Kiristtaanetu Deꞌuwanne Haggaazuwa Shiiquwa Xannaꞌiyo Xuufiyan Odettida Xuufeta
© 2024 Watch Tower Bible and Tract Society of Pennsylvania
ICHCHASHE 6-12
XOOSSAA QAALAN DEꞌIYA ALꞌꞌOBAA MAZAMURE 127-134
Yelidaageetoo—Intte Naata Loytti Naagite
Yihoowa Son Neeyyo Deꞌiya Sohuwaa Nashsha
9 Yihooway asay naata yelidi eti A siiqanaadaaninne awu haggaazanaadan eta tamaarissana mala aawatettaa immiis. Neeni yelidaagaa gidikko, ha imotaa gishshawu galatay? Yihooway kiitanchchatussi maalaalissiya daro eray deꞌanaadan oottidaba gidikkonne, naata yelanaadan oottidi eta medhdhibeenna. Naata dichchiyaageeti hegaa hassayidi naata dichchiyo maataa xoqqu ootti xeellana koshshees. Yelidaageeti bantta naata “Godaa seeraaninne zoriyan” dichchiyo gita aawatettay etawu imettiis. (Efi. 6:4; Zaa. 6:5-7; Maz. 127:3) Yelidaageeta maaddanawu Xoossaa dirijjitee Geeshsha Maxaafaa qofay deꞌiyo xuufeta, biidota, muuziqaanne hegaa mala darobata giigissiis. Saluwan deꞌiya nu Aawaynne A Naꞌay nu naata siiqiyoogee qoncce. (Luq. 18:15-17) Yelidaageeti Yihoowan ammanettiyo wodenne bantta naatussi koshshiyaabaa kunttanawu banttawu danddayettida ubbabaa oottiyo wode Yihooway ufayttees. Yelidaageeti bantta naati merinawu Yihoowa soo asa gidanaadankka maaddoosona!
Yelidaageetoo—Intte Naati Yihoowa Siiqanaadan Tamaarissite
20 Intte naata loytti erite. Mazamure 127y naata tooraara woy wonddafiyaara geeddarssees. (Mazamure 127, 4 nabbaba.) Wonddafee dumma dummabaappe giigana danddayiyoogaadaaninne yesuwan dummatana danddayiyoogaadan, naati ubbay dumma dumma. Yaatiyo gishshawu, yelidaageeti bantta naata issuwaa issuwaa waati loohissanaakko kuuyana koshshees. Ha wodiyan Israaꞌeela biittan bantta naaꞌꞌu naati Yihoowawu haggaazanaadan loohissidi dichchida azinaynne machchiyaa banttana maaddidabaa hagaadan giidosona: “Nuuni nu naata Geeshsha Maxaafaa dumma dumma xannaꞌissida.” Hegaadan xannaꞌissiyoogee koshshiyaakko koshshennaakko so asawu huuphe gidida uri kuuyiyoogee qoncce.
Ayyaanaaban Alꞌꞌobaa
Yihoowayyo Haggaazanawu Ne Oottiyooban Ufaytta!
6 Mazamure 131:1, 2y yelidaageeti tamaarana koshshiyaabaa yootees. (Nabbaba.) Kawuwaa Daawiti ‘gitabaa’ woy I oottana danddayennabaa amottibeennaagaa yootiis. I bana ziqqi oottido gishshawu, bawu deꞌiyaaban ufayttidi saruwan deꞌiis. Yelidaageeti Daawiti yootidobaappe ay tamaarana danddayiyoonaa? Yelidaageeti banttana ziqqi oottiyaageeta gidikko, banttappekka bantta naatuppekka keehi darobaa naagokkona. Yelidaageeti bantta naati loytti oottana danddayiyoobaanne danddayennabaa akeekidi, eti gakkana danddayiyo halchchuwaa halchchiyoogan naati pattikke giidi qoppennaadan maaddana danddayoosona. Maarino giyo michchiyaa hagaadan gaasu: “Ta aayyiyaa tana ta ishanttuura woy hara naatuura mule geeddarssa erukku. Asa ubbawu dumma dumma eray deꞌiyoogaanne nuna ubbaa Yihooway xoqqu ootti xeelliyoogaa tana tamaarissaasu. A hegaadan tamaarissido gishshawu, taani haratuura tana geeddarssa erikke.”
ICHCHASHE 13-19
XOOSSAA QAALAN DEꞌIYA ALꞌꞌOBAA MAZAMURE 135-137
‘Nu Goday Xoossatu Ubbaappe Xoqqiyagaa’
Kiristtoosa Xoossaa Wolqqaa
Yesuusi ba wolqqaa Yihoowappe demmiis; hegaa gishshawu, Ubbaa Danddayiya Xoossay saꞌaa meretaa wolqqaa azazana danddayiyoogaa ammaniyoogee bessiyaaba. Amarida leemisota ane qoppa. Yihooway Bashshaa Haattaappe kase, “Laappun gallassaappe guyyiyan, taani oitamu gallassaanne oitamu qammaa ha sa7aa bollan iraa bukissana” yaagiis. (Doo. 7:4) Hegaadankka, Yihooway arshsho baggappe “wolqqaama carkkuwaa yeddidi, abbaa” guyye zaaridoogaa Kessaabaa 14:21 yootees. Qassi Yoonaasa 1:4y, “GODAI abbaa bolli wolqqaama carkkuwaa denttiis; denttin abbaa beetai keehi darido gishshau, markkabee me77ana haniis” yaagees. Yihooway carkkuwaanne hegaa malabaa azazana danddayiyoogaa eriyoogee minttettiyaaba. Sinttappe saꞌay loꞌꞌanaagee erettidaba.
Aggenna Yihoowa Siiqoy Nena Waati Goꞌꞌii?
16 Yihooway nuna naaganaagaa ammanettikko, nuuni minettana danddayoos. SHin nuuni issi issitoo azzanananne minettennan aggana danddayoos. Hegaa mala wodetun Yihooway nuussi ay oottanee? (Mazamure 136:23 nabbaba.) I ba kusheta garssaara yeddidi leddan nuna dentteesinne nuuni azzaniyoogaa agganaadan maaddees. (Maz. 28:9; 94:18) Nuuni goꞌettiyo ogiyaa: Nuuni ubbatoo Xoossan ammanettana danddayiyoogaa eroos. Hegee nuna naaꞌꞌu ogiyan maaddees. Koyroogee, nuuni awan deꞌikkonne Yihooway nuna awudenne naaganaagaa eroos. Naaꞌꞌanttoogee, saluwan deꞌiya siiqiya nu Aaway nuussi loytti qoppees.
Ayyaanaaban Alꞌꞌobaa
Yihoowassi ‘Ammanettiyaageeti Ufayttiyaageeta’
12Yihooway ‘deriyaa heemmiyaageetuppe’ xoqqiyaagaa gidiyoogaa loytti bessiis. Heezzu leemisota beꞌa. Gibxxe kawoy Paarooni Yihoowa asata aylle oottidi haariis, qassi eta yeddanaadan oychchin darotoo yeddennan ixxiis. SHin, Xoossay eta laꞌa kessiisinne Paaroona Zoꞌo Abban xayssiis. (Kes. 14:26-28; Maz. 136:15) Baabiloone Kawoy Belshshaaxaari gibiraa giigissidi, ‘saluwaa Godaa bolli otorettiis,’ qassi Yihoowa aggidi ‘biraappenne worqqaappe oosettida xoossata galatiis.’ (Dane. 5:22, 23) SHin he otorettiya bitaniyaa Xoossay kawushshiis. “He galla qammi” Belshshaaxaari hayqqiis, qassi A kawotettay Meedoonatuyyoonne Parssetuyyo imettiis. (Dane. 5:28, 30, 31) Yihudaa biittaa Kawoy Heeroodisi Agriiphphi Koyroy kiitettida Yaaqooba woriis, qassi PHeexiroosakka woranawu qoppidi qachchiis. Gidikkonne, Heeroodisi ba qoppidobaa polennaadan Yihooway diggiis. “Godaa kiitanchchai a dechchin,” I hayqqiis.—Oos. 12:1-5, 21-23.
Ootti-besuwa
ijwfq 7
Yihoowa Markkati Kiristtaanee?
Ee. Kaallidi deꞌiya gaasotuppe denddidaagan nuuni Kiristtaane:
Nuuni Yesuus Kiristtoosa timirttiyaanne eeshshaa loyttidi kaallanawu baaxetoos.—1 PHeexiroosa 2:21.
Atotettaa demmanawu Yesuusan ammaniyoogee keehippe koshshiyoogaa ammanoos, “nuuni a sunttan attanau bessees; aissi giikko, Xoossai saluwaappe garssan asassi immido hara suntti baawa.”—Oosuwaa 4:12.
Asay Yihoowa Markka gidiyo wode, Yesuusa sunttan xammaqettees.—Maatiyoosa 28:18, 19.
Nu woosaa Yesuusa sunttan woossoos.—Yohaannisa 15:16.
Nuuni Yesuusi ubba attuma asau Huuphe, woy eta bolli aawatettay deꞌanaadan sunttettidaagaa gidiyoogaa ammanoos.—1 Qoronttoosa 11:3.
Gidikkokka, Kiristtaane geetettiya haymaanoote citatuppe daroban dummatoos. Leemisuwau, Geeshsha Maxaafay Yesuusi Sillaasiyaa shaaho gidennan, Xoossaa Naꞌaa giidi tamaarissiyoogaa ammanoos. (Marqqoosa 12:29) Nuuni shemppoy hayqqennabaa giidi, Xoossay asaa merinawu siꞌooliyaa taman xuuggees giyo qofay Geeshsha Maxaafan deꞌees giidi, woy sintta xeera gididi haymaanoote oosota oottiyaageeta haraatuppe xoqqissidi xeesiyo bonchcho sunttay deꞌana koshshees giidi ammanokko.—Eranchchaa 9:5; Hizqqeela 18:4; Maatiyoosa 23:8-10.
ICHCHASHE 20-26
XOOSSAA QAALAN DEꞌIYA ALꞌꞌOBAA MAZAMURE 138-139
Shiiquwan Qofaa Yootanawu Yayyoppa
Gubaaꞌiyan Yihoowa Sabba
10 Zaaranawu kushiyaa denttanawu qoppiyo wode ubban neeni yashshaa maasha eray? Yaanikko, hegaadan siyettiyoy ne xallaassa gidenna. Zaariyo wode nuuppe dariya baggati amarida hanotan yayyiyoogee tuma. Neeni zaarennaadan teqqiya yashshaa xoonanaappe kase, neeni yayyiyo gaasuwaa shaakka erana koshshees. Neeni yootana koyiyoobaa dogana gaada yayyayiyye, woy balabaa yootays gaada yayyayii? Neeni zaariyoobay haratuugaadan loꞌꞌo gidenna gaada hirggay? Hegaadan yayyiyoogee loꞌꞌo malaata gidana danddayees. Hegee neeni ne huuphiyaa ziqqi oottiyoogaanne harata neeppe xoqqu oottada xeelliyoogaa bessees. He eeshshaa Yihooway dosees. (Maz. 138:6; Pili. 2:3) Qassi Yihooway neeni A sabbanaadan, shiiqotun ne ishanttanne ne michchontta minttettanaadankka koyees. (1 Tas. 5:11) I nena siiqiyo gishshawu neessi koshshiya xalatettaa immana.
Gubaaꞌe SHiiqotun Issoy Issuwaa Minttettite
7 Wochchiyo Keelan kase kiyida maaddiya amarida qofata pilggiyoogee nena maaddana danddayees. Leemisuwawu, loytta giigetta. (Lee. 21:5) Neeni xuufiyaa loytta giigettikko, qofaa yootanawu metootennan aggana danddayaasa. Qassi qantta qofaa yoota. (Lee. 15:23; 17:27) Qanttan zaariyoogee neeni darin yayyennaadan oottees. Adussa qofaa yootiyoogaappe, issi woy naaꞌꞌu qofaa qashuwaa qanttan zaariyoogee, ishanttinne michchontti neeni zaariyo qofaa metootennan akeekanaadan oottees. Xuufiyaappe nabbabennan qanttan zaariyoogan neeni loytta giigettidoogaanne xuufiyaa qofaa loytta akeekidoogaa bessana danddayaasa.
Ayyaanaaban Alꞌꞌobaa
Ayfiyan Beettennaba Gidikkonne Keehi Alꞌꞌo Imotata
12 Nuuni Xoossaa geeshsha ayyaanaa xoqqu ootti xeelliyoogaa waati bessana danddayiyoo? Nuuni nu wozanan qoppiyo woy amottiyo iitabaa akeekanaadan geeshsha ayyaanay maaddana mala woossiyoogee hegaa bessiyo issi oge. (Mazamure 139:23, 24 nabbaba.) Nuuni hegaadan woossikko, nuuni qoppiyo woy amottiyo iitabaa akeekanaadan Yihooway ba ayyaanaa baggaara maaddana danddayees. Qassi nuuni iitabaa qoppiyoogaa woy amottiyoogaa akeekikko, he qofaa woy amuwaa eqettanaadan Xoossaa ayyaanay wolqqaa immana mala woossana koshshees. Yaatikko, Yihooway ba geeshsha ayyaanaa baggaara nuna maaddiyoogaa agganaadan oottiya aybanne nu oottana koyennaagaa I akeekana.—Efi. 4:30.
Haasayaa
ijwyp 105
Dungguuxiyogaa Waana Aggana Danddayiyanaa?
Azzanttiyabaa: Dungguuxatettay neeni haratuura laggetennaadaaninne etaara loꞌꞌo wodiya aattennaadan diggana danddayees.
Ufayssiyabaa: Dungguuxatettay ubbatoo iita gidenna. Hegee neeni haasayanaappe kase qoppanaadan, issibaa loytta xeellanaadaaninne ezgganaadan maaddana danddayees.
Keehi ufayssiyabaa: Dungguuxatettay laamettana danddayenna eeshsha gidenna; yaatiyo gishshawu hegee gattiyo qohuwa teqqana danddayaasa. Neeni hegaadan waata oottana danddayiyakko ha huuphe yohoy qonccissana.
Nena yashshiyabay aybakko shaakka era
Oottanabata
Ne laggeti woygiyonaa?
Nena yashshiyabay aybakko shaakka era
Neeni dungguuxa gidikko asaa somꞌꞌuwa xeellaydda haasayanawu keehi unꞌꞌettana danddayaasa. Hegee neeni xuma kifiliyan nerkka deꞌiyabadan neeyyo siyettanaadan oottana danddayees. Qassi hegee nena yashshiyaba gidana danddayees. Shin nena yashshiyabay aybakko shaakka eranawu baaxetikko hegawu yayyana koshshennaagaa akeekana danddayaasa. Heezzu leemisota beꞌa.
◼ Yashshaa #1: “Woyga haasayanaakko erikke.”
Tumubaa: Asay neeni haasayidobaappe aaruwan ne ufayssidobaa hassayees. Harati haasayiyobaa wozanappe ezggiyo hiillaa meezetiyogan yashshaa xoonana danddayaasa.
Qoppana bessiyabaa: Neessi ay mala laggee deꞌanaadan koyay? Ne haasayiyobaa loytti ezggiya ureeyye, haasayaa dariya uree?
◼ Yashshaa #2: “Taani haasayaa darikko asay tanan ufayttenna.”
Tumubaa: Neeni dungguuxa gidin aggin asay nebaa issibaa qoppiyogaa aggenna. Neeni ne eeshshaa asay eranaadan oottikko, asay nebaa loꞌꞌobaa qoppana danddayees; qassi hegee neeni dungguuxatettaa xoonanaadan maaddana.
Qoppana bessiyabaa: Ubba asay nebaa iitabaa qoppiyaba neeyyo milatikko, asaa bolli coo pirddaydda deꞌiyay nena gidanddii?
◼ Yashshaa #3: “Balabaa haasayada yeellatanaappe coꞌꞌu giyogee loꞌꞌo.”
Tumubaa: Issi issitoo, ubba asaykka balabaa haasayana danddayees. Hegaa mala balata neeni polo asa gidennaagaa haratussi bessiyo loꞌꞌo injjedan xeelliyogan yashshaa xoonana danddayaasa.
Qoppana bessiyabaa: Banttana polo asadan xeellenna asatuura laggetiyogee ufayssennee?
Hagaa eray? Issi issi asati daro kiitaa xaafidi asawu kiittiyo gishshawu dungguuxa gidokko giidi qoppoosona. Shin tumu laggetettaa metootennan medhdhanawu maaddiyagee asaara gayttidi haasayiyogaa. Asaa eeshshaabaa xannaꞌiyanne zammaana tekinolojiya eranchchay Sheeri Terkili hagaadan giis: “Issoy issuwa somꞌꞌuwa xeelliyogeenne issoy issuwa cenggurssaa siyiyogee issoy issuwara loytti dabbotanawu maaddees.”a
Oottanabata
• Nena haratuura geeddarssoppa. Neeni xexxelana koshshenna. Shin, loꞌꞌo laggetettaa medhdhada hegan ufayttanawu ne dungguxatettaa xoonanawu halchchana danddayaasa.
“Asaara haasayiyobay keehi adussa gidana bessiyabadan, qassi he haasayaa neeni kaalettiyabadan qoppana koshshenna. Ooratta urawu nena eretissikko woy amarida oyshata A oychchikko hegee gidees.”—Aliisho
Geeshsha Maxaafaa maaraa: “SHin asai ubbai huuphiyan huuphiyan ba oosuwaa paacco; hegaappe guyyiyan, hara asaagaara giigissennan, ba huuphe ooso xalaalan ceeqettiyoobaa demmana.”—Galatiya 6:4.
• Akeekanchcha gida. Asaara metootennan haasayiya asata loytta xeella; qassi eti haratuura waati haasayiyakko akeeka. Eti ayba hiillaa goꞌettiyonaa? Eti daro goꞌettenna hiillay awugee? Neeni qullanawu keehi koyiyo eta hiillay awugee?
“Laggeta metootennan demmiya asata loytta akeekanne etappe tamaara. Issi uraara koyro gayttiyo wode eti ay oottiyakkonne woygi haasayissiyakko xeella.”—Aarona.
Geeshsha Maxaafaa maaraa: “Biratai birataa poshiyoogaadan, asai issoi issuwaappe tamaarees.”—Leemiso 27:17.
• Oyshata oychcha. Issibaa xeelliyagan asay ba qofaa yootiyogaa dosiyo gishshawu, oyshata oychchiyogee asaara haasayaa doommanawu loꞌꞌo oge. Qassi hegee asay ne bolli xeelaa wottennaadan oottees.
“Kasetada giigettiyogee daro unꞌꞌettennaadan nena maaddana danddayees. Asay shiiqiyo sohuwa baanaappe kase amarida qofata woy oyshata qoppana danddayaasa; yaatikko ooratta asaara gayttiyo wode daro unꞌꞌettakka.”—Alano.
Geeshsha Maxaafaa maaraa: “Qassi issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.”—Piliphphisiyuusa 2:4.
Ne laggeti woygiyonaa?
“Noocu giyogaanne ‘saroo’ giyogaa mala guuttaban doommikko asay neessi zaariyoban ne maalaalettana; qassi hara wode asaara haasayanawu koyikko yayyakka.”—Kelsseyo.
“Ubba asawukka amarida loꞌꞌo eeshshaynne hara asawu immiyo loꞌꞌobay deꞌees. Neeyyo siyettiyabaa haratussi laꞌatettan qonccissana xayikko, ne loꞌꞌo eeshshaappe ooninne goꞌettenna.”—Robina.
“Asay ufayttanaadan ne oottikko, neeni dungguuxa gidikkokka asay nena dosana. Hegee neeni wozanappe noocu gaanaadankka maaddana. Qassi neeni wozanappe noocu gaanawu asawu deꞌiya loꞌꞌo eeshshaa akeekana koshshees.”—Veroniko.
Neeni issitoo yashshaa xoonikko, asaara gayttidi haasayiyogee ne qoppoogaa keenaa yashshiyaba gidennaagaa akeekana danddayaasa
ICHCHASHE 27– USUPPUNE 2
XOOSSAA QAALAN DEꞌIYA ALꞌꞌOBAA MAZAMURE 140-143
Maaduwa Demmanawu Woossi Simmidi Intte Woosaara Maayettiyabaa Oottite
“Aadhdhida Eranchchai Odiyoobaa Siya”
13 Neessi imettiya zoriyaa Xoossay nena siiqiyoogaa bessiyaabadan xeella. Yihooway nuussi keehi loꞌꞌobaa qoppees. (Lee. 4:20-22) I ba Qaalaa baggaara, Geeshsha Maxaafaa qofay deꞌiyo xuufiyaa baggaara, woy kayma Kiristtaaniyaa baggaara nuna zoriyo wode, nuna siiqiyoogaa bessees. Ibraawe 12:9, 10y yootiyoogaadan, “Xoossai . . . nuna maaddanau qaxxayees.”
14 Zoree imettido ogiyaa gidennan, zoriyaa qoppa. Nuuni issi issitoo zoree nuussi likke ogiyan imettibeenna giidi qoppana danddayoos. Zoriyaageeti siyanawu ufayssiya ogiyan zoranawu baaxetana koshshees. (Gal. 6:1) SHin zoree imettiyoy nuussa gidikko, zorida uri nuna loꞌꞌo ogiyan zoribeenna giidi nuuni qoppikkokka zoriyan xeelaa wottana koshshees. Nuna hagaadan oychchana danddayoos: ‘Zoree imettido ogiyaa taani dosana xayikkonne, odettidabay tumee? Taani zoriyaa immida ura balaa aggabayada he zoriyan goꞌettana danddayiyaanaa?’ Nuuyyo imettiya zoree ayba gidikkonne, zoriyan goꞌettiyo ogiyaa koyiyoogee loꞌꞌoba.—Lee. 15:31.
w10 3/15 32 ¶4
Ha Iita Wodiyan ‘Wozanaa Geeshshatettaa’ Naaga
4Eqettiyageeti yedettiyogee, miishshaa metoy, qassi wolqqaama harggee issi issi Xoossaa ashkkarati keehi unꞌꞌettanaadan oottees. Hegaa mala wodetun eta wozanay azzanees. Kawuwa Daawitakka hegaa malabay gakkiis. I hagaadan giis: “Taani hitaas; ta wozanaikka yibbaatiis.” (Maz. 143:4) Hegaa mala metuwa genccanaadan A aybi maaddidee? Xoossay ba ashkkaratussi oottidobaanne metuwappe A ashshido wodeta hassayidoogee Daawita maaddiis. Yihooway Ba gita sunttaa gishshawu oottidobaa Daawiti wotti dentti qoppiis. Daawiti Xoossay oottidobata zaari zaaridi qoppiis. (Maz. 143:5) Nuunikka nuna Medhdhidaagaanne I kase nuussi oottidobaa qassi haꞌꞌi oottiyobaa wotti dentti qoppiyogee metuwa genccanaadan nuna maaddana.
Yihoowawu Goynniya Ura Xallaa Geliyoogee Ha Wodiyankka Danddayettiyaabee?
2Issi issitoo, “Abeet GODAU, taayyo zaaruwaa immanau ellella! Taani hitaas. . . . Ne som77uwaa taappe genttoppa” yaagida mazamuraawiyaa Daawitaagaadan neeyyookka siyettana danddayees. (Maz. 143:5-7, 10) Hegaa mala wodiyan, saluwan deꞌiya ne Aaway neeyyo qoppidobaa neessi qonccissanaashin naaga. Geeshsha Maxaafaa nabbabiyoogaaninne wotta dentta qoppiyoogan hegaa bessana danddayaasa. Yaatiyoogan, a azazoti aybakko eraasa; qassi Yihooway beni wode ba asaayyo waatidaakko akeekaasa. I yootiyoobaa siyiyoogan, a azazettiyoogee aadhida eratetta gidiyoogaa kaseegaappe aaruwan ammanettaasa.
Ayyaanaaban Alꞌꞌobaa
Tumu Goynoy Neeni Loytta Ufayttanaadan Maaddana
7Nuuni Yihoowa woossiyo wode awu goynnoos. Xoossaa Dunkkaaniyaaninne guyyeppe beeta maqidasiyan shiiqida loytti giigissido ixaanaara Geeshsha Maxaafay nu woosaa geeddarssees. (Maz. 141:2) Sawuwaa tonggu giya he ixaanan Xoossay ufayttiis. Hegaadankka, nuuni akeekanawu metenna qaalata goꞌettikkonne, wozanappe nu woossiyo woosay A “ufaissees.” (Lee. 15:8; Zaa. 33:10) Nuuni A siiqiyoogaanne galatiyoogaa qonccissiyo wode Yihooway siyidi ufayttiyoogaa ammanettoos. Nuuni nuna qofissiyaabaa, nu hidootaanne nuuni koyiyoobaa awu yootanaadan I koyees. Neeni woosan Yihoowa haasayissanaappe kase, woossanaabaa loyttada qoppiyoogee loꞌꞌo. Yaatiyoogan, neeni saluwan deꞌiya ne Aawawu keehi loꞌꞌo “ixaanaa” shiishshana.
Ootti-besuwa
ijwfq 21
Yihoowa Markkati Suuttaa Ekkennay Aybissee?
Meeze gidida bala qofata
◼ Bala qofaa: Yihoowa Markkati aakimeti maaddana danddayokkona giidi ammaniyo gishshawu, akkamettanawu koyokkona.
Tumaa: Nuuni nuussinne nu so asawu, danddayettida keenan keehi loꞌꞌo akkamuwa koyoos. Nuuni sahettiyo wode, suuttaa immennan akkamana woy shukkana danddayiya aakimetukko boos. Akkamuwara gayttidaagan eray gujjidoogaa nashshoos. Sahettida Yihoowa Markkata maaddanawu doommido suuttaa immennan akkamiyogee haratakka maaddiiddi deꞌees. Daro biittatun, sahettida ooninne suuttaappe oyqqiya harggiya, bollay suuttaara maayettennan ixxiyogaanne aakimetu balaa malabatu gaasuwan suuttaa ekkennan agganawu doorana danddayees.
◼ Bala qofaa: Yihoowa Markkati ammanoy issi ura harggiyappe pattees giidi ammanoosona.
Tumaa: Nuuni sahettida ura ammanuwan pattana giidi oottiyobi baa.
◼ Bala qofaa: Suuttaa ekkennan akkamettanawu daro miishshaa koshshees.
Tumaa: Suuttaa ekkennan akkamettiyogee daro miishsha koshshiyaba gidenna.
◼ Bala qofaa: Suuttaa ekkennaagaa gaasuwan naata gujjin, daro Yihoowa Markkati layttan layttan hayqqoosona.
Tumaa: Hegee tuma gidiyogaa bessiya naqaashi mule baa. Shukkiya aakimeti wozanaanne meqettaa shukkidi akkamiyogaa, qassi kilahuwa malabata laammiyogaa mala waayissiya akkamota suuttaa immennan darotoo akkamoosona. Guutta naata gujjin, suuttaa ekkennan akkamettiyageeti suuttaa ekkidi akkamettiyageetuppe aaruwan darotoo sohuwara paxoosona. Gidikkokka, sahettiya uri suuttaa ekkennan ixxido gishshawu hayqqees, woy suuttaa ekkido gishshawu paxees gaana danddayettenna.
Yihoowa Markkati suuttaa ekkennay aybissee?
Hegee akkamuwaba gidennan, haymaanooteera gayttidaba. Galꞌꞌa Maachchaykka Ooratta Maachchaykka nuuni suuttaappe haakkanaadan minttidi azazees. (Doomettaabaa 9:4; Wogaabaa 17:10; Zaarettido Wogaa 12:23; Oosuwaa 15:28, 29) Qassi, Xoossay suuttaa deꞌodan xeellees. (Wogaabaa 17:14) Yaatiyo gishshawu, nuuni suuttaappe haakkiyoy Xoossawu azazettana xallaassa gidennan, deꞌuwa Immida A bonchchiyo gishshataassa.
Qofaa laamiya
Issi wode, akkamuwara gayttidabaa oottiyageeti suuttaa ekkennaagaa, woy suutti baynnan akkamettiyogaa, bessennabadaaninne bana barkka woriyobadan xeelloosona; shin mata wodeppe simmin, he xeelay laamettiis. Leemisuwawu, 2004n, akkamuwara gayttida huuphe yohuwan attamettida issi xuufee hagaadan gees: “Yihoowa Markka gidida sahettiyageeta akkamanawu oottiyobatuppe darobati sinttappe akkamuwawu goꞌettiyo maara gidana.” Hart, Lang end Serkuleshin giyo xuufiyan kiyida issi huuphe yohoy, “‘suuttaa immennan shukkiyogee’ Yihoowa Markkatu xallaassa gidennan, shukkiyo akkamuwan ubbatoo goꞌettana koshshiyaba” gidiyogaa 2010n yootiis.
Ha wodiyan, kumetta saꞌan shaꞌan qoodettiya aakimeti shukkidi akkamiyo waayissiya akkamota suuttaa immennan akkamanawu, daro suuttay gukkennaadan oottiyo hiillaa goꞌettoosona. Suuttaa immennan akkamiyo hegaa mala akkamota, biron dicciiddi deꞌiya biittatunkka goꞌettoosona, qassi Yihoowa Markka gidenna daroti hegaadan akkamettanawu oychchidosona.
USUPPUNE 3-9
XOOSSAA QAALAN DEꞌIYA ALꞌꞌOBAA MAZAMURE 144-146
‘Eta Xoossay Yihoowa Gidiyo Asati Ufayttiyageeta!’
Nabbabiyageetu Oyshaa
2. He mazamuriyan deꞌiya hara qofaa akeeka. Paydo 12n (Ooratta Alamiyaa Birshshettan) “yaanin” giya qaalaa goꞌettiyoogee, paydo 12ppe 14 gakkanaashin deꞌiya anjjoti iitatuppe banttana ‘ashshanaadan’ woossiya geeshshatu hanotaa qonccissiyoogaa akeekanaadan oottees (paydo 11). Maayettiya naaꞌꞌu yohota yootiya paydo 15ykka he qofaa qonccissees. Hegaa giyoogee, naaꞌꞌusan “anjjettidaageeta” (‘ufayttiyaageeta,’ NW) giya qofay issi asaabaa—‘eta Xoossay Yihoowa’ gidido asatubaa yootees.
3. He qofay Geeshsha Maxaafan deꞌiya, Xoossay baassi ammanettida asata anjjanaagaa yootiya hara qofatuura maayees. Ha mazamuree Xoossay Israaꞌeelata eta morkketuppe ashshi simmidi, asay ufayttanaadaaninne duretanaadan oottidi eta anjjanawu gelido, mino naqaashay deꞌiyo qaalaa Daawiti ufayssan naagiyoogaa qonccissees. (Wog. 26:9, 10; Zaa. 7:13; Maz. 128:1-6) Leemisuwawu, Zaarettido Wogaa 28:4y hagaadan gees: “Ne uluwaa aifee, ne shooqaa aifee, ne mehiyaa maratinne ne dorssaanne ne deeshshaa wudiyaa marati corattidi anjjettidaageeta gidana.” Daawita naꞌaa Solomona haaruwaa wode, Israaꞌeelati laggetiyaabi baynna sarotettaaninne duretettan deꞌidosona.—1 Kaw. 4: 20, 21; Maz. 72:1-20.
Ne Hidootaa Mintta Naaga
16 Merinaa deꞌuwaa hidootay Xoossay nuuyyo immido alꞌꞌo imota. Nuuni ufayssiya sinttanaa hidootaa yeemuwan naagoos; qassi hegee polettanaagaa ammanettana danddayoos. Nu hidootay markkabiyaa oyqqiya qaaxxenna birataadan nuuni metuwaanne yedetaa genccanaadan, ubba qassi hayquwaa yayyennaadan maaddees. Nu hidootay birata qophiyaadan, nuuni iitabaa ixxidi loꞌꞌobaa dosanaadan nu qofaa naagees. Geeshsha Maxaafay yootiyo hidootay nuuni kaseegaappe aaruwan Xoossaakko shiiqanaadaaninne I nuna ay keena siiqiyaakko eranaadan maaddees. Nuuni nu hidootaa mintti naagikko, loytti goꞌettana.
17 Kiitettida PHawuloosi Roomen deꞌiya Kiristtaanetussi xaafido dabddaabbiyan, “Xoossai intteyyo immana giidoogan ufaittite” yaagidi minttettiis. (Roo. 12:12) PHauloosi ammanettidi deꞌikko, saluwan merinawu deꞌanaagaa eriyo gishshawu ufayttana danddayees. Yihooway ba gelido qaalaa polanaagaa ammanettiyo gishshawu, nuunikka hidootan ufayttana danddayoos. Mazamuraawee hagaadan giis: “GODAA ba Xoossaa baayyo ufaissa oottiya urai anjjettidaagaa. Xoossai . . . merinaukka ammanettiyaagaa.”—Maz. 146:5, 6.
Tumu Ufayssaa Demissiya Siiqoy Awugee?
19 Seexaanaa alamee 6,000 gidiya layttawu asay metootanaadan oottiis; ha alamee haꞌꞌi xayanawu matiis. Ba huuphiyaa, miishshaanne ufayttiyoobaa likkiyaappe aattidi siiqiya asan saꞌay kumiis. Eti demmana danddayiyoobawu keehi yeemottiya, qassi bantta deꞌuwan koyiyoobaa waannayidi xeelliya asa. Hegaa mala asay tumuppe ufayttana mule danddayenna. Hegaappe dumma hanotan, Geeshsha Maxaafay hagaadan gees: “Yaaqooba Xoossai maaddiyo urainne GODAA ba Xoossaa baayyo ufaissa oottiya urai anjjettidaagaa.”—Maz. 146:5.
20 Yihoowa asaa giddon deꞌiya Xoossaa siiqoy gujji gujji bees; qassi layttan layttan nu qooday dari dari bees. Hegee Xoossaa Kawotettay haariiddi deꞌiyoogaanne mata wode ha saꞌawu maalaalissiya anjjuwaa ehaanaagaa bessiya naqaasha. Nuuni tumu ufayssaa demmiyoy Xoossaa sheniyaa oottiyoogaananne Ubbaappe Xoqqiyaagaa ufayssiyoogaa eriyoogaana. Qassi Yihoowa siiqiyaageeti merinawu ufayttana! Kaalliya huuphe yohuwan, ba huuphiyaa siiqiyoogaappe pulttiyaa issi issi eeshshata pilggana, qassi he eeshshati Yihoowa ashkkarati bessiyo eeshshatuppe waani phalqqettiyaakko beꞌana.
Ayyaanaaban Alꞌꞌobaa
Immiyogan Loytta Ufayttiyagaa Gida
6 Yihooway nuna siiqiyo gishshawu nuussi koshshiyabaa kunttees. Yesuusi Maatiyosa 6:25, 26n yootidobaa ane beꞌoos. (Nabbaba.) Yesuusi kafotubaa leemisodan yootiiddi hagaadan giis: “Eti kattaa zerokkona woy cakkokkona woy shiishshidi gootaran yeggokkona.” Shin I kaallidi giidobaa akeeka: “Saluwan deꞌiya intte Aaway eta mizees.” Yaatidi Yesuusi eta hagaadan oychchiis: “Intte etappe aadhdhekketii?” Nuuni hegaappe ay tamaariyoo? Yihooway bawu goynniyageeta mehiyappenne doꞌaappe aaruwan xoqqu ootti xeellees. Yaatiyo gishshawu, Yihooway mehiyassinne doꞌaassi koshshiyabaa kunttikko, nuussikka koshshiyabaa kunttanaagaa ammanettana danddayoos! Qoppiya aawaagaadan, Yihoowaykka siiqoy denttettin ba so asawu koshshiyabaa kunttees.—Maz. 145:16; Mat. 6:32.
USUPPUNE 10-16
XOOSSAA QAALAN DEꞌIYA ALꞌꞌOBAA MAZAMURE 147-150
Nuuni Yihoowa Sabbiyo Daro Gaasoti Deꞌoosona
‘Yihoowa Galata!’—Aybissi?
5 Yihooway Israaꞌeela deriyaa kumettaa xalla gidennan, eta ubbaa huuphiyan huuphiyan minttettiis. I ha wodiyankka hegaadan oottees. Mazamuraawee, “Wozanai meqqidoogeeta i pattees; eta mazunttaakka i qachchees” yaagidi Xoossaabaa yootiis. (Maz. 147:3) Ee, Yihooway sahettidaageetussinne unꞌꞌettidaageetussi qoppees. Ha wodiyan, Yihooway nuna minttettanawunne meqqida nu wozanaa pattanawu keehi koyees. (Maz. 34:18; Isi. 57:15) Nu bolli gakkiya ay metuwaakka genccanaadan i aadhida eratettaanne wolqqaa nuussi immees.—Yaaq. 1:5.
6 Hegaappe simmin, he mazamuraawee saluwaa xeellidi Yihoowabaa hagaadan giis: ‘I xoolintteta qoodaa likkiyan wottiis; eta ubbaakka eta sunttan sunttan xeegees.’ (Maz. 147:4) I saluwan deꞌiya meretatubaa yootidoy aybissee? Hagaa qoppa: He mazamuraawee xoolintteta ba ayfiyan xeellana danddayees; shin eta qooday ay keena darokko erenna. eti daro gidiyoogee wodiyaappe wodiyan erettiiddi deꞌees. Nuuni deꞌiyo Milkkiwey gaalakise xallan biilooniyan qoodettiya xoolintteti deꞌiyoogaa eranchati yootoosona. Qassi zawi baynna gaalakiseti deꞌoosona! Xoolintteta qoodana danddayokko! SHin Medhidaagee eta ubbawu sunttaa kessiis. Yihoowa xeelan issi xoolintte haraappe dummatees. (1 Qor. 15:41) Saꞌan deꞌiya asay shin? Xoolintte ubbay awan deꞌiyaakko eriya Xoossay, neeni deꞌiyoosaa, neeyyo siyettiyaabaa, qassi neessi koshshiyaabaa ubbaa loytti erees!
‘Yihoowa Galata!’—Aybissi?
7 Yihooway neeyyo qoppiyoogaa xalla gidennan, qarettidi ne metuwan maaddanawu awu wolqqay deꞌees. (Mazamure 147:5 nabbaba.) Ne hanotay keehi deexxiyaabadan, qassi hegaa genccana danddayennabadan qoppana danddayaasa. Xoossay ‘neeni biitta gidiyoogaa akeekiyo’ gishshawu, oottana danddayennabay deꞌiyoogaa erees. (Maz. 103:14) Nuuni nagarancha gidiyo gishshawu, bala gidida issi issibaa zaari zaaridi oottoos; hegee hidootaa qanxxissana danddayees. Issibaa haasayido, iitabaa amottido woy asabaa qanaatido gishshawu keehi zilꞌꞌettoos! Yihooway hegaadan balabaa oottenna; shin i nubaa loytti erees!—Isi. 40:28.
‘Yihoowa Galata!’—Aybissi?
18 Xoossay beni wode deꞌida ba asaa ay keena nashshidaakko mazamurawee erees. Xoossay ‘ba qaalaa, ba awaajjuwaanne ba pirddaa’ eta xallawu immiis. (Mazamure 147:19, 20 nabbaba.) Ha wodiyan, Xoossaa sunttan xeegettiyay nu xallaa; hegee gita anjjo. Nuuni Yihoowa eriyo gishshawunne a Qaalay nuna kaalettiyo gishshawu, aara keehi dabbotida. Mazamure 147 xaafidaagaadan, neenikka haratikka ‘Yihoowa galatanaadan’ denttettiya daro gaasoti deꞌoosona.
Ayyaanaaban Alꞌꞌobaa
Yihooway Medhdhidobaappe Abaa Loytta Tamaara
6 Yihooway issibay haniyo wodiyaa keerees. Israaꞌeelati layttan layttan Usuppuniyaa wurssettaappe Uddufuniyaa baggaa gakkanaashin shimalaa giyo kafoti eta biittaara kanttidi huuphessa baggawu paallidi biyoogaa beꞌoosona. “SHimalaa giyo kafoti bantta wodiyaa eroosona,” yaagidi Xoossay Israaꞌeelatussi yootiis. (Erm. 8:7) Yihooway he kafoti issisaappe harasaa biyo wodiyaa keeridoogaadan, ba pirddaa polanawu wodiyaa keeriis. Ha wodiyan kafoti issisaappe harasaa paallidi biyoogaa nuuni beꞌiyo wode, hegee Yihooway ha iita alamiyaa xayssanawu ‘keerido wodee’ deꞌiyoogaa nuuni ammanettana danddayiyoogaa hassayissees.—Imb. 2:3.
Haasayaa
Yihooway Yootiyoobaa Siyite
7 Maatiyoosa 17:1-5 nabbaba. Yihooway saluwaappe naaꞌꞌanttuwaa haasayidoy Yesuusi ‘laamettido’ wode. Yesuusi PHeexiroosaara, Yaaqoobaaranne Yohaannisaara issippe gita deriyaa kiyanawu eta shoobbiis. He wode eti keehi maalaalissiya ajjuutaa beꞌidosona. Yesuusa somꞌꞌoy awa ayfiyaadan pooꞌiis; a maayoykka pooꞌuwaadan booxxiis. Muusenne Eelaasa leemiso gidiyaageeti Yesuusi matan hayqqana hayquwaabaanne A dendduwaabaa aara haasayiyoogaa doommidosona. Yesuusi kiittido he heezzu asati ‘xiskkuwan kayrikkonne,’ eti beegottido wode ha maalaalissiya ajjuutaa beꞌidosona. (Luq. 9:29-32) Hegaappe simmin pooꞌiya shaaray yinne eta gentti aggiis, qassi shaaraappe Xoossaa qaalaa siyidosona! Yesuusi xammaqettido wodiyaagaadan, Yihooway ba Naꞌan ufayttiyoogaanne A siiqiyoogaa qonccissiiddi, ‘Hagee taani siiqiyo tana ufayssiya ta Naꞌaa’ yaagiis. Qassi he wode Yihooway gujjidi, “I giyoogaa siyite” yaagiis.
8 He ajjuutay Yesuusi sinttappe Xoossaa Kawotettawu Kawo gididi demmana bonchchuwaanne wolqqaa guuttaa bessiis. Hegee Kiristtoosa gakkana wolqqaama metuwaassinne I keehi waayettidi hayqqana wodiyaassi A minttettidoogee qoncce. Qassikka ha ajjuutay Yesuusi erissiyo ashkkaratu ammanuwaa minttiis. Hegee eti banttana gakkana paaciyawunne oottana koshshiyo wolqqaama oosuwawu giigettanaadan maaddiis. Hasttama gidiya layttappe guyyiyan kiitettida PHeexiroosi Yesuusi laamettido ajjuutaabaa haasayiis, hegee he wodekka ha ajjuutay A qofan qonccidi beettiyoogaa bessees.—2 PHe. 1:16-18.
9 “I giyoogaa siyite.” Nuuni A Naꞌaa qaalaa siyidi azazettanaadan koyiyoogaa Yihooway qonccissiis. Yesuusi saꞌan deꞌiyo wode woygidee? I siyanawu keehi koshshiya darobata haasayiis. Leemisuwawu, mishiraachchuwaa waati sabbakana bessiyaakko I bana kaalliyaageeta siiquwan tamaarissiis, qassi eti naagi uttana mala I zaari zaaridi hassayissiis. (Maa. 24:42; 28:19, 20) Eti I tamaarissidobaa oosuwan peeshshanaadaaninne hidootaa qanxxennaadankka minttidi yootiis. (Luq. 13:24) Yesuusi bana kaalliyaageeti issoy issuwaara siiqettana, issippetettan deꞌananne A azazuwaa naagana koshshiyoogaa yootiis. (Yoh. 15:10, 12, 13) Yesuusi ba erissiyo ashkkarata zorido zoree keehi goꞌꞌiyaagaa! He zoree Yesuusi koyro zorido wodiyaagaadan ha wodiyankka keehi koshshees.
10 Yesuusi, “Tumaa bagga gidiya ooninne taani giyoogaa siyees” yaagiis. (Yoh. 18:37) Nuuni ‘issoy issuwaabaa danddayiyoonne issoy issuwawu atto yaagiyo’ wode A qaalaa siyiyoogaa bessoos. (Qol. 3:13; Luq. 17:3, 4) “Wodee injjetin injjetana xayin” mishiraachchuwaa mishettidi yootiyoogankka A qaalaa siyiiddi deꞌiyoogaa bessoos.—2 Xim. 4:2.
11 Yesuusi, “Ta dorssati ta qaalaa siyoosona” yaagiis. (Yoh. 10:27) Kiristtoosa kaalliyaageeti A qaalaa hayttan siyiyoogaa xalla gidennan, I giidoogadan oottiyoogankka siyiyoogaa bessoosona. Qassi ‘Aqossi hirggiyoogan’ eta qofay shaahettenna. (Luq. 21:34) Ubba eti wolqqaama metoy gakkiyo wodekka, Yesuusi azazidobaa oottiyoogaa bantta deꞌuwan kaseyoosona. Nu ishanttuppenne michchonttuppe daroti nuna ixxiyaageeti gattiyo qohuwaa, ekkiyoobay baynna hiyyeesatettaa, meretay gattiyo daafabaanne hegaa mala wolqqaama metuwan gencciiddi deꞌoosona. Ayba metoy gakkikkokka, eti Yihoowayyo ammanettidi deꞌoosona. Yesuusi, “Ta azazoi a matan de7iyo asi, qassi he azazuwaakka naagiyaagee, i tana siiqiya asa. Tana siiqiya asa ta Aawaikka siiqees” yaagidi eta minttettees.—Yoh. 14:21.
USUPPUNE 17-23
XOOSSAA QAALAN DEꞌIYA ALꞌꞌOBAA LEEMISO 1
Yelagatoo—Intte Ooni Yootiyobaa Siyuteetii?
Neeppe Woytuwaa Aybinne Halissanaadan Oottoppa
16 Neeni yelaga gidikko, nena yelidaageeti nebaa akeekennabadan woy laꞌatettaa diggiyaabadan neeyyo siyettikko shin? Hegee neeni keehi yiillotada, Yihoowawu haggaazanawu koyiyaakkonne siranaadan oottana danddayees. SHin, neeni yiillotada, Yihoowawu haggaaziyoogaa aggikko, Xoossawu yayyiya aawaappenne aayeeppe, qassi gubaaꞌiyaappe haray neessi tumuppe qoppennaagaa neeni akeekana.
17 Ane hagaa qoppa: Nena yelidaageeti nena mule seerana xayikko, eti neessi tumuppe qoppiyoogaa waata eruutee? (Ibr. 12:8) SHin, nena yiilloyiday nena yelidaageeti seerido ogiyaa gidana danddayees. Eti nena seerido ogiyan unꞌꞌettiyoogaappe, hegaadan oottido gaasuwaa akeekanawu mala. Hegaa gishshawu, woppu ga; moorabeennabadan hanoppa. Xoossaa Qaalay, “Amarida qaala haasayiya asi eranchcha; woppa ayyaani de7iyo asikka akeekanchcha” yaagees. (Lee. 17:27) Zoriyaa woppu gi siyidi, zoree imettido ogiyaaban keehi unꞌꞌettennan hegan goꞌettiya kaymida asa gidanawu baaxeta. (Lee. 1:8) Yihoowa wozanappe siiqiya aawaynne aayyiyaa neeyyo deꞌiyoogee gita anjjo. Eti neeni deꞌuwaa woytuwaa ekkanaadan nena maaddanawu wozanappe koyoosona.
w05 2/15 19-20 ¶11-12
Nuuni Kiristtaane Gidiiyogaa Erissiyabaa Naagiyogaa
11 Asaa gidennan Xoossaa ufayssanawu baaxeta. Issi citaa yara gidiyogan nuuni erettanawu koyiyogee wottin deꞌiyaba. Ubba asawukka laggeti koshshoosona; qassi harati nuna nashshiyo wode ufayttoos. Panttatettaa wodiyan woy hegaappe simmin deꞌiya layttatun laggeti iisettiyogee keehi wolqqaama gidiyo gishshawu yelagati harata milatanawu woy eta ufayssanawu koyanaadan oottana danddayees. Shin laggeti ubbatoo nuna iisettiyoy nuussi qoppidi gidennan nuna eti koyiyobaa ootissanaassa. Issi issitoo eti banttanaara iitabaa oottiyageetu xallaara laggetana koyoosona. (Leemiso 1:11-19) Issi Kiristtaanee iita laggeti iisettin eta qofan maayettiyo wode, I Kiristtaane gidiyogaa erissiyabaa genttees. (Mazamure 26:4) Kiitettida Phawuloosi “ha saꞌaa asaa qulliyogaa aggite” giidi zoriis. (Roome 12:2) Alamiya milatanaadan nuna iisettiyogaa xoonanawu maaddiya wolqqaa Yihooway nuussi immees.—Ibraawe 13:6.
12 Alamee iisettiyogee nuuni Kiristtaane gidiyogaa erissiyabaa moorana haniyogaa nu akeekikko, Yihoowassi ammanettiyogee daro asan dosettiyogaappe woy eta milatiyogaappe keehi aadhdhiyogaa hassayana koshshees. Kessaabaa 23:2y maaddiya maaraa yootees. Hagaadan gees: “Iitabaa oottanau daro asaa kaalloppa.” Aara deꞌiya daro Israaꞌeelati Yihooway ba gelido qaalaa polanaagaa sirikkonne Kaaleebi daro asaa bagga gidiyogaa xalatettan ixxiis. I Yihooway ba gelido qaalaa polanaagaa ammanettido gishshawu daro woytuwa demmiis. (Qoodaabaa 13:30; Yaasa 14:6-11) Neenikka hegaadan, daro asay oottanawu dosiyobaa ixxada Xoossaara dabbotido ne dabbotaa naaganawu eeno gay?
Ayyaanaaban Alꞌꞌobaa
w22.10 19 21 ¶6, 11
Aadhdhida Eratettiyaa Xeesawusu
6 Daroti aadhdhida eratettiyaa ‘ogiyan xeesiyoogaa’ siyanawu koyokkona. Geeshsha Maxaafay yootiyoogaadan aadhdhida eratettaa ixxiya heezzu citati deꞌoosona: ‘Akeekay paccidoogeeta,’ ‘qilliicciyaageeta,’ qassi ‘eeyyata.’ (Leemiso 1:22-25 nabbaba.) He asati Xoossaa aadhdhida eratettaa ixxiyoy aybissakko, qassi nuuni waanidi eta mala gidennan aggana danddayiyaakko ane loyttidi beꞌoos.
11Heezzantto citan deꞌiyaageeti aadhdhida eratettaa ixxiya ‘eeyyata.’ Eti Xoossay kessido kandduwaa maaraadan deꞌanawu koyenna gishshawu eeyyata geetettidosona. Eti banttawu loꞌꞌo milatidabaa oottoosona. (Lee. 12:15) Hegaa mala asati aadhdhida eratettawu Pultto gidida Yihoowa ixxoosona. (Maz. 53:1) Nuuni haggaazuwan etaara gayttiyo wode, Geeshsha Maxaafay yootiyo maaraa kaalliyo gishshawu eti nuna darotoo keehi boroosona. SHin eti nuussi kehabaa aybanne oottana danddayokkona. Geeshsha Maxaafay hagaadan gees: “Eeyyai aadhdhida eratettaa akeekanau danddayenna; au yaa7ankka odiyoobi aibinne baawa.” (Lee. 24:7) Eeyya uri zorana danddayiyo loꞌꞌobi aybinne baawa. “Eeyya asappe haakka” giidi Yihooway yootidoy hegaassa!—Lee. 14:7.
USUPPUNE 24–LAAPPUNE 2
XOOSSAA QAALAN DEꞌIYA ALꞌꞌOBAA LEEMISO 2
Buzo Xinaatiya Yeemottidi Xannaꞌana Koshshiyoy Aybisee?
‘Tuman Deꞌa’
16 Nuuppe daroti nabbabanawunne xannaꞌanawu dosokko. SHin tumaa loytti akeekanawu aggennan ‘koyanaadan’ Yihooway nuna minttettees. (Leemiso 2:4-6 nabbaba.) Nuuni yaatiyaaba gidikko ubbatoo goꞌettoos. Koori Geeshsha Maxaafaa nabbabiyoogaara gayttidaagan issi xiqisiyaa xallaa I wudidi xeelliyoogaa yootiis. I hagaadan giis: “Taani tohossa qofata ubbaa nabbabays, geeddarssanawu imettida xiqiseta xeellays, qassi gujjada pilggays. . . . Hegaadan xannaꞌidoogee taani darobaa eranaadan maaddiis!” Nuuni xannaꞌanawu goꞌettiyoy ha hiillaa woy hara hiillaa gidin, nu wodiyaanne wolqqaa goꞌettidi xannaꞌiyoogan tumaa nashshiyoogaa bessoos.—Maz. 1:1-3.
Aadhdhida Eratettiyaa Xeesawusu
3 Aadhdhida eratettay nuuni loꞌꞌobaa kuuyanawu nu eridobaa goꞌettiyoogaa qonccissiyaaba. SHin tumu aadhdhida eratettay hegaappe aadhdhiyaabaa qonccissees. Geeshsha Maxaafay hagaadan gees: “Aadhdhida eratettaassi doomettai GODAASSI yayyiyoogaa; Geeshsha GODAA eriyoogee akeekiyoogaa.” (Lee. 9:10) Yaatiyo gishshawu, nuuni keehi koshshiya issibaa kuuyiyo wode hegaa xeelliyaagan Yihoowa qofay aybakko akeekana koshshees. Nuuni Geeshsha Maxaafaanne nu xuufeta nabbabiyo wode hegaadan oottana danddayoos. Yaatiyo wode, aadhdhida eratettay deꞌiyoogeeta gidiyoogaa bessoos.—Lee. 2:5-7.
4 Nuussi aadhdhida eratettaa immana danddayiyay Yihoowa xalaala. (Roo. 16:27) Aadhdhida eratettay Yihoowappe yees giyoy aybissee? Koyruwan, Yihooway nuna Medhdhidaagaa gidiyo gishshawu, ba medhdhidobaa xeelliyaagan ubbabaa erees. (Maz. 104:24) Naaꞌꞌanttuwan, Yihooway ubbabaa aadhdhida eratettan oottees. (Roo. 11:33) Heezz,anttuwan, Yihooway aadhdhida eratettan zoriyoobay hegaa oosuwan peeshshiyaageeta awudenne maaddees. (Lee. 2:10-12) Nuuni aadhdhida eranchcha gidanawu koyikko, he heezzubata ammanananne nuuni kuuyiyoobaaninne oottiyooban hegeeta kaallanawu eeno gaana koshshees.
Yelagatoo, Intte Ammanuwaa Minttite
2 Neeni Yihoowawu haggaaziya yelaga woy abaa tamaariya ura gidikko, Medhidaagee deꞌiyoogaa ammaniyoogaa aggada daro asay dosiyo lodda laamiyaa timirttiyaa ammananaadan oottiya paacee gakkiyaabadan neeyyo siyettii? Yaanikko, ne ammanoy minnanaadaaninne hegaa minttada deꞌanawu neeni oottana danddayiyoobay deꞌees. Issibay ‘nena naagana’ danddayiya, Xoossay neessi immido adussi qoppiyo imotaa goꞌettiyoogaa. Hegee ne ammanuwaa moorana danddayiya alamiyaa eratettaappe nena naagees.—Leemiso 2:10-12 nabbaba.
3 Tumu ammanuwaa ammaniyoy Xoossaabaa suure eraa eriyoogaana. (1 Xim. 2:4) Hegaa gishshawu, neeni Xoossaa Qaalaanne nu xuufeta xannaꞌiyo wode, dirbboppa. Neeni nabbabiyoobaa ‘akeekanawu’ yuushsha qoppa. (Maa. 13:23) Neeni hegaadan xannaꞌikko, Yihooway nuna Medhidaagaa gidiyoogaanne Geeshsha Maxaafaa immiday a gidiyoogaa bessiya daro naqaashaa demmaasa.—Ibr. 11:1.
Ayyaanaaban Alꞌꞌobaa
Yihoowa Dabbo Gidada Deꞌa
10Neeni Yihoowa dabbo waana gidadii? Geeshsha Maxaafaa xannaꞌiyoogan, neeni Yihoowa loytta eradasa, qassi a dabbo gidadasa. He dabbotay eexxiiddi takkanaadan koyiyo tamaa mala. Tamay eexxiyoogaa aggennaadan mittaa gujjana koshshiyoogaadan, Yihoowaara deꞌiya dabbotaa minttanawu ubbatoo abaa tamaarana koshshees.—Leemiso 2:1-5.
[Tohossa qofaa]
a Rikileeming Konversseeshin giyo maxaafaappe ekettidaagaa.