin, sabbakiyoogee hara biittatun aassiyaageeta keehi metees; darotoo son asi baawa, qassi son demmiyo asatikka Geeshsha Maxaafaabaa siyanawu keehi koyokkona.

⁴ Sabbakiyoogee metiyo biittan neeni deꞌiyaaba gidikko, ha huuphe yohoy yootiyo zoree nena maaddana danddayees. Aassiya amaridaageeti haggaazuwan daro asaa demmanawu waatidaakko nuuni beꞌana. Qassi nuuni yootiyoobaa asay siyin woy siyennan ixxin nuuni haggaazuwaa xeelliyaagan ubbatoo loꞌꞌobaa qoppana danddayiyoy aybissakko beꞌana.

ASA DEMMENNA WODEKKA AGGENNAN SABBAKA

5. Daro Yihoowa Markkata metiyaabay aybee?

⁵ Asaa eta son demmanaagee daro Yihoowa Markkata kaseppe keehi metees. Amarida aassiyaageeti deꞌiyo heeran mintti naagiyo pooqeti woy direttida heerati deꞌoosona. Issi keettaaway shoobbenna uri gelennaadan teqqiya naagiyaagee hegan deꞌana danddayees. Hara sohotun, Yihoowa Markkati sooppe soo metootennan baana danddayikkonne, eti son demmiyo asay darenna. Qassi aassiya harati gaxariyan woy haahosan sabbakoosona. Aassiyaageeti issi uraa demmanawu keehi adussa saatiyaa hemettikkonne, eti he uraa son demmennan aggana danddayoosona. Nuuni haggaaziyoy hegaa mala moottatun gidikko, aggennan sabbakana bessees. Nuuni hegaa mala metota xoonanawunne asaa demmidi haasayissanawu waatana danddayiyoo?

6. Sabbakiyaageeti moliyaa oyqqiyaageetu mala gidiyoy ayba ogiyaanee?

⁶ Sabbakiyo oosuwaa Yesuusi moliyaa oyqqiya uraa oosuwaara geeddarssiis. (Mar. 1:17) Moliyaa oyqqiya amarida asati ayba molenne oyqqennan daro gallassaa takkana danddayoosona. SHin eti hidootaa qanxxokkona; qassi eti moliyaa koyiyo ogiyaa laammoosona. Eti moliyaa oyqqiyo wodiyaa, sohuwaa woy hiillaa laammoosona. Haggaazuwankka nuuni hegaadan laammana danddayoos. Nuuni malana danddayiyo amaridabaa haꞌꞌi tobbana.

7. Dumma dumma saatiyan sabbakikko ayba ayfe demmana danddayiyoo?

⁷ Dumma dumma saatiyan asaa demmanawu mala. Asay son deꞌana danddayiyo saatiyan nuuni sabbakikko, daro asaa demmana danddayoos. Ayssi giikko, oonikka ba soo simmennan aggenna! Daro ishanttinne michchontti saateppe guyyiyan woy omarssan daro asaa demmiyo gishshawu he saatiyan sabbakoosona. Hegaa bollikka, keettaawati he saatiyan pashkki giidi haasayissana danddayoosona. Woy qassi Deevida giyo cimay oottidobaa neeni malana danddayaasa. Inne A laggee issi moottan guutta wodiyawu haggaazidi eti kase son asa demmibeenna keetti zaarettidi biidoogaa I yootiis. I hagaadan giis, “Nuuni zaarettidi biido wode daro keettan asaa demmidoogan garamettaas.”b

8. Eranchchaa 11:6y yootiyoobaa haggaazuwan waati oosuwan peeshshana danddayiyoo?

⁸ Nuuni asaa son demmanawu baaxetana koshshees. Ha huuphe yohuwawu waannatiya xiqisiyaappe nuuni tamaariyoobay hegaa. (Eranchchaa 11:6 nabbaba.) Qommoora abaa denttido Deevidi hidootaa qanxxibeenna. I asaa demmanawu keehi daro keettata qoxxi simmidi, wurssettan issi keettan keettaawaa demmiis. He bitanee Geeshsha Maxaafaabaa tobbanawu koyido gishshawu, hagaadan giis: “Taani hosppun laytta gidiyaagaa hagan deꞌaas; shin Yihoowa Markki ta soo yin mule beꞌa erikke.” Deevidi hagaadan giis, “Issi uri wurssettan son asaa demmiyo wode, eti nuuni yootiyoobaa siyanawu koyiyoogaa taani akeekaas.”

9. Son asaa demmanawu aassiya amaridaageeti ay oottidonaa?

⁹ Dumma dumma sohuwan mala. Son demmana danddayenna asata demmanawu, aassiya amaridaageeti sabbakiyo sohuwaa laammidosona. Leemisuwawu, gita pooqetun deꞌiya asaa demmanawu, sooppe soo biidi markkattiyoogee loꞌꞌo gidenna gishshawu, ogiyaaninne xuufiyaa wottiyo gaariyaa goꞌettidi markkattiyoogee loꞌꞌo ayfiyaa demissiya hiilla. Yaatiyoogee Yihoowa Markkati hegan deꞌiya asata demmidi haasayissanaadan maaddees. Qassi, asay allaxxiyo sohotun, giyatuuninne zalꞌꞌe heeratun he asati haasayanawu woy xuufiyaa ekkanawu koyiyoogaa aassiya daroti akeekidosona. Boliviyan woradaa xomoosiya Floorani, hagaadan giis: “Zalꞌꞌanchchati woppu giyo wodiyan nuuni 7n saateppenne 9n saateppe gidduwan giyaanne zalꞌꞌe heeri boos. Nuuni darotoo etaara loytti haasayoos; ubba qassi Geeshsha Maxaafaa xannaꞌissiyoogaa doommoos.”

10. Asaa demmanawu ayba hiillata goꞌettana danddayay?

¹⁰ Dumma dumma ogetun mala. Neeni issi uraara gayttanawu zaaretta zaarettada maliyaabadan qoppa. Neeni dumma dumma saatiyan biidaba gidikkonne son A demmabaakka. He ura neeni demmiyo hara ogeti deꞌiyoonaa? Katiriina, hagaadan gaasu, “Taani eta demmiyaakko yootanabaa qonccissada, taani son mule demmabeenna asatuyyo dabddaabbiyaa xaafays.” A oottidobaappe nuuni ay tamaariyoo? Neeni haggaaziyo wode ne moottan deꞌiya ubba asaa dumma dumma ogiyan demmanawu mala.

ASAY SIYANAWU KOYENNA WODE AGGENNAN SABBAKIYOOGAA

11. Amarida asay nu yootiyoobaa siyanawu koyennay aybissee?

¹¹ Amarida asay nu yootiyoobaa siyana koyenna. Xoossaabaa woy Geeshsha Maxaafaabaa eriyoogee koshshees giidi eti qoppokkona. Eti alamiyan keehi daro tuggay deꞌiyoogaa beꞌiyo gishshawu Xoossan ammanokkona. Geeshsha Maxaafay yootiyoobaa azazettoos giya haymaanootiyaa kaalettiyaageeti daro balabaa oottiyoogaa eti beꞌiyo gishshawu Geeshsha Maxaafaabaa eranawu koyokkona. Harati qassi bantta oosuwaabaa, bantta soo asaabaa, woy bantta metuwaabaa ubbatoo qoppoosona; qassi eti Geeshsha Maxaafay banttana maaddana danddayees giidi qoppokkona. Nuuni yootiyoobay koshshennaba giidi qoppiya asawu sabbakiyo wode waani ufayttidi daana danddayiyoo?

12. Piliphphisiyuusa 2:4n deꞌiya zoriyaa oosuwan peeshshiyoogee haggaazuwan nuna waati maaddana danddayii?

¹² Haratuyyo qoppiyoogaa bessa. Nuuni yootiyoobaa koyro heeran siyanawu koyennaageeti aassiyaagee etayyo wozanappe qoppiyoogaa eti akeekidi nu yootiyoobaa guyyeppe siyana danddayoosona. (Piliphphisiyuusa 2:4 nabbaba.) Leemisuwawu, qommoora abaa denttido Deevidi hagaadan giis, “Issi uri nuuni yootiyoobaa siyanawu koyikke giikko, nu Geeshsha Maxaafaa woy nu xuufiyaa borssan yeggidi hagaadan goos: ‘Neeni koyenna gaasuwaa yootiyaakko taani erana koyays.’” Asay issi uri etawu qoppiyoogaa akeekees. Eti nuuni yootidobaa dogana danddayoosona; shin nuuni etawu ay keena qoppiyaakko eti hassayennan waayi aggana. Issi uri nuuni ayyo mishiraachchuwaa yootanaadan koyana xayikko, nuuni nu eeshshaaninne pashkki giyoogan assi qoppiyoogaa bessana danddayoos.

13. Nuuni haasayissiyoogeeti ubbay nu yootiyoobaa siyanawu koyanaadan waatana danddayiyoo?

¹³ Nuuni haasayissiyo qofaa keettaawaa hanotaadan laammiyo wode assi qoppiyoogaa bessoos. Leemisuwawu, keettaawawu naati deꞌiyoogaa bessiyaabaa akeekiyoo? Naata dichchiyoogaa xeelliyaagan woy so asaa duussan waanidi ufayttanaakko Geeshsha Maxaafay yootiyo zoriyaa yelidaageeti siyanawu koyana danddayoosona. Eti bantta penggiyaa bollan daro qulppiyaa wottidoogaa nuuni akeekiyoo? Yaatikko nuuni danobaa xeelliyaagaaninne hegee daro asay yayyanaadan waatidi oottidaakko haasayissanawu kuuyana danddayoos. Danobay xayiyo wodiyaabaa siyidi keettaaway ufayttana danddayees. Neeni yootiyoobaa siyana koyiya asa demmido wode ubban, Geeshsha Maxaafaa zoree eta waati maaddana danddayiyaakko eti akeekanaadan maadda. Qommoora denttido Katiriina, hagaadan gaasu, “Geeshsha Maxaafay tana keehi maaddidoogaa taani qoppays.” Hegaappe denddidaagan, Katiriina asawu yootiyoobaa ammaniyo gishshawu, A haasayissiyo asay hegaa akeekana danddayees.

14. Issippe haggaaziyaageeti issoy issuwaa waati maaddana danddayiyaakko Leemiso 27:17y waati qonccissii?

¹⁴ Haratu maaduwaa ekka. Koyro xeetu layttan, Ximootiyoosi sabbakanaadaaninne tamaarissanaadan PHawuloosi A tamaarissiis; qassi Ximootiyoosi harata hegaadan maaddanaadan I minttettiis. (1 Qor. 4:17) Ximootiyoosaagaadan, nuunikka nu gubaaꞌiyan deꞌiya kaymatuppe tamaarana danddayoos. (Leemiso 27:17 nabbaba.) SHoona giyo ishaa hanotaa qoppa. Gaxariyan deꞌiya daro asay ba haymaanootiyan ufayttiyo heeran I aqinye gididi guutta wodiyawu haggaaziis. I ubbatoo waani ufayttidi deꞌidee? I hagaadan giis: “Danddayettida ubban, taani issi laggiyaara haggaazays. Nuuni issi keettaappe hara keettaa gakkanaashin biyo wodiyaa sabbakiyoogan kaseppe waani qara gidanaakko issoy issuwaa maaddanawu goꞌettoos. Leemisuwawu, keettaaway haasayidobaanne nuuni ayyo zaaridobaa haasayoos. Yaatidi issi keettaaway haroode hegaadan giyaakko nuuni waatana danddayiyaakko tobboos.”

15. Nu haggaazuwawu woosay keehi koshshiyoy aybissee?

¹⁵ Yihooway maaddana mala woossa. Sabbakiyo wode ubban Yihooway maaddana mala oychcha. Nuuni oottiyo ubbaban maaddana mala A geeshsha ayyaanay nuussi koshshees. (Maz. 127:1; Luq. 11:13) Yihooway nena maaddana mala woossiyo wode, ne koyiyoobaa qonccissada oychcha. Leemisuwawu, abaa tamaaranawu koyiya uraaranne siyanawu giigetti uttida uraara gayttanaadan maaddana mala oychcha. Yaatada nenaara gayttiya ubbawu sabbakanawu baaxetana koshshees.

16. Nuuni haggaazuwan muruta gidanawu buzo xinaatiyaa xannaꞌana koshshiyoy aybissee?

¹⁶ Buzo xinaatiyawu wodiyaa bazza. Xoossaa Qaalay hagaadan gees: “Intte Xoossai koyiyoobi, lo77obi, a ufaissiyaabinne qassi kumettabi aibakko erana.” (Roo. 12:2) Nuuni xannaꞌiyo wode, Xoossaa gujji gujjidi eroos. Qassi nuuni abaa haratuyyo yootiyo wode, nu yootiyoobaa wozanappe ammaniyoogaa eti akeekana. Qommoora ibaa denttido Katiriina hagaadan gaasu: “Guutta wodiyaappe kase, Geeshsha Maxaafan koyro erana koshshiyo amarida timirtteta xeelliyaagan taani ta ammanuwaa minttana koshshiyoogaa akeekaas. Yaatiyo gishshawu, Medhdhidaagee deꞌiyoogaa, Geeshsha Maxaafay tumuppe Xoossaa Qaala gidiyoogaanne ha wodiyan Xoossaayyo dirijjitee deꞌiyoogaa qonccissiya naqaashaa taani akeekan xannaꞌaas.” Katiriina buzo xannaꞌidoogee I ammanuwaa minttidoogaanne haggaazuwan kaseppe aaruwan ufayttanaadan O maaddidoogaa yootaasu.

NUUNI AGGENNAN SABBAKANA KOSHSHIYOY AYBISSEE?

17. Yesuusi haggaaziyo wode aggennan sabbakidoy aybissee?

¹⁷ Yesuusi I yootiyoobaa issoti issoti siyanawu koyana xayikkonne aggennan sabbakiis. Aybissi? Asay tumaa siyana koshshiyoogaa I erees; qassi I bawu danddayettida ubban daro asaa maaddanawu koyiis. Issi issi asay koyro heeran siyana xayikkonne guyyeppe siyanaagaa I erees. Eta son hanidabaa qoppa. Yesuusi heezzu layttanne baggaa haggaazido wode, A ishanttuppe ooninne I erissiyo ashkkara gidibeenna. (Yoh. 7:5) SHin, I hayquwaappe denddi simmin, eti Kiristtaane gididosona.—Oos. 1:14.

18. Nuuni aggennan sabbakana koshshiyoy aybissee?

¹⁸ Yihoowa ashkkara gidanay oonakko nuuni erokko. Issoti issoti tumaa tamaaranawu haratuugaappe daro wodiyaa ekkana danddayoosona. Ubba qassi nuuni yootiyoobaa siyanawu koyennaageeti nu loꞌꞌo eeshshaanne nuuni aggennan sabbakiyoogaa akeekoosona; qassi eti wurssettan ‘Xoossaa bonchchana’ danddayoosona.—1 PHe. 2:12.

19. Koyro Qoronttoosa 3:6, 7⁠ppe haggaazuwaa xeelliyaagan nuuni ay tamaariyoo?

¹⁹ Nuuni sabbakiyaabanne tamaarissiyaaba gidikkonne, dichchiyay Xoossaa gidiyoogaa hassayana bessees. (1 Qoronttoosa 3:6, 7 nabbaba.) Nu biittan Toophphiyan haggaaziya Getahuna giyo ishay hagaadan giis: “Laatamaappe dariya layttawu, ta deꞌiyo heeran Yihoowa Markki ta xalaala. SHin haꞌꞌi ta deꞌiyo heeran 14 aassiyaageeti deꞌoosona. Ta keettaayiyoonne ta heezzu naata gujjin, tammanne heezzati xammaqettidosona. SHiiquwaa shiiqiya asay amakaayiyan 32.” Wozanaa suure gidida asati Yihoowayyo goynniyaageeta gidanaadan maaddanawu aggennan sabbakiiddi danddayan naagidoogan Getahuni ufayttees!—Yoh. 6:44.

20. Nuuni shemppuwaa ashshiyaageetu mala gidiyoy ayba ogiyaanee?

²⁰ Yihooway ubba asaa xoqqu oottidi xeellees. Ha alamee xayanaappe kase qommo ubbaappe asaa shiishshiyo oosuwaa ba Naꞌaara oottanaadan nuussi maataa immiis. (Hag. 2:7) Sabbakiyo oosoy shemppo ashshiyo oosuwan leemisettana danddayees. Maadiniya bookkidi kessiyo sohoy woddin kiyiyoosay xayido asaa kessanawu biya citan deꞌiyaageetuura nuuni leemisettana danddayoos. Bookkiyaageetuppe paxa deꞌiyaageeti amaridaageetu xalla gidikkonne, shemppuwaa ashshiyaageeti oottiyo oosoy xoqqu ootti xeelliyo ooso. Nuuni haggaaziyo haggaazoykka hegaa mala. Seexaanaa alamiyaappe paxa ay keena asay attanaakko nuuni erokko. SHin etappe amaridaageeta maaddanaadan Yihooway nuna goꞌettana danddayees. Boliviyan deꞌiya Andresa giyo ishay hagaadan giis, “Issi ura maaddanawu daroti issippe oottido gishshawu, I tumaa tamaaridi xammaqettiyoogaa erays.” Nuunikka haggaazuwaa xeelliyaagan hegaadan ubbatoo loꞌꞌobaa qoppiyaageeta gidoos. Nuuni yaatikko, Yihooway nuna anjjana; qassi sabbakiyo oosuwan nuuni loytti ufayttana.