Kiristtaanetu Deꞌuwanne Haggaazuwa Shiiquwa Xannaꞌiyo Xuufiyan Odettida Xuufeta
© 2025 Watch Tower Bible and Tract Society of Pennsylvania
UDDUFUNE 5-11
XOOSSAA QAALAN DEꞌIYA ALꞌꞌOBAA LEEMISO 12
Minni Oottiyogawu Woytoy Deꞌees
Alꞌꞌo SHuchaappekka Keehi Alꞌꞌiya Xoossaagaa Mala Eeshshaa
Yihoowawu oottiya issoti issoti asatettan banttawu koshshiyaabaa demmanawukka metootana danddayoosona. Eti ammanettenna asa gididi issibaa sohuwaara demmiyoogaappe minnidi oottanawu baaxetoosona. Yaatiyoogan, eti ammanettiyoogaa gujjin, Xoossaagaa mala loꞌꞌo eeshshata aybippenne alꞌꞌobadan xeelliyoogaa bessoosona.—Lee. 12:24; Efi. 4:28.
Minnidi Oottiyogan Ufayttiyogaa
Nuuni oottiyobay harata waati maaddiyakko qoppiyogan nu oottiyoban keehi ufayttoos. Yesuusi, “Immiyogee ekkiyogaappe aaruwan ufayssees” yaagiis. (Oosuwa 20:35) Nuuni minnidi oottiyobay nuna ootissiyageetanne nu siiratu xalla gidennan haratakka maaddees. Hegeetuppe amaridaageeti nu soo asatanne maadoy koshshiyogeeta.
Nu soo asata. Keettaa ayssiya uri ba soo asawu koshshiyabaa kunttanawu minni oottiyo wode, baa giishin naꞌꞌu ogetun eta maaddees. Koyruwan, etawu asatettaaban koshshiyabata, hegeekka miyobaa, maayiyobaanne keettaa giigissees. Yaatiyogan, Xoossay awu immido “ba so asaayyo” koshshiyabaa kunttiyo aawatettaa polees. (1 Ximootiyoosa 5:8) Naaꞌꞌanttuwan, ba soo asawu koshshiyabaa kunttanawu baaxetiya uri minnidi oottiyogaa goꞌꞌaa haratussi leemiso gidiyogan tamaarissees. Kasetiya huuphe yohuwan abay odettido Shaani hagaadan giis: “Ta aaway minni oottiyogan loꞌꞌo leemiso. I ba deꞌo layttaappe dariya baggaa anaaxe gididi oottiis; I minnidi oottiyanne ammanettida asa. Issi asi ba kushiyan harata maaddiyabaa oottiyogee ufayssaa demissiyogaa appe tamaaraas.”
Maadoy koshshiyogeeta. Kiitettida Phawuloosi Kiristtaaneta, ‘minnidi oottite; hegaappe denddidaagan, metootida asassi immiyobay intteyyo deꞌana danddayees’ giidi zoriis. (Efisoona 4:28) Nuuni nuussinne nu soo asawu koshshiyabaa demmanawu minnidi oottiyo wode, metootidaageeta maaddiyobay nuussi deꞌana danddayees. (Leemiso 3:27) Yaaniyo gishshawu, minni oottiyogee immiyogan beettiya gita ufayssaa demissana danddayees.
Ayyaanaaban Alꞌꞌobaa
ijwyp huuphe yohuwa 95 ¶10-11
Taani Metuwa Gencciyanaa?
● Ne metoy aybakko shaakka era. Nena gakkiya gitanne guutta metota shaakkada era. Geeshsha Maxaafay hagaadan gees: “Eeyya uraa hanqqoi sohuwaara erettees; shin cincca asi cashshaa wudenna.” (Leemiso 12:16) Ubba metotakka issi ayfiyan xeellana koshshenna.
“Tamaare keettan, naati banttana gakkiya guutta metotakka keehi xoqqu oottidi xeelloosona. Sooshal miidiyan eta laggeti giyobaa siyiyogee eti yaa hanqqettanaadan oottees; qassi hegee eti bantta metuwa shaakki erennaadan oottees.”—Jaana.
Ne Ammaniyobaa Qonccissiyogaa
Ootti-besuwa. ijwfq huuphe yohuwa 3
Yihoowa Markkati Tumu Haymaanootee Banttaagaa Xallaa Giidi Ammaniyoonaa?
Haymaanootiyaa mintti kaalliya asay A ammanoy Xoossaanne Yesuusa ufayssiyaagaa gidiyoogaa erana koshshees. Hegee xayikko, yaatin ayssi kaalliyoonaa?
Ubba haymaanooteekka atotettaa demissiya ogee giyo qofay Yesuus Kiristtoosa qofa gidenna. Ubba I, “De7uwau efiya penggee un77o; ogeekka xuntta. Qassi hegaara biya asatikka amaridaageeta” yaagiis. (Maatiyoosa 7:14) Yihoowa Markkati he ogiyaa demmidoogaa ammanoosona. Hegee baynnaakko eti hara haymaanootiyaa koyana.
UDDUFUNE 12-18
XOOSSAA QAALAN DEꞌIYA ALꞌꞌOBAA LEEMISO 13
‘Iitatu Xomppiyan’ Cimettoppite
it-2 196 ¶2-3
Xomppiya
Leemiso Hanotan Goꞌettidoogaa. Issi uri ba deꞌuwan ba ogiya pooꞌissanawu goꞌettiyobay xomppiyan leemisettees. Leemiso Maxaafay xillotanne iitata hegaadan geeddarissees: “Xillotussi ubbatoo poo7o; shin iitatu xomppee to7ana.” (Lee 13:9) Xillotu pooꞌoy gujji gujji pooꞌees; shin iitatu xomppee loyttidi pooꞌiyabanne eti dure milatiyaba gidikkonne, Xoossaa xeelan eta wurssettay xuma; qassi eta tohoy xubettiyogee attenna. Ba aawanne ba aayyiyo cayiya ura hegaa malabay gakkees.—Lee 20:20.
Qassikka, issi ura ‘xomppee toꞌees’ giyogee ayyo hidooti baawa giyogaa. Hara leemisoy hagaadan gees: “Iita urau sinttaara yaana kehi baawa; iitatu xomppeekka to7ana.”—Lee 24:20.
w12 7/15 12 ¶3
Laꞌatettaa Xoossaayyo Ootta
3 Seexaanay naaꞌꞌu polo asatinne daro kiitanchati Xoossaa haaruwaa bolli makkalanaadan denttettana danddayikko, nunakka balettana danddayees. A hiillay haꞌꞌikka he wodeegaa mala. I Xoossay kessido maaray deexxiyaabadaaninne nuna ufayssa diggiyaabadan qoppanaadan oottidi nuna balettanau malees. (1 Yoh. 5:3) Nuuni hegaadan qoppiya asaara daro wodiyaa aattiyaaba gidikko, etaagaadan qoppiyoogaa doommana danddayoos. Haꞌꞌi iyyo layttay 24 gidido issi michiyaa, “Ta laggetuugaappe dumma ogiyan qoppanau yayyido gishshau, iita laggetettay tana keehi qohiis” yaagaasu. Hegaappe denddidaagan a shori baynna asho gaytotettaa polaasu. Laggetu woyganddee nenakka hegaadan qohennan aggenna.
“Cincca Asai Ubbai Eran Oottees”
Ubbabaa tumu eran oottiya cinccanne bali baynna asi anjjettana. Solomoni hagaadan giis: “Xilloi a uloi kallana gakkanaassi mees; shin nagaranchchai namisettees.” (Leemiso 13:25) Nu deꞌo macara ubban, hegeekka nu soo asaara, haratuura deꞌiya dabbotaara, nu haggaazuwara gayttidaagan, woykko nuussi seeray imettiyo wode nuuyyo loꞌꞌobay aybakko Yihooway erees. Yaaniyo gishshawu Geeshsha Maxaafaa zoriya nuuni akeekan oosuwan peeshshikko, nu deꞌoy ufayssiyagaa gidanaagee qoncce.
Ayyaanaaban Alꞌꞌobaa
“Kiristtoosi Attumaasa Ubbaayyo Huuphe”
Nu tamaariyoobaa. So asawu huuphe gidida uri ubbabaa siiqoy denttettin oottana bessees. Hegee keehi koshshiyoy aybissee? Hegaa zaaruwaa kiitettida Yohaannisi hagaadan giis: “Be7ido ba ishaa [woy so asaa] siiqennaagee be7ibeenna Xoossaa siiqanau waani danddayii?” (1 Yoh. 4:11, 20) Ba so asaa siiqiyaanne Yihoowanne Yesuusa milatanawu koyiya azinay, ba so asay Yihoowaara dabbotaa minttanaadaaninne woppu gaanaadan oottana; qassi etawu asatettan koshshiyaabaa kunttana. (1 Xim. 5:8) I ba naata tamaarissananne seerana. Hegaa bollikka, I ubbatoo Yihoowa bonchchissiyaabaanne ba so asaa goꞌꞌiyaabaa kuuyana.
Haasayaa
lmd gujo qofaa A, qofaa 9
Banttana yelidaageeta bonchchiyanne etawu azazettiya naatussi ushachchana.—Lee. 1:8, 9; Efi. 6:1-3.
UDDUFUNE 19-25
XOOSSAA QAALAN DEꞌIYA ALꞌꞌOBAA LEEMISO 14
Daafabay Gakkiyo Wode Waatanaakko Loytti Qoppite
Xoossay Immido Deꞌuwaa Imotaa Nashsha
10 Issi issitoo iitabay gakkennaadan nuuni teqqana danddayokko. Meretay gattiyo daafabay, ubbasaa gakkiya harggeenne olay nuna qohana danddayees. Gidikkonne, hegaa malabati nuna gakkiyo wode, nuussi danddayettida keenan nuna qohoy gakkennaadan baaxetana, qassi heeraappe kiyidi baanaadan nuussi odettiyaabatanne kawotettati nuussi yootiyo hara kaaletota azazettiyoogan qohuwaappe attana danddayoos. (Roo. 13:1, 5-7) Qohiyaabati qoppennan nuna gakkana danddayiyo gishshawu, daafabawu kasetidi giigettanaadan nuna maaddanawu kawotettati nuussi immiyo kaaletuwaa nuuni azazettana koshshees. Leemisuwawu, haattaa, moorettana danddayenna qumaa, qassi akkamuwan koyro maaduwawu koshshiyaabata giigissiyoogee maaddana danddayees.
11 Asappe asaa oyqqiya harggee nuuni deꞌiyo heeran aakkikko waatana koshshii? Nu kushiyaa meecettiyoogaa, asaakko matattennaagaa, maskkiyaa wottiyoogaanne asaappe shaahettidi deꞌiyoogaa mala, kawotettaa sunttati yootiyo kaaletota nuuni azazettana koshshees. Nuuni hegaadan oottiyo wode, Xoossay immido deꞌuwaa imotaa keehi nashshiyoogaa bessoos.
12 Qoppibeennabay merettiyo wode nu laggetuppe woy nu shoorotuppe woy oduwaappe tuma gidennabaa issi issitoo siyana danddayoos. Nuuni siyido “ubbabaa” ammaniyoogaa aggidi, kawotettatinne dottoreti yootiyo tuma gididabaa siyana koshshees. (Leemiso 14:15 nabbaba.) Oosuwaa Kaalettiya Citaynne macara biiroti gubaaꞌe shiiquwaanne sabbakiyo oosuwaara gayttidaagan kaaletuwaa yootanaappe kasetidi tuma gididabaa eranawu baaxetoosona. (Ibr. 13:17) Ha kaaletota kaalliyoogan nunakka haratakka qohuwaappe naagoos. Qassi harati Yihoowa Markkatubaa loꞌꞌobaa qoppanaadan maaddana danddayoos.—1 PHe. 2:12.
Xaadooqadan Xala Gida
11 Nu ishantti hirggissiya hanotan deꞌiyo wodenne etawu maadoy koshshiyo wode nuuni Xaadooqadan waani xala gidana danddayiyoo? (1) Kaaletuwa kaalla. Hegaa mala iita wodetun issippetettan deꞌanawu azazettiyogee keehi koshshiyaba. Macara biiroy immiyo kaaletuwa kaalla. (Ibr. 13:17) Daafabawu waani giigettanaakko, qassi daafabay gakkiyo wode waatanaakko yootiya kaaletota cimati ubbatoo zaarettana koshshees. (1 Qor. 14:33, 40) (2) Xala gidana koshshikkonne akeekanchcha gida. (Lee. 22:3) Issibaa oottanaappe kasetada qoppa. Danddayettido keena ubban nena qohoy gakkennaadan naagetta. (3) Yihoowan ammanetta. Yihooway neenikka ne ishanttikka qohettennaadan koyiyogaa hassaya. Ne ishantti qohettennaadan neeni oottiyoban Yihooway nena maaddana.
Ayyaanaaban Alꞌꞌobaa
Loꞌꞌobaa Waata Kuuyana Danddayay?
Geeshsha Maxaafay, “Cinccai akeekidi tanggees” yaagees. (Leemiso 14:15) Hegaa giyoogee nuuni issibaa kuuyanaappe kase dumma dummabaa takki giidi qoppana koshshees giyoogaa. Hegeeta ubbaa yiggiyo wode nena hagaadan oychcha: ‘Geeshsha Maxaafay hegawu maaddiya ayba maarata yootii? Tawu woppaa demissanay awugee? Ta kuuyiyoobay harata maaddaneeyye qohanee? Ubbaappe aaruwan, hegan Yihooway ufayttanee?’—Zaarettido Wogaa 32:29.
UDDUFUNE 26–TAMME 1
XOOSSAA QAALAN DEꞌIYA ALꞌꞌOBAA LEEMISO 15
Harati Ufayttanaadan Maaddite
Imattaa Mokkiyoogaa—Ufayssiyaabanne Keehi Koshshiyaaba!
15 Nena ne xeelliyo ogiyaa: Neeni imattanawu koyikkonne hegaa danddayennabadan qoppa eray? Issoti issoti dungguuxa gidiyo gishshawu, imattati boorasana giidi qoppana danddayoosona. Harati qassi banttawu deꞌiyaabay guutta gidiyo gishshawu, gubaaꞌiyan deꞌiya haratuugaadan mokkana danddayennabadan qoppoosona. Issi keettawu koshshiya waannabay he keettay mankkatidaagaa, geeshshanne ufayssiyaagaa gidiyoogaappe attin, a allꞌꞌotettaa gidennaagaa hassaya.
16 Neeni imattanawu hirggiya asee? Haratikka neegaadan hirggoosona. Birttaaniyan deꞌiya issi cimay hagaadan giis: “Imattanawu giigettiyo wode guuttaa yashshana danddayees. SHin, Yihoowawu oottiyo hara ubbabaagaadan, demmiyo anjjoynne ufayssay yashshaa dogissiyaaba. Imattatuura uttidi tukkiyaa uyiiddi haasayiyoogee tana keehi ufayssees.” Imattati koyiyoobaa qoppiyoogee ubbatoo maaddiyoogaa hassaya. (Pili. 2:4) Daroti bantta deꞌuwan hanidabaa haratuyyo yootiyoogan ufayttoosona. Nuuni issippe gayttiyo wodee eta deꞌuwan hanidabaa siyanawu keehi loꞌꞌo wode. Hara cimay qassi hagaadan giis: “Gubaaꞌiyan deꞌiya ishantta ta soo shoobbiyoogee eta, ubba qassi eti tumaa waati siyidaakko loytta eranaadaaninne eta qofaa akeekanaadan tana maaddees.” Siiqiyoogeenne haratussi qoppiyoogee keehi ufayssiya wodiyaa aattanaadan maaddees.
17 Dumma dumma tiꞌokiraase timirtte keettatun tamaariyaageeta mokkida issi aqinyaa hagaadan gaasu: “Ta keettay keehi guutta, qassi so giddo miishshaykka galꞌꞌaa shammidoogaa gidiyo gishshawu koyro tana qofissiis. Issi asttamaariyaa machchiyaa tana woppissaasu. He michchiyaa anne I azinay woradaa oosuwan keehi ufayssiya wodiyaa aattiyoy aqoy darana xayikkonne etaagaadan Yihoowawu oottiyoogaanne sima deꞌuwaa deꞌiyoogaa sinttayiya uraara takkiyo wodiyaa gidiyoogaa tawu yootaasu. Hegee ta aayyiyaa nuuni naatettan deꞌiyo wode darotoo, ‘Siiqoi de7iyoosan santtaa miyoogee keha’ yaagiyoogaa tana hassayisees.” (Lee. 15:17) Imattanaadan siiqoy nena denttettana bessees; qassi neeni hirggana koshshenna.
Awudeegaappenne Aaruwan Issoy Issuwaa Minttettite
16 Nuuni hara asaara darin haasayenna gishshawu harata minttettana danddayokko gi qoppikko hegee bala. Minttettanawu darobaa oottana koshshenna; issi uraa sarotiyo wode pashkki giyoogaa xallay gidana danddayees. He uri neeyyo pashkki gaana xayikko, hegee metoy deꞌiyoogaa bessiyaaba gidana danddayees; qassi I yootiyoobaa hara uri siyiyoogaa xallay A minttettana danddayees.—Yaaq. 1:19.
17 Oneri giyo issi yelaga ishay, harati bonchchiyo gubaaꞌe cima gidida A aawaa gujjin, ayyo mata dabboti tumaa aggido wode I keehi unꞌꞌettiis. Woradaa xomoosiya issi ishay Onera shaye keettan tukkiyaa shoobbidi I bawu siyettiyaabaa yootanaadan oottin, Oneri minettiis. Oneri bantta soo asay tumaakko simmanaadan I maaddana danddayiyo issi ogee ammanettidi deꞌiyoogaa xalla gidiyoogaa akeekiis. I Mazamure 46; Sofonaasa 3:17; qassi Marqqoosa 10:29, 30 nabbabidi keehi minettiis.
18 Martinne Onera hanotay minttettoy koshshiyo ishanttanne michchontta nuuni minttettana danddayiyoogaa bessees. Kawuwaa Solomoni hagaadan giis: “Haasayaa likke wodiyan haasayiyoogee aiba lo77obee! Pashkkidi xeelliyo xeelai wozanaa ufaissees; mishiraachcho odoikka bollaa pattees.” (Lee. 15:23, 30) Hegaa bollikka, Wochiyo Keelaappe woy nu weybsaytiyaappe nabbabiyoogee azzanida uraa minttettana danddayees. Kawotettaa mazamuriyaa issippe yexxiyoogee minttettana danddayiyoogaa PHawuloosi yootiis. I hagaadan giis: “Issoi issuwaa tamaarissitenne zorite; intte wozanan Xoossaa galatiiddi, xalotiyaanne mazamuriyaa, Xoossaa sunttaa xoqqu oottiya yettaa yexxite.”—Qol. 3:16; Oos. 16:25.
Ayyaanaaban Alꞌꞌobaa
ijwbq huuphe yohuwa 39 ¶3
Kiristtaaneti Akkamettiyoonaa?
2. Issi akkamuwaara gayttidaagan kuuyanaappe kase hara dottoreta zoriyaa oychchana danddayiyaanaa? Ne hanotay hirggissiyaaba gidikko “daro zoriyaageeti” yootiyoobay maaddana danddayees.—Leemiso 15:22.
TAMME 2-8
XOOSSAA QAALAN DEꞌIYA ALꞌꞌOBAA LEEMISO 16
Loꞌꞌobaa Kuuyanawu Maaddiya Heezzu Oyshata
Yelagatettan Loꞌꞌobaa Dooriyoogaa
11 Yihoowayyo haggaaziyoogee nuna aybippenne aaruwan ufayssiyaaba. (Lee. 16:20) Ermmaasa xaafee Baaruki hegaa dogennan waayi aggana. Issi wode, i Yihoowau haggaaziyoogan ufayttiyoogaa aggiis. Yihooway assi hagaadan giis: “Neeni neeyyo gitabaa koyaiyye? Hegaa koyoppa. Aissi giikko, asaa ubbaa bollan taani iitabaa ehaana. . . . SHin neeni biidosan ubban taani nena haiquwaappe ashshana.” (Erm. 45:3, 5) Baaruki ufayttanaadan oottanabay aybee? A ufayssanay gitabaa koyiyoogeeyye Xoossau ammanettidi haggaaziyoogan Yerusalaamee xayiyo wode attiyoogee?—Yaaq. 1:12.
12 Ramiro giyo ishay haratussi oottiyoogan ufayssaa demmidaageetuppe issuwaa. I hagaadan giis: “Taani Andiis giyo Deriyaa heeran diccaas; nu soo asay hiyyeesa. Hegaa gishshau, ta bayra ishay taani yuniversttiyan tamaarana mala miishsha qanxxanaagaa yootiis; hegee keehi gitaba. SHin taani mata wode xammaqettada Yihoowa Markka gidaas; qassi issi aqinyee taani aara issi guutta kataman haggaazanaadan shoobbiis. Taani yaa baas; yaatada huuphiyaa qanxxiyoogaa tamaarada, tau koshshiyaabaa kunttanau huuphe keettaa dooyaas. Nuuni asay Geeshsha Maxaafaa tamaaranaadan shoobbin daroti ufayttidi siyidosona. Guyyeppe, taani he heeraa asay haasayiyo qaalaa goꞌettiya mati eqqida gubaaꞌiyaa baas. Taani kumetta wodiyaa haggaaziyoogaa doommoosappe tammu laytta gidiis. Asay ba qaalan mishiraachuwaa tamaaranaadan maaddiyoogaa keenaa tana ufayssana danddayiya hara oosoy baa.”
Laamettadii?
NUUNI ubbay nu diccido hanotaadaaninne nu heeraadan, hegeekka nu laggetuugaadan, nu wogaadaaninne nu heeraa asaagaadan hanoosinne oottoos. Nuuni dosiyo qumay, maayiyoobaynne haniyoobay nu wogaadaana gididoy hegaassa.
2 SHin, nuuni maanaunne maayanau dooriyoobaappe aaruwan keehi koshshiyaabati deꞌoosona. Leemisuwau, nuuni issi issibaa likke woy suure gididabadan, qassi harabaa iitabadan woy suure gidennabadan tamaariiddi diccida. SHin, likke gididabaanne likke gidennabaa xeelliyaagan asau dumma dumma qofay deꞌees. Nuuni ubba nu zoriyaa wozanay denttettin issi issibaa doorana danddayoos. “Aihuda gidenna asau higgee baawa; shin [eti darotoo] banttana zoriya wozanan higgee azaziyoogaa” oottiyoogaa Geeshsha Maxaafay yootees. (Roo. 2:14) SHin, hegaadan giyoogee Xoossay qoncce higgiyaa immibeennaba gidikko, nuuni tamaariiddi diccido, qassi nu heeran meeze gidida wogaa kaallana danddayoos giyoogee?
3 Baa giishin naaꞌꞌubaa gaasuwan Kiristtaaneti hegaadan oottokkona. Koyruwan, Geeshsha Maxaafay, “Asaassi suure milatiya ogee de7ees; shin wurssettan haiquwau gattees” yaagees. (Lee. 16:25) Nuuni nagarancha gidiyo gishshau, nu hemetaa muleera suurissanau tumuppe maaddiyaabay aybakko loytti erana danddayokko. (Lee. 28:26; Erm. 10:23) Naaꞌꞌanttuwan, alamiyan meezenne woga gididabaa asay kaallanaadan oottiyay ‘ha saꞌaa xoossaa’ Seexaanaa gidiyoogaa Geeshsha Maxaafay yootees. (2 Qor. 4:4; 1 Yoh. 5:19) Hegaa gishshau, nuuni Yihoowan nashettanaunne a anjjuwaa demmanau koyikko, Roome 12:2n (Nabbaba.) deꞌiya zoriyaa oosuwan peeshshana koshshees.
Ayyaanaaban Alꞌꞌobaa
Cima Ishanttanne Michchontta Nashsha
1 ALMAAZE giyo alꞌꞌo shuchchaa massidi giigissana xayikko, phoolenna woy xeellanawu loꞌꞌenna. Yaatiyo gishshawu, issi uri giigibeenna almaaziyaa beꞌiyaakko, I beꞌiyoobay aybakko akeekennan aggananne he alꞌꞌobaa yedhdhi kanttana danddayees.
2 Cimida ishanttinne michchontti he almaazetudan keehi alꞌꞌo. Xoossaa Qaalay cimidaageetu puuluntta kallachchan leemisees. (Leemiso 16:31 nabbaba; 20:29) Gidoppe attin, he alꞌꞌobaa nuuni akeekennan aggana danddayoos. Yelagati cimidaageeti alꞌꞌo gidiyoogaa akeekiyo wode, duretettaappe keehi aadhdhiya alꞌꞌobaa demmoosona. Ha huuphe yohuwan heezzu oyshatu zaaruwaa beꞌana: Yihooway ammanettida cima ishanttanne michchontta alꞌꞌobadan xeelliyoy aybissee? Cimida ishanttinne michchontti Yihoowa dirijjitiyawu keehi koshshiyoy aybissee? Nuuni eti oottidobaappe tamaaranawu waatana danddayiyoo?
Haasayaa
ijwbv huuphe yohuwa 40—Cuccumaa: Leemiso 16:3 Birshshettay Aybee?
Leemiso 16:3—“Ne Oottiyoobaa Ubbaa Hadaraa GODAAYYO Imma”
“Ne oottiyo ubbabaa Yihoowayyo hadaraa imma; yaatikko ne halchchidobay polettana.”—Leemiso 16:3, Ooratta Alamiya Birshshettaa.
“Ne oottiyoobaa ubbaa hadaraa GODAAYYO imma; yaatikko, neeni halchchidobai polettana.”—Leemiso 16:3, Wolayttatto Geeshsha Maxaafaa.
Leemiso 16:3 Birshshettaa
Tumu Xoossawu goynniyageeti A kaaletuwa koyiyogaaninne hegaa kaalliyogan Yihoowan ammanettikko, eti halchchidobay polettanaagaa ha leemisoy boxooxissees.
“Ne oottiyo ubbabaa Yihoowayyo hadaraa imma.” Yihoowawua goynniyageeti, issibaa kuuyanaappe kase, ashkketettan appe kaaletuwa koyoosona. (Yaaqooba 1:5) Aybissi? Hegawu issi gaasoy, asay darotoo ba deꞌuwan gakkiya iitabaa teqqana danddayenna gishshataassa. (Eranchchaa 9:11; Yaaqooba 4:13-15) Hegaa bollikka, eti bantta halchchidobaa polanawu etawu eray paccana danddayees. Hegaa gishshawu, eranchcha gidida daroti bantta oottiyobaa hadaraa Xoossawu immiyogan loꞌꞌobaa kuuyoosona. Eti kaaletuwa demmanawu akko woossiyogaaninne A Qaalan Geeshsha Maxaafan qonccida Yihoowa sheniyara maayettiya ogiyan ubbabaa oottiyogan yaatana danddayoosona.—Leemiso 3:5, 6; 2 Ximootiyosa 3:16, 17.
“Ne oottiyobaa ubbaa hadaraa GODAAYYOb imma,” giyogee sittan “ne oottiyobaa GODAAYYO aattada imma” giyogaa. Issi qonccissiya xuufee yootiyogaadan ha qofay “deexo toohuwa wottidi baappe minniyanne tookkana danddayiya urawu ba toohuwa immiya izaawa” bessees. Xoossan ammanettiya ashkke asati, I banttana maaddanaagaanne zemppissanaagaa sirokkona.—Mazamure 37:5; 55:22.
“Ne oottiyobaa ubbaa” giyogee, asay halchchiyo ubbaban Xoossay ufayttees, woy hegaa I anjjees giyogaa gidenna. Eti Yihoowa anjjuwa demmana koyikko, eti halchchiyobati Yihooway kessido maaratuuranne A sheniyara maayettana bessees. (Mazamure 127:1; 1 Yohaannisa 5:14) A sheniyara maayettenna halchchuwa Xoossay anjjenna. Yihooway “iitatu [halchchuwa] halissees.” (Mazamure 146:9) Hara baggaara qassi, I ba Qaalaa Geeshsha Maxaafaa baggaara immido maarata bonchchiyogan awu haarettiyageeta Yihooway maaddees.—Mazamure 37:23.
“Ne halchchidobay polettana.” Ha qofaa issi issi birshshettati “ne halchchidobay minnana” goosona. Inggilizettuwan “minnana” geetettidi birshshettida qaalay asay Galꞌꞌa Maachchaa giyo Ibraawetto Geeshsha Maxaafan darotoo, baasuwa baasiyogaanne Xoossay medhdhidobati minni eqqidoogaa qonccissees. (Leemiso 3:19; Ermmaasa 10:12) Hegaadankka, Xoossaa sinttan suurebaa oottiyageetu halchchoy minnanaadan I oottees; qassi woppu giidi ufayssiya deꞌuwa eti deꞌanaadan maaddees.—Mazamure 20:4; Leemiso 12:3.
Leemiso 16:3 Yuushuwan Deꞌiya Qofaa
Ha leemisuwa, Leemiso maxaafaappe dariya baggaa xaafida Kawuwa Solomoni xaafiis. Xoossay awu aadhdhida eratettaa immido gishshawu Solomoni shaꞌan qoodettiya leemisota haasayiis.—1 Kawota 4:29, 32; 10:23, 24.
Shemppo 16 doomettan, Solomoni Xoossaa aadhdhida eratettaa sabbiis; qassi otorettiyageeta I keehi ixxiyogaa yootiis. (Leemiso 16:1-5) Yaatidi he shemppoy, Leemiso maxaafay zaari zaaridi yootiyo issi tumaa nabbabiya uri akeekanaadan maaddees: Asaa naati tumu eranchcha gidanawunne etawu injjetanaadan koyikko, Xoossay eta kaalettanaadan ashkketettan eeno gaana bessees. (Leemiso 16:3, 6-8, 18-23) He keehi koshshiya tumay Geeshsha Maxaafan zaari zaaridi odettiis.—Mazamure 1:1-3; Isiyaasa 26:3; Ermmaasa 17:7, 8; 1 Yohaannisa 3:22.
Leemiso maxaafan deꞌiya qofaa akeekanawu ha qantta biiduwa beꞌa.
Xannaꞌanawu giigida Ooratta Alamiya Geeshsha Maxaafaa Birshshettan Leemiso 16 nabbaba. Ha nabbabanawu metenna Geeshsha Maxaafan, cenggurssan duuqettidabay, qonccissiya qofay, geeddarssiyo qofay, misileti, biidotinne karttati deꞌoosona.
TAMME 9-15
XOOSSAA QAALAN DEꞌIYA ALꞌꞌOBAA LEEMISO 17
Intte Aqo Deꞌuwan Sarotettan Deꞌite
g 9/14 11 ¶2
Lancciya Aggiyogaa
Tumatettan nena qora. Issi issi asati ‘hanqqettiyogaanne elle yillotiyogaa’ Geeshsha Maxaafay yootees. (Leemiso 29:22) Neenikka hegaa mala aseeshsha? Yaatikko nena hagaadan oychcha: ‘Taani hanqquwan suulliyanaa? Taani eesuwan yillotiyanaa? Taani guuttabankka elle hanqqettiyanaa?’ Geeshsha Maxaafay hagaadan gees: “Yoho zaari zaaridi woociya urai, ammanettiya laggeta shaakkees.” (Leemiso 17:9; Eranchchaa 7:9) Hegaa malabay aqo deꞌuwankka merettana danddayees. Neeyyo elle hanqqettiyo eeshshay deꞌikko nena hagaadan oychcha, ‘Ta aqo laggiyassi kasegaappe aaruwan waana danddayanchcha gidoo?’—Geeshsha Maxaafaa maaraa: 1 Pheexiroosa 4:8.
w08 5/1 10 ¶6–11 ¶1
Metuwa Pagaliyogaa
1. Merettida metuwabaa haasayanawu wodiya bazzite. “Ubbabau wodee de7ees;. . . Co77u gaanau wodee de7ees; qassi haasayanaukka wodee de7ees.” (Eranchchaa 3:1, 7.) Aqo deꞌuwan merettiya issi issi metoti keehi hanqqettanaadan oottana danddayoosona. Hegaa malabay merettikko, bana naagidi “co77u” giyogee hanqquwan suullennaadan oottana danddayees. “Ooshshai doommiiddi, zeeruwaa xuussiya haattaa mala; hegaa gishshau, ooshshaappe kasetada palamaa aggaaga” giya Geeshsha Maxaafaa zoriya oosuwan peeshshiyogan intte dabbotay moorettennaadan oottana danddayeeta.—Leemiso 17:14.
Shin, “haasayanaukka wodee de7ees.” Metoy sharafaa mala; aggiigikko darana danddayees. Yaaniyo gishshawu, issi metoy bawu giigana giidi coo aggiigoppite. Metoy meretto sohuwara haasayanawu intteyyo injjetennaba gidikko, hegaabaa daro takkennan tobbanawu keeriyogan intte aqo laggiya bonchchiyogaa bessite. Hegaadan keeriyogee “intte hanqqetti uttidaashin, awai wulloppo” giya Geeshsha Maxaafaa zoriya oosuwan peeshshanaadan inttena maaddana danddayees. (Efisoona 4:26) Qassi intte giidobaa oosuwan peeshshana koshshees.
Ayyaanaaban Alꞌꞌobaa
Xoossawu Yayyiyoogan Ubbatoo Goꞌetta
Nu leemiso wozanaa naagana koshshiyo waanna gaasoy Yihooway nu wozanaa qoriyoogaa. Hegaa giyoogee harati nubaa akeekana danddayiyoogaappe aaruwan I nuna beꞌeesinne nuuni tumuppe ay mala asakko erees giyoogaa. (Leemiso 17:3 nabbaba.) Merinaa deꞌuwaa demmanaadan maaddana danddayiya ha zoriyaa nuuni ubbatoo loytti qoppikko, I nuna siiqana. (Yoh. 4:14) Nuuni yaatiyo wode, iita kandduwan, Seexaanay aassiyo wordduwaaninne ha alamiyan deꞌiya iita asatun mule qohettokko. (1 Yoh. 5:18, 19) Nuuni kaseegaappe aaruwan Yihoowakko shiiqiyo wode nuuni A loytti siiqananne bonchchana. Nuuni nu Aawaa azzanttanawu koyenna gishshawu, nagaraa oottanaadan denttettiya qofaa eqettoos. Nuuni iitabaa oottanawu paacettiyo wode nuna hagaadan oychchana danddayoos, ‘Tana keehi siiqiya Yihoowa aybissi azzanttiyaanaa?’—1 Yoh. 4:9, 10.
Haasayaa
ijwbv huuphe yohuwa 60—Cuccumaa: Leemiso 17:17 Birshshettay Aybee?
Leemiso 17:17—“Laggee Mule Wodekka Siiqees”
“Tumu laggee mule wodekka siiqees; qassi meto wodiyawu yelettiya isha.”—Leemiso 17:17, Ooratta Alamiya Birshshettaa.
“Laggee mule wodekka siiqees; ishaikka metuwaa wode maaddanaassi yelettees.”—Leemiso 17:17, Wolayttatto Geeshsha Maxaafaa.
Leemiso 17:17 Birshshettaa
Tumu laggeti ammanettiyageeta. Keehi siiqettiya ishanttudan, tumu laggeti meto wodiyan issoy issuwawu ammanettoosonanne qoppoosona.
“Tumu laggee mule wodekka siiqees.” Ha qofay “laggeti mule wodekka issoy issuwa siiqoosona” geetettidikka birshshettana danddayees. Ha sohuwan “siiquwa” geetettida Ibraawetto qaalay, issi ura xeelliyagan nuussi siyettiyabaa xalaalaa yootiyaba gidenna. Hegee issi uri ba goꞌꞌaa aggi bayidi hara urawu oottiyoban bessiyo siiqo. (1 Qoronttoosa 13:4-7) Hegaadan mintti siiqettiya laggeti eta siiqoy paacettiyo wodekka, geella issoy issuwara ooyettiyo wode woy deꞌuwan unꞌꞌettanaadan oottiya metoy eta gakkiyo wode ammanettidi deꞌoosona. Issoy issuwawu coo atto goosona. (Leemiso 10:12) Loꞌꞌo laggee ba laggiyawu ushachchiyo wode qanaatenna. Yaatiyogaappe, I ba laggiyara ufayttees.—Roome 12:15.
“Tumu laggee . . . meto wodiyawu yelettiya isha.” Ha leemisoy ishantti issoy issuwa keehi siiqana danddayiyogaa yootees. Yaaniyo gishshawu, metoy gakkiyo laggiya maaddanawu nuussi danddayettida ubbabaa oottikko, tumu ishay woy michchiya oottiyobaa oottoos giyogaa. Hegaa bollikka, hegaadan siiqettiya laggetu siiqoy paaciya gaasuwan irxxenna. Yaaniyogaappe, eti kaseegaappe aaruwan issoy issuwa siiqoosonanne bonchchoosona.
Leemiso 17:17 Yuushuwan Deꞌiya Qofaa
Leemiso maxaafan, nabbabiya asi takki giidi qoppanaadan oottiya, aadhdhida eratettay deꞌiyo daro qantta qofati deꞌoosona. Ha maxaafaappe dariya baggaa Kawuwa Solomoni xaafiis. I hegaa Ibraawettuwan danttuwa xaafiyo hiillan xaafiis; qassi issi mala woy issoy haraappe dummatiya geeddarssota goꞌettiis. Dantto meran xaafettiya issi mala geeddarssuwa Leemiso 17:17n akeekana danddayoos; qassi ha xiqisiyawu naaꞌꞌantto qofay koyroogaa minttees. Shin Leemiso 18:24n issoy haraappe dummatiya geeddarssoy deꞌees. “Daro laggee de7iyo asi xayana; shin ishappe aadhdhidi ammanttiya laggee de7ees.”
Solomoni Leemiso 17:17 xaafiyo wode, ba aawaa Daawitanne Kawuwa Saaꞌoola naꞌaa Yonaataanaara deꞌiya keehi mino laggetettaa qoppennan waayi aggana. (1 Sameela 13:16; 18:1; 19:1-3; 20:30-34, 41, 42; 23:16-18) Daawitinne Yonaataani tumu ishantta gidana xayikkonne, ishanttuppe aaruwa mintti siiqettidosona. Yonaataani ba yelaga laggiya ashshanawu ba shemppuwa daafan yeggiis.c
Leemiso maxaafaa erissiya ha qantta biiduwa beꞌa.
Xannaꞌanawu giigida Ooratta Alamiya Geeshsha Maxaafaa Birshshettan Leemiso shemppo 17 nabbaba. Ha nabbabanawu metenna Geeshsha Maxaafan, cenggurssan duuqettidabay, qonccissiya qofay, geeddarssiyo qofay, misileti biidotinne karttati deꞌoosona.
TAMME 16-22
XOOSSAA QAALAN DEꞌIYA ALꞌꞌOBAA LEEMISO 18
Sahettiyageeta Minttettiyabaa Haasayite
Aadhdhida Eratettiyaa Xeesawusu
17 Haasayanaappe kasetada qoppa. Nuuni naagettana xayikko, haasayiyooban harata keehi qohana danddayoos. Geeshsha Maxaafay hagaadan gees: “Akeekennan haasayiyo haasayai cu[b]edan caddees; shin aadhdhida eranchchaa inxxarssai pattees.” (Lee. 12:18) Haratu balaa denttidi haasayiyoogaappe naagettiyoogan sarotettay deꞌanaadan oottana danddayoos. (Lee. 20:19) Nu haasayiyoobay asaa qohiyaaba gidennan minttettiyaaba gidanaadan koyikko, nuuni Xoossaa Qaalaa nabbabananne hegaa wotti dentti qoppana koshshees. (Luq. 6:45) Geeshsha Maxaafay yootiyoobaa nuuni wotti dentti qoppiyo wode, nu haasayiyoobay harata minttettiya “aadhdhida eratettaa [pulttuwaa] mala” gidana.—Lee. 18:4.
mrt huuphe yohuwa 19 saaxiniya
Issi Uri Qoppennan Sahettiyo Wode Waatana Danddayiyoo?
Loytta ezgga. Neeni ne laggiya maaddana danddayiyo keehi loꞌꞌo ogee I haasayiyo wode ezggiyogaa. I haasayiyo ubbabawu zaaro immana bessiyabadan qoppoppa. Darotoo loytti ezggiyogaa xallay gidees. I haasayiyo ubbabaa siroppa; qassi A boroppa. Awu siyettiyabaa eriyabadan qoppoppa; ubba qassi A sakkiyabay ayfiyan beettiyaba gidana xayikko.—Leemiso 11:2.
Loꞌꞌobaa haasaya. Neeni woyganaakko erenna wodiyan, aynne haasayennan aggiyogaappe ne laggiya hanotaa ne akeekiyogaa bessiya amaridabaa haasayiyogee A minttettana danddayees. Neeyyo gaanabay xayikko, wozanappe hagaadan gaana danddayasa: “Ta woyganaakko erikke, shin nebay tana qarettees.” Qassi hagaadan mulekka gaana koshshenna: “Hanotay ya iiti iiti bana danddayees” woykko “Neegaappekka iitay deꞌees.”
Ne laggiya sahuwabaa loytta eranawu pilggiyogan assi qoppiyogaa bessana danddayasa. A sakkiyabaa neeni akeekanawu baxetiyogaa ne laggee nashshana danddayees; qassi A minttettiyabaa haasayana danddayasa. (Leemiso 18:13) Shin, I koyennan zoroppa.
Maaddiyabaa ootta. Waata maaddanaakko eriyabadan qoppiyogaappe, ne ay maaddana danddayiyakko oychcha. Shin I nena metanawu koyenna gishshawu, maadoy koshshenna gaana danddayiyogaa hassaya. Hegaadaana gidikko, keettaa geeshshiyogan, koshshiyabaa shammiyogan, woy harabata oottiyogan maaddanawu oychcha.—Galaatiya 6:2.
Hidootaa qanxxoppa. Ne laggee sahettiyo wode, issi issitoo ne maaduwa ixxana woy nenaara haasayanawu koyennan aggana danddayees. Danddayanchchanne hanotaa akeekiyagaa gida. Awu koshshiyaban ubbatoo maadda.—Leemiso 18:24.
Guuggiyaa Sahuwan Waayettiyaageeta Waata Maaddana Danddayay
‘Minttetta.’—1 TASALONQQE 5:14.
Ne laggee unꞌꞌettana woy bana pattennabadan xeellana danddayees. Neeni woyganaakko erana xayikkonne awu qoppiyoogaa I eranaadan oottiyoogan, A minttettana danddayaasa.
“Laggee mule wodekka siiqees.”—LEEMISO 17:17.
Koshshiyaaban maadda. Neeni A waata maaddana danddayiyaakko eriyaabadan qoppiyoogaappe ay oottanaakko oychcha. Ne laggee ba koyiyoobaa qonccissanawu metootikko, issippe hemettiyoogaa mala intte issippe oottana danddayiyoobata qoppanawu mala. Woy suuqiyaappe shammiyoobata shammiyoogan, geeshshiyoogan, woykko hara amaridabata oottiyoogan maaddana danddayaasa.—Galaatiya 6:2.
‘Danddaya.’—1 TASALONQQE 5:14.
Ne laggee issi issitoo haasayanawu koyennan aggana danddayees. Ne laggee haasayanawu koyiyo wode, neeni ufayttada siyanawu koyiyoogaa I eranaadan ootta. Ne laggee sahettiyo gishshawu, nena azzanttiyaabaa haasayana woy oottana danddayees. I nenaara oottanawu halchchidobaa oottennan aggana woy demmoban dereqqoban yiillotana danddayees. Koshshiyaaban A maaddiyo wode danddayanchchanne A hanotaa akeekiya ura gida.—Leemiso 18:24.
Ayyaanaaban Alꞌꞌobaa
Meto Wodiyan Yihooway Nena Maaddana
Nuuni oottana koshshiyabaa. Haratuppe haakkennan agganawu baaxeta. Nuuni haratuppe haakkiyo wode nubaanne nuna gakkiya metuwa xalla qoppana danddayoos. Hegaappe denddidaagan nuuni loꞌꞌobaa kuuyennan aggana danddayoos. (Lee. 18:1) Azzanttiyabay nuna gakkiyo wode, nurkka takkiyo wodee nuussi keehi koshshiyogee tuma. Shin nuuni nurkka adussa wodiya takkikko, Yihooway goꞌettiyo asatu maaduwa sheneho gaana danddayoos. Meto wodiyan yaatiyogee keehi deexxiyaba gidikkokka so asaappe, laggetuppenne cimatuppe maaduwa ekka. Yihooway nena maaddanawu eta goꞌettiyogaa akeeka.—Lee. 17:17; Isi. 32:1, 2.
Ne Ammaniyobaa Qonccissiyogaa
Ootti-besuwa. ijwfq huuphe yohuwa 30
Goynuwawu Masqqaliya Intte Goꞌettennay Aybissee?
Daro asay masqqaliyaa Kiristtaanetu malaata giidi qoppees. Nuuni Yihoowa Markkati Kiristtaane gidikkokka, nu goynuwawu masqqaliyaa goꞌettokko. Aybissi?
Issi gaasoy, Yesuusi hayqqidoy masqqaliyan gidennan, sitti giida mittaana gidiyoogaa Geeshsha Maxaafay yootiyo gishshataassa. Harabay qassi, Kiristtaaneti ‘eeqassi goynniyoogaappe baqatanaadan’ Geeshsha Maxaafay minttidi zorees; hegee goynuwawu masqqaliyaa goꞌettiyoogaakka diggiyaaba.—1 Qoronttoosa 10:14; 1 Yohaannisa 5:21.
Yesuusi, “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagidi yootiis. (Yohaannisa 13:34, 35) Yesuusi yaagiyoogan, tumu Kiristtaaneta shaakkidi erissiyay, masqqaliyaa woy hara malaata gidennan, asay ba goꞌꞌaa agganaadan oottiya siiquwaa gidiyoogaa bessiis.
TAMME 23-29
XOOSSAA QAALAN DEꞌIYA ALꞌꞌOBAA LEEMISO 19
Intte Ishatussi Tumu Lagge Gidite
Nuuni Ubbatoo Issoy Issuwa Waati Mintti Siiqana Danddayiyoo?
16 Ne ishanttussinne michchonttussi deꞌiya iita eeshshan gidennan, eta loꞌꞌo eeshshan xeelaa wotta. Ane hagaa qoppa. Ishanttuuranne michchonttuura issippe kaaꞌaydda deꞌiyabadan qoppa. Neeni ufayssiya wodiya aattada wurssettan pootuwa denttadasa. Qassi koyro pootoy darin loꞌꞌenna gishshawu hara naaꞌꞌu pootota denttadasa. Haꞌꞌi neeyyo heezzu pootoy deꞌees. Shin hegeetuppe issuwan issi ishay noocu geennaagaa akeekadasa. Neeni he pootuwa waatuutee? Xayssaasa; ayssi giikko hara naaꞌꞌu poototun he ishaa gujjin, ubbaykka noocu goosona.
17 Nuuni kase pootota haꞌꞌiigaara geeddarssana danddayoos. Nuuni nu ishanttuuranne michchonttuura aattido daro wodeta hassayoos. Shin he wodetuppe issuwan issi ishay woy michchiya qohiyabaa haasayennan woy oottennan aggokkona. Nuuni hegaa waatana koshshii? Nuuni he poototuppe issuwa xayssiyogaadan hegaa doganawu baaxetana koshshees. (Lee. 19:11; Efi. 4:32) Nuuni nu mala Kiristtaaniyara aattido daro wodeta hassayidi he uri mooridobaa dogana danddayoos. Hegaa mala wodeta nuuni ubbatoo hassayanawunne xoqqu ootti xeellanawu koyoos.
Yihoowanne Harata Kaseegaappe Aaruwan Siiqa
10 Nuunikka nu ishanttanne michchontta maaddiyo ogiyaa koyoos. (Ibr. 13:16) Kasetiya huuphe yohuwan ibay odettido Aani hanotaa ane beꞌa. Wolqqaama gotee denddi simmin Aananne I azinay Yihoowa Markka gidida issi keettaa asaa oychchanawu biidi eta keettaa kaaray he gotiyan keehi qohettidoogaa akeekidosona. Hegaappe denddidaagan, he so asawu geeshsha maayoy baawa. Aana hagaadan gaasu: “Nuuni eta maayuwaa ekkidi meeccidi tokkosidinne dakkoyidi etawu immida. Hegaa oottiyoogee nuuyyo metennaba; shin yaatidoogan hanno gakkanawu nuuni etaara keehi loꞌꞌo lagge gidida.” Aananne I keettaaway ishanttanne michchontta siiqidoogee koshshiyaaban eta maaddanaadan denttettiis.—1 Yoh. 3:17, 18.
11 Nuuni kehanne harata siiqiyaageeta gidiyo wode, Yihoowa milatanawu nu baaxetiyoogaa eti akeekana danddayoosona. Qassi nuuni akeekiyoogaappekka aaruwan eti nu kehatettaa nashshana danddayoosona. Qommoora ibay odettido Keena O maaddidaageeta loytta hassayawusu. A hagaadan gaasu: “Tana haggaazuwaa ekki kiyida siiqiya michchontta ubbaa keehi galatays. Eti tana kaamiyan efiidi qumaa shoobboosona, yaatidi tana so moyssoosona. Eti yaatanawu keehi baaxetana koshshidoogaa haꞌꞌi akeekays. Eti hegaa ufayttiiddi oottidosona.” Nuuni oottidobawu ubba asay galatennaagee qoncce. Keena O maaddidaageetubaa hagaadan gaasu: “Eti tawu kehido kehatettaa ubbaa gishshawu kushiyaa zaaranawu koyays; shin eti ubbay deꞌiyoosaa taani erikke. SHin Yihooway kushiyaa zaarana danddayees; qassi I ta gishshaa yaatanaadan woossays.” Keena giidobay tuma. Nuuni haratussi kehiyo guuttabaakka Yihooway akeekees. I hegaa alꞌꞌo yarshshodaaninne qanxxana koshshiyo acodan xeellees.—Leemiso 19:17 nabbaba.
Aggenna Siiquwaa Issoy Issuwawu Ubbatoo Bessite
6 Kiitettida PHawuloosinne hara asay deꞌiyo markkabee meꞌꞌidoogaa yootiya taarikee kehatettaa bessiyaaba. Beetay sugin Maltta haruuruwaa dooni eti kiyidosona. Maltta asay markkabiyan manddariya asawu qaalaa gelidobi woy etaara kase dabbotidobi baynnaba gidikkonne, he haruuruwaa asati imatuwaa eta mokkiyoogan etawu kehatettaa bessidosona. (Oos. 28:2, 7) SHin Maltta asay aggenna siiquwaa bessiis gaana danddayiyoo? CHii, ayssi giikko, eti giigettennan mokkidosona, qassi maadoy koshshiyo asaa maaddanawu koyidosona.
7 Mentto 6n beꞌidoogaadan kehatettay aggenna siiquwaappe dummatees. Dummatettaa eranawu, Xoossaa asay bessido aggenna siiquwaa xannaꞌana danddayoos. Leemisuwawu, Daawita hanotaa beꞌa. Yonaataana aaway Daawita woranawu koyikkonne Daawiti ba mata laggiyaa Yonaataanawu aggenna siiquwaa bessiis. Yonaataani hayqqin daro layttay aadhdhi simminkka, Daawiti Yonaataana naꞌaa Mafibosheetawu aggenna siiquwaa bessiyoogaa aggibeenna. Daawiti hegaadan oottidoy aybissee? I Yonaataana keehi siiqiyo gishshataassa. Hegee kehatettaanne aggenna siiquwaa giddon deꞌiya dummatettaa bessees.—1 Sam. 20:9, 14, 15; 2 Sam. 4:4; 8:15; 9:1, 6, 7.
Ayyaanaaban Alꞌꞌobaa
g20 3 4 ¶6-8
Tumaa Shaakkada Era
Ha xiqisiyaappe nuuni ay tamaariyoo? Nuuni tuma gididabaa erennan iitabaa kuuyoos. Nuuni tuma gididabaa aggidi worddobaa ammanikko, haratu bolli balan pirddana danddayoos.
Hara Asaabaa Tumaa Eriyoogee Maaddiyoy Aybissee?
Nuuni asaabaa tuma gididabaa loytti eriyo wode, harati etabaa yootana danddayiyo worddobaa ammanokko. Qassi issi citaa xeelliyaagan asay yootidobay tumubaa gidennan, bala gidiyoogaa nuuni akeekiyo wode, hara asaa xeelliyaagan nuuni siyidobaa eesuwan ammanokko.
Neeni Oottanabaa
• Issi citan deꞌiya asay iita gidiyoogaa asay yootana danddayees. SHin he citan deꞌiya darotussi iita eeshshay baynnaagaa hassaya.
• Issi citan deꞌiya asaa xeelliyaagan neeni wurssa erennabay deꞌana danddayiyoogaa hassaya.
• Ammanettiyaasappe tuma gididabaa eranawu mala.
Haasayaa
lmd gujo qofaa A, qofaa 10
Xoossawu sunttay deꞌees.—Maz. 83:18, NW; Erm. 10:10, NW.
TAMME 30–ISIINE 6
XOOSSAA QAALAN DEꞌIYA ALꞌꞌOBAA LEEMISO 20
Aqo Oyqqanawu Qoppidi Wodiya Aattanawu Keehi Maaddiyabata
Aqo Oyqqanawu Qoppada Issippe Aattiyo Wode Yihoowa Bonchchissa
3 Aqo oyqqanawu qoppidi issippe wodiya aattiyogee ufayssiyaba gidikkokka, hegee eti aqo oyqqanaadan oottana danddayiyo gishshawu keehi koshshiyaba. Aqo laggeti deꞌuwan deꞌido wode ubban issoy issuwa siiqanawunne bonchchanawu bantta bullachchaa gallassi Yihoowa sinttan qaalaa geloosona. Nuuni qaalaa geliyobay ayba gidikkokka, hegaabaa kasetidi loytti qoppana koshshees. (Leemiso 20:25 nabbaba.) Aqo oyqqanawu qaalaa geliyogawukka hegee hanees. Aqo oyqqanawu qoppidi wodiya aattiyogee issoy issuwa eranawunne loꞌꞌobaa kuuyanawu maaddees. Kuuyiyobay aqo oyqqanaagaa woy agganaagaa gidana danddayees. Eti shaahettikko, issippe aattido wodee hada attiis giyogaa gidenna. Hegee eti issoy issuwara aqo oyqqana woy aggana koshshiyakko eranaadan maaddiis giyogaa.
4 Aqo oyqqanawu qoppidi wodiya aattiyogaa bessiyagaadan xeelliyogee keehi koshshiyoy aybissee? Aqo oyqqibeennaageeti bessiyagaadan qoppikko, ekkanawu woy gelanawu qoppennan issi uraara wodiya aattokkona. Shin bessiyagaadan qoppana koshshiyay aqo oyqqibeennaageetu xalaala gidokkona. Nuuni ubbay bessiyagaadan qoppana koshshees. Leemisuwawu, aqo oyqqibeennaageeti aqo oyqqanawu qoppidi issippe wodiya aattikko, amarida asay eti aqo oyqqana koshshiyabadan qoppees. Hegaadan qoppiyogee aqo oyqqibeenna Kiristtaaneta waati qohii? Amarkkan deꞌiya aqo oyqqabeenna Meleeso giyo michchiya hagaadan gaasu: “Issi ishaynne michchiya aqo oyqqanawu qoppidi wodiya aattikko issi issi Yihoowa Markkati eti aqo oyqqana koshshiyabadan qoppoosona. Hegaa gaasuwan amaridaageeti issoy issuwawu loꞌꞌo aqo lagge gidana xayikkonne, aqo oyqqanawu qoppidi wodiya aattiyogaa aggokkona. Harati qassi aqo oyqqanawu qoppidi issippe wodiya aattokkona. Hegee eti keehi unꞌꞌettanaadan oottana danddayees.”
Loꞌꞌo Aqo Lagge Waata Demmana Danddayay?
8 Neeni issi uraa siiqiyogaa awu yootennan abaa waata erana danddayay? Galchchaa shiiqotun woy issippe wodiya aattiyosan he uri ayyaanaaban, eeshshaaninne kandduwan ay malakko akeekana danddayaasa. A laggeti oonee, qassi I haasayanawu dosiyobay aybee? (Luq. 6:45) A halchchoy neegaara issi malee? A loytti eriya A galchchaa cimata woy hara kayma Kiristtaaneta abaa oychchana danddayaasa. (Lee. 20:18) Ayyo ay mala sunttaynne eeshshay deꞌiyakko oychchana danddayaasa. (Uru. 2:11) Neeni abaa eranawu baaxetiyo wode A yeellayennaadan naagetta. A qofaa bonchcha; qassi abaa ubbabaa eranawu baaxetoppa.
Aqo Oyqqanawu Qoppada Issippe Aattiyo Wode Yihoowa Bonchchissa
7 Neeni issi uraa waata loytta erana danddayay? Neeni oyshaa oychchiyogaaninne I yootiyobaa ezggiyogan he uraa loytta erana danddayaasa. Intte naaꞌꞌaykka intteyyo tumuppe siyettiyabaa haasayana koshshees. (Lee. 20:5; Yaaq. 1:19) Issippe haasayanawu metootennaadan maaddiyabata issippe oottana danddayeta; leemisuwawu issippe maana, asi dariyo heeran hemettananne sabbakana danddayeta. Qassi laggetuuranne so asaara issippe aattiyo wode issoy issuwabaa loytti erana danddayeta. Hegaa bollikka, dumma dumma hanotatuuninne dumma dumma asaara deꞌiyo wode I bessiyo eeshshaa eranawu issi issibaa oottanawu halchcha. Nezerlandden deꞌiya Aschiwini hegaadan oottanawu baaxetidoogaa beꞌa. I Alishiira aqo oyqqanawu qoppidi aattido wodiyabaa hagaadan giis: “Nuuni issoy issuwa eranaadan maaddiya oosota koyida. Hegeeti darotoo oottanawu metennabata; leemisuwawu, qumaa issippe kattoos woy harabata issippe oottoos. Yaatiyo wode issoy issuwawu deꞌiya shugonne mino miyyeta akeekida.”
8 Ayyaanaabaa xannaꞌiyogankka loytti erettana danddayeta. Intte aqo oyqqikko, intte aqo deꞌuwan Xoossaa kaseyanawu so asaa goynuwawu wodiya bazzana koshshees. (Era. 4:12) Hegaa gishshawu, intte aqo oyqqanawu qoppidi aattiyo ha wodiyan issippe xannaꞌanawu wodiya bazzana danddayeta. Aqo oyqqanawu qoppidi wodiya issippe aattiyageeti so asa gidiichchibeennaageenne ishay michcheeyyo huuphe gidiichchibeennaagee qoncce. Gidikkonne, ubbatoo issippe xannaꞌiyogan intte ayyaanaaban ay malakko erana danddayeta. Amarkkan deꞌiya Maksanne Layso giyo aqo laggeti harabankka goꞌettidosona. I hagaadan giis: “Nuuni aqo oyqqanawu qoppidi issippe wodiya aattiyogaa doommido heeran, hegaabaa, aqo deꞌuwabaanne so asaa deꞌuwabaa yootiya xuufeta xannaꞌiyogaa doommida. Nuuni he xuufeta xannaꞌido gishshawu haasayiyogaa doommanawu deexxiya keehi koshshiya yohota haasayana danddayida.”
Ayyaanaaban Alꞌꞌobaa
Yelaga Naatoo Xammaqettanawu Giigettidetii?
4 Gastta asa xallay woy layttay hagaa keena gidiyo asa xallay xammaqettana bessees giidi Geeshsha Maxaafay yootenna. Leemiso 20:11, “Na7i geeshshanne suure gidiyoogee i oottiyo oosuwan erettees” yaagees. Yelaga naꞌikka suurebaa oottanawu, qassi bana Medhidaagawu ba huuphiyaa geppiya urappe koyettiyaabay aybakko akeekanawu danddayees. Hegaa gishshawu, wozannaama gididanne ba huuphiyaa Yihoowawu geppida naꞌi xammaqettiyoogee bessiyaaba; qassi hegee keehippe koshshiyaaba.—Lee. 20:7.
5 Issi uri wozannaama gidiyoogee aybin erettii? Dicciyoogaa xallay wozannaama gidiyoogaa bessenna. Wozannaama uri ba akeekaa abbiyaa loohissiyoogan ‘iitaa kehaa shaakkida asa’ gidiyoogaa Geeshsha Maxaafay yootees. (Ibr. 5:14) Hegaa gishshawu, wozannaama uri Yihoowa sinttan likke gididabay aybakko erees; qassi ubbatoo hegaadan oottanawu ba wozanan qofaa qachees. Yaatiyo gishshawu, he uri iitabaa oottanaadan issibi a denttettenna; woy ubbatoo asi denttettin loꞌꞌobaa oottenna. Xammaqettiya yelaga naꞌi a yelidaageeti woy hara gastta asi beꞌenna wodekka Xoossay kessido maaraa naagana giidi qoppiyoogee bessiyaaba.—Piliphphisiyuusa 2:12ra gatta xeella.
Ne Ammaniyobaa Qonccissiyogaa
Ootti-besuwa. ijwbq huuphe yohuwa 159—Cuccumaa: Mehee Doꞌay Saluwa Bii?
Geeshsha Maxaafay yootiyobaa
Saꞌan deꞌiya mereta ubbaappe, amarida asatu xallay saluwa baanaagaa Geeshsha Maxaafay tamaarissees. (Ajjuutaa 14:1, 3) Eti yan Yesuusaara kawotanne kahineta gididi haaranawu boosona. (Luqaasa 22:28-30; Ajjuutaa 5:9, 10) Asaappe keehi dariya baggay gannate saꞌan deꞌanawu hayquwappe denddana.—Mazamure 37:11, 29.
So meheti saluwa biyogaa xeelliyagan Geeshsha Maxaafay mule yootenna; qassi hegawu gaasoy deꞌees. Mehee doꞌay saluwa baanawu koshshiya gidata kunttana danddayenna. (Ibraawe 3:1) He gidata kunttanawu eraa demmana, ammanuwa bessananne Xoossaa higgeta azazettana koshshees. (Maatiyosa 19:17; Yohaannisa 3:16; 17:3) Merinawu deꞌanaadan merettiday asaa xalaala.—Doomettaabaa 2:16, 17; 3:22, 23.
Saꞌan deꞌiya meretati saluwa baanawu hayquwappe denddana bessees. (1 Qoronttoosa 15:42) Geeshsha Maxaafay hayquwappe denddida asatubaa darosan yootees. (1 Kawotu 17:17-24; 2 Kawotu 4:32-37; 13:20, 21; Luqaasa 7:11-15; 8:41, 42, 49-56; Yohaannisa 11:38-44; Oosuwa 9:36-42; 20:7-12) Shin, mehee doꞌay denddidoogaa yootenna.
Mehiyawu doꞌawu shemppoy deꞌii?
Shemppoy hayqqana danddayii?
Mehee doꞌay nagaraa oottii?
Mehiyawu doꞌawu meqettaa iitiyogee bessiyabee?
Mehiyawu doꞌawu shemppoy deꞌii?
Chii. Geeshsha Maxaafay mehee doꞌaynne asay shemppo gidiyogaa yootees. (Qoodaabaa 31:28) Koyro bitanee Addaamee merettido wode, awu shemppoy imettibeenna; shin I“paxa deꞌiya shemppo gidiis.” (Doomettaabaa 2:7, NW) ‘Biittaa baanaynne deꞌo shemppoy,’ naaꞌꞌubati issippe gayttin shemppoy merettiis.
Shemppoy hayqqana danddayii?
Ee, Geeshsha Maxaafay shemppoy hayqqana danddayiyogaa tamaarissees. (Wogaabaa 21:11; Hizqqeela 18:20) Hayqqiyo wode, mehee doꞌaykka asaykka biittawu simmees. (Eranchchaa 3:19, 20) Hara guussan, hegaappe guyyiyan eti deꞌokkona giyogaa.d
Mehee doꞌay nagaraa oottii?
Chii. Nagaraa oottiyogaa giyogee, Xoossaa higgetuura maayettennabaa qoppiyogaa woy oottiyogaa giyogaa. Issi meretay nagaraa oottanawu, kandduwara gayttida issibaa qoppidi kuuyana koshshees; shin mehee doꞌay hegaadan oottana danddayenna. Mehetinne doꞌati eti deꞌiyo guutta wodiyan issi issibaa qoppennan coo oottoosona. (2 Pheexiroosa 2:12) Eti nagaraa oottennaba gidikkonne, eta deꞌo layttay wurin hayqqoosona.
Mehiyawu doꞌawu meqettaa iitiyogee bessiyabee?
Chii. Asay mehiya doꞌaa haaranaadan Xoossay aawatettaa immiis; shin meqettaa iitidi haariyo maataa immibeenna. (Doomettaabaa 1:28; Mazamure 8:6-8) Xoossay mehiyawu doꞌawu, guutta kafotuura ubbawu qoppees. (Yohaannisa 4:11; Maatiyosa 10:29) Awu goynniyageeti mehiyawu doꞌawu qarettanaadan Xoossay azaziis.—Kessaabaa 23:12; Zaarettido Wogaabaa 25:4; Leemiso 12:10.
Mehiya doꞌaabaa yootiya xiqiseta
Doomettaabaa 1:28: “Xoossai [koyro asata] hagaadan yaagidi anjjiis; ‘Yelettite; corattite; ha sa7aa kumitenne haarite; abbaa moliyaa, saluwaa kafuwaanne biittaa bolli woxxi qaaxxiya, paxa de7iya mereta ubbaa haarite.’”
Birshshettaa: Xoossay mehiya doꞌaa haaranaadan asawu maataa immiis.
Qoodaabaa 31:28: “Olettida olanchchata gakkida shaahuwaappe, asa gidin, miizza gidin, hareta, dorssata woikko deeshshata gidin, ichchashu xeetaappe [issi shemppuwa] . . . , giiraa giirite.”
Birshshettaa: Mehee doꞌaynne asay shemppo.
Leemiso 12:10: “Xillo asi ba mehiyaassi qarettees.”
Birshshettaa: Loꞌꞌo asi gawaraanne kanaa gujjin, ubba mehiyawukka qarettees.
Maatiyosa 10:29: “Woni naaꞌꞌu qeeri kafoti issi santtimiyan bayzettokkonaayye? Shin intte Aaway erennan etappe issoynne saꞌan kunddenna.”
Birshshettaa: Guutta kafota gujjin mehiya doꞌaa Xoossay erees; qassi etawu qoppees.
[Tohossa qofata]
a Yihoowa giyogee Xoossawu buzo suntta. (Mazamure 83:18) “Yihooway Oonee?” giya huuphe yohuwa xeella.
b Daro Geeshsha Maxaafaa birshshettati Xoossaa sunttaa “GODAA” giyagan laammidosona. Hegee Geeshsha Maxaafaa nabbabiya asay akeekanawu metootanaadan oottidogaa beꞌanawu ha kaalli kaalli kiyiya huuphe yohuwan, “Isiyaasa 42:8—‘Taani GODAA’” giyagaa xeella.
c “Mata Dabbotettaa Medhdhidosona” giya huuphe yohuwa xeella.
d Hegaabaa gujjada eranawu, Merinawu Ufayttada Deꞌa! giyo maxaafaa shemppo 29 xeella.