Danddayikke Gaada Guyye Gooppa
1. Issoti issoti Geeshsha Maxaafaa xannaꞌissanau guyye giyoy aybissee?
1 Geeshsha Maxaafaa loytta xannaꞌissanau danddayennabadan qoppada, guyye gay? Beni wode, Muusanne Ermmaasa mala Yihoowayyo ammanettidi oottida asati, banttau imettida oosuwaa oottanau danddayennabadan qoppidosona. (Kes. 3:10, 11; 4:10; Erm. 1:4-6) Yaatiyo gishshau, hegaadan qoppiyoogee oorattaba gidenna. Hegaa waati xoonana danddayiyoo?
2. Sooppe soo biiddi haggaaziyoogee gidana gi qoppidi, xannaꞌissiyo oosuwaa hara asi ootto gaana bessennay aybissee?
2 Yihooway nuuni nu wolqqaappe bolla gididabaa oottanaadan mule koyennaagaa hassayana koshshees. (Maz. 103:14) Asaa Yesuusa ‘kaalliyaageeta oottiyoogeenne eta tamaarissiyoogee’ nuuni oottana danddayiyooba. (Maa. 28:19, 20) Ha oosoy, Yihooway nu giddon deꞌiya eranchanne hayyottiya asatu xallau immidoba gidenna. (1 Qor. 1:26, 27) Hegaa gishshau, sooppe soo biiddi sabbakiyoogee gidees gi qoppidi, Geeshsha Maxaafaa xannaꞌissiyoogaa hara uri ootto gaana bessenna.
3. Yihooway nuuni Geeshsha Maxaafaa xannaꞌissanau danddayanaadan waati maaddii?
3 Yihooway Danddayissees: Nuuni erissiyo ashkkara oottiyo wode maaddiyay Yihoowa. (2 Qor. 3:5) Ha alamiyan keehi erancha giyo asatikka erenna Geeshsha Maxaafaa tumaa Yihooway nuna ba dirijjitiyaa baggaara tamaarissiis. (1 Qor. 2:7, 8) Nuuni Gita Asttamaariyaa, Yesuusa leemisuwaa kaallanaadan i tamaarissido ogiyaa Yihooway xaafissi wottiis; qassi gubaaꞌiyaa baggaara nuna ubbatoo loohissees. Qassi Geeshsha Maxaafaa tamaarissanau maaddiyaabaa Yihooway nuussi immiis. Tumaa loꞌꞌonne akeekanau metenna ogiyan tamaarissanau Geeshsha Maxaafay Tamaarissiyoy giya maxaafaa mala keehi maaddiya miishshaa i immiis. Geeshsha Maxaafaa xannaꞌissiyoogee nuuni qoppiyoogaa keena metiyaaba gidennan aggana danddayees.
4. Yihooway nuna maaddanaagaa ammanettiyoy aybissee?
4 Muuseenne Ermmaasi banttau imettida oosuwaa Yihooway maaddin oottidosona. (Kes. 4:11, 12; Erm. 1:7, 8) Yihooway maaddanaadan nuunikka woossana danddayoos. Nuuni issi asa Geeshsha Maxaafaa xannaꞌissiyo wode, he uraa Yihoowabaa tumaa tamaarissoos giyoogaa; qassi hegee Xoossaa ufayssiyaaba. (1 Yoh. 3:22) Yaatiyo gishshau, keehi ufayssiyaanne anjjo demissiya haggaazo qommo gidida, Geeshsha Maxaafaa xannaꞌissanau halchiyaageeta gidoos.