Eray?

Geeshsha Maxaafay issi mala qofaa zaari zaaridi yootiyoy aybissee?

GEESHSHA MAXAAFAA xaafidaageeti issi mala qofaa issi issitoo zaari zaaridi xaafidosona. Eti hegaadan xaafanaadan oottida heezzu gaasota ane beꞌoos:

Xaafettido wodiya. Beni Israaꞌeelan Higgiya maxaafay ubba asawu baawa. Eti Higgee nabbabettishin darotoo siyiyoy Xoossaa dunkkaaniyaninne Xoossaa garuwan issippe shiiqiyo wodiyana. (Zaa. 31:10-12) Eti keehi daro asaara adussa saatiyawu eqqidi siyiyo wode eta qofay shaahettennan aggenna. (Nah. 8:2, 3, 7) Hegaa mala wodetun waanna qofaa zaari zaaridi yootiyogee eti xiqiseta metootennan hassayanaadaaninne oosuwan peeshshanaadan maaddees. Amarida qaalata zaari zaaridi yootiyogee Yihooway etayyo immido higgeta eti loytti hassayanaadan maaddennan aggenna.—Wog. 18:4-22; Zaa. 5:1.

Xaafettido ogiya. Geeshsha Maxaafan daro mazamureti deꞌoosona; leemisuwawu, Mazamure maxaafaa, Siiquwaa Sabaa maxaafaanne Ermmaasa Zilaassaa maxaafaa. Issi issitoo mazamuretun azmaachchee deꞌees; hegee mazamuriya waanna qofaa qonccissiyo gishshawu ezggiyageeti he qofaa hassayanaadan maaddees. Leemisuwawu, Mazamure 115:9-11n deꞌiya qofaa akeeka: “Inttenoo, Israa7eela asatoo, GODAN ammanettite! I inttena maaddiyaagaanne intte gonddalliyaa. Inttenoo, Aaroona keettaa asatoo, GODAN ammanettite! I inttena maaddiyaagaanne intte gonddalliyaa. Inttenoo, GODAASSI yayyiyaageetoo, GODAN ammanettite! I inttena maaddiyaagaanne intte gonddalliyaa.” Yexxiyageeti ha qofaa zaari zaaridi yexxiyogee ha alꞌꞌo qofaa hassayanaadan maaddennan waayi aggana.

Xaafettido gaasuwa. Geeshsha Maxaafaa xaafidaageeti keehi koshshiya qofata issi issitoo zaari zaaridi xaafidosona. Leemisuwawu, Yihooway Israaꞌeelati suuttaa meennaadan azazido wode, Muuseyyo hegaa gaasuwa zaari zaaridi yootiis. Xoossay asho maayida ubbaa deꞌoy suuttaa giddon deꞌiyogaa qonccissanawu koyiis; hegaa giyogee suuttay deꞌo giyogaa. (Wog. 17:11, 14) Guyyeppe, Yerusalaamen deꞌiya kiitettidaageetinne cimati Kiristtaaneti Xoossaa ufayssanawu naagettana koshshiyobaa yootiyo wode, suuttaappe haakkanaadan zaarettidi yootidosona.—Oos. 15:20, 29.

Geeshsha Maxaafay issi mala qofaa zaari zaaridi yootees; shin hegee Yihooway nuuni Geeshsha Maxaafaa qofaa zaari zaaridi yootanaadan koyees giyogaa gidenna. Leemisuwawu, Yesuusi hagaadan giis: “Intte woossiyo wode, . . . issi malabaa darotoo zaarettoppite.” (Mat. 6:7) Guyyeppe, I nuuni woossana koshshiyo issi issibata yootiis. (Mat. 6:9-13) Yaaniyo gishshawu, nuuni woossiyo wode issi mala qaalata zaarettana xayikkonne, issi mala qofata zaari zaaridi woossana danddayoos.—Mat. 7:7-11.

Geeshsha Maxaafay amarida qaalatanne qofata zaari zaaridi yootiyoy hegaassa. Hegee nu Gita Asttamaaree maaddiyabaa nuna tamaarissiyo daro ogetuppe issuwa.—Isi. 48:17, 18.