Ne Zoriya Wozanaa Minttada Naaga

1. Haggaazo layttaa 2013 dumma shiiquwaa gallassaa huuphe yohoy woygiyaagee, ha prograamee giigidoy aybissee?

¹ Zoriya wozanaa yeggi agganaadan oottana danddayiyaabay nuna galla galla gakkees. Haggaazo layttaa 2013n doommiya, dumma shiiquwaa prograamiyaa huuphe yohoy, “Ne Zoriya Wozanaa Minttada Naaga” giyoy hegaassa. (1 Xim. 1:19) Medhidaagee immido ha muruta imotaa nuuni loytti go⁠ꞌettiyo ogiyaa mintti qoppanaadan maaddanau ha prograamee giigiis.

2. Ha prograamiyan zaaro demmiyo waanna oyshati awugeetee?

² Kaallidi De⁠ꞌiyaabaa Akeekite: Ha prograamee zoriya wozanaa xeelliyaagan laappun waanna oyshata zaarees:

• Zoriya wozanaa mooriyaabay aybee aybee?

• Zoriya wozanaa waati loohissana danddayiyoo?

• Asa suuttan ashettennan attana danddayiyoy ayba ogiyaanee?

• Geeshsha Maxaafaa baaso siraataara gayttidaagan nuuni qoppiyoobaynne oottiyoobay nubaa ay qonccissii?

• Zoriya wozanaara gayttidaagan harata qohiyoogaappe waani naagettana danddayiyoo?

• Yelagatoo, zoriya wozanaa intte yeggi agganaadan paacettiyo wode waani genccana danddayeetii?

• Ayyaanaa kaaletuwaa kaalliya zoriya wozanay deꞌiyoogeeti ayba anjjuwaa demmiyoonaa?

3. Ha shiiqoy nuna goꞌꞌana danddayiyoy ayba ogiyaanee?

³ Seexaanay nu zoriya wozanaa mooranau oottiyoobaa Yihoowa maaduwan eqettana danddayoos. Saluwan deꞌiya nuna siiqiya Aaway, ba Qaalaanne ba dirijjitiyaa baggaara, “Ogee hagaa; an biite” yaagees. (Isi. 30:21) Ha prograamee Yihooway hegaadan yootiyo ogetuppe issuwaa. Hegaa gishshau, kumetta prograamiyan goꞌettanau issi issibaa giigissite. Qassi loytti ezggite; tamaariyoobaa waatidi oosuwan peeshshanaakko qoppite. He shiiquwaabaa so asaara tobbite. Nuuni tamaaridobaa oosuwan peeshshiyoogee ‘geeshsha zoriya wozanay’ deꞌiyoogeeta gidanaadan minttettees; qassi Seexaanaa alamiyan deꞌiya, guutta wodiyau ufayttiyooban cimettennaadan maaddees.​—⁠1 PHe. 3:⁠16.