“Oosoi Gita”

YERUSALAAMEN keehi koshshiya shiiquwawu shiiqiyo wodee gakkiis. Kawuwaa Daawiti ba halaqata, kawo keettaa oosanchatanne mino asata ubbaa shiishshiis. Eti dumma erissuwaa siyidi ufayttidosona. Xoossaayyo goynniyoosa gidida maalaalissiya beeta maqidasiyaa keexxanaadan Yihooway Daawita naꞌaa Solomona dooriis. Cimida Israaꞌeela kawoy Xoossay ba ayyaanan akeekissido, beeta maqidasiyaa keexxiyo halchuwaa Solomonayyo immiis. Daawiti, “Ha keexettana keettai asa keetta gidennan GODAA Xoossaa Beeta Maqidasiyaa gidiyo gishshau, oosoi gita” yaagiis.—1 Odi. 28:1, 2, 6, 11, 12; 29:1.

Daawiti kaallidi, “Intteppe hachchi ba sheniyan GODAAYYO kehidi immanai oonee?” yaagidi oychiis. (1 Odi. 29:5) Neeni he sohuwan deꞌiyaaba gidiyaakko waatuutee? Ha gita oosuwaa maaddanawu koyuutee? Israaꞌeelati ha oosuwaa maaddanawu denddidosona. Ubba asay “ba sheniyan ba kumetta wozanan GODAAYYO immido gishshau ufaittiis.”—1 Odi. 29:9.

Daro xeetu layttappe simmin, Yihooway beeta maqidasiyaappe keehi aadhiyaabaa giigissiis. Yesuusa yarshshuwaa baggaara asay baassi goynnanaadan maaddanawu Yihooway ayyaana beeta maqidasiyaa gitaa giigissiis. (Ibr. 9:11, 12) Yihooway ha wodiyan asay aara sigettanaadan waati maaddii? Erissiyo ashkkara oottiyo oosuwaa baggaara maaddees. (Maa. 28:19, 20) Ha oosuwaappe denddidaagan, layttan layttan miilooniyan qoodettiyaageeti Geeshsha Maxaafaa xannaꞌoosona, shaꞌan qoodettiya erissiyo ashkkarati xammaqettoosona, qassi xeetan qoodettiya ooratta gubaaꞌeti eqqoosona.

Hegee daro Geeshsha Maxaafaa xuufeta attamanaadan, Kawotettaa Addaraashatanne gita shiiquwaa Addaraashata keexxanaadan oottiis. Mishiraachuwaa yootiyoogee gita ooso gidiyoogaanne anjjuwaa demissiyaaba gidiyoogaa maayikkii?—Maa. 24:14.

Xoossaanne nu shooruwaa siiqiyoogeenne Kawotettaa mishiraachoy eesuwan sabbakana koshshiyaaba gidiyoogee Xoossaa asay ‘ba sheniyan Yihoowayyo kehidi immanaadan’ denttettees. ‘Yihoowa nu duretettan bonchiyoogee’ qassi hegaa mala aquwaa ha gita oosuwaa oottanawu Yihoowa asay ammanettiyaagaa gididi maara goꞌettiyoogaa beꞌiyoogee keehi ufayssees.—Lee. 3:9.

Kumetta Saꞌan Oottiyo Oosuwawu Miishshaa Waati Immiyoo?

Kiitettida PHawuloosa wodeegaadan, ha wodiyan daroti gubaaꞌiyan “Alame Yuusho Oosuwawu” giya xuufee deꞌiyo saaxiniyan yegganawu amarida miishshaa ‘dagayoosona.’ (1 Qor. 16:2) SHiiqida miishshaa gubaaꞌeti Yihoowa Markkatu oosuwaa bantta biittan kaalettiya biiruwawu aginan aginan yeddoosona. Neeni immiyo miishshaa Yihoowa Markkati ne biittan goꞌettiyo, higgiyan erettida dirijjitiyawu yeddanawukka danddayaasa. Ne biittan Yihoowa Markkati goꞌettiyo, higgiyan erettida waanna dirijjitiyaa sunttaa eranawu yan deꞌiya macara biiruwaa oycha. Macara biiruwaa adrashaa www.jw.org weyb sayttiyan beꞌana danddayaasa. Neeni yeddana danddayiyo imotaa qommoy hagaappe kaallidi deꞌiyaagaa:

MULEERA IMMIYOOGAA

Bankkiyaappe elektiroonikiyaa baggaara, deebit karddiyan, kiredit karddiyan woy moobayliyan miishshaa immiyoogaa. Issi issi macara biirotun jw.org weyb sayttiyaa woy doorettida hara weyb sayttiyaa goꞌettidikka hegaadan oottana danddayettees.
Miishshaa, alleequwaa woy hara alꞌꞌobaa imotaa. Immiyo miishshay woy harabay muleera imettidaba gidiyoogaa dabddaabbiyan qonccissa.

KOSHSHIKKO ZAARIDI EKKANAWU IMMIYOOGAA

Immiya uri koyiyaaba gidikko zaaridi ekkanawu immiyo miishshaa.
Immiyo miishshaa koshshikko zaarada ekkanaagaa dabddaabbiyan qonccissa.

LOYTTI HALCHIDI IMMIYOOBAA

Miishshaappenne neeni goꞌettiyo alꞌꞌoobaappe harabaa immiyoogankka, kumetta saꞌan oottiyo Kawotettaa oosuwaa maaddana danddayaasa. Hegeetikka hagaappe kaallidi deꞌiyaageeta. Neeni goꞌettana koyiyo ogee awugaanne gidin, intte biittan deꞌiyaagaa eranawu kasetada ne biittaa macara biiruwaa oycha. Higgiyaa hanotaynne qaraxaa wogay wodiyaappe wodiyan dummatiyo gishshawu, neeni ayba ogiyan immiyoogee loꞌꞌokko dooranaappe kase qaraxaabaanne higgiyaabaa eranchata zoriyaa oychiyoogee keehi loꞌꞌo.

Inshuranssiyaa: Issi uri Yihoowa Markkatu haymaanoote dirijjitee ba gishshaa deꞌuwaa inshuransse higgiyan woykko xurataa miishshaa goꞌettanaadan oottana danddayees.

Bankkiyan Deꞌiya Miishshaa: Deꞌiyo biittan bankkiyaa higgiyaara maayettiya ogiyan, bankkiyan deꞌiya miishshay, miishshay deꞌiyoogaa qonccissiya woraqataa woykko xurataa miishshay hadaran woykko hayqqiyo wode Yihoowa Markkatuyyo imettanaadan qonccissana danddayettees.

Akisiyoonetanne Bonddeta: Akisiyoonetanne bonddeta Yihoowa Markkatu haymaanoote dirijjitiyawu immana danddayettees; woykko hayqqi simmin Yihoowa Markkatu haymaanoote dirijjitiyawu imettanaadan oottana danddayettees.

Gadiyaanne Keettaa: Yihoowa Markkatu dirijjitiyawu immiyo, bayzettana danddayiya keettaanne biittaa; keetta gidikko, deꞌido keenan goꞌettidi hegaappe simmin laatissana danddayettees.

Immidobaappe Aballiyaa Ekkiyoogaa: Immiya uri woy a gishshaa oottiya uri ba deꞌido wodiyan layttan layttan amarida aballiyaa ekkana mala Yihoowa Markkatu dirijjitiyawu immiyo miishshaa woy issibay he uraabaa gidiyoogaa erissiya sanadeta. Immiya uri immiyo layttan kaseegaappe guutta qaraxaa qanxxana danddayees.

Laataanne Hadara Miishshaa: Higgiyaara maayettiya ogiyan, aquwaa woykko miishshaa Yihoowa Markkatu dirijjitiyaa laatissanawu woykko hadaran immettida aquwan Yihoowa Markkatu dirijjitee goꞌettanaadan oottana danddayettees. Ha imotaa immiyaagee qaraxaara gayttidaagan goꞌettana danddayees.

“Loytti halchidi immiyoobaa” giyoogee bessiyoogaadan, hagaa mala imotaa immiya uri loytti halchana koshshees. Yihoowa Markkati kumetta saꞌan oottiyo oosuwaa halchidi maaddanawu koyiyaageetussi hegaa loytti qonccissanawu, Kawotettaabaa Sabbakiyo Kumetta Saꞌan Oottiyo Oosuwaa Maaddanawu Loytti Halchidi Immiyoobaa giyo brooshuree Inggilizettuwaaninne Isppeenettuwan giigiis. Ha brooshuree giigidoy, asay hayqqiyo wode laatissiyoogaadan sinttappe woy qassi haꞌꞌi imotaa immanawu waatana danddayiyaakko dumma dumma qofaa qonccissanaassa. Intte biittan deꞌiya qaraxaa higgiyaa gaasuwan woy hara higgiyaa gaasuwan ha brooshuriyan qonccida issi issibay neeyyo hanennan aggana danddayees. Daroti hagaa mala hanotan kehatettan immiyoogan, nuuni kumetta saꞌan oottiyo haymaanoote oosuwaaninne asawu koshshiyaaban maaddidosona; qassi qaraxaara gayttidaagan goꞌettidosona. Ha brooshuree ne biittan deꞌikko, intte gubaaꞌiyaa xaafiyaa oychada demmana danddayaasa.

Gujo qofaa demmanawu jw.org saytiyaa koyro sinttaa tohossan deꞌiya “Make a Donation to Our Worldwide Work” giyaagaa bochana woy neeni deꞌiyo biittaa macara biiruwaa oychana danddayaasa.