“. . . Maxeetiyaa Asau Immanau Maaddiya Qofaa”

Haggaazuwaa SHiiquwan maxeeteta asau waati immanaakko aginan issitoo shiiqiya kifilee deꞌees. Ha kifiliyaa halchoy maxeeteti oyqqido qofaa qonccissanaassa gidennan, maxeeteta asau waati immanaakko tobbanaassa. Yaatiyo gishshau, kaaletuwaa maaran, ha kifiliyaa shiishshiya ishay asay maxeetiyaa immanaadan minttettiya qantta qofaa yootees. Hegaappe simmidi, aassiyaageeti issi huuphe yohuwaa (sintta huuphe yohuwaa) goꞌettidi waatidi asau immanau qoppidaakko yootanaadan shoobbees; hegee, shiiquwan deꞌiya asay banttau loꞌꞌo gidida qofaa akeekanaadan maaddees. Ha kifiliyaa shiishshiya ishay, ezggiyaageeti kumetta qofaa yootanaadan shoobbiyoogaappe, eti asaa oychanau qoppido loꞌꞌo oyshaanne nabbabiyo xiqisiyaa yootanaadan dumma dumma asaa amarida oyshata oychees. Maxeeteta immiyo wode huuphiyan huuphiyan waati immanaakko bessiya ootti-besuwaa shiishshiyoogan kuuyees. Maxeeteta kaseti nabbabidi nu qofaa immanau giigettana koshshees. Ubbay kasetidi giigettiyaaba gidikko, ha kifilee nuuni issoy issuwaappe tamaaranaadan keehi maaddana.—Lee. 27:17.