Xoossay Baayyo Azazettiyaageeta Anjjees

Hananabaa yootiya Muusee nuuni Xoossaa azazota azazettikko, Xoossay nuna anjjanaagaa yootiis. (Zaarettido Wogaa 10:13; 11:27) Nuuni Xoossawu azazettiyoy I qaxxayennaadan yayyiyo gishshataassa gidenna. Nuuni A siiqiyoonne A azanttana danddayiyaabaappe naagettanawu koyiyo gishshawu, Xoossawu deꞌiya ufayssiya eeshshati nuna denttettin ayyo azazettoos. “Nuuni Xoossaa siiqiyoogee a azazuwaa naagiyoogaa.”—1 Yohaannisa 5:3.

SHin Xoossawu azazettiyoogee anjjuwaa waati demissii? Ane naaꞌꞌu ogeta beꞌoos.

1. XOOSSAWU AZAZETTIYOOGEE NUNA AADHDHIDA ERANCHCHA OOTTANA

“Taani GODAI, ne Xoossai, nena maaddiyaabaa tamaarissiyaagaa. Neeni baanau bessiya ogiyankka nena kaalettiyai tana.”—ISIYAASA 48:17.

Nuna Medhdhida Xoossay Yihooway nuna erees; qassi nuussi koshshiya kaaletuwaa immees. Nuuni akeekan kuuyana mala Xoossaa timirttee nuna maaddanaadan koyikko, Xoossay nuuni ay oottana mala koyiyaakko A qaalaappe tamaarananne hegeeta oosuwan peeshshana koshshees.

2. AZAZETTIYOOGEE NUUNI UFAYTTANAADAN OOTTANA

“Anjjettidaageeti Xoossaa qaalaa siyidi, he qaalai azaziyoogaadan oottiyaageeta.”—LUQAASA 11:28.

Ha wodiyan, miilooniyan qoodettiyaageeti Xoossaa Qaalaa azazettiyoogan tumu ufayssaa demmidosona. Leemisuwawu, elle hanqqettiyaanne ba machchiyo gujjin harata kehatetti baynna ogiyan oyqqiya Isppeenen deꞌiya bitaniyaabaa qoppa. Issi galla I Yaaqooba naꞌay Yooseefi bessido loꞌꞌo eeshshaa xeelliyaagan hananabaa yootiya Muusee xaafidobaa nabbabiis. Yooseefi aylle gididi bayzettiis; qassi wordduwan mootin qashettiis; gidikkokka, I yiillotenna, sarotettaa koyiyaanne atto giya asa gididi deꞌiis. (Doomettaabaa, shemppo 37-45) Isppeenen deꞌiya he bitanee hagaadan giis: “Yooseefa taarikiyaa wotta dentta qoppidoogee taani woppu gaanaadan, keha gidanaadaaninne elle hanqqettennaadan denttettiis. Hegaappe denddidaagan taani haꞌꞌi ufayttada deꞌays.”

Nuuni harata waati oyqqana bessiyaakko hara kaaletuwaa Xoossaa Qaalay yootees. Kaalliya huuphe yohuwan hegaabaa loyttada akeeka.