Kiristtaanetu Deꞌuwanne Haggaazuwa Shiiquwa Xannaꞌiyo Xuufiyan Odettida Xuufeta
© 2024 Watch Tower Bible and Tract Society of Pennsylvania
ICHCHASHE 1-7
XOOSSAA QAALAN DEꞌIYA ALꞌꞌOBAA | IYYOOBA 32-33
Unꞌꞌettiyageeta Minttettite
it-1 710
Eeliha
Eelihu asa zaggenna; qassi oonakka cimmanawu bonchcho sunttan xeesenna. Ubbaa Danddayiyagee Iyyoobaagaadan akka urqqaappe Medhdhidoogaa I akeekiis. Eelihu Iyyooba yashissanawu koyibeenna; I Elifaazi, Bilddaadi woy Xoofaari oottibeennabaa, hegeekka Iyyooba A sunttan xeesidi haasayissiyogan awu tumu lagge gidiyogaa bessiis.—Iyyooba 32:21, 22; 33:1, 6.
Daafuranchata Yihooway Xeelliyoogaadan Xeellay?
8 Nu siiqo ishatuppenne michotuppe issota issota wolqqaama metoy gakkiyoogaa, leemisuwawu, eti sahettiyoogaa, Yihoowa Markka gidenna so asaara issippe deꞌiyoogaa woy unꞌꞌettiyoogaa nuuni akeekikko, etawu keehi qarettana danddayoos. Nunakka issi wode etaagaa mala metoy gakkana danddayees. Gibxxe biittan hiyyeesanne daafurancha gididi deꞌida Israaꞌeelati Hidootaa Biittaa gelanaappe kase, metoy gakkido bantta ishatuyyo ‘meqettaa iitenna’ mala Yihooway yootiis. Yihooway eti hiyyeesanne daafurancha gidida bantta ishantta maaddana mala koyiis.—Zaa. 15:7, 11; Wog. 25:35-38.
9 Nuuni metoy gakkido asa bolli pirddiyoogaappe woy a siriyoogaappe ayyaanaaban minttettana koshshees. (Iyy. 33:6, 7; Maa. 7:1) Leemisuwawu, issi asi motoriyaa laaggishin daafabay gakkin qohettidi sohuwaara hosppitaaliyaa biidabadan qoppa. I yaa gakkin, dottoretinne narsseti daafabaa gattiday oonakko palamettiiddi wodiyaa wurssiyoonaa? CHiikka, eti a sohuwaara akkamoosona. Hegaadankka, issi ishay bana gakkida metuwaappe denddidaagan daafuriyaaba gidikko, nuuni a ayyaanaaban sohuwaara maaddana koshshees.—1 Tasalonqqe 5:14 nabbaba.
10 Nu ishati daafurancha milatiyaaba gidikkokka, nuuni eta hanotaa qoppiyo wode, eti tumuppe daafurancha gidennaagaa akeekoos. Azinay daro layttawu eqettishin tuman genccidi deꞌiya michotubaa qoppa. Issoti issoti daafurancha milatikkokka, mino ammanoy deꞌiyoogeeta gidana danddayoosona. Ba naatuura ubba wode gubaaꞌe shiiquwaa yiya, barkka naata dichiya aayyiyo beꞌiyo wode, i ammanuwaa nashshikkii? Timirtte keettan iita paacee gakkishin tumaa mintti oyqqida yelagata shin nashshikkii? Nu ishati Yihoowayyo haggaazanawu oottiyoobaa nuuni qoppiyo wode, eti daafurancha milatiyaaba gidikkokka, ‘ammanuwan dure’ gidiyoogaa akeekoos.—Yaaq. 2:5.
Haasayanawu Bessiya Wodee Awudee?
17 Iyyooba oychchanawu yiida oyddantto bitanee Abrahaama dabbuwaa Eeliha. Iyyoobinne hara heezzu asati haasayiyo wode I ezggiis. I Iyyooba kehatettan tumu zoriyaa zoridi Iyyoobi ba qofaa suurissanaadan maaddanawu, odettiyaabaa loyttidi ezggana koshshidoogee qoncce. (Iyy. 33:1, 6, 17) Eelihu xoqqu oottidi xeellidobay bana woy hara asaa sabbiyoogaa gidennan, Yihoowa sabbiyoogaa. (Iyy. 32:21, 22; 37:23, 24) Nuuni coꞌꞌu gaanawu, qassi siyanawu wodee deꞌiyoogaa Eelihu hanotaappe tamaaroos. (Yaaq. 1:19) Nuuni zoriyo wode nu xoqqu ootti xeellana koshshiyaabay nu bonchchuwaa gidennan, Yihoowa bonchchissiyoogaa gidiyoogaakka tamaaroos.
18 Nuuni awude, qassi waati haasayanaakko Geeshsha Maxaafay yootiyo zoriyaa kaalliyoogan, haasayiyo imotaa xoqqu ootti xeelliyoogaa bessana danddayoos. Eranchcha Kawuwaa Solomoni ayyaanay denttettin hagaadan giis: “Koshshiyo wodiyan haasayettida likke qaalai biraa bolli tigido worqqaa alleequwaa mala.” (Lee. 25:11) Nuuni harati haasayiyoobaa loytti ezggikkonne haasayanaappe kase qoppikko, nu haasayiyoobay loꞌꞌiyaanne alꞌꞌoba gidida biraa bolli tigido worqqaa alleequwaa mala gidana danddayees. He wode nuuni guuttaa woy daruwaa haasayikkokka, nu haasayiyoobay harati minnanaadan oottana, qassi nunan Yihooway ufayttana. (Lee. 23:15; Efi. 4:29) Hegee ha imotaa immida Xoossaa nuuni galatiyoogaa bessiya aybippenne aadhdhiya oge!
Ayyaanaaban Alꞌꞌobaa
Aggennan Yihoowakko SHiiqa
10 Nu meraabaakka qoppiyoogee bessiyaaba. SHin, cima milatennaadan giidi nu meraa laammanau baaxetana koshshenna. Geeshsha Maxaafay, “Puulummida huuphee bonchcho kallachcha; hegeekka beettiyoi xillo de7uwaa de7iina” yaagees. (Lee. 16:31) Yihooway nuna hegaadan xeelliyo gishshau, nuunikka nuna aagaadan xeellana koshshees. (1 PHeexiroosa 3:3, 4 nabbaba.) Yaatin, meraa loꞌꞌanau giidi, shuhettiyoogan woy xalettiyoogan qohana danddayiyaabaa oottiyoogee bessiyaabee? Nu layttay ay keena woy nu payyatettay ay mala gidikkonne, nu wozanaappe kiyiya loꞌꞌotettaa pulttoy ‘GODAA ufayssaa.’ (Nah. 8:10) Nuuni muleera payya gidanaynne nu puulay yelagatettaagaa mala gidanay ooratta alamiyaana. (Iyy. 33:25; Isi. 33:24) He wodee gakkanaassi, nuuni loꞌꞌo dooro doorananne Yihooway qaalaa gelidobaa ammanana koshshees. Hegee nuuni ha wodiyan nu deꞌuwan ufayttanaadaaninne wonttin qammin payyatettaara gayttidabaa qoppennaadan maaddees.—1 Xim. 4:8.
ICHCHASHE 8-14
XOOSSAA QAALAN DEꞌIYA ALꞌꞌOBAA | IYYOOBA 34-35
Loꞌꞌo Asaa Bolli Iitabay Gakkiyo Wode
Xoossay Ay Mala Xoossee?
Xoossay ubbatoo suurebaa oottees. Qassi, “Ubbaa Danddayiya Xoossai iitabaa mulekka oottenna.” (Iyyooba 34:10) Mazamuraawee Yihoowabaa “neeni asaa xillotettan pirddaasa” giidoogee Xoossaa pirdday suure gidiyoogaa bessees. (Mazamure 67:4) ‘Yihooway wozanaa xeelliyo’ gishshawu, loꞌꞌo milatiya iita asatun cimettenna; qassi I ubbatoo tuma gididaabaa akeekidi suure pirddees. (1 Sameela 16:7) Hegaa bollikka, ha saꞌan deꞌiya pirdda pacaanne iita oosuwaa akeekees; qassi I mata wode ‘iitata biittaappe xoqollanawu’ qaalaa geliis.—Leemiso 2:22.
Xoossaa Kawotettay Yiyo Wode Aybi Xayanee?
5 Yihooway ay oottanee? Yihooway ha wodiyankka iitati laamettana danddayiyo ogiyaa dooyiis. (Isi. 55:7) Eti huuphiyan huuphiyan biron pirddaa ekkiichibookkona. Pirddettiday ha alamiyaa. Gidoppe attin, laamettennan ixxidi, iita waayiyaa wodee gakkanaashin ha alamiyaa exa gidiyaageeti shin? Yihooway iitata ha saꞌaappe merinawu xayssanawu qaalaa geliis. (Mazamure 37:10 nabbaba.) Iitati ha pirdday banttana bochennabadan qoppana danddayoosona. Daroti bantta oottidobaa genttiyoogaa tamaaridosona; qassi ha alamiyan eti darotoo pirddappenne bantta oosuwaa daafaappe attiyaabaa milatoosona. (Iyy. 21:7, 9) Gidikkonne, Geeshsha Maxaafay hagaadan gees: “Xoossai asaa hemetaa xeellees; a tanggo ubbaakka wochchees. Iitaa oottiyaageeta Xoossaappe genttanau danddayiya sakkana xumi baawa.” (Iyy. 34:21, 22) Xoossaa Yihoowappe qosettana danddayettenna. A cimmana danddayiya asi baawa; laggetiyaabi baynna Xoossaa ayfee issibaa beꞌennaadan genttana danddayiya xuma shaari baawa. Yaatiyo gishshawu, Armmageedoonappe simmin, nuuni iitati kase deꞌiyoosan eta koyana danddayoos; shin demmokko. Eti merinawu xayana!—Maz. 37:12-15.
Yesuusa Kaalliyoogaa Nena Aybinne Digganaadan Oottoppa
19 Ha wodiyan hegaa mala metoy deꞌiyoogaa akeekiyoo? Ee. Nuuni polotikaaban oossinne exatenna gishshawu ha wodiyan daroti nuuni yootiyoobaa siyokkona. Yihoowa Markkati dooruwaa wode doorana koshshees eti giidi qoppoosona. SHin, nuuni asi nuna haaranaadan doorikko, Yihooway nuna haaranaadan koyokko giyoogaa. (1 Sam. 8:4-7) Asay nuuni timirtte keettatanne hosppitaaleta keexxanaadan, qassi deretettaa maaddiya harabaakka oottanaadan koyees. Nuuni ha alamiyaa metuwaa giigissanawu malennan, sabbakiyo oosuwaa minni oottiyo gishshawu eti nu yootiyoobaa siyokkona.
20 Nu ammanoy xayennaadan nuna aybi maaddanee? (Maatiyoosa 7:21-23 nabbaba.) Yesuusi nu oottanaadan azazido oosuwaa nuuni keehi xoqqu oottidi xeellana koshshees. (Maa. 28:19, 20) Ha alamiyaa metuwaa giigissanawu baaxetiyoogan nu wodiyaa mule wurssana koshshenna. Nuuni asaa siiqiyo gishshawu eta metoy nuna qofissees, shin nuuni nu shoorota Xoossaa Kawotettaabaa tamaarissiyoogeenne eti Yihoowaara dabbotanaadan maaddiyoogee aybippenne aadhdhiyaaba gidiyoogaa eroos.
Ayyaanaaban Alꞌꞌobaa
Ne Dosan Oottiyoobay Yihoowa Galatissiyaabaa Gido!
3 Eelihu, “Xillo gidikko, ayyo [Xoossaayyo] neeni ai immuutee? Woikko ne kushiyaappe i ai ekkanee?” yaagidi oychin Yihooway a seeribeenna. (Iyy. 35:7) Eelihu Xoossaa oosuwan nuuni daafuriyoobawu waagi baawa giidee? Akkay, gibeenna. I nuuni Yihoowayyo oottiyoobay ayyo zemppo gidenna yaagiis. Yihooway kumetta. I kaseegaappe duretanaadan woy minnanaadan nuuni aynne oottana danddayokko. Gidikkokka, nuussi deꞌiya loꞌꞌobay, eray woy wolqqay aybikka Xoossay immidobaa; qassi hegaa nuuni waati goꞌettiyaakko i akeekees.
ICHCHASHE 15-21
XOOSSAA QAALAN DEꞌIYA ALꞌꞌOBAA | IYYOOBA 36-37
Yihooway Merinaa Deꞌuwa Immana Giidoogan Nuuni Ammanettiyoy Aybissee?
Xoossaa Erana Danddayiyoo?
XOOSSAY MERINAAPPE MERINAWU DEꞌIYOOGAA: Geeshsha Maxaafay Xoossay “merinaappe merinaa gakkanaayyookka” deꞌiyoogaa yootees. (Mazamure 90:2) Hegee Xoossawu doomettay woy wurssettay baawa giyoogaa. ‘A layttaa coratettay [asi] qoodin gakettennaagaa.’—Iyyooba 36:26.
Hegee nena waatidi maaddii? Xoossay neeni a erikko merinaa deꞌuwaa neyyo immanawu qaalaa geliis. (Yohaannisa 17:3) Xoossay merinawu deꞌennaba gidiyaakko ha hidootay woni waani polettanee? Tumakka, ha hidootaa polana danddayiyay ‘merinaa Kawuwaa’ xalla.—1 Ximootiyoosa 1:17.
Xoossay Immido Loꞌꞌobatu Gishshawu A Galatay?
6 Saꞌay awa ayfiyaappe bessiyaagaa keena haakkidi deꞌiyo gishshawu, haattaa goggiyaaba oottiyaagaa keena hoꞌꞌo. Saꞌay ba sohuwaappe guuttaa awa ayfiyaakko shiiqiyaakko, saꞌan deꞌiya haattay penttuwan pude denddana, qassi saꞌay deꞌuwan deꞌiya aybinne baynna hoꞌꞌiyaanne mela soho gidana. Saꞌay awa ayfiyaappe guuttaa haakkiyaakko, ubba haattay shachcha gidana, qassi saꞌay shachchan kamettana. Yihooway saꞌaa likke sohuwan wottido gishshawu, saꞌan haattaara gayttidaagan simmi simmi haniyaabay deꞌuwawu maaddees. Away ano abbaaninne saꞌan deꞌiya haattay hoꞌꞌanaadan oottees, qassi shaara gidanaadan he haattaa saꞌaappe penttuwan pude denttees. Layttan layttan, away ubbasaappe keehi daro haattaa penttuwan pude denttees. Ha haattay ira woy shaachcha gididi bukkanaappe kase tammu gallassa gidiyaagaa saluwan takkees. Haattay wurssettan goggidi ano abbatun woy hara haattatun gayttees, yaatidi haranttuwaa penttuwan pude denddees. Haattaara gayttidaagan simmi simmi haniyaabaa Yihooway giigissido gishshawu saꞌan haattay ubbatoo deꞌees. Hegee Yihooway aadhdhida eranchchanne wolqqaama gidiyoogaa bessees.—Iyy. 36:27, 28; Era. 1:7.
Ne Hidootaa Mintta Naaga
16 Merinaa deꞌuwaa hidootay Xoossay nuuyyo immido alꞌꞌo imota. Nuuni ufayssiya sinttanaa hidootaa yeemuwan naagoos; qassi hegee polettanaagaa ammanettana danddayoos. Nu hidootay markkabiyaa oyqqiya qaaxxenna birataadan nuuni metuwaanne yedetaa genccanaadan, ubba qassi hayquwaa yayyennaadan maaddees. Nu hidootay birata qophiyaadan, nuuni iitabaa ixxidi loꞌꞌobaa dosanaadan nu qofaa naagees. Geeshsha Maxaafay yootiyo hidootay nuuni kaseegaappe aaruwan Xoossaakko shiiqanaadaaninne I nuna ay keena siiqiyaakko eranaadan maaddees. Nuuni nu hidootaa mintti naagikko, loytti goꞌettana.
Ayyaanaaban Alꞌꞌobaa
it-1 492
Qofaa Laamettiyogaa
Geeshsha Maxaafan odettida biittatun beni wode odotinne qofati issi asappe hara asaa dumma dumma ogetun gakkoosona. Heeran coo asay haasayiyobatinne haaho biittaa odoti, issisaappe harasaa darotoo haasayan gakkoosona. (2Sam 3:17, 19; Iyy 37:20) Caana mehiya laaggidi manddariyageeti, eti qumaa maanawu, haattaa uyanawu, qassi koshshiya hara allaalliyawu katamatuuninne siira keettatun shemppiyo wode haaho sohuwappe ehiido odota yootoosona. Pilisxxeema biittay, Isiyara, Afirkkaaranne Awurooppaara gayttiyo gishshawu, haaho sohotuppe caana mehiya laaggidi manddariyageeti kanttiyo injje soho. Yaatiyo gishshawu, he biittan deꞌiyageeti aynne metootennan hara biittatun hanida gitabata siyana danddayoosona. Asay ba deꞌiyo biittan gidin, hara biittan hanidabatu oduwa darotoo kataman giya sohotun siyana danddayees.
ICHCHASHE 22-28
XOOSSAA QAALAN DEꞌIYA ALꞌꞌOBAA | IYYOOBA 38-39
Meretaa Xeellanawu Wodiya Bazzeetii?
Yihoowa Naagashshanawu Eeno Guutee?
7 Yihooway saꞌaa waati medhdhidaakko Geeshsha Maxaafay qonccissiyo wode ‘saꞌay ay keenakko, saꞌaa tuuqeti eqqidoogaanne saꞌaa baasuwaa shuchchay wodhdhidoogaa’ yootees. (Iyy. 38:5, 6) I takki giidi ba oottidobaa wotti denttidi qoppiis. (Doo. 1:10, 12) Yihooway medhdhidobati lodda loddan giigi giigi biyoogaa beꞌiyo wode kiitanchchatussi aybi siyettidaakko qoppana danddayay? Hegee eta keehi ufayssiis! Hegaa gishshawu eti ‘ufayssan ililidosona.’ (Iyy. 38:7) Nuuni hegaappe ay tamaariyoo? Yihooway medhdhiyoogaa wurssanawu daro shaꞌu layttaa wurssidaba gidikkonne, Yihooway ba medhdhido ubbabaa xeellidi, hegee “daro lo77o” yaagiis.—Doo. 1:31.
Denddoy Xoossaa Siiquwaa, A Aadhdhida Eratettaanne Danddayaa Qonccissees
2 Koyruwan, Yihooway ba naꞌaa Yesuusa medhdhiis. Kaallidi, miilooniyan qoodettiya qoppana danddayiya ayyaana meretata gujjin, “ubbabaikka [he bayra naꞌaa baggaara] merettiis.” (Qol. 1:16) Yesuusi ba Aawaara oottiyoogan keehi ufayttiis. (Lee. 8:30) Qassi Xoossaa naata gidida kiitanchchatikka ufayttiyo gaasoy deꞌees. Yihoowaynne A Waanna Oosanchchay Yesuusi saluwaanne saꞌaa medhdhiyo wode eti beꞌidoosona. Kiitanchchati ufayttiyoogaa waati bessidonaa? Eti saꞌay merettido wode ‘ufayssan ililidoosona;’ qassi wurssettan merettida asata gujjin, Yihooway medhdhido ubbaban eti ufayttidoogee qoncce. (Iyy. 38:7; Lee. 8:31) He ubba meretati Yihoowa siiquwaanne A aadhdhida eratettaa qonccissoosona.—Maz. 104:24; Roo. 1:20.
Yihooway Medhdhidobaappe Abaa Loytta Tamaara
8 Yihooway nuuni ammanettanawu bessiya Xoossa. Yihooway Iyyoobi kaseegaappe aaruwan an ammanettanaadan maaddiis. (Iyy 32:2; 40:6-8) Yihooway xoolintteta, shaaraanne wolqqanttaa gujjin, dumma dumma meretatubaa Iyyoobaara haasayiis. Yihooway menttaanne paraa mala mehetubaakka ayyo yootiis. (Iyy. 38:32-35; 39:9, 19, 20) Ha ubbabati maalaaliya Xoossaa wolqqaa xalla gidennan, A siiquwaanne A gita eraa qonccissoosona. Hegaadan haasayidoogee, Iyyoobi kaseegaappe aaruwan Yihoowan ammanettanaadan oottiis. (Iyy. 42:1-6) Nuunikka meretaabaa akeekan xeelliyo wode, Yihooway nuuppe aaruwan eranchchanne wolqqaama gidiyoogaa hassayoos. I nuna gakkiya meto ubbaa xayssana danddayees; qassi I xayssana. Hegaa eriyoogee nuuni Yihoowan ammanettanaadan maaddana danddayees.
Ayyaanaaban Alꞌꞌobaa
it-2 222
Higgiya Immiyagaa
Yihooway Higgiya Immiyagaa. Saluwan saꞌan tumu Higgiya immiyagee Yihoowa xalaala. Shemppoora deꞌenna meretatanne (Iyy 38:4-38; Maz 104:5-19), mehiya doꞌaa haariya higgeta ubbaa I kessiis. (Iyy 39:1-30) Asaakka Yihooway medhdhido gishshawu, etikka I kessido meretaa higgetussi haarettana bessees. Qassi asay kandduwabaa eriya, qoppiyanne ayyanaabaa akeekiya mereta gidiyo gishshawu, Xoossay kessido kandduwa higgetussikka azazettana koshshees. (Roo 12:1; 1Qor 2:14-16) Hegaa bollikka ayyaana mereta gidida kiitanchchatikka Yihoowa higgiyawu haarettoosona.—Maz 103:20; 2Phe 2:4, 11.
Yihooway immido meretaa higgeti mulekka laamettokkona. (Erm 33:20, 21) Beettiya saluwa meretaa higgeti laamettokkonanne ammanttiyageeta; qassi eti bantta sohuwappe sherꞌꞌennaagaa saynttistteti eriyo gishshawu aginay, pilaaneetetinne hara saluwa meretati issi sekonddiya shaahuwankka qaaxxiyo qaattaa eti akeekana danddayoosona. Meretaa higgeta kanttiya ooninne hegee kaalettiyo qixaatiya sohuwara ekkees. Hegaadankka, Xoossay immido shaarettenna kandduwa higgeta kanttiya woy makkaliya uri qaxxayettennan attenna. Yihooway immido meretaa higgeta kanttiya uri qaxxayettiyogaadan, sohuwara gidana xayikkonne, kandduwa higgeta kanttiya uri qaxxayettiyogee attennaba. “Ooninne Xoossaa bolli qilliiccanau danddayenna; aissi giikko, asi ba zeriyoogaa zaarettidi cakkana.”—Gal 6:7; 1Xim 5:24.
ICHCHASHE 29–USUPPUNE 4
XOOSSAA QAALAN DEꞌIYA ALꞌꞌOBAA | IYYOOBA 40-42
Iyyooba Gakkidabaappe Ay Tamaariyoo?
w10 10/15 3-4 ¶4-6
‘Yihoowa Qofaa Eriyay Oonee?’
4 Nuuni Yihoowa oosuwaa wotti dentti qoppiyo wode, asa xeelan Xoossaa qofaa xeellennaadan naagettana koshshees. Yihooway Mazamure 50:12n, “Tanakka ne mala gaada qoppadasa” yaagidoogee hegaa mala xeelaa qonccissees. Hegee issi Geeshsha Maxaafaa eranchay 175 layttappe kase, “Asay Xoossaa qofaa ba xeelan xeellees; qassi eti asay kaallana koshshees giyo higgiyau Xoossay aqees giidi qoppoosona” giidoogaadaana.
5 Nuuni Yihoowa xeelliyoy nu xeelaadaananne nu koshshaadaana gidennaadan naagettana bessees. Hegee keehippe koshshiyoy aybissee? Nuuni Geeshsha Maxaafaa xannaꞌiyo wode, Yihooway oottido issi issibay polo gidennanne paca gidida nu xeelan likke gidennaba milatana danddayees. Beni Israaꞌeelati hegaadan qoppidosona; qassi Yihooway eta oyqqido hanotaa bala ogiyan akeekidosona. Yihooway etau giidobaa akeeka: “Intte hegan, ‘GODAA ogee suure gidenna’ yaageeta. Inttenoo, Israa7eela asatoo, ha77i siyite! Suure gidennai intte ogiyaa gidennee ta ogee?”—Hiz. 18:25.
6 Yihoowa qofaa nu xeelaadan xeelliyoogaappe haakkanaadan maaddana danddayiya issibay, nu xeelay paca gidiyoogaanne issi issitoo keehippe moorettiyoogaa akeekiyoogaa. Iyyoobi hegaa akeekana koshshiis. Iyyoobi tuggatido wode, keehippe unꞌꞌettidi, babaa xallaa qoppiis. I gitabaa akeekibeenna. SHin aassidi xeellanaadan Yihooway siiquwan a maaddiis. I zaarana danddayenna 70ppe dariya dumma dumma oyshata Yihooway a oychiyoogan, Iyyoobi eriyoobay guutta gidiyoogaa qonccissiis. Iyyoobi bana kawushshidi ba xeelaa laammiis.—Iyyooba 42:1-6 nabbaba.
Keehi Gita Allaalliyaa Qoppiyoogaa Aggoppa
12 Iyyoobi keehi wolqqaama metuwaa gencci simmin Yihooway a seeridoogee Xoossay qarettennaagaa bessiyaabee? Xoossay qareti baynnaagaa gidenna; Iyyoobikka hegaadan qoppibeenna. Daro metoy Iyyooba gakkikkokka, guyyeppe Yihoowaabaa nashshidi haasayiis. I ubba, “Taani haasayidobai tana yeellayiis. Yaatin, taani bidinttaaninne baanan uttada paaxais” yaagiis. Awu hegaadan siyettidoy Yihooway qoncce zoriyaa siiquwan yootido gishshataassa. (Iyy. 42:1-6) Hegaappe kase, yelaga gidida Eelihu Iyyooba zoriis. (Iyy. 32:5-10) Iyyoobi Xoossaa seeraa siyidi ba qofaa laammi simmin, i waayettiiddikka awu ammanettido gishshawu Xoossay a nashshiyoogaa haratuyyo yootiis.—Iyy. 42:7, 8.
“Yihoowan Hidootaa Wotta”
17 Wolqqaama metoy gakkishinkka xalatettaaninne minotettan genccida Yihoowa ashkkaratuppe Iyyoobi issuwaa. Kiitettida PHawuloosi Ibraawe Kiristtaanetuyyo xaafido dabddaabbiyan hara daro asatubaa yootiis, eta ‘shaaraadan nu matan yuuyi aadhdhida markkata’ giidi xeesiis. (Ibr. 12:1) Eta ubbaa wolqqaama metoy gakkikkokka, eti bantta deꞌo laytta ubban Yihoowawu ammanettidi deꞌidosona. (Ibr. 11:36-40) Eti genccidoogeenne baaxetidoogee hada attidee? Hada attibeenna! Eti Xoossay qaalaa gelidobay ubbay polettishin bantta deꞌuwan beꞌana xayikkonne, Yihoowan hidootaa wottiyoogaa aggibookkona. Qassi eti Yihoowan nashettidoogaa ammanettiyo gishshawu, qaalaa gelidobati polettishin beꞌanaagaa aynne siribookkona. (Ibr. 11:4, 5) Eta taarikee nuuni ubbatoo Yihoowan hidootaa wottanawu murttido murttiyaa yaa minttees.
18 Nuuni ha wodiyan keehi iiti iiti biya alamiyan deꞌoos. (2 Xim. 3:13) Seexaanay Xoossaa asaa paacciyoogaa aggibeenna. Sinttappe nuna gakkana metoy ayba gidikkokka, ‘deꞌo Xoossaappe nuuni ekkana giidi uttidoogaa’ ammanettiyoogan Yihoowawu minnidi oottanawu murttidaageeta gidoos. (1 Xim. 4:10) “Godai maarotainne qaretai kumidoogaa” gidiyoogaa Xoossay Iyyoobawu immidobay bessiyoogaa hassaya. (Yaaq. 5:11) Yihooway “bana koyiyaageetuyyo” woytuwaa immanaagaa ammanettiyoogan nuunikka Yihoowawu ammanettidi deꞌiyaageeta gidoos.—Ibraawe 11:6 nabbaba.
Ayyaanaaban Alꞌꞌobaa
it-2 808
Qilliicciya
Daroti qilliiccishin Iyyoobi ba suuretettaa naagidi deꞌiis. Shin I balabaa qoppidi moorobaa oottido wode awu seeray imettiis. Eelihu awu hagaadan giis: “Xoossaa bolli Iyyoobadan qilliicciya asi de7ii?” (Iyy 34:7) Iyyoobi Xoossaabaappe aattidi babaa yootiis; qassi I Xoossaagaappe aaruwan ba xillotettaa xoqqissidi yootiis. (Iyy 35:2; 36:24) A heezzu “laggeti” keehi qilliiccido wode, Iyyoobi Xoossaappe aaruwan bana qilliiccidabadan qoppiis. Hegaadan oottiyogan, I qilliicciyan erettiya qassi hegan ufayttiyanne qilliicciya haattaadan uyiya asa mala gidiis. Xoossay wurssettan Iyyoobaara haasayido haasayan he qilliicciyageeti Xoossaabaa tumaa haasayibeennaagaa awu yootiis. (Iyy 42:7) Hegaadankka, Israaꞌeelati banttawu kawo koyido wode Yihooway hananabaa yootiya Sameelawu hagaadan giis: “Taani eta bolli kawotennaadan, eti tana ixxidosonappe attin, nena ixxibookkona.” (1Sam 8:7) Yesuusikka ba erissiyo ashkkaratussi hagaadan giis: “[Intte gishshawu gidennan] ta sunttaa gishshau, dere ubbai inttena ixxana.” (Maa 24:9) Issi Kiristtaanee ubbatoo hegaa qoppiyogee harati qilliicciyode genccanaadaaninne woytuwa ekkanaadan maaddees.—Luq 6:22, 23.
USUPPUNE 5-11
XOOSSAA QAALAN DEꞌIYA ALꞌꞌOBAA | MAZAMURE 1-4
Xoossaa Kawotettawu Exatite
“Kawotettata Ubbaakka Qaattana”
8 Nu yootiyo mishiraachchuwaa asay siyii? Daroti siyokkona. (Mazamure 2:1-3 nabbaba.) Kawotettati yiillotidosona. Yihooway sunttido Kawuwaa ekkennan ixxidosona. Nuuni yootiyo Kawotettaa mishiraachchuwaa eti ‘mishiraachchodan’ xeellokkona. Ubba qassi issi issi kawotettati sabbakiyo oosuwaa teqqidosona! Ha kawotettatun haariyaageetuppe daroti Xoossawu oottays giyaaba gidikkonne, bantta maataa agganawu koyokkona. Yaatiyo gishshawu, Yesuusa wode haaridaageetuugaadan, ha wodiyan haariyaageeti Yihooway tiyidoogaa ammanettidi kaalliyaageeta qohiyoogan A eqettoosona.—Oos. 4:25-28.
SHaahettida Alamiyan Oossinne Exatennan Deꞌa
11 Aquwaa siiqiyoogaa. Nuuni aquwaa keehi siiqiyaaba gidikko, paacciyaabay gakkiyo wode, oossinne exatennan deꞌanawu metootana danddayoos. Maalaawen deꞌiya Uruta he biittan deꞌiya Yihoowa Markkata 1970 heeran yedetay gakkido wode issoti issoti hegaadan oottidoogaa beꞌaasu. A hagaadan gaasu: “Eti bantta ishalo deꞌuwaa aggibayanawu koyibookkona. Issoti issoti nunaara kiyidi biidosona, shin eti kambbiyan injjetenna duussaa genccidi deꞌanawu koyibeenna gishshawu, polotikaa citan gelidi bantta soo simmidosona.” SHin Xoossaa asati hara daroti miishshaara gayttidaban metootiiddi, ubba banttawu deꞌiya ubbabay xayinkka alamiyaaban oossinne exatennan deꞌidosona.—Ibr. 10:34.
Ayyaanaaban Alꞌꞌobaa
it-1 425
Suullaa
Banggaanne gisttiya mala kattaa ayfiya kammiya woy he ayfee qohettennaadan naagiya suullay deꞌees. Geeshsha Maxaafaabaa yootiya xuufetun suullay leemiso hanotan qonccidaba gidikkonne hegee beni wode kattaa qoxxiyo meeziya bessiyogee erettidaba. Kattaa ayfiya ekki simmiyo wode, keehi koshshiya ayfiya kammidi naagi gattida suullay aynne maaddennaba gidees; qassi kawushshabawu, pattennabawu, koshshennabawunne, maaddiyabaappe shaakkidi oliyobawu loꞌꞌo leemiso.
Koyruwan, kattaa qoxxiyo wode, suullay kinchchettidi ayfiyappe shaahettees. Yaatidi suraggiyo wode, suullay baanaadan carkkuwara bees. Hagee Xoossaa Yihooway kaddidaageeta ba asaa giddoppe waati shaakkanaakko, qassi iita asatanne eqettiya kawotettata waati xayssanaakko bessiya loꞌꞌo leemiso. (Iyy 21:18; Maz 1:4; 35:5; Isi 17:13; 29:5; 41:15; Hoo 13:3) Xoossaa Kawotettay ba morkketa gaaccidi aynne metennan carkkuwan biya suullaadan oottana.—Dane 2:35.
Awudiyan shiiqida kattaa ayfiya carkkuwan yiidi moorana danddayiya aynne maaddenna suullaa darotoo issisaa shiishshidi xuuggeettees. Hegaadankka, Xammaqiya Yohaannisi sinttappe keehi iita gidida worddo haymaanootee xuugettidi xayanaagaa yootiis. Kattaa qoxxiyagee, Yesuus Kiristtoosi, gisttiya issippe shiishshana; “shin [suullaa] to77enna taman xuuggana.”—Maa 3:7-12; Luq 3:17.
USUPPUNE 12-18
XOOSSAA QAALAN DEꞌIYA ALꞌꞌOBAA | MAZAMURE 5-7
Harati Ay Oottikkonne Ammanettada Deꞌa
Geeshsha Maxaafaa Nabbabiyoogee Metuwaa Genccanaadan Nena Waati Maaddii?
7 Ne laggee woy so asay nena qohidee? Yaanikko, A naꞌay Abeseloomi A qohido wodenne kawo gidanawu malido wode, Kawuwaa Daawiti oottidobaa xannaꞌiyoogee nena maaddana danddayees.—2 Sam. 15:5-14, 31; 18:6-14.
8 (1) Woossa. He taarikiyaa qoppada, nena gakkida metuwaa xeelliyaagan neeyyo siyettiyaabaa Yihoowayyo woosan yoota. (Maz. 6:6-9) Geeshshada yoota. Yaatada, nena gakkiya metuwaa gencciyo wode goꞌꞌiya maarata neeni akeekanaadan Yihooway maaddana mala oychcha.
Neeni Ammaniyoobay Tumakkonne SHaakka Era
3 Nu ammanuwawu denddoy Xoossaa asay Kiristtoosaagaa mala siiquwaa bessiyoogaana xalla gidana bessenna. Aybissi? Ne mala Kiristtaanee, ubba qassi gubaaꞌe cimay woy aqinyee gita nagaraa oottiis gaada qoppa. Woykko issi ishay woy michchiyaa issiban nena qohikko shin? Woy issi uri kaddidaagaa gididi, nuuni tamaariyoobay tuma gidenna giidi yootana danddayees. Hegaa malabay hanikko, neeni xubettada Yihoowayyo haggaaziyoogaa agguutee? Nuuni tamaariyoobay hagaa: Ne ammanoy keexettidoy Xoossaara dabbotido dabbotan gidennan, haratu hanotaa beꞌiyoogaana gidikko, ne ammanoy mino gidenna. Neeni ne ammanuwaa keettaa keexxanawu neeyyo siyettiya laafaa malabata xalla goꞌettiyoogaappe minobatakka goꞌettana bessees. Geeshsha Maxaafay Yihoowabaa tamaarissiyo tumaa neeni pilggada ammanana koshshees.—Roo. 12:2.
4 Issoti issoti tumaa “ufaissan” ekkanaagaa Yesuusi yootiis; shin metoy gakkiyo wode eta ammanoy laafana. (Maatiyoosa 13:3-6, 20, 21 nabbaba.) Eti Yesuusa kaalliyo wode yedetaynne metoy gakkanaagaa akeekennan aggana danddayoosona. (Maa. 16:24) Woy Kiristtaaneta metoy mule gakkennabadan woy Xoossay eta metuwaa ubbatoo qaariyaabadan qoppana danddayoosona. SHin ha alamiyan wayssiyaabay deꞌana. Issi issibay nu deꞌoy laamettanaadaaninne nu kaseegaadan ufayttennaadan oottana danddayees.—Maz. 6:6; Era. 9:11.
Ayyaanaaban Alꞌꞌobaa
it-1 995
Duufuwa
Roome 3:13n Kiitettida Phawuloosi Mazamure 5:9 qofaa ekkidi iita asatunne makkalanchchatu “doonai dooyettida duufo mala” giis. Dooya deꞌiya duufoy anhan kumiyogaadan, dooya deꞌiya iitatu doonaykka woriyabaaninne worddo haasayan kumiis.—Maa 15:18-20ra gatta xeella.
USUPPUNE 19-25
XOOSSAA QAALAN DEꞌIYA ALꞌꞌOBAA | MAZAMURE 8-10
‘Abeet Yihoowa Taani Nena Sabbana’!
Yihoowa Son Neeyyo Deꞌiya Sohuwaa Nashsha
6 Yihooway nuuni deꞌanawu loꞌꞌo sohuwaa giigissiis. Yihooway asaa medhdhanaappe daro wodiyaa kasetidi asay deꞌana mala saꞌaa giigissiis. (Iyy. 38:4-6; Erm. 10:12) Yihooway nuussi qoppiyo gishshawunne keha gidiyo gishshawu, nu ufayttanaadan oottiya darobata medhdhiis. (Maz. 104:14, 15, 24) Qassi I ba medhdhidobata wotti dentti qoppidi “hegee lo77o gididoogaa” akeekiis. (Doo. 1:10, 12, 31) I saꞌan medhdhido loꞌꞌiya ubbabaa asay ‘haaranaadan’ oottiyoogan asaa bonchchiis. (Maz. 8:6) Xoossay wottiyoobi baynna asay I medhdhido loꞌꞌiyaabata naagiyoogan merinawu ufayttanaadan koyees. Yihooway qaalaa gelido maalaalissiyaabaa gishshawu A ubbatoo galatay?
Xoossay Immido Loꞌꞌobatu Gishshawu A Galatay?
10 Lodda laamiyan ammaniyaageetuyyo Xoossay ubbabaa medhdhidoogaa nuuni ammaniyoy aybissakko qonccissiyoogee haasayiyo imotaa nu nashshiyoogaa bessana danddayiyo issi oge. (Maz. 9:1; 1 PHe. 3:15) Lodda laamiyan ammaniyaageeti saꞌaynne saꞌan deꞌuwan deꞌiyaabay merettibeenna giidi yootoosona. Nuuni Geeshsha Maxaafaanne ha huuphe yohuwan xannaꞌido amaridabata goꞌettikko, saluwan deꞌiya nu Aawawu exatana danddayoos; qassi Yihooway saluwaanne saꞌaa Medhdhidaagaa gidiyoogaa nu ammaniyoy aybissakko siyanawu koyiyaageetuyyo qonccissana danddayoos.—Maz. 102:25; Isi. 40:25, 26.
Neeni ‘Haasayan Leemiso Giday’?
13 Wozanappe yexxa. Nuuni nu shiiqotun mazamureta yexxiyo waanna gaasoy Yihoowa sabbiyoogaa. Saaro giyo michchiyaa yexxiyoogan gooba gidikke gaada qoppawusu. SHin, A mazamuriyan Yihoowa sabbanawu koyawusu. Hegaa gishshawu, A shiiquwawu giigettiyo wode, mazamuretakka meezetawusu. A yaatiyoogan mazamuretu danttoti shiiquwan tamaariyoobaara waani gayttiyaakko akeekanawu malawusu. A, “Taani qaalatubaa qoppiyo wode, ta loytta yexxiyoogaa woy yexxennaagaa xeelliyaagan darin qoppikke” yaagasu.
Ayyaanaaban Alꞌꞌobaa
w23 03 19 ¶14
Yihooway Medhdhidobaappe Abaa Loytta Tamaara
14 Daawiti Xoossay medhdhidobata loytti qoppiis. I Yihoowawu hagaadan giis: “Neeni ne biradhdhetun medhdhido ne salota, sohuwan sohuwan neeni wottido aginaanne xoolintteta taani be7iyo wode, neeni asabaa qoppanau asi aibee?” (Maz. 8:3, 4) Ee, Daawiti qammi saluwan xoolintteta xeelliiddi ufayttiyoogaappe aarobaa oottiis. Xoolintteti Xoossaabaa ay tamaarissiyaakko I loytti qoppiis. Yihooway keehi gita gidiyoogaa I akeekiis. Hara wode qassi, Daawiti I ba aayee uluwan waani merettidaakko wotti dentti qoppiis. I maalaaliya hanotan merettida ba bollaabaa loytti qoppidoogee Yihoowa A aadhdhida eratettawu keehi galatanaadan oottiis.—Maz. 139:14-17.
USUPPUNE 26–LAAPPUNE 3
XOOSSAA QAALAN DEꞌIYA ALꞌꞌOBAA | MAZAMURE 11-15
Xoossay Ehaana Sarotettay Kumido Ooratta Alamiyan Intte Deꞌiyabadan Qoppite
w06 5/15 18 ¶3
Mazamure Maxaafaa Shaahotuppe Koyruwan Deꞌiya Kulkka Qofaa
11:3—Laalettida baasoti awugeetee? Asaa zariyawu baaso gidida higgeti, maaratinne tumu pirddati laalettidosona. Hegeeti laalettiyo wode, asaa deꞌoy metiyagaa gidees; qassi suure pirddaykka xayees. Hegaa mala hanotan, “xillo” gidida asi Xoossan mintti ammanana koshshees.—Mazamure 11:4-7.
Danoy Baynna Alamee Deꞌana Danddayii?
Ha saꞌaappe mata wode danobaa xayssanawu Xoossay qaalaa gelidoogaa Geeshsha Maxaafay yootees. Danobay kumido ha alamee “Xoossau goinnenna asati pirddettiyo gallassainne xayiyo gallassai gakkanaassi” naagees. (2 PHeexiroosa 3:5-7) Hegaappe simmin danobaa oottidi harata qohiya asi deꞌenna. Xoossay kelttiyaa gelidi danobaa muleera xayssanawu koyiyoogaa nuuni waati ammanettana danddayiyoo?
Geeshsha Maxaafay, “Hanttaarabaa siiqiyaageeta [Xoossay] keehippe ixxees” yaagees. (Mazamure 11:5) Medhidaagee sarotettaanne suure pirddaa dosees. (Mazamure 33:5; 37:28) Danobaa oottiya asaa i merinawu coꞌꞌu giidi xeellennay hegaassa.
Ne Dosan Danddayada Naaguutee?
15 Daawiti ba dosan danddayidi naagidoy aybissee? I ichashutoo, “Aude gakkanaassi?” giidi oychido mazamuriyan hegaa zaaruwaa yootiis. I hagaadan giis: “SHin aggenna ne siiquwan taani ammanettais; neeni tana ashshiyo gishshau, taani ufaittais. GODAU, taani neeyyo yexxana; aissi giikko, neeni taayyo kehadasa.” (Maz. 13:5, 6) Daawiti aggenna Yihoowa siiquwan ammanettiis. I Yihooway ashshiyo wodiyaa ufayssan naagiis; qassi Yihooway baassi oottidobaa wotti denttidi qoppiis. Ee, naagidoogee bessiyaaba gidiyoogaadan Daawitawu siyettiis.
Kawotettay Xoossaa SHenee Saꞌan Polettanaadan Oottees
16 Hirggennan deꞌiyoogaa. Isiyaasa 11:6-9n odettida ufayssiyaabay leemiso gidenna ogiyan wurssettan muleera polettana. Attumay, maccaynne naatoy saꞌan awu biikkokka eta qohiyaabinne hirggissiyaabi baawa. Asa woy doꞌa gidin, ayba meretinne qohees giidi oonikka hirggenna. Neeni ha kumetta saꞌaa ne keettadan xeellana wodiyaa, aynne yayyennan shaafaaninne abban haattaa wadhana danddayiyo wodiyaa, deriyaaninne maatay kumido dembban hemettana danddayiyo wodiyaa ane qoppa. Qassi neeni qammikka yayyakka. Xoossaa asay haray atto “bazzon saro de7ana [malanne] wora garssankka hirggi bainnan allaxxana” mala, Hizqqeela 34:25n deꞌiya qaalay polettana.
Ayyaanaaban Alꞌꞌobaa
Laamettadii?
12 Nuuni deꞌiyoy PHauloosi yootido asatu malay kumido alamiyaana gidiyoogee azzanttiyaaba. Eti higgiyaa naagidi deꞌiyoogee attidabadaaninne hegaa naaganaadan ooninne hara uraa wolqqanttana koshshennabadan qoppoosona. Daro asttamaareti, aawatinne aayeti naati bantta koyidobaa hananaadan coꞌꞌu giidi xeelloosona. Eti ubba asau likke woy likke gidennabaa ba huuphe kuuyiyo maatay deꞌees giidi naata tamaarissoosona. Hegaa mala asati likke gididabaa woy likke gidennabaa erana danddayettenna giidi qoppoosona. Xoossan ammanoos giyaageetikka i likke giyoobaa oottana bessiyaabadan qoppokkona. (Maz. 14:1) Ha qofay tumu Kiristtaaneta qohana danddayees. Naagettennaageeti Xoossay giigissidobaa hegaadan xeellana danddayoosona. Eti gubaaꞌiyaa kaaletuwaa kaallanau koyennan aggana danddayoosona; ubba qassi eti dosennaba ubbaa gishshau amassalana danddayoosona. Woy qassi wodiyaa aattiyoobaa, Interneettiyaa goꞌettiyo ogiyaanne xoqqa timirttiyaa tamaariyoogaa xeelliyaagan Geeshsha Maxaafaappe imettiya zoriyaa sirana danddayoosona.