Oosoy Dariyo Gishshau Gaada Guyye Gooppa
1. Issoti issoi Geeshsha Maxaafaa xannaꞌissanau guyye giyoy aybissee?
1 Issoti issoti oosoy dariyo gishshau giidi, Geeshsha Maxaafaa xannaꞌissanau guyye goosona. Geeshsha Maxaafaa xannaꞌiya ura maaddanau wodiyaa koshshees. Xannaꞌiyoobaa giigettanau, tamaarissanaunne tamaaree issi issi metuwaa xoonanaadan maaddanau wodiyaa koshshees. Tasalonqqen deꞌiya asay Yihoowa eranaadan maaddanau kiitettida PHauloosi ba deꞌuwaa etau immanau giigi uttidoogaa yootiis. (1 Tas. 2:7, 8) Nuuyyo oosoy dariyaaba gidikkokka, Geeshsha Maxaafaa waati xannaꞌissana danddayiyoo?
2. Yihoowa siiqiyoogee nuuni wodiyaa goꞌettiyo ogiyaa qoppanaadan waati maaddii?
2 Goynuwau Wodiyaa Koshshees: Goynuwau wodiyaa koshshiyoogee erettidaagaa. Leemisuwau, nuuni wodiyaa bazzidi aggennan gubaaꞌiyaa shiiquwaa boos, haggaazoos, Geeshsha Maxaafaa nabbaboos, qassi woossoos. Oosoy dariyo azinay woy machiyaa naaꞌꞌay issippe aattiyo wodiyaa ufayssan bazzoosona. Nuuni Yihoowa siiqiyo gishshau, ayyo goynnanau hegaappekka aaruwan ufayssan wodiyaa bazzana koshshees. (Efi. 5:15-17; 1 Yoh. 5:3) Yesuusi yootidoogaadan, goynniyo waanna ogetuppe issoy asaa erissiyo ashkkara oottiyo oosuwaa. (Maa. 28:19, 20) Nuuni hegaa wotti dentti qoppiyoogee Geeshsha Maxaafaa xannaꞌissanau guyye geenna mala maaddees.
3. Haggaazanau injjetenna hanotay merettiyo wodekka gidin, Geeshsha Maxaafaa ayba ogiyan xannaꞌissana danddayiyoo?
3 Oosoy, wolqqaama sahoy woy gubaaꞌiyaa oosoy nuna gatuwaa diggikkoshin? Aassiyaageetuppe issoti issoti danddayenna wodetun silkkiyaa woy kompputeriyaa goꞌettidi Geeshsha Maxaafaa xannaꞌissosona. Keehi sahettiyaageeti qassi, xannaꞌissiyo uri eta soo yiidi xannaꞌanaadan oottoosona. Harati qassi banttau injjetenna wode xannaꞌissiya hara uraa kaseti giigissoosona.
4. Geeshsha Maxaafaa xannaꞌissiyoogan ayba anjjuwaa demmiyoo?
4 PHauloosi ba wodiyaanne wolqqaa harati tumaa tamaaranaadan maaddanau goꞌettido gishshau keehi ufayttiis. (Oos. 20:35) I Tasalonqqen deꞌiyaageeta maaddanau oottidobaanne hegaa ayfiyaa qoppiyo wode, Yihoowa galatiis. (1 Tas. 1:2) Oosoy dariyo gishshau giidi Geeshsha Maxaafaa xannaꞌissanau nuuni guyye geennaba gidikko, haggaazuwan kaseegaappe aaruwan ufayttiyaageeta gidoos.