‘Keha Asi Anjjettana’

ASAY benippekka doommidi tumu goynuwawu darobaa yarshshees. Israaꞌeelati mehiyaa yarshshidosona; qassi Kiristtaaneti ubbatoo “galataa yarshshuwaa” yarshshiyoogan erettoosona. SHin Xoossaa keehi ufayssiya hara yarshshotikka deꞌoosona. (Ibr. 13:15, 16) Kaallidi deꞌiya leemisoti bessiyoogaadan, hegaadan yarshshiyoogee ufayssaanne anjjuwaa demissees.

Beni wode deꞌida, Xoossawu ammanettada oottida Haanna naꞌa yelanawu amottikkokka, yelana danddayabeykku. A naꞌa yelikko, ‘i ba deꞌo laytta ubban Yihoowayyo oottanaadan immanaagaa’ woosan Yihoowawu qaalaa gelaasu. (1 Sam. 1:10, 11) Guyyeppe, Haanna shahaarada attuma naꞌaa yelaasu; yaatada Sameela ga sunttaasu. Sameeli xanttaa duuxxidoogaappe guyyiyan, Haanna kase shiiqettidoogaadan, ba naꞌaa gayttiyo dunkkaaniyaa ekkada baasu. Haanna ba goꞌꞌaa aggabayido gishshawu Yihooway o anjjiis. Anjjin, a hara ichashu naata yelaasu; qassi Sameeli hananabaa yootiyaagaa gidiisinne Geeshsha Maxaafaa xaafiis.—1 Sam. 2:21.

Haannigaadaaninne Sameelaagaadan, ha wodiyan deꞌiya Kiristtaanetuyyookka bantta deꞌuwan banttana Medhidaagawu haggaaziyo gita maatay deꞌees. Nuuni Yihoowayyo goynnanawu giidi nu goꞌꞌaa aggibayiyo ubbabay daro anjjuwaa demissanaagaa Yesuusi yootiis.—Mar. 10:28-30.

Koyro xeetu layttan, Dorqqo giyo Kiristtaaniyaa “lo77obaa oottaiddanne hiyyeesaa maaddaidda de7aasu”; a harata maaddanawu ba goꞌꞌaa aggabayiyoogan erettiya asa. SHin “a harggada haiqqin” gubaaꞌee keehi azzaniis. Erissiyo ashkkarati PHeexiroosi he heeran deꞌiyoogaa eridi, i etakko sohuwaara yaanaadan awu kiittidosona. PHeexiroosi yiidi Dorqqo hayquwaappe denttin eti ay keena ufayttidaakko qoppa; Yesuusi kiittidoogeetuppe asa hayquwaappe denttida uri kase baa! (Oos. 9:36-41) Dorqqa ba goꞌꞌaa aggabayada oottidobaa Xoossay dogibeenna. (Ibr. 6:10) A kehatettan oottido loꞌꞌobay nuuni kaallanaadan Xoossaa Qaalan xaafettiis.

Kiitettida PHawuloosikka harata maaddiyaabaa oottanawu ba wodiyaa kehatettan immiyoogan loꞌꞌo leemiso. PHawuloosi Qoronttoosan deꞌiya ba mala Kiristtaanetuyyo, “Taani intte shemppuwaayyo taayyo de7iyaabaa tanaara gattada ufaissan immana” yaagiis. (2 Qor. 12:15) Issi uri harata maaddanawu giidi ba goꞌꞌaa aggibayiyoogee izaawa ufayssiyoogaappekka aaruwan Yihooway a anjjanaadaaninne nashshanaadan oottiyaaba gidiyoogaa PHawuloosi ba deꞌuwan beꞌiis.—Oos. 20:24, 35.

Nuuni Kawotettaara gayttidabaa oottanawunne nu ishanttanne michontta maaddanawu nu wodiyaanne wolqqaa goꞌettiyo wode Yihooway ufayttiyoogee qoncce. SHin Kawotettaabaa sabbakiyo oosuwaa maaddanawu nuuni oottana danddayiyo harabi deꞌii? Ee, deꞌees! Nu wodiyaanne wolqqaa goꞌettiyoogaa bolli miishshaa immiyoogankka nu Xoossaa bonchana danddayoos. He miishshay misoonaawetuyyoonne kumetta wodiyaa dumma haggaazuwaa haggaaziyaageetuyyo koshshiyaabaa kunttiyoogaa gujjin, kumetta saꞌan sabbakiyo oosuwawu maaddees. Hegaa bollikka, asay ba dosan immiyo miishshay xuufiyaa birshshiyoonne biiduwaa giigissiyo, meretay daafabaa gattin qohettidaageeta maaddiyo, qassi ooratta SHiiquwaa Addaraashaa keexxiyo oosuwawu maaddees. ‘Keha asi anjjettanaagaa’ ammanettana danddayoos. Hegaa bollikka, nu duretettaa Yihoowawu immiyo wode hegan a bonchoos.—Lee. 3:9; 22:9.

Kumetta Saꞌan Oottiyo Oosuwawu Miishshaa Waati Immiyoo?

Kiitettida PHawuloosa wodeegaadan, ha wodiyan daroti gubaaꞌiyan “Kumetta Saꞌaa Oosuwawu” giya xuufee deꞌiyo saaxiniyan yegganawu amarida miishshaa ‘dagayoosona.’ (1 Qor. 16:2) SHiiqida miishshaa gubaaꞌeti Yihoowa Markkatu oosuwaa bantta biittan kaalettiya biiruwawu aginan aginan yeddoosona. Neeni immiyo miishshaa Yihoowa Markkati ne biittan goꞌettiyo, higgiyan erettida dirijjitiyawu yeddanawukka danddayaasa. Ne biittan Yihoowa Markkati goꞌettiyo, higgiyan erettida waanna dirijjitiyaa sunttaa eranawu yan deꞌiya macara biiruwaa oycha. Macara biiruwaa adrashaa www.jw.org weyb sayttiyan beꞌana danddayaasa. Neeni immana danddayiyo imotaa qommoy hagaappe kaallidi deꞌiyaagaa:

MULEERA IMMIYOOGAA

Bankkiyaappe elektiroonikiyaa baggaara, deebit karddiyan woykko kiredit karddiyan immiyoogaa. Issi issi macara biirotun jw.org weyb sayttiyaa woy doorettida hara weyb sayttiyaa goꞌettidikka hegaadan oottana danddayettees.
Miishshaa, alleequwaa woy hara alꞌꞌo imotaa. Immiyo miishshay woy harabay muleera imettidaba gidiyoogaa dabddaabbiyan qonccissa.

KOSHSHIKKO ZAARIDI EKKANAWU IMMIYOOGAA

Immiya uri koyiyaaba gidikko zaaridi ekkanawu immiyo miishshaa.
Immiyo miishshaa koshshikko zaarada ekkanaagaa dabddaabbiyan qonccissa.

LOYTTI HALCHIDI IMMIYOOBAA

Miishshaappenne neeyyo deꞌiya alꞌꞌoobaappe harabaa immiyoogankka, kumetta saꞌan oottiyo Kawotettaa oosuwaa maaddana danddayaasa. Hegeetikka hagaappe kaallidi deꞌiyaageeta. Neeni goꞌettana koyiyo ogee awugaanne gidin, intte biittan deꞌiyaagaa eranawu kasetada ne biittaa macara biiruwaa oycha. Higgiyaa hanotaynne qaraxaa wogay wodiyaappe wodiyan dummatiyo gishshawu, neeni ayba ogiyan immiyoogee loꞌꞌokko dooranaappe kase qaraxaabaanne higgiyaabaa eranchata zoriyaa oychiyoogee keehi loꞌꞌo.

Inshuranssiyaanne Xurataa: Issi uri Yihoowa Markkatu haymaanoote dirijjitee ba gishshaa deꞌuwaa inshuransse higgiyan woykko xurataa miishshaa goꞌettanaadan oottana danddayees.

Bankkiyan Deꞌiya Miishshaa: Deꞌiyo biittaa bankkiyaa higgiyaara maayiya ogiyan, issi urawu bankkiyan deꞌiya miishshay he uray hayqqiyo wode Yihoowa Markkatu dirijjitiyaayyo imettana danddayees.

Akisiyooniyaanne Bonddiyaa: Akisiyooniyaanne bonddiyaa Yihoowa Markkatu haymaanoote dirijjitiyawu immana danddayettees; woykko hayqqi simmin Yihoowa Markkatu haymaanoote dirijjitiyawu imettanaadan oottana danddayettees.

Gadiyaanne Keettaa: Yihoowa Markkatu dirijjitiyawu immiyo, bayzettana danddayiya keettaanne biittaa; keetta gidikko, deꞌido keenan goꞌettidi hegaappe simmin laatissana danddayettees.

Laataanne Hadara Miishshaa: Higgiyaara maayiya ogiyan, aquwaa woykko miishshaa Yihoowa Markkatu dirijjitiyaa laatissanawu woykko hadaran immettida aquwan Yihoowa Markkatu dirijjitee goꞌettanaadan oottana danddayettees. Ha imotaa immiyaagee qaraxaara gayttidaagan goꞌettana danddayees.

“Loytti halchidi immiyoobaa” giya qofay hegaa mala imotaa immiya uri loytti halchana koshshiyoogaa qonccissees. Yihoowa Markkati kumetta saꞌan oottiyo oosuwaa halchidi maaddanawu koyiyaageetussi hegaa loytti qonccissanawu, Kawotettaabaa Sabbakiyo Kumetta Saꞌan Oottiyo Oosuwaa Maaddanawu Loytti Halchidi Immiyoobaa giyo brooshuree Inggilizettuwaaninne Isppeenettuwan giigiis. Ha brooshuree giigidoy, asay deꞌon deꞌiyo wode woy sinttappe hayqqiyo wode laatissiyoogan imotaa immanawu waatana danddayiyaakko dumma dumma qofaa qonccissanaassa. Intte biittan deꞌiya qaraxaa higgiyaa gaasuwan woy hara higgiyaa gaasuwan ha brooshuriyan qonccida issi issibay neeyyo hanennan aggana danddayees. Daroti hagaa mala hanotan kehatettan immiyoogan, kumetta saꞌan oottiyo haymaanoote oosuwaanne asawu koshshiyaabaa kunttiyo oosuwaa miishshan maaddidosona; qassi qaraxaara gayttidaagan goꞌettidosona. Ha brooshuree ne biittan deꞌikko, intte gubaaꞌiyaa xaafiyaa oychada demmana danddayaasa.

Gujo qofaa demmanawu jw.org saytiyaa koyro sinttaa tohossan deꞌiya “Kumetta Saꞌan Nu Oottiyo Oosuwawu Miishshaa Immanawu” giyaagaa bochana woy neeni deꞌiyo biittaa macara biiruwaa oychana danddayaasa.