Oyshaa Saaxiniyaa

◼ Hayqqiyo wode nuussi deꞌiya aquwaappe amaridaagaa woy nu aquwaa muleera Yihoowa dirijjitiyau laatissanau azazanaappe kase ay qoppana koshshii?

Asi hayqqiyo wode bau deꞌiya aquwaa kaseegaadan naagana danddayenna. (Era. 9:5, 6) Yaatiyo gishshau, issi issi ishantti haꞌꞌissau banttau koshshenna miishshaa zaari ekkanau qoppidi Yihoowa dirijjitiyau hadaran immoosona. Haraati qassi, bantta gadiyaa woy keettaa deꞌido keenan goꞌettidi, hayqqiyo wode Yihoowa dirijjitee laattanaadan issi issibaa giigissoosona. Hegaa malabay darotoo sohuwaara polettiyaaba gidikkokka, issi issitoo eti qoppidobaa oottanau wayssees. Hegaa gishshau, daroti eti hayqqiyo wode bantta aquwaa ooni laattanaadan koyiyaakko bessiyaabaa kasetidi xaafi wottoosona. (2 Kaw. 20:1) Hegaadan xaafi wottidobay, eti hayqqi simmin bantta aquwaa laatissiyoobaara gayttidaagan ooyyo hadaraa immidaakkokka qonccissees. Hegaadan xaafi wottidobi xayikko, issi issi biittan hayqqida uraa aquwaa kawoy woy heera asay koyiyoogaadan shaakki ekkiyo meezee deꞌees. Hegaa gishshau, nu aquwaappe amaridaagaa woy nu aquwaa ubbaa Yihoowa dirijjitiyau laatissana koyiyaaba gidikko, hegaa qonccissiyaabaa xaafi wottana, qassi nu hadaraawaa akeekan doorana koshshees.

Nuuni hadaraa immiyo urau deexo aawatettay deꞌees. Aqoy daro gidikko hegaa shiishshidi, ekkana bessiyaageetussi shaakkiyoogee wodiyaanne wolqqaa wurssiyaaba. Qassi hegaa malabaa oottana danddayiyay oonakko kawoy kessido higgiyaa kaallana koshshees. Gubaaꞌiyan deꞌiya asay ubbay hegaa malabau hadaraa ekkanau danddayiyaagaa gidennan aggana danddayees. Hegau nuuni dooriyo uri he aawatettaa polana danddayiyaagaa, ammanettiyaagaa, qassi nuuni koyiyoogaadan oottiyaagaa gidana bessees.—Inggilizetto Beegottite! maxeetiyaa Tisaase 8, 1998 sinttaa 24n deꞌiya, “Zi Wizddem end Benefits of Isttet Pilaning” giya huuphe yohuwaanne Amaaratto Wochiyo Keelaa, Ichashe 15, 1998 sinttaa 19 xeella.