Haggaazuwan Ubbatoo Diccite
1. Nuuni haggaazuwan diccana bessiyoogaa qonccissiya koyro xeetu layttan deꞌida Kiristtaanetu leemisoti awugeetee?
1 Kiristtaaneti haggaazuwan diccana bessees. Yesuusi ba ashkkarati sabbakiyoogan kaseegaappe qara gidana mala maaddanawu loohissidoy hegaassa. (Luq. 9:1-5; 10:1-11) PHirisqqilanne Aqiili Aphiloosa banttanaara efiidi “Xoossaa ogiyaa kaseppe sittayidi, ayyo geeshshidi” yootidoykka hegaassa. (Oos. 18:24-26) Hegaadan, PHawuloosi haggaaziyoogan loꞌꞌo meezee deꞌiyo Ximootiyoosayyo tamaarissiyoogan ubbatoo minnanaadaaninne a “dichchai asa ubbau qonccana” mala minttettiis. (1 Xim. 4:13-15) Nuuni mishiraachuwaa aassiyaageeta gididi Godawu haggaaziyoogaa doommoosappe daro layttay aadhidaba gidikkonne, haggaaziyo hiillaa muletoo kaseegaappe dichana koshshees.
2. Nuuni haraatuppe waati tamaarana danddayiyoo?
2 Haratuppe Tamaarite: Nu haggaazo hiillaa kaseegaappe dichana danddayiyo issi ogee haraatuppe tamaariyoogaa. (Lee. 27:17) Hegaa gishshawu, nenaara haggaaziya uri asa haasayissiyo wode loyttada ezgga. Haggaazuwan asa haasayissiyoogan qara gididaageeta qofaa oycha, qassi eti yootiyo wode akeekan ezgga. (Lee. 1:5) Intte waatidi zaaretti oychanaakko, Geeshsha Maxaafaa xinaatiyaa waati doomissanaakko, woy issi qommo haggaazuwaa waati doommanaakko erana xayikko shin? Asi denttettennan, inttena loohissanaadan intte citaa xomoosiya ishaa woy haggaazuwan qara gidida uraa oychite. Yihoowa geeshsha ayyaanaykka intte qara gidanaadan maaddana danddayiyo gishshawu, hegaa demmanawu ubbatoo woossana koshshiyoogaa haasayite.—Luq. 11:13.
3. Nuna asi zorikko, ubba qassi zoriyaa nuuni oychennan zorikko waatana koshshii?
3 Intte issibaa giigissana mala asi zorikko, ubba qassi zoriyaa intte oychennan zorikko hanqqettoppite. (Era. 7:9) Aphiloosaagaadan, intte huuphiyaa kawushshidi maaduwaa ekkite; qassi galatite. Yaatiyoogee aadhida eratettaa qonccissees.—Lee. 12:15.
4. Haggaazuwan diccana koshshiyoogaa bessiyaabaa Yesuusi ay yootidee?
4 Dicciyoogee Xoossaa Bonchissees: Yesuusi leemisuwaa yootiyoogan ba ashkkarati haggaaziyoogan diccanaadan minttettiis. I bana woyniyan qassi tiyettida ba ashkkarata woyniyaa turaa maran leemissiis. “Kaseegaappe keehi aifanaadan” Aaway maraa xeeraa ubbaa qanxxanaagaa yootiis. (Yoh. 15:2) Woyniyaa goday woyniyaa marati keehi ayfanaadan koyiyoogaadan, Yihooway nuuni ‘menttershshaa ayfiyaa’ ayfidi ubbatoo diccanaadan koyees. (Ibr. 13:15) Nuuni haggaazuwan dicciyo wode demmiyo ufayssiyaabay aybee? Yesuusi, ‘Intte daro ayfiyaa ayfikko, hegan ta Aaway bonchchettana’ yaagiis. (Yoh. 15:8)