Ufayssan Immiyo Wode Yihooway Keehi Anjjees
NUNA Medhidaagee koyidobaa oottiyo maataa immiyoogan nuna bonchiis. Hegaa bollikka, bantta koyidobaa dooriyo maataa tumu goynuwaa aassanawunne a boncho sunttaa geeshshanawu, qassi a gita halchuwaa polanawu goꞌettiyaageeta keehi anjjees. Yihooway nuuni qixaatiyaa yayyidi woy azazettana bessiyo gishsha xallawu azazettanaadan koyenna. Hegaappe dumma ogiyan, nuuni wozanappe siiqidi, qassi keehi nashshidi azazettiyo wode ufayttees.
2 Leemisuwawu, Yihooway Israaꞌeelati Siinaa bazzuwan deꞌiyo wode goyno sohuwaa keexxanaadan azaziis. I, “Intteyyo de7iyaabaappe GODAAYYO immiyoobaa ehiite; GODAAYYO immiyoobaa ehaanau koyiya ooninne [eho]” yaagiis. (Kes. 35:5) Israaꞌeela asa gidida uri bawu deꞌiya aybanne immana danddayees; qassi asay ba dosan immiyoobay aybanne gidin, woy ay keenanne gidin, hegaa Xoossaa sheniyaa polanawu suure goꞌettana danddayettees. Yaatin asay waatidee?
3 “Immanau koyidaageetinne eta wozanai eta imma imma giidoogeeti ubbai” “bantta dosan” imotaa immidosona. Attuma asaykka macca asaykka Yihoowa oosuwawu maaddiya, kaallidi deꞌiyaabaa ufayttidi immiis: hegeekka, worqqaappe medhido alleeqota, hayttaa gutuchata, migidota, qooriyan aattiyo gujjumatanne worqqaa alleeqota, salo milatiya qacinaa, ocha teera milatiya qacinaa, shololla zoꞌo qacinaa, liinuwaa giyo liiqo qacinaa, deeshshaa agoziyaa, dorssa orggiyaa calaa zoꞌo qalamiyan yeggi kessidoogaa, sawiya ixaanaa, zaytiyaa, bonchettida shuchata, biraa, nahaasiyaa, qassi guuganttaa. Wurssettan, “eti ehiido imotai ooso ubbaa oottanau gididi [palahiis].”—Kes. 35:21-24, 27-29; 36:7.
4 Yihoowa keehi ufayssiday eti immido imotaa gidennan, eti immanawu wozanappe koyidoogaa. Eti bantta wodiyaanne wolqqaakka Yihoowa oosuwawu immanawu koyidosona. Geeshsha Maxaafay, ‘kushe hiillaa eriya maccaasay ubbay bantta kushiyan suqqidoogaa’ yootees. “Qassikka imuwaa immanau koyida maccaasai ubbai deeshshaa agoziyaa daddidosona.” Hegaa bollikka, Yihooway Baxaaliꞌeela “hiillan, akeekaaninne ooso ubbaa oottiyo eran kunttiis.” Ee, Xoossay Baxaaliꞌeelinne Oholiꞌaabi banttawu imettida oosuwaa polanaadan maaddiya eraa immiis.—Kes. 35:25, 26, 30-35.
5 Yihooway Israaꞌeelati imotaa immanaadan odido wode, “GODAAYYO immiyoobaa ehaanau koyiya” ubbay tumu goynuwawu maaddiyaabaa oottanaagaa erees. Qassi immanawu koyiya asay yaatiyo wode, etawu kaaletuwaanne ufayssaa immiyoogan eta darissidi anjjees. Yihooway hegaadan oottiyoogan ayyo ufayssan immiya asaa anjjiyoogan ba oosuwawu koshshiya aybanne pacissennaagaa bessiis. (Maz. 34:9) Neeni ne goꞌꞌaa aggabayada Yihoowawu oottiyo wode i nena anjjana.