Harata Koshshiyaaban Waati Maaddana Danddayiyoo?

DICCIIDDI deꞌiya issi biittan gubaaꞌe cima gidida Fransuway hagaadan giis: “Xoonanau daro baaxetido dooroy wuri simmin denddida ooshshay shaꞌan qoodettiya Yihoowa Markkati bantta keettaa aggidi baqatanaadan oottiis. Deꞌiya kattaynne xalee guutta gidiyo gishshau, waagay keehi alꞌꞌo. Bankke keettay gorddettiis; qassi asay miishshaa ekkiyo maashiniyan miishshi baawa woy maashinee oottenna.”

Macara biiruwaappe yiida ishantti baqatidi Kawotettaa Addaraashatun shiiqida Yihoowa Markkatussi sohuwaara miishshaanne etau koshshiya harabaa immiyoogaa doommidosona. Issoy issuwaara eqettiya citati ogiyaa gorddikkonne, naaꞌꞌu baggan deꞌiyaageetikka Yihoowa Markkati polotikan mule gelennaagaa eriyo gishshau, macara biiruwaappe yiya kaameti hegaara kanttanaadan darotoo paqqadoosona.

Fransuway hagaadan giis: “Issi Kawotettaa Addaraashaa biyo wode qosetti uttidi zambbiyaageeti nu kaamiyaa bolli tokkosidosona. SHin, xiitee nuuppe gidduwaara aadhiis. Issi wotaaddaray zayyiyaa oyqqidi nuukko woxxiiddi yiyaagaa beꞌidi, nu kaamiyaa sohuwaara guyye zaaridi eesuwan macara biiruwaa guyye simmidi biida. Nuuni paxa attido gishshau Yihoowa galatida. Wonttetta gallassi, he Kawotettaa Addaraashan deꞌiya 130 ishantti naagetti attiyo sohuwaa biidosona. Amaridaageeti macara biiruwaa yiidosona; yan he iita wodee aadhana gakkanaashin asatettaaninne ayyaanaaban etau koshshiyaabaa kunttida.”

Fransuway hagaadan giis: “He biittan ubbasan deꞌiya ishantti guyyeppe macara biiruwau xaafido dabddaabbiyan wozanappe galatidosona. Harasan deꞌiya ishantti banttana waati maaddidaakko beꞌidoogee eti Yihoowan kaseegaappe aaruwan ammanettanaadan oottiis.”

Meretaa gaasuwaaninne asaa gaasuwan bashshay gakkiyo wode, maadoy koshshiyo ishanttanne michontta, “Tamaa ho77ite. Kallidi miite” gookko. (Yaaq. 2:15, 16) Nuuni etassi asatettan koshshiyaabaa kunttanau koyoos. Hegaadankka, koyro xeetu layttan koshay denddanaagaa siyidi, “kaalliyaageeti huuphiyan huuphiyan bantta wolqqaa keenaa miishshaa peeridi, Yihudan de7iya bantta ishanttussi maaduwaa yeddanau qofaa qachchidosona.”—Oos. 11:28-30.

Nuuni Yihoowa ashkkarata gidiyo gishshau, asatettaaban maadoy koshshiyoogeeta maaddana koyoos. SHin, asau ayyaanaabaa koshshaykka deꞌees. (Maa. 5:3) He koshshaa akeekidi hegaa kunttanaadan eta maaddanau, Yesuusi bana kaalliyaageeti erissiyo ashkkara oottanaadan kiittiis. (Maa. 28:19, 20) Nuuni nu wodiyaappe, nu wolqqaappenne nu aquwaappe daruwaa he kiitaa polanau peeshshoos. Nu dirijjitee asay immido miishshaappe amaridaagaa asaa aquwaaban maaddanau peeshshikkonne, he miishshan oottiyo waannabay Xoossaa Kawotettaara gayttidabaanne mishiraachuwaa yootiyoogaa. Yaatiyoogan, Xoossaanne nu shooruwaa siiqiyoogaa bessoos.—Maa. 22:37-39.

Yihoowa Markkatu alame yuusho oosuwaa miishshan maaddiyaageeti eti immiyo miishshay bessiyaaban maara peꞌiyoogaa ammanettana danddayoosona. Maadoy koshshiyo ishata maaddana danddayay? Erissiyo ashkkara oottiyo oosuwan maaddana koyay? Yaatikko, “neeyyo wolqqai de7ishin, metootidaagau lo77obaa oottiyoogaa aggoppa.”—Lee. 3:27.

ISSOTI ISSOTI SAꞌA YUUSHO OOSUWAU MIISHSHAA WAATI IMMIYOONAA?

Kiitettida PHauloosa wodeegaadan, ha wodiyan daroti gubaaꞌiyan “Alame Yuusho Oosuwau” giya xuufee deꞌiyo saaxiniyan yegganau amarida miishshaa ‘dagayoosona.’ (1 Qor. 16:2) SHiiqida miishshaa gubaaꞌeti Yihoowa Markkatu oosuwaa bantta biittan kaalettiya biiruwau aginan aginan yeddoosona. Neeni immiyo miishshaa Yihoowa Markkati ne biittan goꞌettiyo, higgiyan erettida dirijjitiyau yeddanaukka danddayaasa. Ne biittan Yihoowa Markkati goꞌettiyo, higgiyan erettida waanna dirijjitiyaa sunttaa eranau yan deꞌiya macara biiruwaa oycha. Macara biiruwaa adrashaa www.jw.org Weyb sayttiyan beꞌana danddayaasa. Neeni yeddana danddayiyo imotaa qommoy hagaappe kaallidi deꞌiyaagaa:

MULEERA IMMIYOOGAA
- Miishshaa, alleequwaa woy hara alꞌꞌobaa imotaa.
- Immiyo miishshay woy harabay muleera imettidaba gidiyoogaa dabddaabbiyan qonccissa.
KOSHSHIKKO ZAARIDI EKKANAU IMMIYOOGAA
- Immiya uri koyiyaaba gidikko zaaridi ekkanau immiyo miishshaa.
- Immiyo miishshaa koshshikko zaarada ekkanaagaa dabddaabbiyan qonccissa.
LOYTTI HALCHIDI IMMIYOOBAA

Miishshaappenne neeni goꞌettiyo alꞌꞌoobaappe harabaa immiyoogankka, alame yuusho Kawotettaa oosuwaa maaddana danddayaasa. Hegeetikka hagaappe kaallidi deꞌiyaageeta. Neeni goꞌettana koyiyo ogee awugaanne gidin, intte biittan deꞌiyaagaa eranau kasetada ne biittaa macara biiruwaa oycha. Higgiyaa hanotaynne qaraxaa wogay dumma dumma gidiyo gishshau, neeni ayba ogiyan immiyoogee loꞌꞌokko dooranaappe kase qaraxaabaanne higgiyaabaa eranchata zoretaa bessiyoogee keehi loꞌꞌo.

Inshuranssiyaa: Issi uri Yihoowa Markkatu haymaanoote dirijjitee ba gishshaa deꞌuwaa inshuransse higgiyan woykko xurataa miishshaa goꞌettanaadan oottana danddayees.

Bankkiyan Deꞌiya Miishshaa: Deꞌiyo biittaa bankkiyaa higgee paqqadiyoogaadan, bankkiyan deꞌiya miishshay, miishshay deꞌiyoogaa qonccissiya woraqatay woykko xurataa miishshay hadaran woykko hayqqiyo wode Yihoowa Markkatuyyo imettanaadan qonccissana danddayettees.

Akisiyoonetanne Bonddeta: Akisiyoonetanne bonddeta Yihoowa Markkatu haymaanoote dirijjitiyau immana danddayettees; woykko hayqqi simmin Yihoowa Markkatu haymaanoote dirijjitiyau imettanaadan oottana danddayettees.

Gadiyaanne Keettaa: Keetta gidikko, deꞌido keenan goꞌettidi hegaappe simmin laatissiyo, woykko Yihoowa Markkatu dirijjitiyau immiyo bayzettana danddayiya keettaanne biittaa.

Immidobaappe Aballiyaa Ekkiyoogaa: Immiya uri woy a kalꞌꞌatiya uri ba deꞌido wodiyan layttan layttan amarida aballiyaa ekkana mala Yihoowa Markkata kalꞌꞌatiya dirijjitiyau immiyo miishshaa woy issibay he uraabaa gidiyoogaa erissiya sanadeta. Immiya uri immiyo layttan kaseegaappe guutta qaraxaa qanxxees.

Laataanne Hadara Miishshaa: Higgiyaara maayettiya ogiyan, aquwaa woykko miishshaa Yihoowa Markkata kalꞌꞌatiya dirijjitiyaa laatissanau woykko hadaran immettida aquwan Yihoowa Markkata kalꞌꞌatiya dirijjitee goꞌettanaadan oottana danddayettees. Ha imotaa immiyaagee qaraxaara gayttidaagan goꞌettana danddayees.

“Loytti halchidi immiyoobaa” yaagiyaagee hagaa mala imotaa immiya uri loytti halchana koshshiyoogaa bessees. Yihoowa Markkatu alame yuusho oosuwaa halchidi maaddanau koyiyaageetussi hegaa loytti qonccissanau, Kawotettaabaa Sabbakiyo Alame Yuusho Oosuwau Maaddanau Loytti Halchidi Immiyoobaa giya brooshuree Inggilizettuwaaninne Isppeenettuwan giigiis. Ha brooshuree giigidoy, asay hayqqiyo wode laatissiyoogaadan sinttappe woy qassi haꞌꞌi imotaa immanau waatana danddayiyaakko dumma dumma qofaa qonccissanaassa. Intte biittan deꞌiya qaraxaa higgiyaa gaasuwan woy hara higgiyaa gaasuwan ha brooshuriyan qonccida issi issibay neeyyo hanennan aggana danddayees. Yaatiyo gishshau, ha brooshuriyaa nabbaba simmada, higgiyaa woykko qaraxaa xeelliyaagan zoriyaa oychana koshshees. Daroti hagaa mala hanotan kehatettan immiyoogan, nuuni alame yuushuwan oottiyo haymaanoote oosuwaaninne asau koshshiyaaban maaddidosona; qassi qaraxaara gayttidaagan goꞌettidosona. Ha brooshuree ne biittan deꞌikko, ne gubaaꞌiyaa xaafiyaa oychada demmana danddayaasa.

Gujo qonccissuwaa demmanau hagaappe kaallidi deꞌiya adrashan woykko silkke quxuriyan macara biiruwaa oychana danddayaasa. Woykko neeni deꞌiyo biittaa macara biiruwaa oychana danddayaasa.

LOYTTI HALCHIDI IMMANAU

Yeyihowa Misikiroch

P. O. Box 5522

Addis Ababa

Ethiopia, Silkkee: 011-6603611